Bibliam vidankuta cambiarurqa

¿IMAM yanaparqa cigarro ruranankupaq tabaco sutiyoq planta tarpuqta llamkaynintawan creenciankunata cambiananpaq? ¿Imataq tragoman viciakuq warmita kallpancharqa vidanta cambiananpaq? Qawariy iskayninkupa imam nisqankumanta.

“Kusisqamá tarikuni kay hatun familiapa parten kaspay” (DINO ALI)

NACESQAN WATA: 1949

NACIONNINMI: AUSTRALIA

HUK WILLAKUYKUNA: TABACO TARPUQ

ÑAWPAQ VIDAY: Tayta-mamaymi 1939 watapi Albania nacionmanta Mareeba llaqtachaman astakamusqaku, chayqa Queensland llaqtapim (Australia). Chaymantaqmi astakusqaku Italia, Serbia, Bosnia hinaspa Grecia nacionniyoqkunapas, paykunaqa costumbrenkuman chaynataq llaqtankupi imayna rurasqankuman hinam imatapas ruraqku. Mareeba llaqtachapiqa tabacotam tarpuqku, chaymi tayta-mamaypas tarpuyta qallaykurqaku.

Chay qepallamanmi mayor paniy naceramurqa, chaymantañataq iskay wawqeykunapiwan ñoqa. Taytaymi huk watachayoqllaraq kachkaptiy corazonnin sayaruptin wañukurqa. Hinaptinmi mamay hukwan yapakururqa, hinaspanmi tawa qari wawayoq karqa. Pusaqniykum padrastroypa tabaco tarpusqanpi wiñarqaniku.

Wasiymantam mozollaraq kachkaspay ripukurqani, hinaspam yaqa iskay chunka wataypi Saime sutiyoq sipaswan casarakurqani. Iskayniyku musulman religionniyoq kasqaykuraykum casarakurqaniku yachasqayku lawpi mezquita sutiyoq iglesiapi. Tioykuna, tiaykuna chaynataq primoykunapas chay religionniyoqmi karqaku. Corán sutiyoq librotawan Mahoma sutiyoq profetamanta rimaq librotam leeq kani, ichaqa Bibliatapas leeqtaqmi kani. Corán libroqa willakun Bibliapi rikuriq profetakunamantam, chaymi Bibliata leespayqa astawanraq paykunamanta yacharqani.

Jehová Diospa testigonkunam wasiyman hamuqku, chaymantapas Saimetawan ñoqatam gustawaqku sapa kuti apamuwasqanku revistakunatawan librokunata leey. Yuyachkanim Bibliata estudiaspayku achka kutipi mana entiendesqaykumanta rimasqaykuta. Piensasqankumanta yachachiwanankumantaqa tukuy ima tapukuyniykutam Bibliawan kutichiwaqku. Chaymi anchata admirachiwarqa.

Jehová Diospa testigonkunam Bibliamanta estudianaypaq niwaq hinaspam huñunakuyninkuman rinaypaq invitawaq, ichaqa manamá munarqanichu. Ñoqam munarqani tabaco chakrayoq chaynataq achka churiyoq kayta. Manam haykapipas tabaco chakrayoq kaytaqa atirqanichu, ichaqa tiempopa risqanman hinam pichqa churiyoq karqani.

BIBLIAM VIDAYTA CAMBIARURQA: Jehová Diospa testigonkunata reqsisqaymanta 9 wata pasaruptinpas creenciaykunataqa manam cambiarqanichu. Qellqankunatam ichaqa hinalla chaskiq hinaspa leeq kani. Saimewan ñoqam sapa domingo revistakunata leeq kaniku hinaspam waqaychaq kaniku. Chaykunam anchata yanapawarqa iñiyniyta hukkuna iskayrayachiyta munaptinku.

Huk evangelico pastormi hikutawarqa religionninman yaykunaypaq. Paymi Saimepa turintawan mamaymanta kaq huknin wawqeyta convencerachisqaña. Chay qepamantaqmi, sapaq religionniyoq reqsisqaykuna convencechiwayta munarqaku paykunapaman yaykunaypaq. Wakinkum qowaqku Jehová Diospa testigonkunapa contranpi rimaq qellqakunata. Ñoqaqa nirqanim yachachisqankumanta Bibliawan qawachiwananpaq, ichaqa manam atirqakuchu.

Tukuy chay contraypi churakusqankum kallpanchawarqa Testigokunamanta chaskisqay qellqakunata servichikuspay Bibliata astawan estudianaypaq. Cuentatataqmi qokurqani Bibliamanta yachasqayman hina kawsanaypaqpas.

Manam pipas estudiachiwaqchu Bibliamantaqa, huñunakuykunamanmi ichaqa riq kani. Qallariypiqa manchakuqmi kani penqapakuq kasqayrayku, chaypi kaqkunam ichaqa kuyapayakuqllaña karqaku, gustawarqataqmi chaypi yachasqaykunapas. Chaymi tanteakurqani Jehová Diospa testigon kanaypaq, hinaspaymi bautizakurqani 1981 watapi Jehová Diosman qokusqayta qawachinaypaq.

Señorayqa piensarqam engañawasqankuta, chaynata piensaspanpas manam harkawarqachu bautizakunaypaqqa. Chaymi bautizakusqaymanpas rirqaraq. Ñoqañataqmi hinalla rimapayaq kani tukuy ima yachasqaykunamanta. Bautizakusqaymanta yaqa wata parten qepata carroykupi viajachkaptiykum, Saime niwarqa Testigo kay munasqanmanta. Chaynata niykuwaptinmi carreteramantapas yaqalla lloqsiruni. Hinaspanmi 1982 watapi bautizakururqa.

Imayna kawsasqaykuta cambianaykupaqqa sasachakurqanikum. Bibliapa nisqankunawan mana tupasqanraykum tabacotaqa manaña tarpurqaniñachu (2 Corintios 7:1; Santiago 2:8). Sasataqmi karqa Diospa agradonpaq hina allin llamkaykuna tariypas. Chaymantapas watantinmi wakin aylluykupas watukamuwaykutapas mana munaqkuchu, chayna kaptinpas Bibliapa nisqanman hinam ñoqaykuqa kuyapayakuq karqaniku. Chayna kasqaykuraykum sasachakuykunaqa manaña karqañachu, kunanqa aylluykupas watukamuwankuñam.

BENDICIONKUNA TARISQAYMANTA: Penqapakuqllaña kasqaywan, qollqemanta sasachakusqaywan chaynataq aylluy contraypi churakusqanwan sasachakuykunapi tarikuptiypas, Jehová Diosmi pacienciawan yanapawarqa sasachakuyniykunata atipanaypaq. Kunanqa congregacionpi serviqmi otaq ancianom kani, hinaspaymi huñunakuypi kaqkunaman yachachini. Chaywanpas hinallaraqmi sasachakuni runakunapa qayllanpi yachachiytaqa, manchapakusqayraykum qalluypas watapakun. Ichaqa, Jehová Diospa yanapakuyninwanmi chaynataq payman sapa kuti mañakusqaywanmi kay sumaq llamkayniyta allinta cumplini.

Kunanqa señoraywanmi astawanraq kuyanakuniku, kuskaykuñataqmi imatapas ruraniku. Churiykunata uywasqaypi pantaspaypas anchatam kallpanchakurqani Bibliamanta yachachinaypaq (Deuteronomio 6:6-9). Chaymi huknin churiy señoranpiwan misionero kachkan.

Testigokunapa huñunakuyninkunaman riyta qallaykusqayku qepaman ima pasasqanmantam hinallaraq yuyachkani. Carroyta sayaykachispaymi, Salonman otaq huñunakuna wasiman chayamuq Testigokunata qawaspay familiayta nirqani: “¡Qawariychik!”, nispay. Chaypim karqaku tukuy rikchaq nacionniyoq, costumbreyoq chaynataq rimayniyoq runakuna, paykunam karqaku: Australia, Albania, Croacia hinaspa huk castakunamantapas. Sutillamá qawakurqa kuska kasqankuwan kusisqa tarikusqankuqa. Kusisqamá tarikuni iñiqmasiykunawan kay hatun familiapa parten kaspay, chayqa manamá Australia lawllapichu aswanqa enteron allpapim (1 Pedro 5:9).

“Ñañayqa manam haykapipas qonqaruwarqachu” (YELENA VLADIMIROVNA SYOMINA)

NACESQAN WATA: 1952

NACIONNINMI: RUSIA

HUK WILLAKUYKUNA: TOMAYMAN VICIAKUQ, WAÑUCHIKUYTAM MUNAQ

ÑAWPAQ VIDAY: Krasnogorsk llaqtachapim nacerqani, chayqa Moscú llaqtapa sumaq llaqtachanmi. Tayta-mamaymi karqaku escuelapi yachachiq. Ñoqaqa allin estudiantem karqani, hinaspapas tocay yachaq kanaypaqmi estudiarqani. Viday allin kanantam piensarqani.

Casarakuruspaymi qosaywan astakurqaniku huk llaqtachaman, chaypi yachaqkunam karqaku qacha simi, sinkakuq hinaspa cigarro pitaq. Mana cuentata qokuchkaptiypas chayna runakunaqa manam allinniypaqchu karqa. Qallariypiqa fiestankumanmi riq kani takiqlla hinaspa guitarra tocaqlla. Ichaqa, sapa kutim trago tomanaypaqwan cigarro pitanaypaq runakuna hikutawaqku. Pisi tiempollapim tomayman qokururqani.

Tragoman viciakusqaywanmi vidayta yanqacharurqani. Pisi tiempollamantam paqway mana valeqña rikurirurqani, ñaka-ñakaytam mikuqpas kani. Wañukuytañam munarqani, hinaspapas huk kutipim wañurachikunaypaq tukuyta rurarqani. Kunanqa ancha kusisqam tarikuni mana wañurusqaymanta.

Chayna kaptinpas, ñañaymi sapa kuti watukamuwaq. Jehová Diospa testigon karusqanraykum yachachiwayta munarqa Biblia imayna yanapawananmanta. Bibliamanta yachayta mana munasqayraykum qallariypiqa mana munarqanichu watukamuwanantapas. Ñañayqa manamá haykapipas qonqaruwarqachu. Pacienciawan chaynataq kuyapayakuywan rimapayawasqanraykum munarurqani Bibliamanta yachachiwananta.

BIBLIAM VIDAYTA CAMBIARURQA: Estudiayta qallaykuspaymi tanteakururqani manaña tomanaypaq. Chay tiempopim huk vecinoy sinka kaspan maqaparuwarqa, hinaptinmi hospitalkamaraq chayarurqani. Tawa costillaykunam pakikururqa, huknin ñawiypas dañakururqataqmi. Chaywanpas, hospitalpi kasqaymi yanapawarqa trago tomay munasqayta atipanaypaq.

Hospitalpi tarikuspaymi mana samaykuspay mañakurqani. Lamentaciones 3:55, 56 nisqanmi anchata kallpanchawarqa, chaypim nin: ‘Dios Taytalláy, qamtam qayakamullarqayki. Pozopa ukunmantaraqmi qayakamullarqayki. Qayakamusqaytam uyariykullawarqanki. “Ay, ay” nimusqaytam chaskiykuwarqanki. Mañakamusqaytam uyariykullarqanki’, nispa.

Yachanim mañakusqayta Jehová Dios uyariwasqanmanta. Kallpanchawarqam kaqmanta mana wichiykunaypaq. Wakinpiqa tomakuytam munaq kani, ichaqa manam atipachikurqanichu.

Bibliata estudiasqayman hinam entienderurqani qosayta yanapanaypaq, familiaypi uma kasqanrayku (1 Pedro 3:1, 2). Chayqa sasamá karqa, ñoqaqa sapa kutim payta kamachiq kani. Jehová Diostam mañakurqani yanapawananpaq. Manam chayllachu chayna kasqaytaqa cambiarqani, cambiaytaqa atirqani pisi-pisillamantam.

Qosayqa kallpanchakusqayta qawaspanmi admirakurqa. Payqa manam haykapipas Bibliapiqa interesakurqachu. Ichaqa cigarrota manaña pitanaypaq tateakuruptiymi niwarqa: “¡Manaña pitaptikiqa ñoqapas Biblia estudiaytam qallaykusaq!”, nispa. Chay punchawllapim iskayniyku chay viciota saqerurqaniku.

BENDICIONKUNA TARISQAYMANTA: Qosayqa nisqantam cumplirqa hinaspam qallaykurqa Biblia estudiayta. Kunanqa sapa punchawmi Bibliata kuskayku leeniku hinaspam leesqaykupi yuyaymananiku, kallpanchakunikutaqmi kasukunaykupaqpas.

Manam ima niytapas atiymanchu casado vidayku imayna allinyarusqanmantawan bendicionkuna chaskisqaymantaqa. Jehová Diostam agradecekuni payman asuykachiwasqanmanta (Juan 6:44). Ñañaytapas anchatataqmi agradecekuni mana haykapipas qonqaruwasqanmanta. Cuentatam qokuni Bibliaqa pipa vidantapas cambiay atisqanmanta.

[11 kaq paginapi suti rikuylla kaq willakuy]

Cuentatam qokurqani Bibliamanta yachasqayman hina kawsanaypaq

[13 kaq paginapi suti rikuylla kaq willakuy]

Ñañay pacienciakuq, kuyapayakuq kaptinmi Bibliamanta yachachiwananpaq munarqani