15 YACHACHIKUY
Jesusmanta yachaykusun
Yaqa llapallan runakuna Jesusmanta rimaspankupas paymantaqa manam sumaqtachu yachanku. Chaymi paymantaqa hukta-hukta ninku. Bibliapiqa ¿ima nintaq Jesusmanta?
1. ¿Ima nintaq bibliapiqa Jesusmanta?
Jesusqa hanaq pachapi yachaq atiyniyuq angelmi. Jehova Diosmi manaraq imatapas unanchachkaspan payta puntata unancharqa. Chaymi paymantaqa bibliapi nin ‘tukuy unanchasqanmantapas punta kaq’ kasqanta (Colosenses 1:15). Bibliaqa nintaqmi Jesusqa Diospa ‘sapallan churin’ kasqanta, chaynataqa nin mana pipa yanapasqan payta Jehova Dios unanchasqanraykum (Juan 3:16). Jesusqa taytantam yanaparqa tukuy imata unanchaypi (leey Proverbios 8:30). Chayraykum paykunaqa kunankamapas anchata sientenakunku. Bibliaqa Jesustaqa sutichantaqmi ‘palabra’ nispapas, Diospa ima niy munasqanta runakunaman willasqanrayku (Juan 1:14).
2. ¿Imapaqtaq Jesusqa kay pachaman hamurqa?
2.000 wata ñawpaqtam Maria sutiyuq sipas wiksayakururqa Diospa atiyninwan, chaynapim Jesusqa kay pachapi nacerqa (leey Lucas 1:34, 35). Jehova Diosmi Jesusta akllaykurqa hanaq pachamanta hamuspan runakunapa huchanrayku wañunanpaq, chaynapi wañuymanta librasqa kananchikpaq.a Ñawpaqmantaraqmi bibliapiqa willakurqaña Diospa akllasqanta utaq Cristota imakuna pasananmanta, chay nisqankunaqa Jesuspim cumplikurqa. Chaykunawanmi runakunaqa yachananku karqa Jesusqa ‘Diospa churin Cristo’ kasqanta (Mateo 16:16).
3. ¿Kunanqa maypitaq Jesusqa kachkan?
Jesusqa kawsariruspanmi hanaq pachaman kutikurqa, chaypim Jehova Diosqa aswan autoridadniyuq kananpaq churarun (Filipenses 2:9). Chaywanpas Jesusmantaqa Jehova Diosllam aswan atiyniyuqqa.
ASTAWAN YACHAYKUSUN
Kaypim astawan yachaykusun Jesusqa pi kasqanmanta chaynataq paymanta yachay imanasqa ancha allin kasqanmanta.
4. Jesusqa manam tayta Dioschu
Bibliapim niwanchik Jesus hanaq pachapi atiyniyuq kaspanpas taytan Jehova Diosta kasukusqanta. VIDEOTA qawaykuychik Jehova Dioswan Jesus mana chaynalla kasqankuta yachaykunaykipaq.
Jehova Dios chaynataq Jesus pikuna kasqankumanta astawan yachaykunapaq bibliapa imakuna nisqanta leeykuspa qatiqninmanta rimariychik:
Leeychik Lucas 1:30-32.
¿Pipa churin Jesus kasqanmantataq angelqa Mariaman nirqa?
Leeychik Mateo 3:16, 17.
Jesus bautizakuruptin ¿imataq uyarikamurqa hanaq pachamanta?
¿Pitaq chayta nimuchkarqa?
Leeychik Juan 14:28.
Pitaq wasipiqa kamachin, ¿taytachu icha churichu?
Jehova Diosta Jesus “taytay” nispanqa ¿pi aswan atiyniyuq kasqantam nichkarqa?
Leeychik Juan 12:49.
¿Jesusqa nirqachu taytanwan huk cuerpollapi kasqankuta? ¿Ima ninkitaq?
5. Jesusqa Diospa akllasqanmi karqa
Ñawpaqmantaraqmi bibliapiqa willakurqaña salvawananchikpaq Diospa akllasqanta imakuna pasananmanta. VIDEOTA qawaykuychik chay willakuykuna Jesuspi imayna cumplikusqanta yachanaykichikpaq.
Bibliapi willakusqanta leeykuspa qatiqninmanta rimariychik:
Leeychik Miqueas 5:2 Diospa akllasqan runa maypi nacenanmanta yachanaykichikpaq.b
¿Jesusqa maypitaq nacerqa? (Mateo 2:1).
Leeychik Salmos 34:20 hinaspa Zacarias 12:10 Diospa akllasqan runa imayna wañuchisqa kananmanta yachaykunaykichikpaq.
¿Cumplikurqachu chay willakuykunaqa? (Juan 19:33-37).
¿Yaqachu Jesusqa bibliapi chay willakuykuna paypi cumplikunanpaq imatapas ruwanman karqa?
Chaynaqa ¿Jesusqa Diospa akllasqan Cristochu karqa? ¿Ima ninkitaq?
6. Jesusmanta yachayqa allinninchikpaqmi
Bibliapim niwanchik Jesusmanta chaynataq Dios imapaq kachamusqanmanta yachayqa ancha allin kasqanta. Leeychik Juan 14:6 hinaspa 17:3, chaymantañataq qatiqninmanta rimariychik:
¿Imanasqataq Jesusmanta yachananchikpuni?
Ñanta kichachkaq hinam Jesusqa yanapawanchik Diosman asuykunanchikpaq, yanapawanchiktaqmi chiqap kaqta Diosmanta yachananchikpaq, chaymantapas huchanchikmanta librawananchikpaq wañukusqanwanmi wiñaypaq kawsakusun.
WAKIN RUNAKUNAM NINKU: “Jehova Diospa testigonkunaqa manam Jesuspiqa creenkuchu”, nispanku.
Chaynata niptinku, ¿ima niwaqtaq paykunata?
YUYARIYKUSUN
Jesusqa hanaq pachapi atiyniyuq angelmi, Diospa churinmi chaynataq salvawananchikpaq Cristom utaq Diospa akllasqanmi.
¿Ima niwaqtaq?
¿Imanasqataq Jesusta ninchik Diospa “piwi churin” nispa?
¿Imapitaq Jesusqa taytanta yanaparqa kay pachaman manaraq hamuchkaspan?
¿Imaynatam yachanchik Jesusqa Cristo utaq Diospa akllasqan kasqanta?
ASTAWAN YACHANAYKIPAQ
Kaypi astawan yachaykuy Jesusqa Cristo utaq Diospa akllasqan kasqanmanta.
“¿Prueban las profecías de la Biblia que Jesús fue el Mesías?” (Tarinkim jw.org nisqanpi)
Mariaqa Diospa churintam wiksayakururqa. Chaymanta kaypi leeykuy.
‘¿Imanasqataq Jesustaqa ninku: “Diospa churin”, nispanku?’ (Tarinkim jw.org nisqanpi)
Kaypi yachaykuy Dios tayta, Dios churi, Dios chuya espiritu huklla kasqankumanta nisqankuqa pantay yachachikuy kasqanmanta.
Kay warmicham yacharurqa bibliapi willakuykuna Jesuspi cumplikusqanmanta, chayta yachasqan imayna yanapasqanmanta kaypi leeykuy.
“¿Imanasqataq saqirqa judaismo religionninta?” (Tarinkim jw.org nisqanpi)
a 26 hinaspa 27 yachachikuypim yachasunchik imamanta salvasqa kananchikmanta hinaspa imaynata Jesus salvawasqanchikmanta.
b Qaway kay libropa tukupayninpi 2 kaq willakuyta, chaypim yachanki bibliapa nisqanman hina Diospa akllasqan runaqa kay pachapi haykapi rikurimunan kasqanmanta.