BIBLIAMANTA TAPUKUYKUNA

Diosqa mana rikuy atina espiritum. Paymi cielopipas chaynataq kay pachapipas tukuy imata unancharqa. Paytam ichaqa mana pipas unancharqachu (Salmo 90:2). Diosqa munanmi runakuna payta maskanankuta chaynataq imayna kasqanmanta yachanankutapas. (Leey Hechos 17:24-27.)

Diospa sutintaqa yachachwanmi chaynataq imayna kasqanmantapas tukuy unanchasqankunapi reparaspa (Romanos 1:20). Payta allinta reqsinapaqqa Palabrantam estudiananchik, chaywanmi Diospa sumaq kayninkunamanta allinta yachasunchik. (Leey Salmo 103:7-10.)

Jehova Diosqa cheqninmi mana allin ruwaykunata, pay hina sentimientoyoqtam unanchawarqanchik. Chaymi wakinqa mana allin ruwaykunata cheqninchik (Deuteronomio 25:16). Mana allinkuna kasqanmantaqa manam Dioschu huchayoq. Payqa runakunatam unanchawarqanchik imapaqpas tanteakuqta, chaymi wakinqa mana allinkunata ruwanankupaq tanteanku. Chayna ruwasqankuta qawaspanmi Jehova Diosqa sonqonpi llumpayta llakikun. (Leey Genesis 6:5, 6; Deuteronomio 32:4, 5.)

Jehova Diosqa allin ruwaykunatam kuyan, mana allin ruwaykunataqa manam wiñaypaqchu saqenqa (Salmo 37:28, 29). Bibliam willakun mana allin ruwaykunaqa chaylla chinkachisqa kananmanta. (Leey 2 Pedro 3:7-9, 13.)