Amayá hatun tukuqqa kasunchu

 1. ¿Imatam Davidqa nirqa Jehova Diosmanta?

TAYTANCHIK Jehovaqa mana hatun tukuq llampu sunqum. Chayna kasqanmantam Davidpas kaynata nirqa: “Qanmi harkachikunawan pakaykuwanki mana wañunaypaq, llampu sunqu kasqaykim hatunchawan”, nispa (2 Sam. 22:36, TNM; Sal. 18:35). Chaynata nispanqa ichapas Davidqa yuyaymanachkarqa Israel nacionpa kamachiqnin kananpaq payta Samuel akllasqanpi. Davidtaqa wawqinkunamanta sullka kachkaptinpas Saulpa rantinpi kamachiq kananpaqmi Jehova Diosqa churaykurqa (1 Sam. 16:1, 10-13).

 2. ¿Imamantam kay yachachikuypi yachasunchik?

² David hinam Salmos qillqata huk kaqnin qillqaqpas taytanchik Jehovamanta kaynata nirqa: ‘Hanaq pachatawan kay pachatam kumuykuspa qawamuchkan. Wakcha runatam allpamanta hatarichin, usuq runatam mana imayuq kasqanmanta hatarichin. Kamachikuqkunawan tiyaykachinanpaqmi huqariykun’, nispa (Sal. 113:6-8). Kaypim yachasunchik imakunapi Jehova Diosqa mana hatun tukuq kasqanta qawachisqanmanta hinaspa chaymanta imata yachasqanchikmanta. Yachasunchiktaqmi Saulpa, Danielpa hinaspa Jesuspa llampu sunqu kasqankuta imayna qatipakunamantapas.

 3. ¿Imaynam Jehova Diosqa runakunawan, hinaspa imayna kasqantam chayqa qawachiwanchik?

³ Jehova Diosqa pantaq runakuna kaptinchikpas pay yupaychananchiktam munan, munantaqmi paypa kuyasqan kananchiktapas. Chayna kasqanwanmi qawachiwanchik mana hatun tukuq kasqanta (Sal. 25:14). Paywan kuyachikuytaqa atinchik kikin Jehova Diosninchik huchanchikrayku wañunanpaq churinta kachamusqanraykum.

 4. ¿Imayna kanapaqmi Jehova Diosqa unanchawarqanchik, hinaspa imanasqa?

⁴ Jehova Diosninchikqa kikinchikmanta imatapas tantiakuy atiqtam unanchawarqanchik, chayna kasqanwanmi qawachiwanchik mana hatun tukuq kasqanta. Jehova Diosqa munan kikinchik sunqumanta tantiakuspa payta kuyananchiktam hinaspa kasukunanchiktam. Chayta ruwaspaqa kusisqam tarikusun (Deut. 10:12; Is. 48:17, 18). Ancha kusisqamá tarikunchik taytanchik Jehovaqa chayna mana hatun tukuq kasqanmanta.

 5. ¿Imaynatam Jehova Diosqa mana hatun tukuq kasqanta qawachiwanchik? (Qaway qaranpi kaq dibujota).

⁵ Jehova Diosqa pimantapas aswan yachayniyuq kachkaspanpas hukkuna yanapaykunantam saqin, chayna kasqanwanpas mana hatun tukuq kasqantam qawachiwanchik. Chayraykum churin Jesus tukuy ima unanchaypi yanapaykunanta saqirqa (Prov. 8:27-30; Col. 1:15, 16). Chaymantapas, taytanchik Jehovaqa tukuy atiyniyuq kachkaspanpas manam sapallanchu imatapas ruwan. Chaymi munaychakuyninpi kamachinanpaq Jesusta churarun, 144.000 runakunatapas akllaruntaqmi Jesuswan kuska kamachimunankupaq (Luc. 12:32). Chaypaqmi Jehova Diosqa Jesusta yachachirqa allin kamachiq kananpaq (Heb. 5:8, 9). Yachachichkantaqmi churin Jesuswan hamuq tiempopi kamachimunankupaq akllasqa kaqkunatapas. Jehova Diosqa manapunim iskayrayanchu paypa munasqanman hina imatapas ruwanankumantaqa (Apoc. 5:10).

6, 7. ¿Imaynatam Jehova Diosta qatipakunmanku ayllunkupi nanachikuqkuna hinaspa iñiqkunapi punta apaqkuna?

⁶ Jehova Diosninchikqa sapallan imata ruway atiq kachkaspanpas hukkuna yanapaykunantam saqin. Chaynam ñuqanchikpas kananchik. ¿Imaynatam Jehova Diosta qatipakunmanku ayllunkupi nanachikuqkuna hinaspa iñiqkunapi punta apaqkuna? Imapas ruwayninkutam hukkunaman tupachinanku, hinaspapas manam iskayrayanankuchu imayna ruwanankumantaqa. Chaynata ruwaspankuqa hukkunatam yachachinqaku mana manchakuspanku ima ruwaypipas yanapakunankupaq (Is. 41:10). ¿Imaynatawanraqmi paykunaqa Jehova Diosta qatipakunmanku?

⁷ Bibliam niwanchik Jehova Diosqa angelkunapa ima nisqankuta kusikuywan chaskisqanmanta (1 Rey. 22:19-22). ¿Imaynatam Jehova Diospa chayna kasqanta ayllunkupi nanachikuqkuna qatipakunmanku? Atikuptinqa churinkunatam tapunman imatapas imaynata ruwanankumanta. Wakinpiqa paykunapa nisqanman hinam ruwanmanku.

 8. ¿Imaynatam Jehova Diosqa Abrahanpaq hinaspa Sarapaq mana chaylla piñakuruq kasqanta qawachirqa?

⁸ Jehova Diosqa mana hatun tukuq kasqantaqa qawachintaqmi mana chaylla piñakuruq kasqanwanpas. Payqa serviqninkunataqa sumaqtam uyariykun. Chayna sumaq uyariykuq kasqantam qawachirqa Sodoma hinaspa Gomorra llaqtata chinkachinanpaq tantiasqanmanta Abrahan tapupayaptin (Gen. 18:22-33). Abrahanpa warmin Sara yuyaq kayninpiña wiksayakunanpaq nisqanmanta asikuptinpas Jehova Diosqa manam piñakurqachu, aswanqa kuyakuyllawanmi Sarataqa rimapayarqa (Gen. 18:10-14).

 9. ¿Imaynatawanraqmi ayllunkupi nanachikuqkunawan iñiqkunapi punta apaqkunaqa Jehova Diosta qatipakunmanku?

⁹ Aylluykipi nanachikuq utaq iñiqkunapi punta apaq kaspayki imapas tantiasqaykimanta hukkuna imatapas nisuptikiqa, ¿chayllachu imatapas nirunki? ¿Icha imapas nisqantachu sumaqta uyariykunki? Jehova Diosta qatipakuspayki mana chaylla piñakuruq kaptikiqa, aylluykipas chaynataq iñiqkunapas kusisqam tarikunqaku. Kaykamam yacharamunchik Jehova Diospa mana hatun tukuq kasqanmanta hinaspa chayna kasqanta imayna qatipakunamanta. Kunanñataq yachaykusun Saulmanta, Danielmanta hinaspa Jesusmanta.

10. ¿Imatam Jehova Diosqa palabranpi qillqachirqa?

¹⁰ Jehova Diosqa yachachiwaqninchik kasqanraykum palabranpi qillqachirqa serviqninkunapa imayna kasqankuta qatipakunamanta utaq mana qatipakunamanta (Is. 30:20, 21). Wakiqninkum llampu sunqu kaspanku Jehova Diosta kusichirqaku, wakiqninkuñataqmi mana, chaykunapim yuyaymanachwan (Sal. 37:37; 1 Cor. 10:11).

11. ¿Imatam yachachwan Saulpa mana allin ruwasqanmanta?

¹¹ Rimarisun kamachiq Saulmanta. Musullaraq kachkaspanqa mana hatun tukuqmi karqa. Chaymi kamachiq kananpaq niptinkupas mana chaypaq hinachu hapikurqa, hinaspapas kamachinanpaq churananku punchawmi pakakururqa (1 Sam. 9:21; 10:20-22). Ichaqa kamachiq kananpaq churasqanku qipamanmi hatun tukuq rikurirurqa, hinaspapas mana ruwanan kaqkunatam ruwarurqa. Huk kutipim Samuelta suyayta amiruspan kikinña animalkunata kañarurqa. Saulqa runankunata Jehova Dios yanapananpi mana hapipakuspanmi chayta ruwarurqa. Chayqa Samuelpa ruwanallanmi karqa. Chayraykum Jehova Diosqa Saulta qipancharurqa hinaspam paypa rantinpi huk kamachiqtaña churarurqa (1 Sam. 13:8-14). ¿Imatam yachachwan? Imapas ruwanallanchiktam ruwananchik, manam imatapas kikillanchikpi hapipakuspaqa ruwananchikchu.

12. ¿Imatam Danielmanta yachachwan?

¹² Kunanñataq rimarisun Diosmanta willakuq Danielmanta. Payqa manam kikillanpichu hapipakurqa. Payqa mana hatun tukuq hinaspa llampu sunqu kaspanmi haykapipas Jehova Diospa yanapakuyninta maskarqa. Nabucodonosor musqukuptin ima ninan kasqanta willaspanqa Danielqa manam kikinpa yachayllanwan willasqantachu nirqa, aswanqa Jehova Diospa yanapakuyninwan chay ruwasqantam riqsikurqa (Dan. 2:26-28). ¿Imatam kaymanta yachachwan? Wasin-wasin rispa utaq huñunakuykunapi suma-sumaqta yachachispanchikqa manam kikillanchikchu alabakunanchik, aswanqa Jehova Diospa yanapakuyninwan tukuy chay ruwasqanchiktam riqsikunanchik (Filip. 4:13). Chayna kaspanchikqa Jesustapas qatipakuchkanchikmi. Qatiqninpiyá paymanta yachaykusun.

13. Juan 5 nisqanman hinaqa, ¿imaynatam Jesusqa qawachirqa mana kikillanpi hapipakusqanta?

¹³ Jesusqa mana pantaq hinaspa Diospa churin kachkaspanpas taytanpim hapipakurqa (qaway Juan 5:19, 30). Chaymantapas, Filipenses 2:6 nisqanman hinam Jesusqa ‘mana munarqachu Diospa rantinpi churakuytaqa utaq payman igualakuytaqa’. Payqa riqsikurqam Jehova Dioslla yupaychana kasqanta, chaymi payllata kasukurqa.

14. ¿Imatam Jesus nirqa Santiagopa hinaspa Juanpa mamanta?

¹⁴ Huk kutipim Santiagopa hinaspa Juanpa maman Jesusta nirqa kamachispan alliqninpi hinaspa ichuqninpi wawankunata tiyaykachinanpaq. Chaynata niptin, ¿imatam Jesus nirqa? Mana iskayrayaspanmi nirqa alliq lawninpi hinaspa ichuq lawninpi tiyaykuyqa taytanmanta kasqanta (Mat. 20:20-23). Chayna nisqanwanmi qawachirqa mana kikillanpi hapipakusqanta. Payqa mana hatun tukuspanmi taytanpa nisqallanta haykapipas ruwarqa (Juan 12:49).

15, 16. ¿Imata ruwaspanchikmi 1 Corintios 4:6 nisqanta kasukuchwan?

¹⁵ ¿Imaynatam Jesusta qatipakuchwan? 1 Corintios 4:6 nisqanta kasukuspanchikmi, chaypim nin: “Qillqasqa kasqanman hinallam ruwanayki”, nispa. Chaymi yanapaykunanchikpaq pipas mañakuwaptinchikqa mana tantiasqanchikman hinallachu imatapas chaylla rimarunanchik, aswanqa bibliawan hinaspa qillqanchikkunawanmi yanapananchik. Chaynata ruwaspanchikmi qawachisunchik mana kikillanchikpa yachayninchikpi hapipakusqanchikta. Hinaspapas qawachisunchikmi Jehova Diospa palabranpi imapas nisqankunaqa ñuqanchikpa imapas tantiasqanchikmanta aswan allin kasqanta (Apoc. 15:3, 4).

¹⁶ Kaypi yachamusqanchikman hinaqa, mana hatun tukuq hinaspa mana kikillanchikpi hapipakuspanchikqa Jehova Diostam hatunchachkanchik. Chayna kasqanchikqa yanapawasunmi kusisqa kananchikpaq hinaspa hukkunawanpas hawkalla kananchikpaq. Chaymantayá qatiqninpi yachaykusun.

17. ¿Imaynataq kasun mana hatun tukuq hinaspa mana kikillanchikpi hapipakuspaqa?

¹⁷ Mana hatun tukuq hinaspa kikillanchikpi mana hapipakuspaqa kusisqam kasunchik, chaynaqa kasun pipas yanapaykuwaptinchik mana hatun tukuspanchik chaskikusqanchikraykum. Yuyarisunchik leprawan unquq 10 runakunata huk kutipi Jesus sanoyachisqanta. Chay chunkamantaqa hukllam kutirqa sanoyachisqanmanta Jesusta agradecekuqqa. Chay runaqa riqsikurqam mana haykapipas kikillanmanta allinyay atisqanta. Chayraykum allinyarusqanmanta agradecekuspan Jehova Diosta hatuncharqa (Luc. 17:11-19).

18. Romanos 12:10 nisqanman hinaqa, ¿imaynam hukkunawan kasun mana hatun tukuq hinaspa mana kikillanchikpi hapipakuspaqa?

¹⁸ Mana hatun tukuq hinaspa mana kikillanchikpi hapipakuq kaspaqa hukkunawanpas hawkam kawsakusun, hinaspapas achka runakunawanmi kuyachikusun. Manam iskayrayasunchu hukkunapas sumaq sunqu kasqankumantaqa, manataqmi iskayrayasunchu imapas ruwayninkuta allinta ruwanankumantaqa. Chaymantapas, Diospa llaqtanpi hukkuna ñawpariptinkuqa anchatam kusikusun, hinaspapas allin ruwasqankumantam alabaykusun (qaway Romanos 12:10).

19. ¿Imaynataq rikuriruchwan hatun tukuq kaspaqa?

¹⁹ Hatun tukuqkunam ichaqa hukkuna alabaykuyta sasachakunku, paykunaqa hukkuna alabaykunantam astawanqa munanku. Chaymantapas hukkunawan tupachikuspankum aswan allin kayta munanku. Hukkunata yachachinanmantaqa hinaspa imapas ruwayninkunata hukkuna yanapananmantaqa kikillankum imatapas ruwayta munanku. Paykunaqa piensankum kikinkupa tantiasqankuman hinalla ruwaptinku imapas allin lluqsinanta. Chaymantapas, kikillankupaq munaq kaspankum hukkunamantapas envidiakunku (Gal. 5:26). Chayna hatun tukuq kasqankuraykum amistadninkunapas mana unaypaqchu. Chayraykum hatun tukuq kasqanchikta musyakuspaqa Jehova Diosta mañakunanchik yanapaykuwananchikpaq. Chaynapi hatun tukuq kay mana ukunchikpi sapichakurunanpaq (Rom. 12:2).

20. ¿Imanasqataq llampu sunqu runa kananchik?

²⁰ Ancha kusisqam tarikunchik Jehova Diosninchik mana hatun tukuq kasqanwan. Chayna kasqantam yachanchik yupaychaqninkunawan imayna kasqanpi. Paytamá ñuqanchikpas qatipakuyta munanchik. Qatipakuytataqmi munanchik ñawpaq tiempopi Jehova Diosta serviqkunapa mana hatun tukuq hinaspa mana kikillankupi hapipakuq kasqankutapas. Amayá haykapipas qunqasunchu Jehova Dioslla hatunchana kasqantaqa (Apoc. 4:11). Payqa mana hatun tukuq hinaspa llampu sunqu runakunata kuyaqmi.