2 Corintios

7 Chaynaqa kuyasqallaykuna, kayna willakuykuna kachkaptinqa+ chuyanchakusunyá aychanchikta hinaspa yuyayninchikta* qanrachaq kaqkunamanta,+ chaynapi Diosta manchakuspa aswan-aswanraq chuya kananchikpaq.

2 Sunquykichiktayá kichaykuwayku,+ ñuqaykuqa manam pitapas mana allintaqa ruwarqanikuchu, manataqmi pitapas pantachirqanikuchu nitaqmi kikillaykupaq munaspaqa pitapas engañarqanikuchu.+ 3 Kaykunataqa nichkaykichik manam qamkunata tumpanaypaqchu. Ñawpaqpi nisqaypi hinapas qamkunaqa sunquykupim kachkankichik, qamkunawan kuskam wañusaqkupas utaq kawsasaqkupas. 4 Imam kaqtam qamkunata rimapayaykichik. Qamkunamantaqa anchatam alabakuni, sunquypas tiyaykunmi, tukuy ñakariykuna pasawasqanpipas ñuqaqa kusisqallañam kani.+

5 Macedonia+ lawman chayaruspaykuqa manam hawkachu karqaniku, hinallam tukuy imapi ñakarirqaniku, runakunam ñakarichiwanankupaq maskawarqaku, iñiqkuna ukupipas manchakuypim karqaniku. 6 Ichaqa Titopa hamusqanwanmi llakisqakunapa sunqunta tiyaykachiq Dios+ sunquykuta tiyaykachirqa, 7 manam hamusqallanwanchu, aswanqa Titopa sunquntapas tiyaykachisqaykichikwanmi, paymi willawarqaku ñuqawan tupaykuy munasqaykichikmanta, anchata llakikuwasqaykichikmanta hinaspa allinlla kanayta munasqaykichikmanta, chaymi ñuqaqa astawanraq kusikurqani.

8 Carta qillqamusqaywan qamkunata llakichispaypas+ kunanqa manam pesakunichu. Puntataqa pesakurqanim carta apachimusqaywan llakirikusqaykichikmanta yachaspay. 9 Kunanqa kusikunim, ichaqa manam llakisqa kasqallaykichikmantachu, aswanqa huchaykichikmanta wanakunaykichikpaq llakisqa kasqaykichik yanapasusqaykichikmantam. Qamkunapa chayna llakisqa kasqaykichikqa karqa Diospa munasqanman hinam, chaynapim qamkunaman nisqaykuqa allinnikichikpaq karqa. 10 Ñuqanchikpa allinninchikpaqmi Diospa munasqanman hina chayna llakisqa kayqa, huchanchikmanta wanakunapaqmi yanapawanchik, chaynapi salvasqa kanapaq,+ Diosta mana yupaychaq runakuna hina llakikuymi ichaqa wañuyman apakun. 11 Qamkunaqa Diospa munasqanman hinam llakisqa karqankichik, chaymi anchata kallpanchakurqankichik allin runaña kasqaykichikta riqsichikunaykichikpaq, mana allin ruwasqaykichikmanta pesakunaykichikpaq, Diosta manchakunaykichikpaq, huchaykichikmanta wanakunaykichikpaq, Diosta tukuy sunquykichikwan servinaykichikpaq hinaspa chay mana allin ruwayta allichanaykichikpaq.+ Tukuy chaykunatam allinta ruwarqankichik chay sasachakuyta allichanaykichikpaq*. 12 Qillqamuspayqa manam chay mana allin ruwaq runaraykuchu qillqamurqaykichik nitaq chay mana allinwan ñakariq runaraykuchu,+ aswanqa nisqaykuta kasukusqaykichik Diospa qayllanpi sutilla kananpaqmi. 13 Chayraykum sunquyku tiyaykurqa.

Sunquyku tiyaykuptinpas Titopa kusisqa kasqanwanmi astawanraq kusikurqaniku, paytaqa llapallaykichikmi sunqunta tiyaykachirqankichik. 14 Imatapas qamkunamanta alabakuspay Titoman willasqaymantaqa manam pinqakurqanichu, aswanqa qamkunamanta tukuy ima nisqaykuqa chiqapmi karqa, chiqaptaqmi qamkunamanta alabakuspay Titoman willakusqaypas. 15 Payqa mastaraqmi kuyasunkichik llapallaykichikpa kasukusqaykichikta yuyarispa,+ payqa yuyarinmi ancha respetowan chaskisqaykichikta. 16 Kusikunim qamkunapa tukuy ima ruwasqaykichikwan kallpanchasqa kasqaymanta.