4 KAQ YACHACHIKUY
¿Pitaq Jesucristoqa?
1. ¿Pi kasqanmantam Bibliaqa willan?
¿Imanasqataq lliw runakuna Jesusman asuykuyta munarqaku? (MATEO 11:29; MARCOS 10:13-16.)
Manaraq kay Pachapi nacechkaspanqa hanaq pachapim espiritu karqa. Chayna kasqanmi qawachin mana wakin runakuna hina kasqanta (Juan 8:23). Payqa Jehová Diospa punta unanchasqanmi karqa, Taytantam tukuy ima unanchasqanpi yanaparqa. Paymantam Biblia nin Diospa “sapallan Churin” kasqanta, Taytanpa unanchasqan kasqanrayku (Juan 1:14). Nintaqmi ‘Simiwan’ sutichasqa kasqantapas, Taytanpa rantinpi rimaq kasqanrayku. Leey Proverbios 8:22, 23, 30; Colosenses 1:15, 16.
2. ¿Imanasqam Allpa pachaman hamurqa?
Taytanmi kay Pachaman kachamurqa. Wawa hina nacenanpaqmi Mariawan sutichasqa doncella sipaspa wiksanpi rikurirachirqa. Chaymi Jesuspa taytanqa mana runachu (Lucas 1:30-35). Payqa kaykunaraykum hamurqa: 1) Diosmanta cheqapta yachachinanpaq, 2) sasachakuypi kaspapas rurasqanman hina Diospa munayninta rurananchikpaq, hinaspapas 3) ‘achka runakunapa rantinpi wañunanpaq’. Leey Mateo 20:28.
3. ¿Imanasqataq librasqa kayta necesitanchik?
Pipas wañuymanta librasqa kananpaqqa rantinpim imapas chaninpaq kaqta qonan (Exodo 21:29, 30). Diosqa manam haykapipas munarqachu runakuna wañunantaqa nitaq machu-payayanantaqa. Mana wañunanpaqmi Adanqa Diospa kamachisqanta kasukunan karqa. Kasukuspanqa manam haykapipas wañunmanchu karqa (Genesis 2:16, 17; 5:5). Bibliapa nisqanman hinam wañuyqa Adanwan rikurirurqa. Huchallikusqanraykum lliw mirayninkuna huchayoq kanchik, chayraykum wañunchik. Chaymi wañuymanta libraqninchikta necesitanchik. Leey Romanos 5:12; 6:23.
Chaynaqa, ¿pitaq wañuymanta librawanchikman rantinchikpi wañuspa? Wañuspaqa huchanchikmantam paganchik. Ichaqa huchasapa kasqanchikraykum mana pi runatapas wañuymantaqa librayta atichwanchu. Leey Salmo 49:7-9.
4. ¿Imanasqam Jesusqa wañurqa?
Huchasapa runamantaqa Jesusqa chuyam karqa, manataqmi huchallikurqachu. Payqa manam huchallikusqanraykuchu wañurqa aswanqa huchanchikmanta librawananchikpaqmi. Ñoqanchikrayku wañunanpaq Churinta kachamusqanwanmi Jehová Diosqa runakuna kuyasqanta qawachirqa. Jesuspas kuyawasqanchiktam qawachiwanchik Taytanta kasukusqanwan chaynataq wañuymantawan huchamanta librawananchikpaq vidanta qosqanwan. Leey Juan 3:16; Romanos 5:18, 19.
Qaway “¿Imanasqataq Jesusqa wañukurqa?” niq videota.
5. ¿Imatataq Jesusqa kunan rurachkan?
Kay Pachapi kaspanmi Jesusqa runakunata hampirqa, kawsarichirqa hinaspa ñakariqkunatapas yanaparqa, chayna rurasqanwanmi qawachirqa Diosman sonqo kaqkunata hamuq tiempopipas imayna yanapananmanta (Mateo 15:30, 31; Juan 5:28). Wañuruptinpas Diosqa espiritu cuerpopim kawsarirachirqa hanaq pachapi kawsananpaq (1 Pedro 3:18). Hinaspapas Taytanpa qayllanpim Jesusqa suyarqa kay Pachata kamachinanpaq tiempo chayamunankama (Hebreos 10:12, 13). Hanaq pachamantam kunanqa kamachimuchkanña, discipulonkunapas Allpantinpim chay allin noticiamanta willakuchkanku. Leey Daniel 7:13, 14; Mateo 24:14.
Kay atiyniyoq Reyqa chayllam chinkachinqaña mana allin rurasqankuwan runamasin ñakarichiqkunataqa. Jesuspi iñiqkunaqa hinaspa kasukuqninkunaqa sumaq huertayachisqa Allpa pachapiñam wiñaypaq kawsanqaku. Leey Salmo 37:9-11.