Qechurachikusqanku huertamanta

QAWAY. Adantawan Evatam Eden huertamanta qarqochkanku. ¿Yachankichu imamanta?

Mana allin rurasqankumantam. Chaymi Jehová Dios paykunata castigachkan. ¿Imatam Adanwan Evaqa rurarqaku?

Diospa mana munasqantam rurarqaku. Diosmi nirqa: Huertapi llapallan sachapa ruruntaqa mikuwaqchikmi. Huk sachapa ruruntam ichaqa amam mikunkichikchu, chayta mikuruspaykichikqa wañurunkichikmi, nispa. Chaytaqa Diosmi kikillanpaq waqaycharqa. Yachanchikmi hukpa kaqninta hapikuruyqa mana allin kasqanta, ¿aw? Hinaptinqa, ¿imataq pasarurqa?

¡Musyariy! Huk punchawmi Eva huertapi sapallan tarikuchkaptin, culebra parlapayarqa. Paymi Evata nirqa Diospa prohibisqan sachapa rurunta mikunanpaq. Jehová Diosqa culebrakunata mana rimaqtam unancharqa. Chayraykum, culebrataqa huk espiritum rimarachirqa. ¿Pitaq karqa?

Manam Adanchu. Jehová Diospa unanchasqan huknin espiritum kayta rurarqa. Chay espiritukunaqa angelkunam karqaku, paykunataqa manam rikuyta atichwanchu. Chay angelqa hatuntukuqllaña rikurirurqa. Dios hina kamachikuq kaytam munapayarqa, hinaspa Jehová Diospa rantinpi payllataña kasukunankutapas munarqa. Paymiki culebrataqa rimachirqa.

Evatam kay angelqa engañarurqa. Mikuruspaykiqa Dios hinañam kanki, nispa niykuptinmi; payqa creerqa. Chaymi mikuruspa Adantapas mikurachirqa. Adanwan Evaqa Diosta mana kasukuspankum sumaq huertantapas qechurachikurqaku.

Diosqa enteron Allpata Eden huertata hina suma-sumaqta ruranqa. Chaymantañam qawasunchik imaynatam qampas chaypi tarikuwaq. Kunanqa qawasunchikyá Adanta hinaspa Evata imam pasasqanta.