¿Imanasqataq Diospa Munaychakuyninmanta yachanayki?

Wara-waranqantin runakunam Diospa Munaychakuyninpi otaq Gobiernonpi suyakuyniyoq kanku. Chaymi Jesuspa kamachisqanta kasukunku. Kaynata mañakunankupaqmi nirqa: “Munaychakusqayki hamuchun. Munasqaykiyá rurasqa kachun kay pachapipas hanaq pachapi hina”, nispa (Mateo 6:10).

Achka runakuna Diospa Munaychakuyninpi piensaptinpas yaqa lliw religionkunam mana chaypiqa reparankuchu. Jesusqa anchatam chanincharqa “Diospa Munaychakuyninmanta” yachachikuytaqa, iglesiakunapim ichaqa chaymantaqa mana yachachinkuchu, chaymi admirachirqa ñawpa tiempokunamanta willakuq H. G. Wells sutiyoq runata.

Jehova Diospa testigonkunam ichaqa Diospa Munaychakuyninmanta sapa kuti rimaniku. Kay hapisqayki revistapi piensay, 220 rimaykunapim lloqsimun. Sapa killataqmi horqoniku yaqa 46 wara–waranqantin revistakunata, manamá allpantinpiqa ima qellqapas kay revista hinaqa aypukunchu. ¿Imamantam astawan riman? Qawariy qaranpi kaq sutinta, ninmi: Jehova Diospa Gobiernonmanta Willakuq.a

¿Imanasqam kallpanchakuniku paypa Munaychakuyninmanta willakuypi? Bibliapi yachachisqanraykum, ima yachachikuymantapas astawanqa chaymantam yachachin. Chaymantapas, Jehova Diospa Gobiernollan tukuy ima sasachakuykuna allichananmanta mana iskayrayasqaykuraykum.

Jesustam qatipakuchkanikuqa. Paypaqa Diospa Munaychakuyninmi aswan chaninniyoqqa karqa, chaymantamá astawanqa yachachirqapas (Lucas 4:43). ¿Imanasqataq anchata chanincharqa? ¿Imatam Diospa Munaychakuyninqa qampaq ruwanman? Qatiqnin yachachikuykunapi Bibliapa imayna contestasqanta qawarinaykipaqmi kallpanchaykiku.