Jerusalenpi ramada sutiyuq fiesta

Jesusqa bautizakusqan punchawmantapacham riqsisqa kayta qallaykurqa. Achka runakunam Diospa atiyninwan imapas ruwasqanta rikurqaku, chaymi maypipas rikusqankumanta willakuqku. Chaymi Jesusqa ramada sutiyuq fiestapaq Jerusalenman chayaruptinqa runakuna maskarqaku.

Runakunaqa tukuytam Jesusmantaqa rimaqku. Wakinmi allin runa kasqanpaq hapiqku, wakinñataqmi pantachikuq kasqanpaq (Juan 7:12). Jesusta allinpaq hapiq runakunaqa fiesta qallarisqan punchawkunam mana musyachikuspalla paymanta allinta rimaqku, ichaqa manam lliwpa qayllanpichu chaytaqa rimaqku religionkunapi punta apaqkunata manchakusqankurayku.

Fiestapi kasqan punchawkunam Jesusqa Diospa wasinman rispan yachachirqa. Chaypim achka runakuna sumaqta yachachisqanrayku mana ima niytapas atiqkuchu. Jesusqa manam religionmanta yachachiq escuelamanqa rirqachu, chaymi runakunaqa niqku: “¿Imaynamá kay runaqa kayna yachayniyuqqa escuelallamanpas mana richkaspanqa?”, nispa (Juan 7:15).

Jesusqa nirqam: “Ñuqapa yachachisqayqa manam kikiypachu aswanqa kachamuwaqniypam. Pipas kachamuwaqniypa munayninta ruwayta munaspanqa yachanqam sichu yachachisqayqa Diosmanta kasqanta utaq kikillaymanta rimasqayta”, nispa (Juan 7:16, 17). Jesusqa Diospa kamachikuyninkunamantam yachachirqa, chayta ruwasqanmi Jehova Dioslla hatunchasqa kananta qawachirqa.

Jesusqa nirqaraqmi: “Moisesmi leytaqa qusurqankichik, ¿aw? Ichaqa manam mayqinnikichikpas chay leytaqa kasukunkichikchu. ¿Imanasqataq wañuchiwaytaqa munachkankichik?”, nispa. Jesusta uyariq wakin runakunaqa ichapas huk lawmanta hamusqankurayku manaraq yacharqakuchu Jesus wañuchiy munasqankutaqa. Chaymi paykunaqa Jesusta nirqaku: “Qamqa demonioyuqmi kanki. ¿Pitaq wañuchiyta munasuchkanki?”, nispa (Juan 7:19, 20).

Wakin runakuna mana yachaptinkupas Jesustaqa unayñam religionkunapi punta apaqkunaqa wañurachiyta munarqaku sabado punchawpi huk runata hampirusqanrayku. Chaymi Jesusqa mana yachayniyuq kasqankuta qawachinanpaq Moisespa chaskisqan kamachikuymanta rimarqa. Nirqam kamachikuyman hinaqa qari wawa naceruptinqa pusaq punchawmanta sabado punchaw kaptinpas señalachinankumanta. Hinaspam nirqa: “Moisespa leynin mana yanqachasqa kananpaqmi sabado kachkaptinpas runaqa qari kayninta señalachikun, ¿hinachkaptinchu ñuqapaq llumpayta piñakurunkichik sanoy-sanoyta runata sabado punchawpi sanoyarachisqaymanta? Amañayá juzgaychikchu qawasqallaykichikman hinaqa, juzgaychikqa justiciaman hinayá”, nispa (Juan 7:23, 24).

Jesusta wañuchiyta munasqankumanta yachaq runakunañataqmi nirqaku: “Payqa runakunapa wañuchiy munasqanku runam, ¿aw? Chaywanpas waqaya runakunapa qayllanpi rimachkan, ichaqa manam imatapas ninkuchu, ichachu kamachikuqkuna chiqaptapuni yacharunku payqa Cristo kasqanta”, nispa. Ichaqa manam lliwchu Jesustaqa Cristo utaq Diospa kachamusqan kasqanpaqqa hapiqku. Niqkum: “Ñuqanchikqa yachanchikmi maymanta kay runa kasqanta, Cristo hamuptinmi ichaqa mana pipas yachananchu karqa maymanta kasqanta”, nispa (Juan 7:25-27).

Chaymi hina Diospa wasinpi Jesusqa nirqa: “Qamkunaqa riqsiwankichikmi, yachankichiktaqmi maymanta kasqaytapas. Chaymantapas ñuqaqa manam kikillaymantachu hamurqani, kachamuwaqniyqa chiqapmi, qamkunam ichaqa mana riqsinkichikchu. Ñuqaqa riqsinim paypa rantinpi hamusqayrayku, paymi ñuqataqa kachamuwarqa”, nispa (Juan 7:28, 29). Chayta uyarispam runakunaqa piñakuspanku presochanankupaq utaq wañurachinankupaq hapiruyta munarqaku. Ichaqa manam atirqakuchu manaraq wañukunanpaq tiempo kasqanrayku.

Wakin runakunam ichaqa mana iskayrayarqakuchu Jesusqa Diospa kachamusqan kasqanmanta. Jesusqa yakupa hawantam purirqa, wayratawan lamar quchatam hawkayachirqa, achkallay-achka runakunatam mikuchirqa, ima unquyniyuqkunatapas hampirqam, hinaspapas wañuqkunatam kawsarichirqa. Chaymi ninakuqku: “Cristo chayaramuspanqa manam kay runapa milagrokuna ruwasqanmanta mastaqa ruwanmanchu, ¿aw?”, nispa (Juan 7:31).

Chayta uyariruspankum fariseokunawan riqsisqa sacerdotekunaqa Jesusta presochanankupaq guardiakunata kacharqaku.