Galileapim Diosmanta willakurqa hinaspa apostolkunatapas willakunankupaq yachachirqa

Jesusqa yaqa iskay wataña Diosmanta willakuspanpas, hinallam purirqa “llapallan llaqtakunapi hinaspa llaqtachakunapipas yupaychana wasikunapi yachachistin chaynataq Diospa munaychakuyninmanta sumaq willakuyta willakustin, hinaspa tukuy imawan unquqkunata chaynataq nanayniyuqkunata sanoyachistin” (Mateo 9:35). Chaywanmi musyakurqa runakunamanqa Diosmanta hinalla yachachinanmanta. Ichaqa, ¿imaynatam ruwanan karqa?

Llaqtakunaman hinalla rispanmi Jesusqa musyakurqa runakunaqa Jehova Diosmanta karunchasqa kasqankurayku mana michiqniyuq ovejakuna hina kasqankuta. Chaymi llakipayariykuspan nirqa: “Cosechanapaqqa achkallañam kachkan, cosechaqkunam ichaqa aslla. Chaynaqa, cosechapa dueñontayá mañakuychik cosechanapaq llamkaqkunata kachamunanpaq”, nispa (Mateo 9:37, 38).

Hinaspam 12 apostolninkunata achka hawaqman rinankupaq iska-iskaytakama rakispan nirqa: “Amam rinkichikchu huk nacionniyuq runakunamanqa, amataqmi yaykunkichikchu Samaria lawpi mayqin llaqtakunamanpas, rinkichikqa Israel nacionpi chinkasqa ovejakunallamanmi, rispaykichikqa: ‘Hanaq pacha Diospa munaychakuyninmi hichparamunña’, nispayá willakuychik”, nispa (Mateo 10:5-7).

Jesusqa ñam yachachirqaña Diospa munaychakuyninta mañakunankupaqqa. Jesus kay pachapi kasqanraykum Diospa munaychakuyninqa hichpallankupiña karqa. ¿Imaynanpi? Jesus kamachinanpaq akllasqa kasqanraykum. Chaynaqa, ¿imaynatam Jesuspa qatiqninkunaqa qawachinanku karqa Diospa munaychakuyninmanta willakunankupaq akllasqa kasqankuta? Unquqkunata hampinankupaq hinaspa wañuqkunata kawsarichinankupaq Jesus atiyta qusqanwanmi, chaytaqa mana imallapaqmi ruwananku karqa. Ichaqa, ¿imatataq ruwananku karqa imankupas pisiptinqa?

Jesusqa nirqam quri-qullqitaqa hinaspa cobretaqa ama apanankupaq, nirqataqmi mikuytapas, pachatapas hinaspa usutatapas ama apanankupaq. ¿Imanasqa? ‘Llamkaqqa mikunanta chaskisqanraykum’ (Mateo 10:10). Paykunaqa willakusqankuta kusikuywan chaskiq runakunawanmi hinaspa qukuykuq runakunawanmi tuparqaku. Chaymi Jesusqa nirqaraq: “Maypipas wasiman yaykuspaykichikqa chaypi qipakuychik chay llaqtamanta lluqsinaykichikkama”, nispa (Marcos 6:10).

Jesusqa wasin-wasin ima nispa Diospa munaychakuyninmanta willakunankupaqmi nirqa: “Wasiman yaykuspaykichikqa rimakuykuychikyá. Wasiyuq chaskisuptikichikqa munasqaykichik hawkayayyá paypaq kachun, mana chayqa hawkayaynikichikyá qamkunawan qipakuchun. Maypipas mana chaskisuptikichikqa utaq mana uyarisuptikichikqa, chay wasimanta utaq llaqtamanta lluqsispayá chakikichikpi allpatapas taspikuychik”, nispa (Mateo 10:12-14).

Wakinpiqa lliw llaqtantin runam mana chaskirqakuchu. Hinaptinqa, ¿imaraq kanqa chay llaqtapi runakunawan? Chayna llaqtaqa castigasqa kananmantam Jesus nirqa: “Juicio punchawpiqa Sodoma hinaspa Gomorra llaqtaraqchá aswan llakipayasqa kanqa chay llaqtamantaqa”, nispa (Mateo 10:15).