1 Samuel

15 Samuelmi Saulta nirqa: “Jehova Dios kamachiwaptinmi Israel runankunapa kamachiqnin kanaykipaq churarqayki.+ Kunanyá Jehova Diospa rimapayasusqaykita uyariy.+ 2 Angelkunata kamachiq Jehova Diosmi nisunki: ‘Egipto nacionmanta Israelpa mirayninkuna lluqsimuptinmi Amalec runakunaqa paykunawan pelearqaku, chaymi Amalec runakunaqa wañunanku.+ 3 Chaynaqa rispaykiyá Amalec runakunata wañuchimuy.+ Paykunataqa tukuy imantintam chinkachimunki.+ Amam paykunataqa llakipayankichu. Wañuchimunkimá+ qarikunatapas, warmikunatapas, warmakunatapas chaynataq wawachakunatapas. Wañuchimunkitaqmi torokunatapas, ovejakunatapas, camellokunatapas hinaspa asnokunatapas’”, nispa.+ 4 Chaymi Saulqa soldadonkunata Telaim llaqtaman huñurachispan yuparqa. Hinaptinmi Juda ayllumanta karqa 10.000 qarikuna, wakin ayllukunamantañataqmi karqa 200.000.+

5 Saulqa Amalec runakunapa yachasqan* allpaman chayaruspanmi soldadonkunata nirqa wayqupi pakakunankupaq. 6 Chaymantam Saulqa Ken runakunata nirqa:+ “Qamkunaqa Egiptomanta Israelpa mirayninkuna lluqsimuptinmi kuyakuywan* yanapaykurqankichik.+ Chayraykuyá Amalec runakunapa yachasqanmanta lluqsikuychik, chaynapi qamkunatapas ama wañurachinaykupaq”, nispa.+ Chaymi Ken runakunaqa Amalec runakunapa yachasqanmanta lluqsikurqaku. 7 Chaymantam Saulqa Amalec runakunata wañuchistin+ rirqa Havila lawmanta+ Egiptopa hichpanpi tarikuq Sur sutiyuq sitiokama.+ 8 Lliw Amalec runakunatam espadawan wañurachirqa, kamachiqninku Agagtam+ ichaqa presocharurqa. 9 Saulwan runankunaqa manam wañuchirqakuchu kamachiq Agagtaqa. Manataqmi wañuchirqakuchu allinnin ovejakunataqa, carnerokunataqa nitaq puqusqa vacakunataqa.+ Allinnin kapuqninkutaqa hapikuykurqakum. Chaykuna chinkachiytaqa manam munarqakuchu. Mana munasqanku kaqkunatam ichaqa lliwta chinkarachirqaku.

10 Hinaptinmi Jehova Diosqa Samuelta nirqa: 11 “Saulqa kamachisqaykunatam manaña kasukunchu, chayraykum llakikuni kamachiq kananpaq churasqaymanta”, nispa.+ Samuelpas llumpay llakisqa kaspanmi Jehova Diosta tukuy tuta mañakurqa.+ 12 Paqarintin tutapaytam Samuelqa Saulwan tupaq rirqa, hinaptinmi runakuna nirqaku: “Saulqa Carmelo llaqtaman rispanmi+ riqsisqa kananpaq rumita sayarachimun.+ Chaymantañataqmi Guilgal llaqtaman pasakun”, nispa. 13 Samuelwan tuparuptinkum Saulqa nirqa: “Jehova Diosyá bendecisunki. Ñuqaqa Jehova Diospa niwasqankunataqa ruwaruniñam”, nispa. 14 Samuelmi ichaqa nirqa: “Chaynaqa, ¿imanasqataq ovejakunapa hinaspa vacakunapa waqasqanta uyarichkani?”, nispa.+ 15 Saulñataqmi nirqa: “Chayqa Amalec runakunapam karqa. Soldadoykunam allinnin ovejakunata hinaspa vacakunata mana wañuchimurqakuchu, chaynapi Jehova Diospaq nakasqa kananpaq. Wakintaqa lliwtam wañuchimurqaniku”, nispa. 16 Samuelñataqmi Saulta nirqa: “¡Upallay! Jehova Diospa chisi tuta niwasqantam willanay kachkan”, nispa.+ Hinaptinmi Saulñataq nirqa: “Niwayá”, nispa.

17 Chaymi Samuelqa nirqa: “¿Yuyachkankichu Israel runakunata kamachinaykipaq Jehova Dios akllasuptiki+ mana valeqpaq hapikusqaykita?+ 18 Chaymantañataqmi Jehova Diosqa kamachisurqanki: ‘Huchasapa Amalec runakunata llapanta wañuchimuy’, nispa.+ 19 Chaynaqa, ¿imanasqataq Jehova Diospa kamachisusqaykitaqa mana kasukurqankichu? ¡Jehova Diosta mana kasukuspaykim Amalec runakunapa kapuqninkunata hapikuykurqanki!”, nispa.+

20 Saulñataqmi Samuelta nirqa: “Chaywanpas, ¡Jehova Diospa kamachiwasqantaqa kasukurqanim! Jehova Diosta kasukuspaymi Amalec runakunata wañuchimurqani, kamachiqninku Agagtañataqmi pusamurqani.+ 21 Ichaqa soldadokunam wañuchinankumantaqa allinnin ovejakunata hinaspa vacakunata hapikuykurqaku Jehova Diospaq Guilgal llaqtapi nakasqa kananpaq”, nispa.+

22 Chaynata niptinmi Samuelñataq nirqa: “¿Imataq Jehova Diospaqqa aswan allin? ¿Jehova Diospaq animalkunata nakaspa kañaychu,+ icha nisqanta kasukuychu? Diosta kasukuymi aswan allinqa animalkunata wañuchipuymantaqa,+ payta kasukuytaqmi aswan allinqa carnerokunapa wiranta+ kañapuymantapas. 23 Mana kasukuyqa+ layqa ruway hinam,+ hatuntukuypas taytacha-mamachata* yupaychay hinam. Qamqa Jehova Diospa kamachisusqaykitam mana kasukurqankichu,+ chaymi Diospas qipancharusunki manaña kamachiq kanaykipaq”, nispa.+

24 Hinaptinmi Saulqa Samuelta nirqa: “Huchallikurunim. Manam kasukurqanichu Jehova Diospa kamachiwasqanta nitaq qampa niwasqaykitapas. Runakunata manchakuspaymi paykunapa niwasqanta ruwarqani. 25 Ama hina kaspayá huchaymanta pampachaykuway, hinaspayá ñuqawan kutiy qunqurakuykuspa Jehova Diosta yupaychanaypaq”, nispa.+ 26 Samuelñataqmi Saulta nirqa: “Jehova Diosta mana kasukusqaykiraykum qanwanqa mana kutisaqchu. Jehova Diosmi qipancharusunki, manañam Israel runakunataqa kamachinkiñachu”, nispa.+ 27 Pasakunanpaq Samuel muyuriykuptinmi pachanpa* patanmanta Saulqa hapipakururqa, chaymi llikchikururqa. 28 Hinaptinmi Samuelqa nirqa: “Chaynata llikchichkaq hinam Jehova Diospas Israel runakunata kamachiq kasqaykimanta qarqurusunki. Hinaspam qanmanta aswan allin runataña kamachinanpaq churanqa.+ 29 Israelpa yupaychasqan Diosqa+ mana llullakuqmi,+ paypa imapas rimasqanqa manam yanqachu, manataqmi runakuna hinachu rimaspanqa qipaman kutin”, nispa.+

30 Saulñataqmi nirqa: “Huchallikuruptiypas ama hina kaspayá Israel runakunapa hinaspa punta apaqkunapa qayllanpiqa ama pinqaymanqa churawaychu. Ñuqawanyá kutiy, chaynapi qunqurakuykuspa Jehova Diosta yupaychanaypaq”, nispa.+ 31 Chaymi Samuelqa Saulwan kutirqa, hinaptinmi Saulqa qunqurakuykuspa Jehova Diosta yupaycharqa. 32 Samuelñataqmi runakunata nirqa: “Amalec runakunapa kamachiqnin Agagta pusamuwaychik”, nispan. Kamachiq Agagqa piensarqam: “Manam wañuchiwanqañachu”, nispa. Samuelman pusaruptinkum ichaqa manchakuspan rirqa*. 33 Hinaptinmi Samuelqa Agagta nirqa: “Imaynam espadaykiwan wañuchispayki achka warmikunata mana wawayuqta saqirqanki, chaynam mamaykipas mana wawayuq qipanqa”, nispa. Chaynata nispanmi Samuelqa Jehova Diospa kamachisqanman hina espadawan Agagta kuchuparurqa, chayqa karqa Guilgal llaqtapim.+

34 Chaymantam Samuelqa Rama llaqtaman pasakurqa, Saulñataqmi Guibea llaqtapi wasinman kutikurqa. 35 Samuelqa manañam haykapipas Saultaqa rikurqañachu, chaywanpas Saulmantam anchata llakikurqa.+ Jehova Diospas llakisqam karqa Israel runakunata kamachiq kananpaq Saulta churasqanmanta.+