Kuyapayakuqyá kasunchik

IÑIQMASINCHIKKUNAPA kuyapayakuq kasqankum chaynataq sumaq sunqu kasqankum yanaparqa Lisaa sutiyuq warmita chaynataq Anne sutiyuq warmita bibliamanta yachaspanku Jehova Diospa testigon kanankupaq.

¿Imaynatam rimasqanchikwanpas chaynataq ruwasqanchikwanpas kuyapayakuq kachwan? Chaymantam yachasunchik.

Proverbios 31 capitulopim rimachkan allin warmimanta, allin warmiqa ‘ancha kuyakuywanmi’ riman (Prov. 31:26). Pipas kuyakuqqa allinta tantiarispam riman, chaymi tayta-mamakunapas yachananku imaynata churi-wawankuta rimapayayta. Tayta-mamakunaqa yachankum churi-wawankuta qaqchaptinkuqa paykuna mana kasukunankuta. Sumaq sunqullawan, kuyakuyllawan rimapayaptinkum ichaqa churi-wawankuqa chaylla kasukunqaku.

Manaña tayta-mama kaspanchikpas, ¿imaynatam pitapas kuyakuywan rimapayachwan? Proverbios 31:26 nin ‘ancha yachaywan’ rimanamanta. Yachaywan rimanapaqqa allintam tantiananchik, hinaspapas kuyakuywanmi sumaqta rimananchik. Chaymi piwanpas piñanakuruspanchikqa puntataraq nikunanchik: “Kaynata nispay, ¿astawanchu piñarachisaq, icha sunquntachu tiyaykachisaq?”, nispa (Prov. 15:1). Yachayniyuq runaqa manaraq rimachkaspanmi puntata tantian.

Bibliapim nin: “Nanay simikunam rimanku espadawan tuksichkaq hina”, nispa (Prov. 12:18). Chaymi kuyakuq runaqa allinta tantiananchik imata rimaspapas runamasinchikta mana piñarachinanchikpaq utaq mana sientirachinanchikpaq (Efes. 4:31, 32). Sunqunchik nanachiq rimaykunata rimanamantaqa, sunqunchik tiyaykachiq rimaykunatam rimananchik. Jehova Diospas Eliastam llumpay mancharisqa kachkaptin angelninwan rimapayaspan sunqunta tiyaykachirqa (1 Rey. 19:12). Ichaqa manam rimasqallanchikwanchu kuyakuqqa kananchik, aswanqa imayna kasqanchikwanpas kuyakuqmi kananchik. Chaymantayá yachaykusun.

Jehova Diosta qatipakuspanchikqa kuyakuywanmi runamasinchikta rimapayasunchik, chaymantapas sunqumantam yanapaykusunchik (Efes. 4:32; 5:1, 2). Qallariypi rimamusqanchik Lisa sutiyuq warmim willakun testigokuna imaynata yanapaykusqanmanta. Paymi nin: “Manaraq bibliamanta yachachkaspaykum llaqtaykumanta huk llaqtachaman astakurqaniku, hinaptinmi testigo vecinoyku llamkasqanta saqiykuspan yanapawarqaku astakunaykupaq. Chay yanapawasqankum kallpanchawarqa bibliamanta yachanaypaq”, nispa.

Chaynallatam willakun qallariypi rimamusqanchik Anne sutiyuq warmipas. Paymi nin: “Runakunaqa imapipas yanapaykusunki imapasraykullam, chaymi ñuqaqa piensarqani llapallan runakuna chaynalla kasqanta. Ichaqa bibliamanta yachachiwaqniyqa manam chaynachu karqa. Cuentatam qukururqani payqa sunqumanta yanapawasqanta. Chaymi ñuqapa umayqa karqa bibliamanta yachachiwasqanpiña”, nispa.

Kay iskay willakusqanchik warmikunaqa testigoqa karqaku iñiqmasinchikkuna sunqumanta kuyakuywan yanapaykusqanraykum. Chaynaqa, kuyakuq hinaspa sumaq sunqu kayqa runakunatam yanapan Jehova Diosmanta yachanankupaq.

Wakin runakunaqa kanku sumaq rimayniyuqmi, respetakuqmi, imapipas yanapakuqmi. Ichaqa manam sunqumantachu chaynaqa kanku, chayna kaspaqa manam Jehova Diostachu qatipakuchkanchik (tupachiy Hechos 28:2 nisqanwan).

Sumaq sunquqa hinaspa kuyapayakuqqa kanchik Jehova Dios atiyninwan yanapawaptillanchikmi (Gal. 5:22, 23). Chaymi Jehova Dios hina hinaspa señorninchik Jesucristo hina kuyapayakuq kananchikpaqqa kallpanchakunanchik, hinaspam Jehova Diosta mañakunanchik kuyakuq kananchikpaq. Chaymantapas, señorninchik Jesucristo hina kuyapayakuq kaspanchikqa runamasinchiktapas, kikin Jehova Diostapas sunqumantam kuyasunchik. Chayna kaspanchikqa paywanmi kuyachikusun.

Pipas riqsisqanchik runataqa utaq yanapaykuwaqninchik runataqa kuyakuywanmi rimapayaykunchik, hinaspam yanapaykunchik (2 Sam. 2:6). Hinaspapas anchatam agradecekunchik (Col. 3:15). Ichaqa, ¿imanasqataq sasa kanman mana riqsisqanchik runata utaq mana yanapaykuwaqninchik runata kuyakuywan rimapayayqa utaq yanapaykuyqa?

Manam pipas Jehova Dios hina kuyapayakuqqa kanchu. Diosqa lliw runakunatam kuyawanchik, manam serviqnin kaqkunallatachu. Chaymi bibliapiqa achka kutita Jehova Diosmanta rimaspan nin: “Ancha kuyapayakuq”, nispa. Chaynaqa, ¿imaynatam yachanchik ancha kuyapayakuq kasqanta?

Jehova Diosninchikqa ancha kuyapayakuq kasqanraykum lliw runakunapaq paratapas parachimun chaynataq intitapas lluqsichimun (Mat. 5:45). Taytanchik Jehova Diosqa manaraq servichkaptinchikmi kuyawarqanchikña (Efes. 2:4, 5, 8). Chayraykum sapallan churinta ñuqanchikrayku kachamurqa, chaymi apostol Pablopas nirqa: “Diospa ancha-ancha kuyakuyninraykum churinpa yawarninwan huchanchikmanta pampachasqa kanchik”, nispa (Efes. 1:7). Maynataña pantaptinchikpas Jehova Diosqa hinallam yanapaykuwanchik, hinaspam yachaykachiwanchik. Jehova Diospa yachachikuyninqa “pastopa hawanman paramuchkaq” para hinam (Deut. 32:2). Hatun kuyakuyninmantaqa Jehova Diosmanqa manam imaynatapas kutichipuytaqa atichwanchu. Chaymantapas kuyakuq kasqanraykum wiñay kawsaytapas quwasunchik (tupachiy 1 Pedro 1:13 nisqanwan).

Jehova Dios ancha kuyakuq kasqanraykum ñuqanchikpas payta kuyanchik hinaspa imataña kamachiwaptinchikpas kasukunchik. Chaynaqa ñuqanchikpas pay hinam llapallankuwan kuyakuq kananchik (1 Tes. 5:15). Imaynam chiripi kachkaptinchik inti qispiramuspan quñiykuwaptinchikqa kusisqa tarikunchik, chaynam kuyapayakuq kaptinchikqa ayllunchikpas, iñiqmasinchikpas, llamkaqmasinchikpas chaynataq huk runakunapas kusisqa tarikunqaku.

¿Mayqin ayllunchiktataq utaq iñiqmasinchiktataq kuyakuywan imallapipas yanapaykuchwan? Ichapas iñiqmasinchikqa munachkan wasinpi yanapaykunanchikta utaq imallatapas haywaykunanchikta utaq sunqunta tiyaykachinanchikta. Diosmanta willakuchkaptinchik runamasinchik yanapaykunata munaptinqa yanapaykusunyá, chaypim qawakunqa kuyakuq kasqanchik.

Jehova Dios hinayá runamasinchikta kuyasun rimasqanchikwanpas chaynataq imapi yanapaykuspanchikpas.