Bautizaq Juan hinayá kusikuywan Diospaq llamkasun

YAQAPASCHÁ huñunakusqanchik lawpi yanapakuytaña munachkanchik, ichaqa manapaschá haypayta atinchikraqchu. Yaqapaschá huk kaqnin iñiqmasinchik hina yanapakuyta munanchik, utaq ñawpaqpi imapas ruwasqanchikta kaqllamanta ruwayta munanchik. Ichaqa yuyaqyarusqanchikrayku, unqusqanchikrayku, qullqichanchik mana kasqanrayku utaq ayllunchikpaq imachallatapas ruwasqanchikraykuchá manaña haypakunchikchu munasqanchik kaqkunapi yanapakuytaqa. Achka watakunaña tukuy imapi yanapakuchkaspapas wakinpiqa Diospa llaqtan saqinanchikpaq niwasqanchikraykupaschá saqirqanchik. Imaynaña kaptinpas, wakinpiqa Jehova Diospaq ruway munasqanchikkunata mana ruwasqanchikpaqchá hapikunchik. Chaykunaraykum, wakinpiqa hukmanyasqa tarikunchik. Chaynaqa, ¿imatam ruwachwan mana hukmanyarunapaq hinaspa mana chaylla piñakurunapaq? ¿Imam yanapawasun kusikuywan hinalla yanapakunapaq?

Bautizaq Juantayá qatipakusun. Payqa Jehova Diospaqmi tukuy tiemponwan llamkarqa. Ichaqa manachá mayllanmantapas yacharqachu carcelpi kananmantaqa. Carcelpi kasqanraykum manaña anchatañachu Jehova Diospaqa ruwarqa. Chaywanpas, kusisqam wañukunankama Jehova Diospaq atisqanta ruwarqa. ¿Imam yanaparqa kusisqa kananpaq? ¿Imam yanapawasun ñuqanchiktapas mana chaylla hukmanyarunapaq?

29 watapa abril killanpichusmi, Jehova Diospa kamachisqanman hina Juanqa Diospa akllasqan runa chayamunanmanta runakunaman willayta qallaykurqa. Nirqam: “Hanaq pacha Diospa munaychakuynin hichparamusqanraykuyá huchaykichikmanta wanakuychik”, nispa (Mat. 3:2; Luc. 1:12-17). Chaymi achka runakuna iñikurqaku. Achkallay-achka runakunataqmi huk law llaqtakunamanta hamurqaku Juanpa willakusqanta uyarinankupaq, achkaqtaqmi huchankumanta wanakuspanku bautizakurqaku. Juanqa mana manchakuspam fariseokunatawan saduceokunata nirqa huchankumanta mana wanakuspankuqa wiñaypaq chinkachisqa kanankumanta (Mat. 3:5-12). 29 watapa octubre killanchusmi aswan kusikunanpaqraq karqa, chay watapimriki Jesusta bautizarqa. Chaymantapacham, llapallan runakunata Jesuspi iñikunankupaq nirqa, Jesusqariki suyasqanku runam karqa (Juan 1:32-37).

Bautizaq Juan Diospa nisqanta ruwananpaq kallpanchakusqanmantam Jesus nirqa: “Warmimanta nacemuqkunamantaqa manam pipas rikurimurqachu bautizaq Juanmanta aswan riqsisqaqa”, nispa (Mat. 11:11). Juanqa chanincharqachá Jehova Diospaq imapas ruwasqantaqa, kusikurqataqchá Jehova Dios kuyakuyninpi imapas qusqankunawan. Pay hinam, kunanpas tukuy sunqunkumanta Diospaq llamkaq iñiqmasinchikkunaqa kusisqa kachkanku Jehova Diospa tukuy ima qusqanwan. Tukuy tiemponkuwan llamkaq iñiqmasinchikkunamanta huk kaqninmi iñiqmasinchik Terri, payqa warmichan Sandrapiwanmi 50 wata masninña tukuy tiemponkuwan Diospaq llamkachkanku. Iñiqmasinchik Terrim willakun: “Diospa llaqtanpiqa achka ruwaykunapim yanapakurqani. Yanapakurqanim 70 horata Diosmanta willakuspay, betelpi, 130 horata Diosmanta willakuspay hinaspa llaqtan-llaqtan iñiqmasinchikkunata watukuspay. Kunanqa kaqllamantam 130 horata Diosmanta willakuypi yanapakuchkani”, nispa. Chayna yanapakuyqa anchatam kusichiwanchik. Ichaqa, manam Diospa llaqtanpi imapas ruwasqallanchikmantachu kusikuyninchikqa kanan. Ñawpaqpi hina manaña yanapakuspapas kusisqa kaytaqa atichwanmi. Chaypaqqa tukuyta ruwaspam Bautizaq Juan hina kallpanchakunanchik kanqa. Chaymantayá astawan yachasun.

Jehova Diosmanta tukuy ima chaskisqanta chaninchasqanraykum Bautizaq Juanqa kusisqa tarikurqa. Chayna kasqanqa sutillam qawakun Jesuspa qatiqninkuna mirasqanta qawaspan mana piñapakusqanwan nitaq hukmanyasqanwan. Jesuspa qatiqninkuna mirasqanta qawaspam, Juanpa qatiqninkunañataq piñapakuspa hukmanyarqaku. Hinaspam nirqaku: “Yachachikuq, Jordan mayupa wak lawninpi qanwan kaq runam bautizachkan hinaptinmi payman llapallanku asuykuchkanku”, nispa (Juan 3:26). Juanñataqmi nirqa: “Noviayuq kaqqa noviom. Noviopa amistadninmi ichaqa anchallataña kusikun noviopa [...] rimasqanta uyarispan. Chayraykum ñuqaqa ancha kusisqallaña kachkani”, nispa (Juan 3:29). Juanqa manam hukmanyarqachu Jesuspa qatiqninkuna mirasqanwanqa, nitaqmi ruwaynintapas mana kaqpaqta hinachu qawarqa. Aswanmi ruwasqanta chaninchaspan kusisqa kawsakurqa.

Juantaqa mana chaylla imawanpas hukmanyaruq kasqanmi yanaparqa ruwaynin sasa kaptinpas kusikuywan ruwananpaq. Juanqariki Diospaq sapaqchasqam karqa mamanpa wiksanmantapuni, chayraykum payqa vinotapas mana mallinanchu karqa (Luc. 1:15). Chayraykum Jesus nirqa: “Juanqa hamurqa ayunaspa chaynataq vinota mana tomaspanmi”, nispa. Ichaqa, Jesuswan qatiqninkunaqa manam Juan hinachu karqaku (Mat. 11:18, 19). Juanqa runakunataqa manam hampirqachu nitaq kawsarichirqachu, Jesuspa qatiqninkunam ichaqa  (Mat. 10:1; Juan 10:41). Chayta yachachkaspanpas, Juanqa manam chayraykuchu hukmanyarqa, aswanmi atisqanman hina Jehova Diospa nisqanta ruwarqa.

Jehova Diospa llaqtanpi ruwasqanchikkunata chaninchaspaqa kusisqam kasunchik. Terrim willakun: “Anchatam kallpanchakurqani imapas niwasqankuta ruwanaypaq”, nispa. Tukuy tiemponwan Diospaq llamkasqanmantapas ninmi: “Mam ñakakunichu Diospaq tukuy ima ruwasqaymantaqa. Aswanqa sapa yuyarispam anchata kusikuni”, nispa.

Aswan kusisqaraqmi kasun imapas ruwasqanchikpi utaq yanapakusqanchikpi yuyaymanaspaqqa. Imachallata ruwaspapasriki “Diospa llamkaqmasinmi” kanchik (1 Cor. 3:9). Imaynam alaqa rumipas unay watayuqña kachkaspanpas hina kaqchalla, chaynam kusikuyninchikpas hina kaqlla kanqa Diospaq imapas ruwasqanchikkunapi yuyaymanaptinchikqa. Chaynaqa amayá nisunchu “ruwasqaykunamantaqa paypa ruwasqankunam aswan allin” nispaqa. Aswanqa sapakamayá qawakusun imapas ruwasqanchik imayna kasqanta, chaynapi kikinchikpa ruwasqanchikwan kusikunapaq (Gal. 6:4).

Juanqa yaqapaschá yacharqa ruwayninqa mana unay kananmanta. Ichaqa manapaschá yacharqachu imayna tukurunantaqa (Juan 3:30). 30 watapim, Jesusta bautizarusqanmanta 6 killa pasayllata kamachiq Herodes carcelpi wichqarachirqa. Chaywanpas, Juanqa Jehova Diospaqmi atisqanta ruwarqa (Mar. 6:17-20). ¿Imam yanaparqa carcelpiña kachkaspapas kusisqalla kananpaq? Jehova Diospaq ruwaypi kallpanchakusqanmi.

Juanqa carcelpi kachkaspanmi Jesuspa tukuy ima ruwasqankunamanta yacharurqa (Mat. 11:2; Luc. 7:18). Payqa manam iskayrayarqachu suyasqanku runa Jesus kasqanmantaqa, ichaqa yaqapaschá nikurqa, “¿paychu tukuy imata ruwanqa willakuykunapa nisqanman hina?”, nispa. Willakuykunapa nisqanman hina Jesus kamachiq kananmanta yachasqanraykuchá, yachayta munarqa Jesus haykapi kamachinanmanta. Hinaspapas yaqapaschá nikurqa: “¿Yaqachu payqa hurquykuwanqa carcelmanta?”, nispa. Chaykunamanta yachaykuyta munasqanraykum Juanqa qatiqninkunata kacharqa kaynata nispa Jesusta tapumunankupaq: “¿Qamchu kachkanki suyasqayku runa, icha huktachu suyasaqku?”, nispa (Luc. 7:19). Juanqa kusikuywanchá uyarirqa tapusqankumanta kutispa qatiqninkunapa willasqantaqa. Willarqakum Jesuspa kayna nisqanmanta: “Ñawsakunam qawakuchkanku, wistukunam purichkanku, leprawan unquqkunam sanoyachkanku, mana uyariqkunam uyarichkanku, wañuqkunam kawsarichkanku, wakchakunapas sumaq willakuytam uyarichkanku”, nispa (Luc. 7:20-22).

Juantaqa anchatachá kallpancharqa uyarisqanqa. Jesusqariki suyasqanku runamanta willakuykunapa nisqantam ruwachkarqa. Carcelmanta lluqsinanpaq, Jesus mana yanapananmanta yachaspanpas, tukuy ima ruwasqankunataqa manam yanqapaqchu hapirqa. Imaynaña tarikuspanpas Juanqa kusisqam kawsakurqa.

Juan hina Diospaq imapas ruwasqanchikpi kallpanchakuspanchikqa, mana hukmanyaruspam atipasun tukuy ima sasachakuykunatapas (Col. 1:9-11). Bibliata ñawinchaspa yuyaymanaymi yanapawasun, Diospaq ruwasqanchikkunaqa mana yanqa kasqanmanta yachanapaq (1 Cor. 15:58). Sandram nin: “Bibliata sapa punchaw ñawinchaymi yanapawarqa Jehova Diosman astawan asuykunaypaq hinaspa kikiypi hapipakunaymantaqa payllapi hapipakunaypaq”, nispa. Chaymantapas yuyaymanananchiktaqmi Diospa llaqtan tukuy ima ruwasqanpi. Chayta ruwaspaqa, manam imapas pasawasqallanchiktachu qawasun, aswanqa Jehova Diospa llaqtan ruwasqankunatam. Sandraqa ninraqmi: “Sapa killa lluqsimuq yachachikuyta (JW Broadcasting^®) qawaspaykum, Diospa llaqtanwan huk ayllu hinalla tarikuniku hinaspapas kusisqallañam ruwayniykupi kachkaniku”, nispa.

Bautizaq Juanqa ruwaynintam ruwarqa Elias hina. Eliasqa anchatam kallpanchakuq Jehova Diospaq imapas ruwaypi, chaynam Juanpas karqa. Chaymantapas Juanqa karqa ñuqanchik hina runam (Luc. 1:17; Sant. 5:17). Imapas ruwasqanchikta chaninchaspa hinaspa Jehova Diospaq Juan hina llamkaspaqa, imaña kaptinpas kusisqam tukuy imata Jehova Diospaq ruwasun.