Hebreos

6 Chaynaqa Cristomanta puntapi yachasqanchik yachachikuykunallawanraq+ manaña kasqanchikraykuyá yuyayniyuqña kasunchik,+ yapatawanqa amañayá chay yachachikuykunallataqa yachasunchikchu, amañayá huktawanqa yachasunchu mana valeq ruwasqanchikkunamanta wanakuymantaqa, Diospi iñiymantaqa, 2 bautismokunamanta yachachikuymantaqa, hukkunapa hawanman makita churaymantaqa,+ wañuqkuna kawsarimunanmantaqa+ hinaspa juzgaspan Diospa tantiasqankuna wiñaypaq kananmantaqa. 3 Dios munaptinqa yuyayniyuqmi kasunchik.

4 Huk kutipi achkiy chaskiqkuna,+ Diospa qusqanta* mana imallapaq chaskiqkuna, Diospa atiyninta* chaskiqkuna 5 chaynataq Diospa sumaq palabranta hinaspa hamuq tiempopi* allin kawsakuyña kaptin bendicionkunatapas* chaskiqkuna 6 Diospi iñisqankumanta karunchakuruptinkuqa+ manañam pipas atinmanñachu huchankumanta wanakunankupaq yanapaytaqa. Paykunaqa Diospa churintam yapamanta qirupi* warkuchkanmankupas hina pinqayman churachkanku.+ 7 Diospa bendecisqan allpaqa sapa kuti para chayaptinmi kawsaykunata wiñachispan tarpuqninkunata mikuchin, 8 kichkakunata hinaspa kichkayuq qurakunata* wiñachimuspanmi ichaqa chakraqa saqisqa, chaymantapas chay chakraqa ñakasqa kananpaqñam kachkan, chaymantañataqmi kañasqa kanqa.

9 Kuyasqay wawqi-panillaykuna, chaykunata rimachkaspapas aswan allin kasqaykichikmantaqa manam iskayrayanikuchu, manataqmi iskayrayanikuchu salvasqa kanaykichikpaq tukuy ima ruwasqaykichikmantapas. 10 Diosqa manam mana allin ruwaqchu paypaq llamkasqaykichikta qunqarunanpaqqa, manataqmi qunqanchu sutinta kuyasqaykichikrayku+ runankunata servisqaykichiktapas, kunanpas runankunataqa chaynatam servichkankichik. 11 Ñuqaykuqa munachkaniku qallariymantapacha allin llamkaq kasqaykichikman hina kunanpas kanaykichiktam, chaynapi imam suyasqaykichikta+ mana iskayrayaspa tukupaykama suyanaykichikpaq,+ 12 chayna kaspaqa manam qillachu kankichik,+ aswanqa Diospi iñisqankurayku hinaspa pacienciawan promesakuna chaskiqkunapa ruwasqanta hinam ruwankichik.

13 Abrahanman prometespanmi Diosqa paymanta aswan munayniyuq mana pipas kasqanrayku sutinpi juraspan nirqa.+ 14 Diosmi nirqa: “Tukuypim bendecisqayki, hinaspapas miraynikitam achkayachisaq”, nispa.+ 15 Chaynapim Abrahanqa pacienciawan suyaspan Diospa prometesqanta chaskirqa. 16 Runakunaqa paykunamanta aswan riqsisqa runakunapa sutinpim imatapas ruwanankupaq juranku, jurasqankum qawachin rimasqankuman hina ruwanankuta, chaymi manaña atipanakunkuchu.+ 17 Chaynallataqmi Dioswanpas karqa, payqa munarqa promesankuna chaskiqkunaqa+ munasqanman hina ruwananmanta mana qipaman kutisqanta yachanankutam*. Chaypaqmi sutinpiraq juraspan garantizarqa, 18 chaynapi haykam Diospi amparakuqkuna paypa promesanwan hinaspa sutinpi jurasqanwan allin kallpanchasqa kaspanchik suyasqanchikpi allinta hapipakunapaq, Diosqa promesa ruwasqanta hinaspa sutinpi jurasqanta mana cambiasqanraykum mana haykapipas llullakunchu.+ 19 Chay suyasqanchikqa+ ñuqanchikpaqmi yaqa boteta sayachiq llasaq fierro hina, mana imapa kuyurichinan hinaspa allin takyasqa kachkan chay suyasqanchikmi yanapawanchik Diospa wasinpi cortinapa qipanman yaykunapaq,+ 20 chaymanmi llapanchikmantapas puntata Jesus yaykurun ñanta allichapuwananchikpaq hinaspa kichapuwananchikpaq,+ payqa wiñaypaqmi Melquisedec hina sacerdotekunapa kamachiqnin rikurirun.+