2 Cronicas

25 Amasiasqa 25 watanpim kamachiyta qallaykurqa, payqa Jerusalen llaqtamantam 29 wata kamachirqa. Mamanmi karqa Jerusalen llaqtayuq Jeoadan.+ 2 Amasiasqa Jehova Diospa munasqanman hinam allin kaqkunata ruwarqa, ichaqa manam tukuy sunqunwanchu. 3 Lliw Juda nacionta munaychakuruspanmi Amasiasqa taytan wañuchiq runankunata wañurachirqa.+ 4 Ichaqa Jehova Diospa kamachisqanman hinam mana wañuchirqachu paykunapa churinkunataqa. Moisespa qillqasqan kamachikuypim nirqa: “Amam churinkunapa huchanmantaqa taytantaqa wañuchinkichikchu, amataqmi taytanpa huchanmantapas churinkunataqa wañuchinkichikchu. Sapakamam huchankumantaqa wañunanku”, nispa.+

5 Amasiasmi ayllunkuman hina Juda runakunatawan Benjamin ayllukunata huñurachirqa,+ churarqataqmi paykunapa kamachiqninkunatapas. Paykunam karqaku 100 runakunata hinaspa 1.000 runakunata kamachiqkuna. 20 watankumanta hanayman yupachiptinmi+ karqaku 300.000 allin peleaq soldadokuna. Paykunaqa lanzawan, harkachikunawan peleay yachaqkunam karqaku. 6 Chaymantapas 3.420 kilo* qullqiwanmi Israel nacionmanta 100.000 kallpasapa soldadokunata huñuchimurqa. 7 Hinaptinmi Diosmanta willakuq* Amasiasta nirqa: “Kamachiq Amasias, Jehova Diosqa manañam Israel naciontaqa+ nitaq Efrain ayllutapas yanapanchu. Chaynaqa amayá Israel soldadokunaqa qanwanqa richunchu. 8 Qamkunalla rispaykichikyá mana manchakuspa peleamuychik, manachayqa Diosmi chiqnisuqniki runakunapa makinman churaykusunki. Diosqa atiyniyuqmi yanapasunaykipaq+ utaq paykunapa makinman churaykusunaykipaqpas”, nispa. 9 Chaynata niptinmi Amasiasqa Diosmanta willakuqta nirqa: “Israel soldadokunamanmi 3.420 kilo qullqita quykuniña. Chayqa, ¿yanqachu kanqa?”, nispa. Diosmanta willakuqñataqmi nirqa: “Jehova Diosqa chaymantapas astawanraqmi kutichipusunki”, nispa.+ 10 Chaymi Amasiasqa Efrain lawmanta hamuq soldadokunata wasinkuman kutikunankupaq nirqa. Hinaptinmi Juda runakunapaq llumpayta piñakuspanku kutikurqaku.

11 Chaymantam Amasiasqa qarinchakuspan soldadonkunawan Kachi sutiyuq wayquman rirqa,+ chaypim 10.000 Seir runakunata wañurachirqa.+ 12 Hapirurqakutaqmi 10.000 runakunatapas, paykunatam pusaspanku qaqaman wischuykamurqaku hinaptinmi tullunkupas pakipakururqa. 13 Amasiaspa kutichisqan soldadokunañataqmi Juda nacionpa llaqtankunawan peleaq hamurqaku.+ Samariamanta+ qallaykuspam Bet-horon llaqtakama+ 3.000 runakunata wañurachirqaku, hinaspam tukuy imankuta apakurqaku.

14 Edom runakunata wañuchisqanmanta kutimuspanmi Amasiasqa apamurqa Seir runakunapa taytachankunata,+ hinaspam chayta yupaychaspa animalkunatapas kañapurqa. 15 Chaymi Jehova Diosqa Amasiaspaq llumpayta piñakururqa, hinaspam willakuqninta kamachirqa: “¿Imanasqataq chay runakunapa taytachankunata yupaychachkanki? Chay taytachankunaqa manam qampa makikimanta runankuna harkaytaqa atirqachu”, nispa nimunanpaq.+ 16 Manaraq rimayta tukuchkaptinmi Amasias nirqa: “¿Kamachiqpa rimapayaqnin kanaykipaqchu churarqaykiku?+ Upallay,+ ¿icha wañuytachu munanki?”, nispa. Willakuqñataqmi niykurqaraq: “Taytachakunata yupaychasqaykiraykum hinaspa mana uyariwasqaykiraykum Diosqa nirqaña wañunaykimanta”, nispa. Chaynata niykuspanmi upallarurqa.+

17 Amasiasqa yanapaqninkunawan rimaruspanmi Israel nacionta kamachiq Jehoasman willachimurqa: “Hamuyá peleananchikpaq”, nispa. Jehoasqa karqa Jehoacazpa churinmi, Jehoacazñataqmi karqa Jehupa churin.+ 18 Hinaptinmi kamachiq Jehoasqa kamachiq Amasiasman willachimurqa: “Libano lawpi kichkayuq quram cedro sachaman willachimurqa: ‘Warmi churikitayá qari churiywan casarachisun’, nispa. Ichaqa chay kichkayuq quratam purun animal saruparurqa. 19 Qanmi nirqanki ‘Edom runakunatam wañurachini’ nispa.+ Chaymi hatuntukuspayki alabasqa kayta munachkanki. Hawkallayá wasikipi kakuy, ¿imapaqtaq ñuqawan peleayta munanki qampas chaynataq Juda runakunapas llakipi tarikunaykichikpaq?”, nispa.

20 Chaywanpas Amasiasqa manam kasukurqachu,+ Diosmi munarqa chayna kananta. Chaynapi Edom runakunapa+ taytachankunata yupaychasqanrayku chiqniqnin runakunapa makinpi kananpaq.+ 21 Chaymi Israel nacionta kamachiq Jehoasqa Juda nacionta kamachiq Amasiaswan pelearqa. Pelearqaqa Juda nacionpi Bet-semes llaqtapim.+ 22 Juda runakunata Israel runakuna venceruptinmi wasinkuman llapallanku lluptikurqaku. 23 Israel nacionta kamachiq Jehoasmi Juda nacionta kamachiq Amasiasta Bet-semes llaqtapi hapirurqa. Amasiasqa karqa Jehoaspa churinmi, Jehoasñataqmi karqa Jehoacazpa* churin. Chaymantam Jerusalen llaqtaman rirqaku, chaypim Jehoasqa llaqtapa pirqanta 178 metrota* tuñirachirqa. Tuñirachirqaqa Efrain punkumanta+ Esquina sutiyuq punkukamam.+ 24 Jehoasqa apakurqam Diospa wasinpi chaynataq kamachiqpa wasinpi llapallan qurita, qullqita hinaspa tukuy imata.+ Chaykunamantaqa Obed-edonmi nanachikurqa. Chaymantapas Jehoasqa runakunatam presochasqata pusaspan Samaria llaqtaman kutikurqa.

25 Israel nacionta kamachiq Jehoas wañukusqanmantam Juda nacionta kamachiq Amasiasqa+ 15 watataraq kawsakurqa. Jehoasqa+ karqa Jehoacazpa churinmi, Amasiasñataqmi Jehoaspa churin.+ 26 Amasiaspa imayna kawsakusqanmantaqa Juda nacionta hinaspa Israel nacionta kamachiqkunamanta willakuq libropim qillqasqa kachkan. 27 Jehova Diosta Amasias qipancharusqanmantam Jerusalenpi yachaq* runakuna wañurachiyta munarqaku,+ hinaptinmi Amasiasqa Lakis llaqtaman ayqikurqa. Ichaqa wakin runakunam qatispanku Lakis llaqtapi wañurachirqaku. 28 Chaymantam Amasiastaqa caballowan apamuspanku ñawpaq abuelonkunapa pampakusqan Juda nacionpi pamparurqaku.