2 Samuel

13 Absalonpam karqa kuyayllapaq Tamar sutiyuq panin.+ Davidpa huknin churin Amnonmi+ panin Tamarwan sunqunta suwarachikurqa. 2 Tamarqa qariwan manaraq puñuqmi karqa. Amnonqa manam ima ruwaytapas atirqachu. Chayraykum Amnonqa hukmanyasqallaña karqa. 3 Amnonpa amistadninmi karqa Jeonadab,+ payqa karqa Davidpa wawqin Simeapa churinmi.+ Jeonadabqa sakrillaña runam karqa. 4 Paymi Amnonta nirqa: “Qamqa kamachiq Davidpa churinmi kanki, ¿imanasqataq sapa achikyaqta hukmanyasqallaña kanki? ¿Manachu willaykuwankiman?”, nispa. Amnonñataqmi nirqa: “Wawqiy Absalonpa panin+ Tamartam kuyaruni”, nispa. 5 Hinaptinmi Jeonadabñataq nirqa: “Unquqtukuruspayki camaykiman usturuy. Taytayki watukamusuptikiñataqmi ninki: ‘Ama hina kaspayá paniy Tamarta niykamuy hamunanpaq. Hamuspayá unquqkunapaq mikuyta yanurapuwachun’”, nispa.

6 Chaymi Amnonqa unquqtukuruspan camanman ustururqa, hinaptinmi taytanqa qawaq rirqa. Chaymi Amnonqa taytanta nirqa. “Ama hina kaspayá, paniy Tamarta niykamuy hamunanpaq. Kaypiyá iskay tantata ruwarapuwachun”, nispa. 7 Hinaptinmi Davidqa Tamarman willachimurqa: “Turiki Amnonpa wasinta rispaykiyá imallatapas yanurapamuy”, nispa. 8 Tamarñataqmi turin Amnonpa wasinman chayaruspan camanpi tariykurqa. Tamarqa harinata chapuspanmi turinpa ñawpaqninpi tantata ruwapurqa. 9 Hinaspanmi chay ruwasqan tantata quptin Amnonñataq wischupakuspan nirqa: “¡Llapallankuyá kaymanta lluqsichunku!”, nispa. Chaymi llapallanku lluqsirqaku.

10 Amnonmi Tamarta nirqa: “Puñunaymanyá ruwasqayki tantata apamuway mikuchiwanaykipaq”, nispa. Chaymi Tamarqa ruwasqan tantata turinpa puñunanman aparqa. 11 Mikuchinanpaq asuykuptinmi hapiruspan nirqa: “Panilláy, hamuy puñukusunchik”, nispa. 12 Hinaptinmi Tamarñataq nirqa: “¡Amayá turilláy! Amayá pinqaymanqa churawaychu. Israel nacionpiqa manam kaytaqa ruwanachu.+ Amayá millakuypaq pinqaytaqa ruwaychu.+ 13 Ñuqaqa mayna pinqaypichá kayman. Qampas mana allin qawasqachá kawaq Israel runakuna ukupiqa. Kamachiq Davidwanyá rimay, manam payqa harkakunqachu qanwan casarakunaytaqa”, nispa. 14 Amnonqa manam kasukurqachu, aswanmi kallpasapa kasqanrayku abusaruspan Tamartaqa pinqayman churarurqa. 15 Chayta ruwaruspallanmi Tamartaqa chiqniyta qallaykurqa, kuyasqanmantapas astawanraqmi chiqnirurqa. Chaymi Tamarta nirqa: “¡Pasaway kaymanta!”, nispa. 16 Tamarñataqmi nirqa: “¡Amayá turilláy qarquwaychu! ¡Chayqa kanman kay ruwawasqaykimantapas astawanraqchiki!”, nispa. Amnonmi ichaqa mana uyariqpastukurqachu.

17 Hinaspanmi serviqnin musuta qayaykuspan nirqa: “Kaymanta qarquy kay warmita hinaspa punkuta sumaqta wichqay”, nispa. 18 Chaymi chay musuqa Tamarta hawaman qarquruspan punkuta sumaqta wichqarurqa. Tamarqa suma-sumaq pachayuqmi karqa. Chaynataqa pachakuqku qarita mana riqsiq kamachiqpa churinkunallam. 19 Chay suma-sumaq pachanta llikikuruspanmi Tamarqa umanman uchpata maqchikurqa,+ hinaspam umanta hapikuykuspan qaparispa waqastin pasakurqa.

20 Hinaptinmi turin Absalon+ nirqa: “¿Turiki Amnonchu kayta ruwaramusunki? Panilláy, amañayá willakuyñachu. Payqa turikim.+ Amañayá hukmanyaychu”, nispa. Chaymantam Tamarqa turin Absalonpa wasinpi yacharqa* piwanpas mana rimaspan. 21 Tukuy chayta yacharuspanmi kamachiq Davidqa piñakururqa.+ Amnonqa Davidpa piwi* churin hinaspa kuyasqanmi karqa, chaymi mana imatapas nirqachu. 22 Absalonñataqmi paninta pinqayman churasqanrayku chiqniyta qallaykurqa,+ chaymi Amnontaqa mana imatapas nirqachu.+

23 Iskay wata pasaruptinmi Absalonpa runankuna Baal-hazor lawpi ovejakunata ruturqaku, chayqa Efrain ayllupa hichpanpim karqa.+ Chaypi mikunankupaqmi Absalonqa kamachiqpa lliw churinkunata qayachirqa.+ 24 Absalonqa kamachiq Davidpata rispanmi nirqa: “Taytalláy, ovejaykunatam rutuchichkani. Chaymanyá hamuy runaykikunapiwan”, nispa. 25 Kamachiq Davidñataqmi nirqa: “Amayá churilláy, llapayku rispaykuqa sasachaykikumanmi”, nispa. Absalon hikutaptinpas Davidqa manam riyta munarqachu, chaywanpas bendeciykurqam. 26 Absalonñataqmi nirqa: “Mana qam hamuptikiqa, wawqiy Amnonyá hamuchun ama hina kaspa”, nispa.+ Davidñataqmi nirqa: “¿Imanasqataq pay hamunanta munanki?”, nispa. 27 Absalon hikutaptinmi Davidqa lliw churinkunata hinaspa Amnontapas nirqa rinankupaq.

28 Absalonmi runankunata kamachirqa: “Amnontam allinta qawankichik, vinota tomaspa kusisqallaña kachkaptinmi nisqaykichik: ‘¡Amnonta wañuchiychik!’, nispay. Chaynata niptiymi mana manchakuspa wañuchinkichik, chaytaqa ñuqam kamachichkaykichik. Kallpanchakuspaykichikyá qarinchakuychik”, nispa. 29 Chaymi Absalonpa runankunaqa kamachisqanman hina Amnonta wañurachirqaku. Hinaptinmi kamachiq Davidpa churinkunaqa mulankuman sillakuykuspanku lluptikurqaku. 30 Paykuna ñanllapiraq kachkaptinkum Davidman willaykurqaku: “Absalonmi llapallan churikikunata wañurachin, manam chullapas puchunchu”, nispa. 31 Chaymi kamachiq Davidqa hatarispa pachanta llikikurqa hinaspam pampapi chutarayarqa, llapallan runankunapas pachanku llikisqam waqtanpi sayarqaku.

32 Davidpa wawqin Simeapa+ churin Jeonadabmi+ ichaqa nirqa: “Kamachiqlláy, manam llapallan churikikunatachu wañurachinkuqa, aswanqa Amnonllatam+ Absalon kamachiptin.+ Payqa panin+ Tamarta Amnon abusarusqan punchawmantaraqmi wañurachiyta munarqa.+ 33 Kamachiqlláy, amayá llapallan churikikuna wañurusqantaqa piensaychu, Amnonllam wañurunqa”, nispa.

34 Absalonqa lluptikuspanmi ripukurqa.+ Chaymantam llaqta cuidaq runa rikururqa achka runakuna urqupa waqtanta hamuchkaqta. 35 Chaymi Jeonadabqa+ kamachiq Davidta nirqa: “Waqaya churikikunaqa kutimuchkanku. Ñuqaqa manam llullakurqaykichu”, nispa. 36 Rimayta tukuruptillanmi Davidpa churinkunaqa waqakustin chayaykamurqaku. Davidwan runankunapas llakikuymantam waqakurqaku. 37 Absalonñataqmi Guesur llaqtata kamachiq Talmaipa+ kasqanman ripukurqa, Talmaiqa Amiudpa churinmi karqa. Davidñataqmi churinpa wañukusqanmanta unay llakisqa karqa. 38 Guesur llaqtaman+ ripukuspanmi Absalonqa kimsa wata chaypi yacharqa.

39 Amnonpa wañukusqanmanta Davidpa sunqun tiyaruptinmi Absalonta watukuq riyta munarqa.