Getsemani huertapi Jesuspa mañakusqanmanta

WASIPI cuartomanta Jesuswan apostolninkuna lloqsiruspanku Getsemani huertaman rirqaku. Ñawpaqtaqa achka kutitam kaymanqa hamurqaku. Chaypim Jesusqa rikcharisqalla kaspa mañakunankupaq nirqa, hinaptinmi paykunapa tumpa waklawninman asuriruspan qonqorakuykuspan Diosta mañakurqa.

Chaymantam apostolninkunapa kasqanman kutirqa. Imaniwaqtaq, ¿imatataq paykunaqa rurachkanku? ¡Puñukuchkasqaku! Jesusqa kimsa kutikamam rikchasqalla kanankupaq nirqa, sapa kutisqanpim ichaqa puñukuchkasqaku. Chaymi kimsa kaq kutipiñataq nirqa: ‘¿Imanasqataq puñukuchkankichik?, ñam hora chayaramunña, enemigoykunapa makinman entregasqa kanaypaq’ nispa.

Chaynata rimachkaptinmi achka runakuna chaqwapi hamusqankuta uyarirqaku. ¡Qaway! Runakunaqa hamuchkasqaku espadakunata, kaspikunata hinaspa antorchakunata aparikuspa. Hinaptinmi paykunapa chawpinmanta huk runa Jesusman asuykurqa. Hinaspam muchaykurqa qawasqaykiman hina. Judas Iscariotem chay runaqa. ¿Imanasqataq Jesustaqa muchaykurqa?

Jesusmi nirqa: ‘Judas, ¿muchaykuwaspachu traicionaruwanki?’, nispa. Chaynata ruraspanmi Judasqa paywan kaq runakunata musyachirqa mayqantaq maskasqanku Jesus kasqanta. Chaymi Jesuspa enemigonkunaqa payta hapirunankupaq anchuykamurqaku. Apostol Pedrom ichaqa manamá saqenqachu Jesusta hawkalla hapirunankuta chaymi espadanta horqoykuspan waqtanpi kaq runata chaywan alleq rinrinta qorururqa. Jesusñataqmi chay runapa rinrinta llapchaykuspan sanoyaykachirqa.

Hinaptinmi Jesusñataq Pedrota nirqa: ‘Kutiykachiy espadaykita maymi kasqanman. ¿Manachum yachanki sichum Taytayta mañakuptiyqa wara-waranqa angelkunata kachamuwananta?’, nispa. ¡Atinmanmi! Jesusmi ichaqa Diosta mana mañakurqachu angelninkunata kachamunanpaq, enemigonkuna hapirunankupaq tiempoña kasqanta musyakuspa. Chaymi Jesusqa mana imatapas ruraspa hapirachikurqa. Chaynaqa qawasunchikyá imataq Jesusta pasarqa.