Jezabel warmi wañuchisqa kasqanmanta

Kamachiq Acabmi Nabot sutiyuq runapa uvas huertanta munaruspan rantiyta munarqa. Chay huertaqa karqa Jezreel llaqtapi Acabpa wasinpa waqtanpim. Jehova Diosmi Israel runakunata kamachirqa taytankumanta chaskisqanku herencia chakrata mana rantikunankupaq. Chaymi Nabotqa kasukuq kasqanrayku rantikuyta mana munarqachu. Acabñataqmi mana kasuspan llumpayta Nabotpaq piñakururqa, hinaspam mikuytapas mana munaspan puñunanmantapas mana lluqsiqchu.

Acabpa warmin Jezabelqa qalaypaq mana allin warmim karqa. Paymi nirqa: “Qamqa kamachiq kasqaykiraykum munasqaykita ruwanayki. Ñuqam chay uvas huertanta qichuspay qusqayki”, nispa. Hinaspam autoridadkunaman utaq llaqtapi punta apaqkunaman cartata apachirqa, chaypim kamachirqa Diosta ñakasqanmanta tumpaspanku rumiwan chuqapaspa Nabotta wañuchinankupaq. Nabotta autoridadkuna wañurachiptinkum Jezabelqa Acabta nirqa: “Nabotqa wañurunñam. Qampañam uvas huertanqa”, nispa.

Jezabelqa yanqamantam Jehova Diosman sunqu achka runakunata wañurachirqa, manam Nabotllatachu. Hinaspapas mana allinkunata ruwaspanmi taytacha-mamachakunata yupaycharqa. Ichaqa Jehova Diosmi rikurqa mana allin ruwasqankunata.

Acab wañuruptinmi churin Jeoramña kamachiyta qallaykurqa. Hinaptinmi Jezabelta aylluntinta castigananpaq Jehova Diosqa Jehu sutiyuq runata kamachirqa.

Chaynapim Jehuqa carretanman ­qispiruspa Jezabelpa yachasqan Jezreel llaqtaman rirqa. Jezabelpa wawan Jeorampas Jehuwan tupaqmi richkarqa, chaymi iskayninku ñanpi tuparurqaku. Jeoranmi Jehuta tapurqa: “¿Allin willakuywanchu hamuchkanki?”, nispa. Jehuñataqmi nirqa: “Mamayki Jezabel mana allinkunata hinalla ruwaptinqa, manam allin willakuyqa kanmanchu”, nispa. Hinaspanmi Jeoramta flecharuspa wañurachirqa carretanwan kutinanpaqña kachkaptin.

Chaymantam Jehuqa Jezabelman rirqa. Jezabelñataqmi hamusqanta yacharuspan ñawinkunata pintapakururqa, chukchantapas suma-sumaqta ñaqchapakuruspanmi wasipa altusnin ventananpi suyarqa. Jehu chayaruptinmi Jezabelqa kamiyta qallaykurqa. Jehuñataqmi qaparispan Jezabelpa sirvientenkunata nirqa: “¡Ventananta wischuykamuychik!”, nispa. Chaynata niptinmi wischuykamurqaku. Chaynapim Jezabelqa wañururqa.

Chaymantapas Jehuqa Acabpa 70 churinkunatam wañurachirqa, hinaspam manaña saqirqachu Baal taytachata pipas yupaychanantaqa. Chaynaqa, tukuy imatam Jehova Diosqa yachan, hinaspapas kikinmi tantian mana allin ruwaqkunata haykapi castigananpaq.