Ama qunqaychu agradecekuyta

¿MIKURUNKIÑACHU?... ¿Pitaq yanukurqa?... Ichapas mamayki utaq piynikipas. Hinaptinqa, ¿imanasqataq mikuymantaqa Diosta agradecekunanchik?... Diosninchik mikunanchikpaq tarpukuykunata wiñachisqanraykum. Chayna kaptinpas mikuy yanukuqkunatapas agradecekunanchikmi.

Ichaqa wakinpim qunqanchik imamantapas agradecekuyta. Chaynam karqa Jesuspa tiemponpi lepra unquywan ñakariq runakuna.

Ichaqa, ¿imaynataq lepra unquyqa?... Chay unquyqa runakunapa aychantam ismuparachispa wichiparachin. Chaymi leprawan unquq runakunaqa wakin runakunamantapas karupi yachananku karqa. Pi runapas asuykuptinñataqmi karunta pasakunanpaq qayaykachakuqku hukkunamanpas unquyninku ama rataykunanpaq.

Jesusqa chay unquyniyuq runakunataqa llakipayaqmi. Huk kutipim Jerusalenman risqanpi huk llaqtachaman chayarurqa, hinaptinmi payman chunka lepra unquyniyuq runakuna asuykurqaku. ¿Imanasqa? Diospa atiyninwan ima unquytapas hampisqanta yachasqankuraykum.

Chay leprawan unquq runakunaqa manam Jesuspa waqtankamachu chayarqaku. Ichaqa hampisqa kanankuta yachaspankum rikuruspallaraq nirqaku: “Jesus, yachachikuq, llakipayariykullawaykuyá”, nispanku.

Qamqa, ¿llakipayaykunkichu unquqkunata?... Jesusqa llakipayaykuqmi. Chaymi leprawan unquq runakunatapas llakipayaspan nirqa: “Sacerdotekunaman rispayá qawachikamuychik”, nispa (Lucas 17:11-14).

¿Imanasqataq chaynata nirqa? Moisespa chaskisqan kamachikuykunapi chayna unquyniyuq runakuna Diospa sacerdotenman rispa qawachikunankupaq kamachisqanraykum. Chay kamachikuyman hinaqa sacerdotekunam leprawan unquq runata allinyasqanta utaq mana allinyasqanta qawaspanku unquyninmanta willaqku. Chaynapim chayraq sanoña kaspaqa wakin runakunawan hukllawakuqku (Levitico 13:16, 17).

Hinaptinqa, chay leprawan unquq chunka runakunaqa, ¿rinmankuchu karqa sacerdotekunawan qawachikuq?... Arí, hampisqa kanankuta yachaspankum chaylla rirqaku.

Hinaptinmi ñanllataraq richkaptinku ismullaña aychankuqa suma-sumaqta sanoyarurqa. ¡Maynataya chay runakunaqa kusikurqaku! Jesuspa nisqanta kasukusqankuraykum sanoyarurqaku. Ichaqa, ¿imaynatam agradecekusqankuta qawachinmanku karqa? ¿Imaynatam qamqa qawachiwaq karqa?...

Hukninmi sanoyarusqanmanta musyakuspan Jesusman kutirqa Diosta hatunchastin. Jehova Diosta agradecekuspan hatunchasqanqa ancha allinmi karqa. Jesustapas ñawpaqninpi qunqurakuykuspanmi anchata agradecekurqa.

Jesusñataqmi nirqa: ‘Chunkam sanoyachisqaqa karqankichik. Hinaptinqa, ¿maytaq wakin isqunqa? ¿Hukllachu kutiramun Diosta hatunchananpaq?’, nispa.

Arí, chullallam Diosta hatunchaspan Jesusta agradecekuq kutirqa. Payqa karqa Samaria llaqtayuq runam. Wakinñataqmi Diostaqa mana hatuncharqakuchu nitaq Jesustapas agradecekurqakuchu (Lucas 17:15-19).

¿Mayqanninkuman rikchakuytataq munawaq? Samaria llaqtayuq runamanmi ¿aw?... Hinaptinqa, pipas ñuqanchikpaq imallatapas ruwaptinqa, ¿imatam ruwananchik?... Agradecekunanchikmi. Agradecekuyqa allinmi wakin runakuna mana agradecekuptinpas. Chayqa Jehova Diosta hinaspa churin Jesustam kusichin.

Runakunaqa imapipas yanapaykuwanchikmi. ¿Haykallapipas unqurqanki?... Chay runakuna hina leprawan mana unquspaykipas chulliwan utaq wiksa nanaywanchá unqurqanki. ¿Pitaq imallatapas quykusurqanki?... ¿Kusikurqankichu hampitapas qususpayki yanapaykususqaykiwan?...

Jesusqa anchatam kusikurqa Samaria llaqtayuq runa agradecekuptin. ¿Tayta-mamaykipas kusikunmankuchu imamantapas agradecekuptikiqa?... Awriki.

Sapa kutim pipas qampaq imallatapas ruwachkan kamachisqa kasqanrayku utaq kuyasusqaykirayku. Ichaqa manam qunqanaykichu paykuna agradecekuytapas. Ichapas escuelaykipi profesoraykiqa anchata kallpanchakun yachachisunaykipaq. Chaymi agradecekuptikiqa paypas anchata kusikunqa.

Wakin runakunañataqmi yanapaykuwanchik llasaq qipiwanpas ñakarichkaptinchik utaq imallatapas haywaykuwaspanchik. Chaykunamanta agradecekuypas ancha allinmi.

Runamasinchikkunata agradecekuyta yachaspaqa manam sasachakusunchu Jehova Dios agradecekuytaqa. ¿Imakunamantataq Diosta agradecekuchwan? Samay kawsay quwasqanchikmanta hinaspa imapas ruwasqankunamantam. Tuku-tukuymantam Diostaqa agradecekuspa hatunchananchik.