Lliw runakunawanyá llakipayakuq kasunchik

JESUSMI qatiqninkunata yachachirqa Diosmanta willakunankupaq, chaywanpas yacharqam wakin runakunaqa mana uyarinankumanta (Luc. 10:3, 5, 6). Diosmanta willakuptinchikqa wakin runakunam qaqchawanchik utaq kamiwanchik. Chaymi wakinpiqa sasachakuchwan llakipayakuyta.

Llakipayakuq kaspaqa hukkunapa sasachakuynintam qawasun, hinaspam kuyapayaspa yanapasun. Mana ancha llakipayakuq kaspañataqmi mana kusikuywanñachu nitaq sumaqtañachu Diosmantapas willakusun. Llakipayakuq kananchikpaq kallpanchakuspam ichaqa kusikuywan willakusunchik. Chayqa nina ratananpaq yantata yapay hinam kanman (1 Tes. 5:19).

¿Imaynatam wakinpi sasaña kaptinpas llakipayakuq kayta yachachwan? Kunanmi yachasunchik Jehova Dios, Jesus hinaspa apostol Pablo llakipayakuq kasqankumanta.

Waranqantin watakunam Jehova Diosqa paymanta llullakunata niptinku aguantarqa. Chayna kaptinpas payqa “allin sunqum mana riqsikuqkunawan hinaspa huchasapakunawanpas” (Luc. 6:35). Chayna kasqantam qawachin pacienciakuq kaspan. Payqa munanmi “tukuy rikchaq runakuna salvakunankuta” (1 Tim. 2:3, 4). Mana allin ruwaykunata chiqnispanpas runakunataqa kuyanmi, hinaspapas manam munanchu pi runapas wañunantaqa (2 Ped. 3:9).

Jehova Diosqa yachanmi mana iñiq runakunapa yuyayninta diablo tutayarachisqanta (2 Cor. 4:3, 4). Achkam warmacha kasqankumantapacha mana imam kaqtachu Diosmantaqa yacharqaku. Chaymi imayna piensasqankurayku hinaspa imayna kasqankurayku bibliamanta chiqap yachachikuykunataqa mana uyariyta munankuchu. Ichaqa paykuna yanapaytam Jehova Diosqa munachkan. ¿Imaynatam chayta yachanchik?

Rimasunchik Ninive llaqtayuq runakunamanta. Paykunaqa mana allin ruwaq runakunam karqaku, chayna kaptinkupas Jehova Diosmi Jonasta nirqa: ‘¿Manachum llakipayariyman Ninive hatun llaqtapi yachaqkunataqa? Chaypiqariki kachkan pachak iskay chunkan waranqa masnin mana yuyayniyuq runakunam’, nispa (Jon. 4:11, Chuya Qellqa 1987). Jehova Diosqa yacharqam Ninive llaqtayuq runakunaqa paymanta mana yachasqankuta. Chaymi llakipayarikuspan Jonasta kamachirqa ima ruwananmanta paykunaman willamunanpaq.

Ñuqanchikpas Jehova Dios hinam runakunataqa anchata chaninchanchik. Payta qatipakuspanchikqa uyariwaqninchik runakunatam sunqumanta yanapasun uyariyta mana munaptinkupas.

Jehova Dios hinam Jesuspas runakunata llakipayarqa, qawarqam “wischusqa hinaspa mana michiqniyuq chiqisqa ovejakuna hina” kasqankuta (Mat. 9:36). Jesusqa yacharqam imanasqa chayna tarikusqankuta. Yacharqam religionkunapi punta apaqkunaqa paykunata ñakarichisqankuta hinaspa pantaykuna yachachisqankuta. Payqa llapallan runakuna mana qatinanta yachaspanpas tukuy imamantam hinalla yachachirqa (Mar. 4:1-9).

Diosmanta willakusqanchikta runakuna mana uyariyta munaptinkuqa, yuyaymanananchikmi imanasqa chayna kasqankupi. Wakinkuqa bibliamanta utaq religionkunamantam mana yachayta munankuchu. ¿Imanasqa? Ichapas Diosta yupaychaq tukuqkuna mana allinta ruwasqankurayku. Wakinqa ñuqanchikmanta runakuna mana allinkunata rimasqankurayku, utaq Diosmanta yachachiptinchik riqsisqan runakuna utaq ayllunkuna asikunankumanta pinqakusqankurayku.

Wakinkuñataqmi mana uyariyta munankuchu ñawpaqta ñakarichisqa kasqankurayku. Kim sutiyuq iñiqmasinchikmi willakun: “Diosmanta willakusqayku lawpim, achka runakuna guerra kasqanrayku ñakarirqaku hinaspa mana imayuq qiparqaku. Chayraykum hukmanyasqallaña kaspanku mana chayllachu pitapas chaskinku. Sapa kutim chaypi runakunaqa Diosmanta willakuptiyku harkakunku. Huk kutipim ñuqatapas maqaruwayta munarqaku”, nispa.

¿Imatam Kim sutiyuq iñiqmasinchikqa ruwan hinalla llakipayakuq kananpaq? Paymi nin: “Runakuna kamiwaptinmi yuyarini Proverbios 19:11 nisqanta, chaypim nin: ‘Pacienciakuyqa yachayniyuqpa ruwayninmi’, nispa. Runakunapa imayna tarikusqankupi yuyaymanaymi yanapawan paykunamanta llakipayarikunaypaq. Chaymantapas wakin runakunaqa allintam chaskiykuwanku. Hina chay willakusqayku lawllapim achka runakunaman kaqmanta watukuniku”, nispa.

Ñuqanchikpas tapukuchwanmi: “Diosmanta mana imaniraqllatapas yachachkaptiy Jehova Diospa testigonkuna watukamuwaptinqa, ¿imaynataq tarikuyman?”, nispa. Jehova Diospa testigonkunamanta sapa kuti mana allinta runakuna niwaptinchikqa, ichapas mana allintachu chaskichwan karqa. Ichaqa chayna kasqanchikmanta llakipayasqa kaytaqa munachwanmi karqa ¿aw? Jesusmi nirqa: “Imaynam qamkunapas munankichik runamasikichik qamkunapaq imapas ruwananta, chaynatayá qamkunapas paykunapaq ruwaychik”, nispa. Chaynaqa, kallpanchakunanchikmi sasaña kaptinpas hukkunata llakipayananchikpaq (Mat. 7:12).

Apostol Pabloqa llakipayakuqmi karqa Diosmanta mana uyariy munaq runakunawanpas. ¿Imanasqa? Payqa chay runakuna hinam karqa manaraq Diospa llaqtanpi kachkaspanqa. Chaymi nirqa: ‘Ñawpaqtam Diospa contranpi mana allinkunata rimarqani hinaspa iñiqkunata qatikachaspay trataparqani. Ichaqa Cristom llakipayaykuwarqa manaraq iñisqayrayku hinaspa mana yachaywan chaykunata ruwasqayrayku’, nispa (1 Tim. 1:13). Payqa Jehova Dioswan Jesus llakipayariykusqantam riqsikurqa. Yaqachá Diosmanta willakuspanpas wakin runakunata qawaspan yuyarirqa paypas ñawpaqpi imayna kasqanta.

Apostol Pabloqa wakinpim Diosmanta willakuspan pantay yachachikuykunallapi hapipakuq runakunata tarirqa. Chayta qawaspanqa, ¿imaynam tarikurqa? Hechos 17:16 nisqanman hinam Atenas llaqtapi kachkaspan “qawarqa llaqtapi achkallaña taytacha-mamachakuna kasqanta, hinaspam sunqullanpi rabiarqa”. Ichaqa chayna kaptinkupas Pabloqa hinallam chay runakunamanqa Diosmanta sumaqta yachachirqa (Hech. 17:22, 23). Payqa imayna runakuna kasqanman hinam yachachirqa, chaytaqa ruwarqa wakillanpas salvakunankuta munaspanmi (1 Cor. 9:20-23).

Diosmanta willakuptinchik pipas mana allinkunata niruwaptinchikqa utaq pantaypi kaptinkuqa, Pablopa ruwasqantam yuyarinanchik. Payqa runakunapa imayna kasqankuta yachasqanraykum Diosmanta yachachirqa (Is. 52:7). Doroti sutiyuq iñiqmasinchikmi nin: “Diosmanta willakusqayku lawpi runakunatam yacharachinku Diosqa mana llakipayakuq kasqanmanta. Chaymi puntataqa Diospi iñisqankumanta kallpanchaykuni, hinaspam bibliawan yachachini Diosqa kuyakuq kasqanmanta hinaspa hamuq punchawkunapi imakunata ruwananmantapas”, nispa.

Diosmanta willakusqanchik runakunaqa ‘tukupay punchawkunapi’ kawsasqanchikraykum “aswan-aswanraq mana allin ruwaq kanqaku” (2 Tim. 3:1, 13). Chaywanpas manam llakipayakuq kaytaqa saqinanchikchu. Chaymantapas Jehova Diosmi kallpata quwasun hinalla ‘mana allinta’ allin kaqwan vencenanchikpaq (Rom. 12:21). Jessica sutiyuq precursoram nin: “Sapa kutim Diosmanta willakuspay hatun tukuq hinaspa Diosmanta mana uyariy munaq runakunata tarini. Chayqa llumpaytam hukmanyachikun. Chaymi runakunawan rimariyta qallarinaypaq sunqullaypi Diosta mañakuni ñuqapas pay hina runakunata qawanaypaq. Chaynata ruwaspaymi manaña kikillaypichu piensani, aswanqa runamasiyta imayna yanapanaypiñam”, nispa.

Chaymantapas yuyaymanananchikmi iñiqmasinchikkunata imayna yanapananchikpi. Jessica iñiqmasinchikqa ninraqmi: “Mayqinniykutapas runakuna kamiwaptinkuqa chaylla qunqanaypaqmi kallpanchakuni. Hinaspaymi allin kaqmanta rimani, chayqa kanmanmi wakin mana uyariptinpas Diosmanta willakusqanchik runakunata imayna yanapasqanmanta”, nispa.

Jehova Diosqa yachanmi paymanta willakuspanchik ima sasachakuykunapi tarikusqanchikta, kusikuntaqmi pay hina llakipayakuq kasqanchikwanpas (Luc. 6:36). Ichaqa manam wiñaypaqchu mana allin runakunataqa llakipayanqa. Chaymi mana iskayrayananchikchu mana allinkunata chinkachinanpaq punchaw chayamunanmantaqa. Chay punchaw manaraq chayamuchkaptinqa hinallayá Diosmanta willakusun (2 Tim. 4:2). Chaynaqa, kusikuywanyá Diosmanta willakusun hinaspa lliw runakunata llakipayasun.