Diosmi atiyninwan akllan hanaq pachaman riqkunata

1, 2. ¿Imataq pasakurqa 33 kaq watapi pentecostes sutiyuq hatun punchawpi?

KIMSA chunka kimsayuq kaq watapim, pentecostes sutiyuq hatun punchawpi, Jesuspa 120 qatiqninkuna wasipa altosninpi huñunasqa kachkarqaku (Hech. 1:13-15; 2:1). Chaypiqa kachkarqaku hina llaqta ukupi qipakunankupaq Jesus nisqanraykum. Chaypim Jehova Diospa atiyninta chaskinanku karqa (Hech. 1:4, 5).

² Chayna kachkaspankum “qunqayllamanta uyarirurqaku [hanaq pachamanta] hamuq sinchi wayrapa qapariyninta hina, chaymi wasipas qapariyninwan huntarurqa. Hinaptinmi lenguachkaq nina hina rikurirurqa hinaspam chiqiruspan sapakamapa hawanman tiyaykurqa. Chaymi llapallankuman [Diospa atiynin huntaykurqa]” (Hech. 2:2-4). Chaynatam Jehova Diosqa atiyninta quykurqa chaypi kaqkunaman (Hech. 1:8). Jehova Diosqa paykunatam puntata akllaykurqab hanaq pachamanta Jesuswan kuska kamachimunankupaq.

 3. Jesuspa qatiqninkunaqa, ¿ima pasakusqanwanmi musyakurqaku Jehova Diospa akllaykusqan kasqankuta?

³ Pachak iskay chunka Jesuspa qatiqninkunaqa, manachá qunqarqakuchu chay punchawpi lenguachkaq nina hina paykunaman tiyaykuptin Jehova Diospa atiynin huntaykusqantaqa. Manataqchá qunqarqakuchu huk rimaykunataña rimayta qallaykusqankutapas (Hech. 2:5-12). Chaykunawanchá yacharqaku paykunata Jehova Dios akllaykusqanta. Ichaqa, ¿sapa kutichu Jehova Diosqa chaynallata akllan hanaq pachaman riqkunata? Manam.

 4. Ñawpaqta, ¿chaynallatachu Jehova Diosqa akllarqa hanaq pachapaq kaqkunata?

⁴ Pentecostes sutiyuq hatun punchawpiqa, pachak iskay chunkam hanaq pachapaq akllasqa karqaku, hina chay punchawllapitaqmi 3.000 runakunapas bautizakusqankupi akllasqa karqaku (Hech. 2:37, 38, 41). Samaria llaqtayuqkunam ichaqa bautizakusqankumanta qipataña akllasqa karqaku (Hech. 8:14-17). Corneliowan ayllunñataqmi manaraq bautizakuchkaspa akllasqa karqaku (Hech. 10:44-48). Qawasqanchikman hinapas Jehova Diosqa manam llapallankutachu chaynallata akllarqa.

 5. 2 Corintios 1:21, 22 nisqanman hina hanaq pachapaq akllasqa kaqkunaqa, ¿iskayrayankuchu akllasqa kasqankumanta?

⁵ Hanaq pachapaq kaqkunata Dios akllaykuptin, ¿imaynam tarikunku? Wakinkuqa mana chaypaq hina kasqankupaqchá hapikunku, utaq nikunkupaschá: “¿Imaynanpitaq ñuqataqa akllaykuwan?”, nispa. Ichaqa imaynaña tarikuspankupas, manam iskayrayankuchu Jehova Dios hanaq pachapaq akllaykusqanmantaqa. Pablopas nirqam iñisqankurayku Diospa atiyninwan sellasqac kasqankumanta. Hinaspa chayrayku hanaq pachapi kawsakunankumanta mana iskayrayasqankuta (Efes. 1:13, 14). Arí, Dios yanapaykuptinmi akllasqa kasqankumantaqa mana iskayrayankuchu (qaway 2 Corintios 1:21, 22).

 6. Hanaq pachapaq akllasqakuna, ¿imaynam kananku?

⁶ Pitapas Jehova Dios hanaq pachapaq akllaykuptinqa, ¿chayraykuchu nichwan hanaq pachaman imaynapas rinanmantapuni? Manam. Apostol Pablopas nirqam: “Wawqi-panillaykuna anchatayá kallpanchakuychik qayasqa hinaspa akllasqa kasqaykichikman hina allinta takyanaykichikpaq. Tukuy chaykunata hinalla ruwaspaykichikqa manam haykapipas pantankichikchu”, nispa (2 Ped. 1:10). Chaynaqa, hanaq pachapaq akllasqakunaqa Diosman sunqu kaspallam hanaq pachamanqa rinqaku (Filip. 3:12-14; Heb. 3:1; Apoc. 2:10).

 7. Hanaq pachapaq kaqkunaqa, ¿imaynatam yachanku hanaq pachapaq akllasqa kasqankuta?

⁷ Hanaq pachapaq kaqkuna akllasqa kasqankuta imaynata yachasqankumantam Pablo nirqa: “Diospa espiritunqa manam sirviente kanapaqchu nitaq manchakuq kanapaqchu churawanchik, aswanqa yanapawanchikmi Diospa churinkuna hinaña kananchikpaq, chuya espirituwanmi “¡abba tayta!” nispa qayakunchik. Diospa [atiyninmi] sunqunchikpi sutillata qawachin Diospa churinkuna kasqanchikta”, nispa (Rom. 1:7; 8:15, 16). Chaynaqa, Jehova Diosmi paykunataqa yanapan, hanaq pachaman rinankupaq akllasqa kasqankumanta mana iskayrayanankupaq (1 Tes. 2:12).

 8. 1 Juan 2:20, 27 nisqanman hinaqa, ¿imaynanpitaq hanaq pachapaq akllasqa kaqkunataqa, mana hukraqchu ninan hanaq pachapaq akllasqa kasqankumantaqa?

⁸ Hanaq pachaman riqkunataqa, Jehova Diosmi yanapan hanaq pachapi kawsanankumanta mana iskayrayanankupaq (qaway 1 Juan 2:20, 27). Paykunaqa ñuqanchik hinataqmi yachachisqa kanku. Hanaq pachapaq akllasqa kasqankumantam ichaqa kikinku sumaqta yachakunku, manam hukraqchu ninan hanaq pachapaq akllasqa kasqankutaqa. Chaymanta mana iskayrayanankupaqmi paykunataqa Jehova Dios atiyninwan yanapan.

 9. Efesios 1:18 nisqanman hinaqa, ¿imatam munanku hanaq pachapaq akllasqakunaqa?

⁹ Ñuqanchikqa ichapas nichwan: “¿Imaynaya tarikunku hanaq pachapaq akllasqakunaqa?”, nispa. Ñuqanchikqa chaytaqa manam yachachwanchu hanaq pachapaq akllasqa mana kasqanchikrayku. Jehova Diosqariki manam unanchawarqanchik hanaq pachapi kawsanapaqchu (Gen. 1:28; Sal. 37:29). Chaywanpas akllarunmi llapallanchikmanta wakinta hanaq pachapi kawsanankupaq. Chaymi paykunaqa hanaq pachapi kawsakuytaña munanku (qaway Efesios 1:18).

10. ¿Ima ninantaq ‘musuqmanta naceyqa’? (Qaway uray patanpi willakuyta).

¹⁰ Musuqmanta naceyqad Jehova Diospa akllaykusqan ninanmi. Ñuqanchikqa chay iñiqmasinchikpa imayna tarikusqanmantaqa manam yachaytaqa atichwanchu. Jesuspas nirqam imayna tarikusqankumantaqa hanaq pachapaq akllasqakunalla yachasqankuta (Juan 3:3-8).

11. Hanaq pachapaq kaqkunaqa Diospa akllaykusqan punchawmanta, ¿imatañam munanku?

¹¹ Hanaq pachapaq kaqkunaqa manaraq hanaq pachapaq akllasqa kachkaspankum, kay allpa pachapi kawsakuyta anchata munarqaku, munarqakutaqmi ayllunku kawsarimuptin paykunawan kuska kaytapas. Jehova Diospa akllaykusqan punchawmantam ichaqa hanaq pachapi kawsakuytaña munanku. Chaynaqa tarikunku manam kay allpa pachapi kawsakuyta yanqapaq hina hapisqankuraykuchu, nitaqmi sasachakuykunawan hukmanyasqa tarikusqankuraykuchu, aswanqa Jehova Diosña akllaykusqanraykum.

12. 1 Pedro 1:3, 4 nisqanman hinaqa, hanaq pachapaq akllasqa kasqankumanta yachaykuspa, ¿imaynam tarikunku?

¹² Hanaq pachapaq akllasqa kaqkunaqa, ichapas ninku hanaq pachaman rinankupaq hina mana kasqankuta, chayna tarikuspankupas manam iskayrayankuchu hanaq pachaman rinankumantaqa. Ancha-anchatataqmi kusikunku hanaq pachaman rinankupaq akllasqa kasqankuta yachaykusqankuwan (qaway 1 Pedro 1:3, 4).

13. Hanaq pachapaq akllasqakunaqa, ¿mana kaqpaqta hinachu kay pachapi kawsakusqankuta qawanku?

¹³ Hanaq pachapaq kaqkuna akllasqa kasqankuta yachaykuspanku kusikusqankuwanqa, manam kay pachapi manaña kawsakuyta munasqankutachu nichkanku. Apostol Pablopas hanaq pachapaq akllasqakunapa aychantawan tullunta huk wasiwan tupachirqa, hinaspam nirqa: “Kay wasipi kaqkunaqa ñakarispanchikmi ‘¡ay!’, ‘¡ay!’ nichkanchik, ñuqanchikqa manam munanchikchu kay wasita pachata hina hurqukuruytaqa, aswanqa munanchikmi hanaq pacha wasi chaskiyta. Chaynapi wañuruqlla kaqpa rantinpi kawsakuyña kananpaq”, nispa (2 Cor. 5:4). Chaynaqa, paykunaqa manam hanaq pachaman pasakuytañachu nitaq wañukuytañachu munanku. Aswanqa kay pachapiraq kachkaspam, ayllunkuwan kusisqa kawsakuyta, hinaspa riqsinakusqankunawan tukuy ima ruwayta munanku, chaynataq Diosmanta willakuytapas. Chaywanpas hanaq pachapi kawsakuyninkutaqa manam qunqankuchu (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. ¿Tukuy sunqumanta yanapakusqanchikraykuchu nichwan hanaq pachapaq akllasqaña kasqanchikta?

¹⁴ Nikunkichá: “Ñuqaqa Diosllapaqñam kawsakuni, kusisqallañataqmi Diosmantapas willakuni, kallpanchakunitaqmi bibliayta ñawinchanaypaqpas chaynataq imamantapas sumaqta yachanaypaq, musyakunitaqmi willakuptiy Jehova Dios yanapawasqantapas, hukkunatapas allintam yanapani Jehova Diospa munasqanman hinaña kawsakunankupaq, musyakunitaqmi imapipas Jehova Dios yanapawasqanta”, nispa (1 Cor. 2:10). Chayrayku ichapas niwaq: “Ñuqatapas chaynaqa akllaykuwanchiki”, nispa. Ichaqa chayna nisqaykiwanqa iskayrayachkankiñam, chayna iskayrayaspaqa manam hanaq pachapaq akllasqachu kanki. Hanaq pachapaq akllasqakunaqa, manam iskayrayankuchu hanaq pachaman rinankumantaqa. Tukuy imapi kusisqallaña yanapakuspapas, manam chayraykuchu nichwan hanaq pachapaq akllasqa kasqanchiktaqa, ¿imaynanpi? Llapallan Diosta yupaychaqkuna chayna tarikusqankuraykum. Chaymantapas Jehova Dios pitañapas chayna tarikunankupaq atiyninwan yanapasqanraykum.

15. ¿Diospa atiyninwan yanapasqa kasqankuraykuchu nichwan llapallan hanaq pachapaq akllasqa kasqankuta? ¿Imaynatam chayta yachanchik?

¹⁵ Bibliapas niwanchikmi Jehova Dios atiyninwan runankunata yanapasqanmanta, ichaqa manam chayraykuchu hanaq pachapaq akllasqa karqaku. Chay atiyninwan yanapasqanmanta kaqkunam kamachiq David hinaspa bautizaq Juan (1 Sam. 16:13; Luc. 1:13-16). Davidqa Jehova Dios atiyninwan yanapaykusqanraykum tukuy ima kaqkunatapas sumaqta yacharqa, chaynataq Diospa nisqankunatapas qillqarqa (Mar. 12:36). Jehova Dios atiyninwan yanapaptinpas Davidqa manam hanaq pachamanqa rirqachu (Hech. 2:34). Bautizaq Juantapas Jehova Diosqa atiyninwanmi yanapaykurqa, chayraykum Jesuspas nirqa: “Warmimanta nacemuqkunamantaqa manam pipas rikurimurqachu bautizaq Juanmanta aswan riqsisqaqa”, nispa. Chaywanpas Juanqa manam hanaq pachapaqchu karqa (Mat. 11:10, 11). Paykunata Jehova Dios atiyninwan yanapaptinpas, paykunaqa manam hanaq pachapaqchu karqaku. ¿Imanasqataq manaqa? ¿Tukuy sunqunkumanta Diosta mana yupaychasqankuraykuchu? Manam. Aswanqa kay pachapi kawsakunankuta Jehova Dios munasqanraykum (Juan 5:28, 29; Hech. 24:15).

16. ¿Maypi kawsakuytam munanku achkallay-achka runakuna?

¹⁶ Abrahan, Sara, David hinaspa bautizaq Juan chaynataq llapallan ñawpaq tiempopi Diosta yupaychaqkuna hinam, kunanpas achkallay-achka Diosta yupaychaqkuna kay pachapi kawsakuyta munanchik (Heb. 11:10).

17. ¿Imakunamantam hawanta yachasun?

¹⁷ Hanaq pachapaq akllasqa kaqkunamanta wakinqa kay pachapiraqmi kachkanku (Apoc. 12:17). Chayrayku ichapas nichwan: “¿Imaynataq kananku hanaq pachapaq akllasqakunaqa? Chaymantapas, ¿imaynatam paykunata qawananchik Jesuspa wañukusqanta yuyarisqanchikpi, tantata mikuptinku chaynataq vinota tomaptinku? Hinaspa, ¿hukmanyanchikchu watakuna pasasqanman hina tantata mikuqkuna chaynataq vinota tomaqkuna yapakusqanwan?”, nispa. Kaykunamantam hawanta yachasun.