¿Imataq hanaq pachaqa?

HANAQ pachapi kawsayta, ¿pitaq mana munanmanchu? Achka runakunam chaytaqa suyanku: musulmán, hindú, budista, cristiano hinaspa mana religionniyoq runakunapas. Ichaqa, ¿imataq hanaq pachaqa? Yaqa llapanpim piensanku mana ima ñakariypa kasqan sumaq sitio kasqanta chaynataq allin runakuna, wañukuq familiankuwan chaypi tupasqankuta. Ichaqa, llapallan runakuna hanaq pachaman riyta munaspankupas, manamá wañuytaqa munankuchu. ¿Imanasqa?

Sichu wañuruspa hanaq pachaman rinapaq unanchasqa kaspanchikqa, ¿manachu wañukuytaña munachwan, warmacha yuyayniyoqña kayta munaq hina, otaq casarakunan punchaw chayaramunantaña munaq novia hina? Ichaqa, yaqa llapallanchikmi kawsakuyta munanchik.

Religiosokunapas ninkum kay Pachapi forasterolla kaspa hanaq pachapi kawsanapaq kasqanchikta. Estados Unidos lawpim Theodore McCarrick sacerdote nirqa: “Unanchasqam kachkanchik hanaq pachapi kawsanapaq, manam kay Pachapi kawsanapaqchu”, nispa. Chay lawmanta Asociación Nacional de Evangélicos nisqapa ñawpaq kamachiqninpas yaqa chaynallatam nirqa: “Kay Pachapiqa kachkanchik Diosta hatunchaspa hanaq pachaman rinanchikpaqmi. Chaypim wasinchikqa kachkan”, nispa.

Ichaqa hanaq pachapi llapallanchik kawsanapaq yachachikuyqa, manam Bibliapa yachachisqanman hinachu. Religionkunamanta tapuq George Barna sutiyoq runapa nisqanman hinaqa, “wañuruspa huklawpiña kawsakuymanta piensayqa, rikurimunmi televisionpi qawaykunamantawan takikunamantapas”. Florida lawpi Iglesia Episcopal nisqapa pastorninpas nirqam: “Hanaq pachamantaqa manam imatapas yachanchikchu, yachanchikqa chaypi Dios kasqallantam”, nispa.

Arí, kay yachachikuymantaqa achka tapukuykunam rikurin. ¿Imaynataq hanaq pachaqa? ¿Cheqaptachu chaypi kawsanapaq unanchasqa karqanchik? ¿Pikunataq hanaq pachaman rinku, hinaspa imatam ruranku? Qatiqninpim Bibliapa yachachisqanman hina kay tapukuykunamanta qawasun.

[11 kaq paginapi suti rikuylla kaq willakuy]

Hanaq pachaman riyta munaspaqa, ¿imanasqataq wañuyta mana munanchikchu?