Sabado punchawmi trigopa espiganta rachurqaku

Jesuswan qatiqninkunam kaqmanta Galilea lawman puquy tiempopi kutikurqaku. Hinaptinmi kawsaykunapa chawpinta richkaptin qatiqninkuna yarqarachikurqaku, chaymi trigopa espigantaña rachuspanku mikuyta qallaykurqaku. Fariseo runakunañataqmi sabado punchawpi chay ruwasqankuta rikururqaku.

Chay pasaq punchawkunallam Jesustaqa wakin judiokuna wañurachiyta munarqaku sabado punchawpi huk runata hampirusqanrayku. Kay kutipiñataqmi fariseo runakuna Jesuspa qatiqninkunapa ruwasqanta mana allinpaq hapispa nirqaku: “Qaway, qatiqnikikunaqa sabado punchawpim mana ruwanata ruwachkanku”, nispanku (Mateo 12:2).

Chay fariseo runakunapaqqa trigota rachuywan qaquyqa saruspa cosechay hinañam karqa (Exodo 34:21). Paykunaqa tukuytam llamkayta hinaña qawaqku, chaymi sabado punchawpi Diospa kamachisqanta kasukuyqa sasa karqa. Jehova Diosmi ichaqa munarqa kusikunapaq hinaspa paymanta yuyaymananapaq punchaw kananta. Chayraykum Jesusqa mana allin ruwasqankuta qawachinanpaq iskay yachachikuymanta willarqa.

Puntatam Davidmantawan runankunamanta rimayta qallaykurqa. Paykunam huk kutipi yarqaymanta kaspanku Diospa wasinman yaykuruspa Diospaq kaq tantata mikururqaku. Diosmi ichaqa yarqaymanta kasqankuta yachaspan mana piñakurqachu. Chay tantataqa Diospa carpanman yaykuspam musuq tantataña churaspanku sacerdotekunalla mikunanku karqa (Levitico 24:5-9; 1 Samuel 21:1-6).

Chaymantam Jesusqa kaytapas nirqaraq: “¿Manachu Moisespa leyninpiqa leerqankichik, templopi sacerdotekuna sabado punchawpi llamkachkaspankupas mana huchallikusqankuta?”, nispa. Jesuspa nisqanman hinam sacerdotekunaqa sabado punchawpipas Diospa wasinpi animalkunata kañaqku hinaspa imatapas ruwaspa llamkaqku. Jesusqa nirqataqmi: “Ñuqam ichaqa nikichik: Kaypiqa kachkan templomantapas aswan respetanaraqmi”, nispa (Mateo 12:5, 6; Numeros 28:9).

Chaymantapas pantasqankuta qawachinanpaqmi nirqaraq: “Diospa qillqanmi nin: ‘Munaniqa llakipayakuq kanaykichiktam, manam animalkuna ofrecewanaykichiktachu’, nispa. Sichum qamkuna entiendewaqchik karqa Diospa qillqanpa chayna nisqanta hinaspaqa manachá mana huchayuqkunataqa tumpawaqchikchu karqa”, nispa. Hinaspam Jesusqa tukunanpaq nirqa: “Runapa churinqariki sabado punchawpi munaychakuqmi”, nispa. Chay nisqanwanmi qawachichkarqa kay pachata waranqa wata kamachispan hawkayayta apamunanmanta (Mateo 12:7, 8; Oseas 6:6).

Satanasqa una-unay watakunañam runakunata tukuywan ñakarichiwanchik. Kay pachata Jesus kamachimuptinmi ichaqa sabado punchawpi samanapaq Diospa kamachisqanpi hina hawkayay hinaspa kusikuy kanqa.