Galatas

1 Ñuqa Pablom apostol* kani, apostol kanaypaqqa manam runachu kamachiwarqa nitaq runachu churawarqa, aswanqa Jesucristom+ hinaspa wañuqkunapa kasqanmanta payta kawsarichiq Dios taytam.+ 2 Ñuqawan kuska kaq lliw iñiqmasinchikkunapiwanmi Galacia lawpi huñunakuq iñiqkunaman qillqamuykichik:

3 Qamkunapaqyá kachun taytanchik Diospa hinaspa señor Jesucristopa ancha kuyakuynin* chaynataq hawkayaynin. 4 Paymi Dios taytanchikpa+ munasqanman hina huchanchikrayku entregakurqa,+ chaynapi Diospa contranpi kaqkunamanta* librawananchikpaq,+ 5 Dios taytayá wiña-wiñaypaq hatunchasqa kachun. Chaynayá kachun*.

6 Llumpay hukmanyasqam kachkani qayasuqnikichik Diosmanta manapas unaypi karunchakusqaykichikmanta hinaspa sumaq willakuymanta huk rikchaq willakuytaña uyarisqaykichikmanta. Diosqa qayasurqankichik Cristopa* ancha kuyasqan* kasqaykichikraykum.+ 7 Ichaqa huk rikchaq sumaq willakuyqa manam kanchu, aswanqa hukkunam pantachiyta munasuchkankichik+ Cristomanta sumaq willakuyta yapa-yapaykuspa willakuspanku. 8 Chaynaqa ñakasqayá kachun sumaq willakuy willasqaykumanta huktaña willasuqnikichikqa, chay willasuqnikichik ñuqaykumanta hukniykuña utaq hanaq pachamanta hamuq angelña kaspanpas. 9 Ñawpaqta nisqaykuman hinam kaqmanta ñuqa nini: Chaskisqaykichik sumaq willakuymanta huk willakuyta pipas willasuqnikichikqa ñakasqayá kachun.

10 ¿Runakunawanchu icha Dioswanchu kuyachikuyta munachkani? Icha, ¿runakunapa allin qawasqan kaytachu munachkani? Runakunapa allin qawasqan kayta munaspayqa manam Cristopa sirvientenchu kayman. 11 Wawqi-panillaykuna kayta yachanaykichiktam munani: Qamkunaman kay sumaq willakuyta willasqayqa manam runamantachu,+ 12 chaytaqa manam runamantachu chaskirqani nitaq runachu yachachiwarqa, aswanqa Jesucristom chaytaqa willawarqa.

13 Qamkunaqa uyarirqankichikmi judiokunapa religionninpi+ kachkaspay ñawpaqpi imayna runa kasqayta. Ñuqaqa Diospi iñiqkunatam llumpayta ñakarichirqani, hinaspaymi chinkachiytapas munarqani,+ 14 ñuqaqa judiokunapa religionninpi kaspaymi nacionniypi wiñaymasiykunamantapas aswan mastaraq ñawparichkarqani, ñuqaqa tukuy sunquywanmi ñawpaq taytaykunapa costumbrenkunata ruwaq kani.+ 15 Dios munaptinmi ñuqataqa mamay wachakuwarqa, hinaptinmi kuyasqa kanaypaq hina mana kachkaptiypas Diosqa anchata kuyawaspan*+ qayawarqa, payqa allintam ruwarqa 16 huklaw nacionniyuq runakunaman sumaq willakuymanta willakunaypaq akllawaspan,+ chaynapi churinta paykuna riqsinankupaq. Chayta ruwanaypaq akllawaptinqa manam pi runapa yanapakuynintapas chayllaqa mañakurqanichu. 17 Manataqmi Jerusalen llaqtamanpas rirqanichu* ñuqamanta punta kaq apostolkunamanqa. Aswanqa Arabia lawmanmi rirqani, hinaspam Damasco llaqtaman kutirqani.+

18 Kimsa watamantañataqmi Jerusalenman+ rirqani Pedrota*+ watukunaypaq, paywanmi 15 punchaw qiparqani. 19 Ichaqa wakin apostolkunataqa manam rikurqanichu, rikurqaniqa señorninchikpa wawqin Santiagollatam.+ 20 Qamkunaman kaykuna qillqamusqaymantaqa Diospa qayllanpim mana iskayrayaspa nikichik mana llullakusqayta.

21 Chaymantam rirqani Siria hinaspa Cilicia lawkunaman.+ 22 Ichaqa Judea lawpi huñunakuq iñiqkunaqa manam kikiytapuniqa riqsiwarqakuchu, paykunaqa Cristowan hukllam karqaku. 23 Runakunam niqku: “Ñawpaq ñakarichiwaqninchik runam+ kunanqa sumaq willakuytaña willakuchkan, willakuchkanqa ñawpaqpi chinkachiy munasqan religionmantam”, nispa. Chaynata ñuqamanta rimasqallankutam paykunaqa uyarirqaku.+ 24 Chaymi ñuqarayku Diosta hatunchayta qallaykurqaku.