2 Cronicas

18 Jeosafatqa kapuqniyuq hinaspa ancha riqsisqam karqa,+ hinaspapas churintam Acabpa warmi churinwan casararachirqa.+ 2 Watakuna pasaytam Samaria llaqtata rirqa Acabta watukuq.+ Hinaptinmi Acabqa paypaqwan runankunapaq nakapurqa achka ovejankunata hinaspa toronkunata. Hinaspam hikutarqa Ramot-galaad llaqtata munaychakunanpaq.+ 3 Acabqa Jeosafattam nirqa: “¿Riysiwankimanchu Ramot-galaad llaqtapi runakunawan peleaq?”, nispa. Jeosafatñataqmi nirqa: “Arí, qanwanmi risaq. Rinqataqmi runaykunapas”, nispa.

4 Ichaqa Jeosafatmi Acabta nirqa: “Ama hina kaspayá puntataqa Jehova Diostaraq tapuykuy”, nispa.+ 5 Chaymi Acabqa 400 willakuq runakunata huñuruspan nirqa: “¿Riymankuchu Ramot-galaad llaqtapi runakunawan peleaq?”, nispa. Paykunañataqmi nirqaku: “Riychikyá kamachiqlláy, Diosmi makikiman churanqa”, nispa.

6 Chaymantam Jeosafatqa nirqa: “¿Manachu kaykaypi kan Jehova Diosmanta willakuq runa*?+ Paytapas tapusunyá”, nispa.+ 7 Acabñataqmi nirqa: “Jehova Diosta tapukunapaqqa kachkanraqmi huk runa,+ payqa Imlapa churin Micayam. Ichaqa ñuqamanta mana allinkunallata willakusqanraykum chiqnini”, nispa.+ Chaymi Jeosafatñataq nirqa: “Ama chaynataqa niychu”, nispa.

8 Chaymi Israel nacionta kamachiq Acabqa yanapaqninta qayaspan nirqa: “Kunallan pusamuy Imlapa churin Micayata”, nispa.+ 9 Kamachiq Acabwan Juda nacionta kamachiq Jeosafatqa Samaria llaqtaman yaykuna irapim kachkarqaku. Iskayninkum kamachinanku pachankuwan trononkupi tiyachkarqaku. Paykunapa ñawpaqninkupitaqmi Diosmanta willakuqkunapas ima pasananmanta willakuspanku kachkarqaku. 10 Chaypim Kenaanapa churin Sedequiasqa fierromanta waqrakunata ruwakuruspan nirqa: “Jehova Diosmi nin: ‘Kay waqrakunawanmi Siria runakunata chinkachinaykikama tuksipanki’”, nispa. 11 Wakin willakuqkunapas nirqakum: “Riyá kamachiqlláy, Jehova Diosmi makikiman churanqa Ramot-galaad llaqtataqa”, nispa.+

12 Qayamunanpaq riq runam Micayata nirqa: “Llapallan willakuqkunapa nisqankum kamachiqpa allinninpaq karqa.+ Ama hina kaspayá qampas paykunapa nisqankuta hina niy”, nispa.+ 13 Micayañataqmi nirqa: “Jehova Diospa sutinpim nini, Diospa niwasqallantam rimarisaq”, nispa.+ 14 Chaymantam Micaya riruptin kamachiq Acabqa nirqa: “Micaya, ¿riymankuchu Ramot-galaad llaqtapi runakunawan peleaq?”, nispa. Chaymi Micayapas nirqa: “Riychikyá, Diosmi makikichikman churanqa”, nispa. 15 Chaynata willaykuptinmi kamachiq Acabqa nirqa: “¿Hayka kutikamataq nisqayki Jehova Diospa sutinpi imam kaqta niwanaykipaq?”, nispa. 16 Chaymi Micayaqa nirqa: “Israel runakunatam urqupi rikuchkani mana michiqniyuq chiqisqa ovejakunata hina.+ Jehova Diosmi nin: ‘Manam michiqninku kanchu. Sapakamayá hawkalla wasinkuman kutikuchunku’”, nispa.

17 Chaymi Israel nacionta kamachiq Acabqa Jeosafatta nirqa: “¿Manachu nirqayki payqa ñuqamanta mana allinkunallata willakusqanta?”, nispa.+

18 Micayañataqmi nirqa: “Jehova Diospa nisqantayá uyariy. Jehova Diostam tiyananpi tiyachkaqta rikuruni.+ Paypa sapa law waqtanpiñataqmi llapallan angelkuna kachkasqa.+ 19 Paykunatam Jehova Dios nirqa: ‘¿Pitaq kamachiq Acabta pantarachimunman Ramot-galaad llaqtata rinanpaq, chaynapi wañuchisqa kananpaq?’, nispa. Huk angelmi nirqa hukta, huknin angelñataqmi hukta. 20 Chaymantam huk angel+ Jehova Diospa qayllanman asuykuspan nirqa: ‘Ñuqa pantarachimusaq’, nispa. Jehova Diosñataqmi nirqa: ‘¿Imaynatataq pantachimunki?’, nispa. 21 Hinaptinmi angelñataq nirqa: ‘Rispaymi kamachiqpa willakuqninkunata pantarachimusaq, hinaptinmi llullakunata rimanqaku’, nispa. Chaymi Diosñataq nirqa: ‘Arí, riruyá, atinkim pantachiytaqa’, nispa. 22 Jehova Diosqa ñam nirqaña wañunaykimantaqa. Chaywanpas Jehova Diospa angelninmi kay willakuqnikikunata rimachichkan llullakunata”, nispa.+

23 Micaya+ rimayta tukuruptinmi Kenaanapa churin Sedequiasqa+ asuykuspan laqichururqa,+ hinaspanmi nirqa: “¿Chaywanchu qamqa nichkanki Jehova Dios atiyninta qichuruwaspan qamnintakamaña rimasqanta?”, nispa.+ 24 Micayañataqmi nirqa: “Wasi kuchuman pakakunaykipaq yaykuspaykim chayna kasqantaqa yachanki”, nispa. 25 Hinaptinmi Israel nacionta kamachiq Acabqa nirqa: “Micayata pusaychik llaqtamanta nanachikuq Amonmanwan kamachiqpa churin Joasman. 26 Paykunatam ninkichik: ‘Kamachiq Acabmi kaynata nin: “Kay runata wichqaspaykichikyá+ quychik tantatawan aslla yakuta peleasqaymanta kutimunaykama”’”, nispa. 27 Micayañataqmi nirqa: “Sichu peleasqaykimanta hawkalla kutiramunki, hinaptinqa Jehova Dios mana rimapayawasqanmi yachakunqa”, nispa.+ Nirqaraqmi: “Kay nisqaytaqa llapallaykichikmi uyarichkankichik”, nispa.

28 Chaymantam Israel nacionta kamachiq Acabwan Judata kamachiq Jeosafatqa Ramot-galaad llaqtaman rirqaku.+ 29 Risqankupim Acabqa Jeosafatta nirqa: “Ñuqam huk pachawan pachakuruspay peleaq yaykusaq, qamñataqmi kamachinayki pachallaykiwan kanki”, nispa. Chaymi Israelta kamachiq Acabqa mana riqsichikunanpaq huk pachawan pachakuruspan peleaq yaykurqa. 30 Siriata kamachiqqa carretawan riq soldadokunapa kamachiqninkunatam nirqaña: “Amam mayqin soldadowanpas peleankichikchu, aswanqa Israelta kamachiqllawanmi”, nispa. 31 Carretawan peleaq soldadokunapa kamachiqninkunam Jeosafatta rikuruspanku nirqaku: “Paymi Israelpa kamachiqninqa”, nispa. Chaynata nispankum peleanankupaq qatirqaku, Jeosafatñataqmi qayakurqa yanapaykunankupaq,+ hinaptinmi Jehova Dios yanapaykurqa chiqniqnin runakunamanta karunchaykuspan. 32 Chay qatiqkunaqa cuentatam qukururqaku mana Israelpa kamachiqnin kasqanta, chaymi manaña qatirqakuchu.

33 Ichaqa huk runam llutanpi flechaspan Israel nacionta kamachiq Acabta hapirachirqa qasqu harkachikunanpa kakllunpi. Chaymi Acabqa carretan apaqta nirqa: “Flecham hapiruwan, carretata muyuchimuy kaymanta hurquwanaykipaq”, nispa.+ 34 Chay punchawqa llumpaytam pelearqaku. Acabtaqa inti waqtaykamam carretapi sayachirqaku Siria soldadokunaman qawachispanku. Chaymantam Acabqa inti siqaykuyta wañukurqa.+