Pablomantawan Timoteomanta

Timoteo sutiyuq musum Listra llaqtapi iñiqkunawan huñunakurqa. Payqa Diospi iñiq judia warmipa wawanmi karqa, taytanñataqmi karqa Grecia nacionniyuq Diospi mana iñiq runa. Mamanpa sutinmi karqa Eunice abuelanpañataqmi Loida. Paykunam Timoteomanqa Jehova Diosmanta taksachanmantapacha yachachirqaku.

Iskay kutipi illasqanpim ­Pabloqa Listra llaqtaman chayarurqa, chaypim yacharurqa Timoteoqa iñiqmasinkunata anchata kuyasqanmanta hinaspa imapipas yanapasqanmanta. Chaymi llaqtakunaman riysinanpaq pusarqa, hinaspam yachachirqa allin yachachiq kananpaq chaynataq Diosmanta allin willakuq kananpaq.

Pablotawan Timoteotaqa Diospa chuya espiritunmi yanaparqa maymanpas riptinkuqa. Huk tutam musquypi hina qawaspan Pablo rikururqa Macedoniamanta kaq runata, chay runam Pablota nirqa: “Macedoniaman hamuy yanapawanaykikupaq”, nispa. Chaymi Pabloqa Timoteowan, Silaswan hinaspa Lucaswan Macedonia lawman rirqaku Diosmanta willakunankupaq, chaypim achka runakunata yanaparqaku Diospi iñikunankupaq.

Macedonia lawpi Tesalonica llaqtapim achkallaña runakuna Jesuspa qatiqninña rikurirurqaku. Chayta qawaspankum wakin judiokunaqa Pablotawan puriqmasinkunata chiqnirqaku. Paykunaqa mana allin runakunata huñuruspankum wakin iñiqkunata pampanta aysarqaku llaqtapi autoridadkunaman, hinaspam nirqaku: “¡Kay runakunaqa Roma nacionta kamachiqpa contranpim kachkanku!”, nispa. Chaymi mana imananankupaq tutallan Pablowan Timoteoqa Berea llaqtaman ayqikurqaku.

Bereapi kaqkunaqa anchatam munarqaku Diosmanta yachayta, chayraykum chaypi yachaq achkallaña Grecia nacionniyuq runakuna hinaspa judio runakuna iñikurqaku. Wakin judiokunam ichaqa Tesalonica llaqtamanta hamuruspanku runakunata umacharqaku mana uyarinankupaq, chaymi Pabloqa Atenas llaqtamanña rirqa. Timoteowan Silasñataqmi Berea llaqtapiraq qiparqaku iñiqmasinkuta kallpanchanankupaq. Chaymantam Pabloqa Timoteota kaqmanta Tesalonica llaqtaman kacharqa chaypi ñakarichisqa iñiqmasinkunata kallpanchamunanpaq. Kacharqataqmi huklawpi huñunakuq iñiqmasinkunata kallpanchananpaqpas.

Pablom Timoteota nirqa: “Jehova Diosta yupaychaqkunaqa ñakarichisqam kanqaku”, nispa. Chayna nisqanman hinam Timoteopas Diospi iñisqanrayku ñakarichisqa hinaspa presochasqa karqa, chaywanpas Jehova Diosman sunqu kasqanraykum kusikurqa.

Filipos llaqtapi yachaqkunatam Pabloqa nirqa: “Timoteom allinta yachachisunkichik Diosta hinalla servinaykichikpaq, yachachisunkichiktaqmi Diosmanta imaynata willakunaykichikpaqpas”, nispan. Timoteowan Pabloqa unay watakunam kuskanku Diosmanta willakurqaku.