¿Imanasqataq Diosqa ñakariy kananta permiten?

Rosa: Imaynallam kachkanki Sofia, kusikunim wasikipi tarispay.

Sofia: Allinllam kachkani, ñoqapas kusikunim kutimusqaykiwan.

Rosa: Qayninpa hamuptiymi yacharqanchik ñakarisqanchikwan Dios imayna sientekusqanmanta.a Mamayki accidentakurusqanraykum chaymanta yachay munasqaykita niwarqanki. Payqa, ¿imaynallam kachkan?

Sofia: Allinyachkanñam.

Rosa: ¡Mayna allinmi chayqa! Maynatachá kallpanchakunki mana hukmanyaspa hinalla atiendenaykipaq.

Sofia: Awriki, wakinpiqa tapukunim haykapiraq ñakariykuna tukunanmanta.

Rosa: Qayninpa hamuptiymi rimarqanchik ñakariykunata chinkachinanpaq Dios atiyniyoq kaspanpas, imanasqa manaraq chinkachisqanmanta, ¿yuyachkankichu?

Sofia: Arí, yuyachkanim.

Rosa: Chaymanta Biblia ima nisqanmanta manaraq rimachkaspayá imamanta rimasqanchikta wakinta yuyariykusun.

Sofia: Allinmi, yuyariykusunyá.

Rosa: Yacharqanchikmi ñawpa tiempopi huk runa imanasqa ñakariykuna kasqanmanta tapukusqanta, chayna tapukusqanmantaqa Diosqa manam piñakurqachu manataqmi chay runaqa mana iñiyniyoq kasqantachu qawachirqa.

Sofia: Chaymantaqa manam yacharqanichu.

Rosa: Yacharqanchiktaqmi Jehova Diosqa ñakarisqanchikta mana allinpaq qawasqanmanta. Bibliam willawanchik runankuna ñakariptin Diospas ‘ñakarisqanmanta’b otaq llakipayawasqanchikmanta. ¿Manachu kallpanchawanchik chayna kasqanmanta yachasqanchikqa?

Sofia: Arí kallpanchawanchikmi.

Rosa: Rimarqanchiktaqmi ñakariykunata chinkachinanpaq Jehova Diosqa Tukuy atiyniyoq kasqanmantapas.

Sofia: Atiyniyoq kachkaspanqa, ¿imanasqataq permiten tukuy mana allinkunata?

Rosa: Chaymanta allinta entiendenapaqyá qawasun Bibliapi Genesis libropa ima nisqanta. ¿Uyarirqankichu Adanmantawan Evamanta chaynataq mana mikunankupaq kaq frutamantapas?

Sofia: Arí, catecismopim yachachiwarqaku. Diosmi nirqa huk sachapa rurunta ama mikunankupaq chaytam paykunaqa mana kasukurqakuchu.

Rosa: Allinmi chay nisqaykiqa. Ichaqa chayta manaraq mikuchkaptinku ima pasasqanmanta puntata yachaykusun, chayqa tupanmi imanasqa ñakarisqanchikwan. Leeykuy Genesis 3:1-5 nisqankunata.

Sofia: Ninmi: “Tayta Diospa purunpi llapallan animalkuna unanchasqanmantam culebra aswan sacre karqa. Culebram warmita nirqa: ‘Diosqariki nisurqankichik: “Huertapi llapa sachakunapa ruruntaqa amam mikunkichikchu” nispam ¿aw?’ Chaymi warmiñataq culebrata nirqa: ‘Huertapi sachakunapa ruruntaqa mikunikum. Ichaqa Diosmi nirqa: “Huertapa chawpinpi sachapa ruruntaqa amam mikunkichikchu nitaqmi llachpankichikpaschu, mana chayqa wañuruwaqchikmi”’ nispa. Chaymi warmita culebra nirqa: ‘Manapunim wañunkichikchu. Diosmi yachan, maypacham mikuruspaqa ñawikichik kicharikuruptinmi kikin Dios hinaña allin kaqtapas hinaspa mana allin kaqtapas yachaqña rikurirunkichik’” nispa.

Rosa: Leesqaykiman hinayá sapa versiculopa ima nisqanpi reparasun. Puntatam nin culebrawan Eva rimasqanmanta. Bibliaqa nintaqmi chay culebraqa Satanas Diablo kasqanmanta.c Paymi Evata tapurqa Diospa prohibisqa ruruta mana mikunankupaq kasqanmanta. ¿Imataq Adantawan Evata pasanan karqa Diospa prohibisqan ruruta mikuruptinkuqa?

Sofia: Wañunankus kasqa.

Rosa: Awriki. Chaynata nispanmi Diabloqa Diospa contranpi kaynata nirqa: “Manapunim wañunkichikchu”, nispa. Chayna nisqanwanqa munarqam Diosqa llulla kasqanmanta Eva piensananta.

Sofia: Chaytaqa manam yacharqanichu.

Rosa: Chayna nisqanwanmi Satanasqa pi ciertota rimaq kasqanmanta iskayrayayta qallaykachirqa, yachanapaqqa unay tiempom pasanan karqa. ¿Yachankichu imanasqa?

Sofia: Manam.

Rosa: Kay rikchanachiypi piensarisun. Huk punchaw kutimuspay nikiman qanmantaqa ñoqam aswan kallpayoq kasqaymanta. ¿Imaynatam yachawaq chayqa cierto otaq llulla kasqanmanta?

Sofia: Ichapas kallpawan ruwanapaq kaqta ruwaspa.

Rosa: Awriki, ichapas ima llasaqtapas hoqarispa qawachichwan mayqenninchik kallpayoq kasqanchikta, chay ruwayqa manam sasachu.

Sofia: Chaynamiki.

Rosa: Ichaqa hukkunapa qayllanpi nikiman “qamqa llullam kanki” nispa, ¿chaytaqa chayllachu qawachiwaq rimasqay cierto otaq llulla kasqanta?

Sofia: Manachá.

Rosa: Chaytaqa manachá qawachichwanchu mayqenninchik astawan kallpayoq kasqanchiktaqa.

Sofia: Manamiki.

Rosa: Tiempo pasasqanman hinachá qawachiwaq hukkunapa qayllanpi mana llulla kasqaykita.

Sofia: Chay nisqaykiqa ciertomiki.

Rosa: Kaqmanta piensarisun Genesis libropa nisqanpi. ¿Diabloqa nirqachu Diosmanta astawan atiyniyoq kasqanta?

Sofia: Manam.

Rosa: Satanasqa Evamanmi huk rimaypiqa kaynata nirqa: “Diosqa llullakusuchkankim, ñoqam ciertotaqa nichkayki”, nispa.

Sofia: Chayqa admirakuypaqmi.

Rosa: Diosqa yachayniyoqmi, chaymi saqerqa tiempo pasasqanman hina pi llulla kasqanmanta cuentata qokunankupaq.

Sofia: Eva wañuruptinqa Diosqa qawachirqañam mana llullakusqanta, ¿icha manachu?

Rosa: Awriki, ichaqa Satanaspa nisqanqa manam chayllapichu tukurqa. Kaqmanta qawaykusunchik 5 kaq versiculota. ¿Imatawanraqmi Diabloqa Evaman nirqa?

Sofia: Frutata mikuruptin ñawin kicharikunanpaq kasqanmanta.

Rosa: Awriki, mikuruspanqa “Dios hinaña allin kaqtapas hinaspa mana allin kaqtapas” yachananpaq kasqanmantam nirqa. Chayna nisqanwanpas Satanasqa Diostam nichkarqa allinninkupaq kaqkunata runakunaman mana qosqanmanta.

Sofia: Manam chaypiqa reparasqanichu.

Rosa: Chaynata nispanqa Diospa contranpim rimachkarqa.

Sofia: ¿Imaynanpi?

Rosa: Huk rimaypiqa Evamanmi Satanasqa nichkarqa runakunaqa Diosmanta karunchakuspankuqa allin kawsakunankupaq kasqanmanta. Chaymi Jehova Diosqa pim llulla kasqanta qawachinanpaq Diablota saqerqa huk tiempollapas kay Pachapi munaychakunanpaq. Chayraykum runakunaqa tukuy ñakariykunapi tarikunchik kay Pachaqa Diablopa makinpi kasqanrayku.d Ichaqa ama hukmanyaychu, allin noticiakunamanta willasqayki.

Sofia: ¿Ima allin noticiakunamanta?

Rosa: Bibliam Diosmanta allin noticiakunata willawanchik. Ninmi imawan ñakariptinchikpas ñoqanchikpi reparasqanmanta. Rey Davidmi tukuywan llumpayta ñakarirqa, chaymi Diosmanta kaynata nirqa. Leeykusun Salmo 31:7 nisqanta. Ninmi: “Llumpayta kuyapayawasqaykiraykum kusikusaq. Qamllamiki ñoqapa ñakarillasqaykunataqa qawarqanki. Qamllamiki ñoqapa sasachakuyniykunataqa yacharqanki”, nispa. Davidqa tukuywan ñakarispanpas manam hukmanyarqachu, payqa yacharqam Jehova Dios paypi reparasqanmanta. Imayna tarikusqanchikmanta runakuna mana reparaptinpas Diosqa yachanmi sonqonchikpi llakisqa kasqanchikta, ¿manachu qamtapas consuelasunki Diosqa runakunapi reparasqanmanta yachasqayki?

Sofia: Arí, consuelawanmi.

Rosa: Chaymantapas Bibliapa nisqanman hinam Diosqa mana permitinqachu hinalla ñakarinanchiktaqa. Hinaspapas ninmi, Satanaspa munaychakuyninta chaylla chinkachinanpaq kasqanmanta chaynataq tukuy ñakarichiwaqninchikta chinkachinanpaq kasqanmantapas. Bibliapa chayna nisqanpi imanasqa confianapaq kasqanmanta astawan yachananchikpaq, ¿kutimuymanchu huknin semanata?e

Sofia: Allinmi kanman, kutimunkiyá.