Mozo-sipas, iñiynikita wiñachiy

1, 2. (1) ¿Imatam Diosta yupaychaq mozo-sipaskunaqa wakinpi tapukunmanku? (2) ¿Imatam Jehova Diosqa palabranpi niwanchik?

GRAN BRETAÑA nacionpim sipas iñiqmasinchikta huknin estudiaqmasin kaynata nirqa: “Qam hina yachaysapakunaqa manam Diospiqa iñinanchu”, nispa. Alemania nacionniyuq iñiqmasinchikpas qillqarqam: “Profesorniykunam ninku imapas unanchasqa kaqkunaqa cuentolla kasqanta. Piensankutaqmi imapas kikillanmanta rikurisqanpi lliwchayku iñisqaykuta”, nispan. Francia nacionniyuq sipas iñiqmasinchikpas nirqam: “Colegioypi yachachiqkunaqa admirakunkum wakin mozo-sipaskuna bibliapi iñisqaykumanta”, nispa.

² Kunanqa achka runakunam Dios unanchawasqanchikmantaqa mana creenkuchu. Mozo-sipasllaraq kachkaspayki Jehova Diosta yupaychaspaykiqa utaq chayllaraq paymanta yachaspaykiqa, yaqapaschá tapukuchkanki: “¿Imaynatam Jehova Dios unanchawaqninchik kasqanmanta hukkunaman willakuyman?”, nispa. Bibliam yanapawanchik imapas ñawinchasqanchikkunapi chaynataq uyarisqanchikkunapi yuyaymanananchikpaq, chaynapim kikinchik imam kaqta yachasunchik. Jehova Diosmi palabranpi niwanchik allin tanteakuyninchik waqaychawasqanchikmanta. ¿Imaynatam waqaychasunki? Pantay yachachikuykunata qipanchanaykipaq hinaspa Jehova Diospi iñiynikita astawan wiñachinaykipaq yanapasuspaykim (leey Proverbios 2:10-12).

 3. ¿Imamantam kay yachachikuypi yachasunchik?

³ Iñiynikipi allin takyasqa kanaykipaqqa Jehova Diostam allintapuni riqsinayki (1 Tim. 2:4). Chaymi bibliata hinaspa qillqanchikkunata ñawinchaspaykiqa imamanta rimasqanpi yuyaymananayki. Kallpanchakuy allinta entiendenaykipaq (Mat. 13:23). Chaynata estudiaspaykiqa achka yachachikuykunatam tarinki, manataqmi iskayrayankichu Jehova Dios unanchawaqninchik chaynataq bibliata ruwachiq kasqanmantapas (Heb. 11:1). Kay yachachikuypim chaymanta yachasunchik.

 4. (1) ¿Imanasqam ninchik kikillanmanta imapas rikurisqanpi iñiyqa Diospa unanchasqankunapi iñiywan yaqa chaynalla kasqanmanta? (2) ¿Imatam llapanchik ruwananchik?

⁴ Ichapas pipas nisunkiman: “Imapas kikillanmanta rikurimusqanta yachaysapa runakuna yachachisqankuraykum ñuqapas allinpaq hapini. ¿Imaynataq Diospiqa iñiwaq pipas mana rikuchkaptinqa?”, nispa. Achka runakunam chaynata ninku. Arí, manam haykapipas Diostaqa rikurqanchikchu nitaqmi imapas unanchachkaqtaqa rikurqanchikchu (Juan 1:18). Ichaqa imapas kikillanmantam rikurimun niqkunapas mana rikusqankupim iñinku. ¿Imanasqam chaynata ninchik? Manam pi runapas nitaq yachaysapa runakunapas rikurqakuchu monomanta huk runa rikurimusqantaqa. Manataqmi rikurqakuchu hampatumanta huk misi rikurisqantaqa (Job 38:1, 4). Llapallanchikmi allintapuni chaykunapi yuyaymanananchik hinaspam kikinchik imam kaqta yachananchik. Achka runakunam tukuy ima unanchasqa kaqkunata qawaspanku musyakurqaku Dios kasqanmanta. Bibliapa nisqanman hinam, tukuy chaykunata Dios unanchasqanmanta mana iskayrayankuchu. Manataqmi iskayrayankuchu tukuy atiyniyuq hinaspa sumaq kayniyuq kasqanmantapas (Rom. 1:20).

 5. ¿Ima yanapakuykunam kachkan Diospa unanchasqankunamanta astawan yachananchikpaq?

⁵ Tukuy ima unanchasqa kaqkunata qawaspanchikmi hinaspa imayna ruwasqa kasqanpi yuyaymanaspanchikmi anchata admirakunchik. “Iñiywanmi yachanchik” mana rikuy atina unanchawaqninchik kasqanta. Musyakunchiktaqmi ancha yachayniyuq hinaspa sumaq kayniyuqkuna kasqanmantapas (Heb. 11:3, 27). Diosmantam astawan yachachwan yachaysapa runakunapa estudiasqankumanta yachaspanchik. Chaykunamantam yachachwan Las maravillas de la creación, niq videopi Obra de un Creador, El origen de la vida hinaspa ¿Existe un Creador que se interese por nosotros? niq qillqakunapipas. Achka kutipim ¡Rikchariy! qillqanchikpi rikurin yachaysapa runakunata hinaspa iñiqmasinchikkunata imanasqa Diospi iñisqankumanta tapusqanku. “¿Kikillanmantachu rikurirqa?” niq yachachikuypim rikurin animalkunamantawan wakin unanchasqa kaqkunamantapas, hinaspam willawanchik imatapas ruwanankupaq yachaysapa runakuna qatipakuy munasqankumanta.

 6. ¿Imaynatam qillqanchikkuna yanapasunkiman?

⁶ Estados Unidos nacionmanta 19 watanpi huk iñiqmasinchikmi Obra de un Creador hinaspa El origen de la vida qillqakunamanta rimaspan nirqa: “Achka kutikama estudiasqaymi anchata yanapawarqa”, nispa. Francia nacionmanta warmi iñiqmasinchikpas qillqarqam: “‘¿Kikillanmantachu rikurirqa?’ niq yachachikuykunata ñawinchaspaymi hinalla admirakuchkani. Diospa unanchasqankunata qatipakunankupaq tukuy ima aparatokunata ruwaqkunaqa maynataña kallpanchakuspankupas, manam Diospa unanchasqanta hinaqa ruwayta atinmankuchu”, nispa. Sudáfrica nacionmanta 15 watanpi sipaspa tayta-mamanpas nirqam: “Warmayku ¡Rikchariy! qillqata ñawinchaspanqa puntatam ñawinchan iñiqmasinchikkunata ‘Tapusqankumanta’ niq yachachikuyta”, nispa. Kay qillqakunaqa qamtapas yanapasunkimanmi. ¿Imaynata? Sutillatam qawachisunki unanchaqninchikmanta mana iskayrayanaykipaq hinaspapas yanapasunkim pantay yachachikuykunata riqsispa qipanchanaykipaq. Yanapasunkitaqmi huk sapisapa sacha hina iñiynikipi allinta takyanaykipaq (Jer. 17:5-8).

 7. ¿Imanasqam Diosqa munan tukuy yuyaynikita servichikunaykita?

⁷ Allinmi kanman kayna tapukuyniki: “¿Imanasqataq bibliapa nisqankunapi iñinay?”, nispa. Jehova Diosqa manam munanchu hukkunata qatipakuspallayki imapipas iñinaykitaqa. Diosqa munanmi tukuy yuyaynikiwan bibliamanta yachanaykita hinaspa biblia ruwachisqanmanta mana iskayrayanaykita. ¿Imanasqam Diosqa munan chayta ruwanaykita? Bibliamanta astawan yachaspaykiqa, astawanmi nisqankunapi iñinki (leey Romanos 12:1, 2; 1 Timoteo 2:4). Bibliamanta astawan yachanaykipaqqa imamantapas yachay munasqaykitam estudianayki.

8, 9. (1) ¿Imamantam wakin iñiqmasinchikkunaqa astawan estudianku? (2) ¿Imaynatam yanapachikurqaku ñawinchasqankupi yuyaymanaspanku?

⁸ Wakinkum bibliapi willakuykuna imayna cumplikunanmanta astawan estudianku. Wakinkuñataqmi bibliapa nisqankunata yachaysapa runakunapa estudiasqankuwan tupachinku. Yuyaymanariy Genesis 3:15 nisqanpi. Jehova Diosqa kaytam willakurqa, paypa hinaspa kamachikuyninpa contranpi Adanwan Eva huqarikuruptinku. Kay willakuytawan huk willakuykunata estudiaspanchikmi astawan entiendesun munaychakuyninwan Jehova Dios ñakariykunata chinkachinanmanta hinaspa allin kamachiq kasqanta imayna qawachinanmanta. ¿Imaynatam Genesis 3:15 nisqanpi willakuymanta estudiawaq? Puntata papelchapi qillqay chay willakuywan tupaq bibliapa wakin versiculonkunata. Hinaspa maskay chay versiculokuna haykapi qillqasqa kasqanmanta chaynataq chayman hina ordenninpi qillqay. Chayta ruwaspaykiqa musyakunkim bibliata qillqaqkuna una-unay watakunapi pisi-pisimanta chay willakuypa cumplikusqanta qawachisqankumanta. Kaykunawanqa manañam iskayrayankichu chuya espiritunwan Jehova Dios haykam qillqaqkunata yanapasqanmantaqa (2 Ped. 1:21).

⁹ Alemania nacionmanta iñiqmasinchikpas musyakurqam bibliata 40 runakuna qillqaptinkupas, llapallanku Diospa munaychakuyninmanta qillqasqankuta. Chaymantapas, bibliata qillqaqkunaqa manam llapankuchu riqsinakurqaku chay tiempollapi mana kawsasqankurayku. Australia nacionmanta huk iñiqmasinchikmi Willakuq qillqata estudiaspan yacharqa pascua fiesta hinaspa Genesis 3:15 nisqan Jesuswan imakunapi tupasqanmanta^[1] (qaway 25 kaq paginapi willakuyta). Paymi kaynata qillqarqa: “Chay yachachikuyta estudiasqaymi qawachiwarqa Jehova Diosqa ancha admirakuypaq kasqanta. Israel runakunata sapa wata pascua fiestata yuyarinankupaq Jehova Dios kamachispanqa, yacharqañam achka watakuna pasayta chay punchawpi Jesus wañukunanmanta. Chay willakuy imayna cumplikusqanpi yuyaymanasqaymi anchata admirachiwarqa”, nispa. ¿Imanasqam anchata admirakurqa? Ñawinchasqanpi yuyaymanaspanmi allinta entienderurqa. Chayna ruwasqanmi allinta yanaparqa iñiyninpi allinta takyananpaq hinaspa Jehova Diosman astawan asuykunanpaq (Mat. 13:23).

10. ¿Imaraqtaq yanapasunki bibliapa nisqankunapi astawan iñinaykipaq?

¹⁰ ¿Imaraqtaq yanapasunki bibliapa nisqankunapi astawan iñinaykipaq? Yuyarinaykim qillqaqkuna qarinchakuq chaynataq imam kaqta willakuq kasqankumanta. Bibliata qillqasqanku tiempopi qillqaqkunaqa nacionninkumantawan kamachiqninkumantam allin kaqkunallata willakuqku. Ichaqa Jehova Diosmanta willakuqkunaqa manam Israel runakunapawan reyninkunapa allin ruwasqallankumantachu willakurqaku, aswanqa mana allin ruwasqankumantapas willakurqakum (2 Cron. 16:9, 10; 24:18-22). Willakurqakutaqmi kikinkupa chaynataq Diosta wakin yupaychaqkunapa pantasqankumantapas (2 Sam. 12:1-14; Mar. 14:50). Gran Bretaña nacionmanta mozo iñiqmasinchikmi nirqa: “Bibliata qillqaq runakuna hinaqa manam lliwchu imam kaqtaqa rimanku, chaykunam sutillata qawachiwan bibliaqa Jehova Diospa palabran kasqanmanta”, nispa.

11. ¿Imanasqam mana iskayrayanchikchu biblia Diospa palabran kasqanmanta?

¹¹ Bibliapa yachachiwasqanchikman hina kawsakuspanchikqa, kusikuytam tarinchik. Chaymi Diospa palabran kasqanmantaqa mana iskayrayanchikchu (leey Salmo 19:7-11). Japón nacionmanta sipas iñiqmasinchikmi kaynata qillqarqa: “Lliw aylluywan bibliapa nisqankunata kasukuspaymi ancha kusisqallaña tarikuni hinaspapas kuyanakuspaykum hawkalla kawsakuniku”, nispa. Bibliaqa achka runakunatam yanapachkan pantaykunapi iñisqankumanta musyakunankupaq (Sal. 115:3-8). Chaymantapas tukuy atiyniyuq Jehova Diosllapi hapipakunankupaqmi yanapachkan. Chayna kaptinpas, wakin runakunaqa manam Diospiqa iñinkuchu. Aswanmi lliw unanchasqankunata admirakuywan qawaspanku diosninkupaq hina hapinku. Wakinkuñataqmi ninku sasachakuyninchikkunata runakuna chinkachinankuta. Ichaqa kunankamam mana ima sasachakuytapas allichankuraqchu. Bibliallam chiqap suyakuytaqa quwanchik (Sal. 146:3, 4).

12, 13. ¿Imaynatam runakunawan rimawaq Diospa unanchasqanmanta utaq bibliamanta?

¹² Diospa unanchasqankunamanta utaq bibliamanta runakunawan rimaspaykiqa, puntata tapuy imapi iñisqanmanta. Wakinkuqa kikillanmanta imapas rikurisqantam piensanku hinaspa Diospipas iñinku. Paykunaqa ninkum Dios uchuy animalchakunata puntata unanchasqanmanta hinaspa chaymantaña hatun animalkuna rikurisqanmanta. Ninkutaqmi runakunapas animalkunamanta rikurisqanta. Chaynataqa piensanku estudiasqankupi chaynata yachachisqankuraykum. Wakinkuñataqmi Diospiqa manaña iñinkuchu religionniyuq runakuna mana allinta ruwasqankurayku. Chaymi piwanpas rimaspaykiqa, puntata tapunayki imapi hinaspa imanasqa chaypi iñisqanta. Sumaqta uyariptikiqa, paypas yaqapaschá uyarisunki (Tito 3:2).

¹³ Diospi iñisqaykimanta pipas asikuptinqa, ¿imatam ruwawaq? Sumaqllata tapuy imaynata kay pachapi kawsakuy qallarisqanmanta willasunaykipaq. Tukuy imapas kikillanmanta rikurisqan chiqap kaptinqa, niwaqmi: “¿Imaynataq huk kawsaq celulallamanta achkallaña mirarunman?”, nispa. Chaykunamanta yachachiq profesormi nin: “Chay punta kaq celulaqa qarachayuq hinaspa kallpayuqmi kanan karqa, chay celulapa ukunpim imayna kananpaq hinaspa imayna wiñananpaq qillqasqa kanan karqa chaynataq musuq celulakunapa ukunpim chay willakuykuna kanan karqa”, nispa. Nintaqmi: “Llumpay admirakuypaqmi celulapa imayna kasqanqa llumpay uchuychalla kaspanpas”, nispa.

14. Unanchasqa kaqkunamanta rimaspayki, ¿imaynatam mana sasachakuspalla yachachiwaq?

¹⁴ Diospa unanchasqankunamanta piwanpas rimaspaykiqa Pablopa kayna nisqantam servichikuwaq. Nirqam: “Wasiqa runapa ruwasqanmi, Diosmi ichaqa tukuy imata ruwarqa”, nispa (Heb. 3:4). Wasiqa manam kikillanmantaqa rikurinmanchu. Huk kaqninmi imayna kananpaq tanteanan hinaspa ruwanan. Kawsaq kaqkunata ruwayqa aswan sasam wasi ruwaymantaqa. Huk kaqninmi imayna kananpaq tanteanan karqa hinaspa unanchanan karqa. Qillqanchikkunatapas servichikuwaqmi unanchasqa kaqkunamanta rimaspaykiqa. Huk iñiqmasinchikmi Diospi mana iñiq mozowan rimarqa hinaspam Obra de un Creador hinaspa El origen de la vida niq qillqanchikkunata quykurqa. Huk semana pasaruptinmi chay mozoqa nirqa: “Kunanqa Diospiqa iñiniñam”, nispa. Kay mozoqa biblia estudiaytam qallaykurqa hinaspam tiempopa risqanman hina bautizakururqa.

15, 16. (1) Biblia Diospa palabran kasqanmanta manaraq pimanpas yachachichkaspayki, ¿imatam ruwanayki? (2) ¿Imatam yuyarinayki piwanpas rimaspaykiqa?

¹⁵ Biblia Diospa palabran kasqanmanta pipas iskayrayaptinqa, ¿imaynatam piensarichiwaq? Yachamusqanchikman hinam puntata tapuwaq imapi iñisqanmanta hinaspa imamanta yachay munasqanta (Prov. 18:13). Runakunapa estudiasqankumanta rimayta munaptinqa, qawachiwaqmi imaynam bibliapa nisqankunaqa runakunapa estudiasqanwan tupasqanta. Ñawpaq tiempomanta yachayta munaptinqa, chaymanta rimaq librokunapa willakusqantam willawaq hinaspam niwaq chay pasakunamanta ñawpaqmantaraq biblia willakusqanmantaña. Yaqapaschá wakin runakunaqa uyarisunki kusisqa kawsakunankupaq bibliawan yachachiptikiqa. Yachachiwaqmi Jesuspa ancha riqsisqa wakin yachachikuyninmanta.

¹⁶ Piwanpas rimaspaykiqa yuyarinaykim atipanakuyta mana munasqanchikmanta. Aswanqa munanchikmi ñuqanchikwan rimaspan chaynataq bibliamanta yachaspan kusisqa tarikunanta. Chaymi respetowan tapunayki hinaspa allinta uyarinayki. Sumaqllata willariy imapi iñisqaykimanta. Chaytam astawan ruwanayki qanmanta aswan yuyayniyuq kaptinqa. Chaynata ruwaptikiqa paypas respetasunkim. Chaymantapas, musyakunqam mozo-sipasllaraq kachkaspaykipas imapi iñinaykipaq allinta estudiasqaykimanta. Ichaqa pipas asikunanraykulla utaq atipanakunanraykulla tapusuptikiqa, ama imatapas kutichiychu (Prov. 26:4).

17, 18. (1) ¿Imataq yanapasunki biblia Diospa palabran kasqanmanta mana iskayrayanaykipaq? (2) ¿Imamantam qatiqnin yachachikuypi yachasunchik?

¹⁷ Bibliamanta yachaspaykipas, ¿imatawanmi ruwanayki iñiynikipi hinalla wiñanaykipaq? Bibliapi yachachikuykunata hinalla maskay pakasqa qullqita hina (Prov. 2:3-6). Enteron bibliata ñawinchaspaykim iñiynikipiqa hinalla wiñanki. Kallpanchakuwaqmi huk watallapi ñawinchayta tukunaykipaq. Chaytam ruwarqa llaqtan-llaqtan watukuq iñiqmasinchik, chaymi mozollaraq kachkaspanpas Jehova Diosman astawan asuykurqa. Paymi nin: “Enteron bibliata ñawinchasqaymi yanapawarqa biblia Diospa palabran kasqanmanta mana iskayrayanaypaq. Chaymi warmallaraq kaspay bibliapi willakuykuna yachasqayta chayraq allinta entienderurqani”, nispa. ¿Imatawanraqmi ruwawaq? Watchtower Library (DVD), internetpi LEENAPAQ QILLQAKUNA, Índice de las publicaciones Watch Tower utaq Jehova Diospa testigonkunapa qillqankunapi maskanapaq niq yanapakuykunatam servichikuwaq ñawinchasqaykita aswan allinta entiendenaykipaq.

¹⁸ Tayta-mamakuna qamkunam churi-wawaykichikmanqa Jehova Diosmanta astawan yachachiwaqchik. Chayraykum qatiqnin yachachikuypi yachasunchik, imakunata ruwaspanku tayta-mamakuna warmankuta iñiyninkupi allinta takyanankupaq yanapanankumanta.