1 Samuel

14 Huk kutipim Saulpa churin Jonatanqa+ lanzantawan espadanta apaysiqnin runata nirqa: “Hakuchik wak chimpapi kaq Filistea soldadokunapa kasqanman”, nispa. Chaymanqa taytanpa mana yachasqallantam rirqa. 2 Taytan Saulqa yaqa 600 soldadonkunawanmi kachkarqa Guibea llaqtapa hichpanpi,+ Migron llaqtapi kaq granada sachapa sikinpi.+ 3 Saulwan kaq soldadokunaqa manam yacharqakuchu Jonatan pasakusqantaqa. Chay punchawkunapiqa Aiyam mandilwan*+ churasqa karqa. Aiyaqa karqa Aitubpa churinmi, Aitubqa+ karqa Icabodpa wawqinmi.+ Paykunapa taytanmi karqa Fineas,+ Fineasñataqmi karqa Eliypa churin.+ Eliyqa karqa Silo llaqtapi+ Jehova Diospa sacerdotenmi. 4 Jonatanqa Filistea runakunapa kasqan lawmanmi kichki ñanninta rirqa, chay risqanpa kaylawninpiqa hinaspa waklawninpiqa hatun ñawchi muqukunam karqa. Hukninpa sutinmi karqa Bozez, hukninpa sutinñataqmi karqa Sene. 5 Hanayninpi Bozez muqum karqa Mikmaspa chimpanpi, urayninpi Sene muquñataqmi karqa Gueba llaqtapa chimpanpi.+

6 Jonatanmi lanzantawan espadanta apaysiqnin runata nirqa: “Chimpasunchikyá qari kayninkupi mana señalasqa Filistea runakunapa kasqanman.+ Ichapas Jehova Dios yanapaykuwachwan. Jehova Diosqa achka runawanpas utaq aslla runawanpas yanapawachwanmi”, nispa.+ 7 Apaysiqnin runañataqmi nirqa: “Tantiasqaykiman hinayá kachun, mayninta riptikipas qatisqaykim”, nispa. 8 Chaymi Jonatan nirqa: “Paykunapa kasqanman chimparuspanchikqa amam pakakusunchu. 9 Sichu rikuruwaspanchik niwasun: ‘¡Chayllapi kaychik hamunaykukama!’, nispa. Hinaptinqa hinallapim sayasun, paykunapa kasqanmanqa amam qispisunchu. 10 Sichum niwasun: ‘¡Qispimuychik peleananchikpaq!’, nispa. Hinaptinqa qispisunmi. ‘Qispimuychik’ niwasqanchikwanmi yachasunchik Jehova Diosqa makinchikman paykunata churaykusqanta”, nispa.+

11 Chaymi Jonatanwan riqmasin runaqa Filistea runakunawan rikuykachikurqaku. Hinaptinmi Filistea runakunaqa nirqaku: “¡Qawaychik! Hebreo kastakunam machaykunapi pakakusqankumanta lluqsimuchkanku”, nispa.+ 12 Hinaspam Jonatantawan riqmasinta nirqaku: “¡Kaymanyá qispimuychik! ¡Peleaytam yachachisqaykichik!”, nispa.+ Chaynata niykuptinkum Jonatanqa riqmasinta nirqa: “Hakuchik, Jehova Diosmi Israel runakunapa makinman paykunata churanqa”, nispa.+ 13 Hinaspam Jonatanqa tawanpa qispirqa, lanzantawan espadanta apaqñataqmi qatirqa. Qispiruspanmi Jonatanqa Filistea runakunawan peleastin rirqa. Espadata apaqñataqmi wañupachistin Jonatanpa qipanta rirqa. 14 Chay kutipiqa Jonatanwan riqmasinqa manapas unaypim* yaqa 20 Filistea soldadokunata wañurachirqaku.

15 Chaymi Filistea soldadokunaqa llapallanku mancharikurqaku. Kimsaman rakinasqa lluqsiq soldadokunapas+ mancharikurqakum. Allpapas katkatataytam qallaykurqa, chaywanmi Diosqa Filistea soldadokunataqa llumpa-llumpayta mancharichirqa. 16 Benjamin ayllupa allpanpi kaq Guibea llaqtapim+ Saul churarqa llaqta cuidaq runakunata. Chay runakunam Filistea soldadokuna chaqwallapiña kasqankuta qawarqaku.+

17 Saulñataqmi paywan kaq runankunata nirqa: “Llapallanchik kasqanchikta yachanapaqyá yupamuychik”, nispa. Yuparuptinkum Jonatanwan yanapaqnin runaqa mana kasqachu. 18 Hinaptinmi Saulqa sacerdote Aiyata kamachirqa:+ “¡Diospa baulnintayá apamuy!”, nispa. Chay punchawkunapiqa Israel runakunapa makinpiñam Diospa baulninqa karqa. 19 Aiyawan Saul rimachkaptinmi Filistea soldadokunaqa astawanraq chaqwakurqaku. Hinaptinmi Saulqa Aiyata nirqa: “Saqiruyña, hinaña kachun”, nispa. 20 Chaymi Saulqa runankunata huñuruspan peleaq rirqa. Chayaruptinmi Filistea soldadokunaqa kikinkupura espadankuwan wañuchinakuchkasqaku. Llapankum muspaypi hina kachkasqaku. 21 Chaymantapas, Filistea runakunaman hukllawakuq Hebreo kastakunam hukllawakuykurqaku Saulpa hinaspa Jonatanpa runankunaman. 22 Efrain ayllupa urqunkunapi pakakuq Israel runakunapas+ Filistea runakunapa ayqikusqankutam yacharurqaku, chaymi paykunapas hamurqaku Filistea runakunata qatispanku wañuchimunankupaq. 23 Chaymi Israelpa mirayninkunaqa Filistea runakunata Bet-aven llaqtakama wañuchistin qatirqaku.+ Jehova Diosqa Israel runakunatamá yanaparqa.+

24 Chay punchawmi Israel runakunaqa pisipasqallaña karqaku. Chaynaqa karqaku runankunata Saul kaynata nisqanraykum: “¡Filistea runakunata wañuchinanchikkamaqa utaq inti siqaykunankamaqa amam pipas imatapas mikunqachu. Pipas mikuqqa ñakasqayá kachun!”, nispa. Saulpa nisqanta kasukusqankuraykum mana imallatapas mikurqakuchu.+

25 Chaymantam sachakunapa kasqanman chayaruptinku pampapi abejapa mielnin kakuchkasqa. 26 Chaypimá rikururqaku miel suturimuchkaqta. Chayta qawaspankupas Saulpa nisqanta kasukuspankum mayqanninkupas mana mallirqakuchu. 27 Imatapas mana mikunankupaq soldadokunata Saul kamachiptinqa Jonatanqa manam chaypichu karqa.+ Chaymi Jonatanqa hapisqan kaspiwan mielta tuksiykuspan malliykurqa, hinaptinmi kallpan kutiramurqa. 28 Huknin soldadoñataqmi willarqa: “Taytayki Saulmi niwarqaku: ‘Pipas kunan punchaw mikuqqa ñakasqam kanqa’, nispa.+ Chaymi pisipasqa kachkaniku”, nispa. 29 Jonatanñataqmi nirqa: “Taytayqa kamachisqanwanmi ñakarichiwachkanchik. Kayqaya malliykuspallay kallpayuq rikuriruni. 30 Filistea runakunapa saqisqanta runanchikkuna mikuptinkuqa+ aswan maynataraqya Filistea runakunataqa wañuchichwan karqa”, nispa.

31 Chay punchawmi Israelpa mirayninkunaqa Filistea runakunata wañuchistin qatirqaku Mikmas lawmanta Ayalon lawkama.+ Chaymi manaña kallpayuq karqaku. 32 Hinaspam Israel runakunaqa Filistea runakunapa saqisqanku ovejakunata, vacakunata hinaspa uña vacakunata nakaspanku yawa-yawarnintinta aychata mikururqaku.+ 33 Chaymi Saulta nirqaku: “¡Qaway! Runakunam aychata yawarnintinta mikuchkanku, chaywanmi Jehova Diosta mana kasukuspanku huchallikuchkanku”, nispa.+ Hinaptinmi Saulqa runakunata nirqa: “Qamkunaqa mana kasukuqmi kankichik. Utqayman hatun rumita tanqamuychik kayman”, nispa. 34 Saulqa nirqataqmi: “Runakunata nimuychik: ‘Apamuychik toroykichikta chaynataq ovejaykichikta, hinaspayá kay rumipa hawanpi nakaspaykichik mikuychik. Amayá Jehova Diosta mana kasukuspaqa yawarnintin aychataqa mikuychikchu’”, nispa.+ Chaymi chay tuta toronkuta pusaspanku nakarqaku. 35 Saulqa Jehova Diospaqmi altarta pirqapurqa.+ Chayqa Jehova Diospaq punta ruwapusqanmi karqa.

36 Chaymantam Saul nirqa: “Tutallan rispayá achikyanankama Filistea runakunata wañuchimusun hinaspa tukuy imankuta qichumusun. Llapallankutayá wañuchimusun”, nispa. Chaymi runankunañataq nirqaku: “Tantiasqaykiman hinayá kachun”, nispanku. Hinaptinmi Saulta sacerdote nirqa: “Diostayá tapusunchik”, nispa.+ 37 Chaymi Saulqa Diosta nirqa: “¿Risaqkuchu Filistea runakunata wañuchiq?+ ¿Israel runakunapa makinmanchu churanki?”, nispa. Diosmi ichaqa mana imallatapas nirqachu. 38 Chaymi Saulqa soldadokunapa kamachiqninkunata qayaspan nirqa: “Tapumuychik, hukkaqninmi kunan punchaw huchata ruwarun. 39 Chay hucha ruwaqmi wañunan churiy Jonatan kaspapas. Israel runakunata yanapaq Jehova Diospa sutinpim chaynataqa nini”, nispa. Chaynata niptinmi mana pipas rimarirqachu. 40 Chaymi Saulqa Israelpa lliw mirayninkunata nirqa: “Qamkunayá kaylawpi sayaychik, ñuqañataqyá churiy Jonatanwan waklawpi sayasaqku”, nispa. Paykunañataqmi nirqaku: “Nisqaykitam kasukusaqku”, nispa.

41 Hinaptinmi Saulqa Jehova Diosta nirqa: “Diosnillayku, Tumim nisqawanyá willawayku pi huchayuq kasqanta”, nispa.+ Hinaptinmi Saulwan Jonatanlla akllasqa karqaku. 42 Chaymi Saul nirqa: “Kunanñataqyá sorteaychik+ ñuqa huchayuq utaq churiy huchayuq kasqanta yachanapaq”, nispa. Chaywanmi yacharqaku Jonatan huchayuq kasqanta. 43 Chaymi Saulqa churin Jonatanta nirqa: “Willaykuwayá, ¿imatataq ruwarurqanki?”, nispa. Hinaptinmi Jonatanqa willakurqa: “Abejapa mielnillantam kay hapisqay kaspiwan malliykurqani.+ ¡Kaypim kachkani, wañunay kaptinqa wañusaqchiki!”, nispa.

44 Chaymi Jonatanta Saul nirqa: “Mana wañuptikiqa Diosyá ñuqata imatapas ruwawachun”, nispa.+ 45 Runakunañataqmi Saulta nirqaku: “Jonatan mana kaptinqa Israel runakunaqa hinallaraqchiki Filistea runakunapa makinpi kachkachwan karqa, ¿chaychu wañunman?+ Paytaqa Diosmi tukuypi yanaparqa. ¡Jonatanqa manapunim wañunmanchu! Chaytaqa kawsaq Jehova Diospa sutinpim niniku”, nispa.+ Chaynata nisqankuraykum Jonatantaqa mana wañuchirqakuchu.

46 Saulqa manañam rirqachu Filistea runakunata wañuchiqqa. Hinaptinmi Filistea runakunaqa ripukurqaku allpankuman.

47 Saulmi pelearqa Moab runakunawan,+ Ammon runakunawan,+ Edom runakunawan,+ Zoba nacionta kamachiqkunawan+ hinaspa Filistea runakunawan.+ Maymanña chayaspanpas munaychakurqam, chaymi Saulqa kamachispan riqsisqa karqa. 48 Saulqa mana manchakuspam Amalec runakunataqa+ peleaspan wañurachirqa. Israel runakunatam chiqniqnin runakunamanta libraykurqa.

49 Saulpa qari churinkunam karqa Jonatan, Isvi hinaspa Malkisua.+ Mayor warmi churinmi karqa Merab,+ sullkanñataqmi Mical.+ 50 Saulpa warminmi karqa Ainoam. Payqa karqa Aimaazpa warmi churinmi. Saulpa soldadonkunapa kamachiqninñataqmi karqa Abner.+ Payqa karqa Nerpa churinmi hinaspa Saulpa tionmi. 51 Saulpa taytanmi karqa Quis.+ Abnerpa taytanmi karqa Ner,+ Nerpa taytanñataqmi karqa Abiel.

52 Saulqa kamachisqan punchawkunapim Filistea runakunawan peleayllapiña karqa.+ Chaymi pi qaripas allin kallpayuq hinaspa mana manchakuq kaptinqa peleananpaq pusaq.+