Wakin runakunaqa sasachakunkum Diosta kuyanankupaq, piensankum payqa mana reqsiy atina kasqanta, karu-karupi kasqanta chaynataq mana llakipayakuq kasqantapas. Chayna piensasqankumanta wakinpa ima nisqankupi reparay:

• Italiamanta Marcosmi nirqa: “Yanapawananpaqmi Diosta mañakuq kani ichaqa llumpay karupi kasqantam sienterqani. Piensarqanim mana reqsiy atina kasqanpi chaynataq mana sentimientoyoq kasqanpipas”, nispa.

• Guatemalamanta Rosam nirqa: “Dios serviytam munarqani ichaqa mana reqsiy atinapaq chaynataq mana kuyapayakuq castigakuqllaña kasqanpaqmi rikchakuwarqa. Manam creerqanichu kuyakuq kasqanpiqa”, nispa.

• Canadamanta Raimundam nirqa: “Warmacha kasqaymantam piensarqani Diosqa castigawananchikpaq mana allin ruwasqanchikkunallapi reparasqanta. Tiempo pasasqanman hinam piensarqani karu-karupi kasqanta chaynataq mana kuyapayakuq gobernante kasqanpipas”, nispa.

¿Ima ninkitaq qamqa? ¿Manachu Dios kuyayta atichwan? Una-unay watakuna ñawpaqmantaraqmi cristianokunaqa chaynata tapukunku. 500 kaq watamanta 1500 kaq watakamam yaqa lliw runakuna Diosta mana mañakurqakuchu (Edad Media). ¿Imanasqa? Manchakusqankuraykum. Ñawpa tiempokunamanta willakuq runam nirqa: “¿Imaynamá huchasapa runaqa mañakunman karu-karupi manchakuypaq kamachiqtaqa?”, nispa. (Will Durant.)

¿Imanasqataq Diosmanta chaynata piensanku? ¿Imatam Bibliaqa Diosmanta yachachin? ¿Atichwanchu Dios kuyayta pay imayna kasqanmanta yachaspaqa?

Huk profesormi libronpi nirqa: “Manam lliwchu acuerdopi karqaniku Diosqa sutiyoq otaq mana sutiyoq kasqanmanta. Manataqmi yacharqanikuchu ima sutiyoq kasqanmantaqa”, nispa. (David Cunningham, Theological Studies.)

Kikin Diosmi nirqa: “Ñoqam [Jehova, NM] Dios kani. Chayna sutiyoq Diosmi kani”, nispa (Isaias 42:8). Hebreo rimaypi Jehova ninanqa munasqan cumplikunanpaq imatapas ruwaq ninanmi.

Jehova Diosqa munanmi sutin rimananchikta. Bibliam willakun: ‘Graciasta qospa Tayta Diosman qaparispa takiychik, tukuy ima ruwasqankunata lliw llaqtakunaman reqsichiychik, sutin hatunchasqa kasqanmanta willakuychik’, nispa (Isaias 12:4, Chuya Qellqa edición revisada 2012).

Jesusqa Diospa sutintam rimarqa, chay sutimantaqa qatiqninkunamanpas willarqam. Mañakusqanpim huk kutipi nirqa: “Hanaq pachapi Taytayku, sutiki yupaychasqa kachun”, nispa (Mateo 6:9). ¿Imanasqataq yachachirqa? Paymi nirqa: ‘Hinallaraqmi yachachisaq chaynapi kuyawasqaykiman hina paykunapipas [kuyakuyniki kananpaq, NM] chaynataq ñoqapas paykunapi kanaypaq’, nispa (Juan 17:26).

Huk runam qellqanpi nirqa: “Diospa sutinta mana yachaq runaqa manam yachanmanchu Dios imayna kasqanmantaqa [. . .] manataqmi kuyanmanchu payta mana reqsispanqa”, nispa. (Teólogo Walter Lowrie.)

Victor sutiyoq runam sapa semana riq iglesiaman, ichaqa Diospa sutinmantaqa manam imatapas yacharqachu. Paymi willakun: “Diospa sutin Jehova kasqanmanta chaynataq pim pay kasqanmanta yacharuspaymi kusikurqani. Unayñam pay reqsiykuyta munarqani. Sutin yachasqaymantapacham amistadniy rikurirun, Diosqa cheqappunim ñoqapaqqa”, nispa.

Jehova Diospas asuykunmi “sutinpi piensaqkunamanqa” chaymi paykunaman nin: “Imaynam huk taytapas llakipayarikun yanapaqnin churinmanta, chaynam ñoqapas paykunamanta llakipayarikusaq”, nispa (Malaquias 3:16 NM, 17). Diosqa bendecintaqmi sutinmanta qayakuqkunataqa. Bibliam nin: “Haykam Señorpa otaq Diospa sutinta qayakuqkunaqa, salvom kanqa”, nispa (Romanos 10:13, Chuya Qellqa edición revisada 2012).

Huk qellqam nin: “Huk cuerpollapi Tayta, Churi hinaspa Chuya Espiritu kasqanmanta yachachisqankuqa mana entiendey atinam”, nispa. (Diccionario Akal crítico de Teología.) Huk qellqapas ninmi: “Chaynatam yachachinku católico, ortodoxo, anglicano hinaspa protestantekunapas”, nispa. (Diccionario abreviado del cristianismo.)

Diospa Churin Jesucristoqa manam haykapipas yachachirqachu Taytanwan igualla kasqanmantaqa. Aswanqa Taytanmantam kaynata nirqa: “Payqa ñoqamantaqa aswan atiyniyoqmi”, nispa (Juan 14:28). Chaymantapas huknin apostolninmanmi nirqa: “Richkanim Taytaypata, qamkunapapas Taytaykichikpata, ñoqapa Diosniyman, qamkunapapas Diosnikichikman”, nispa (Juan 20:17).

Chuya espirituqa manam Dioschu. Apostolkunapa tiempopi cristianokunamanmi ‘chuya espiritu huntaykurqa’. Chayna pasananmantam Jehova Diosqa nirqaña: “Chaqchurimuq hina lliw runakunaman kachamusaq Espirituyta”, nispa (Hechos 2:1-4, 17). Chuya espirituqa Jehova Diospa atiyninmi, manam huk Dioschu.

Bibliamanta estudiaq católico runakunam ninku: “Huk cuerpollapi kimsa dioskunamantaqa revelacion kaptinmi entiendechwan, chay revelacionwanpas manam allintapuniqa entiendechwanchu”, nispa. (Karl Rahner hinaspa Herbert Vorgrimler.) ¿Atichwanchu pitapas manaraq reqsichkaspa kuyayta? Manam. Tayta, Churi chaynataq Chuya Espiritu huk cuerpollapi kasqankumanta yachachikuyqa Jehova Diosmantam karunchawanchik.

Kay yachachikuypa qallariyninpim Marcos rimarqaña, paymi nin: “Chayna yachachikuywanmi piensarqani Diosqa mana reqsichikuy munasqanta chaynataq mana reqsiy atina kasqantapas”, nispa. Ichaqa ‘Diosqa [...] manam chaqwa ruwaqchu otaq pantachikuqchu’ (1 Corintios 14:33). Payqa reqsinanchiktam munan. Jesuspa nisqanman hinam ñoqanchikqa ‘reqsisqanchik’ Diosta yupaychanchik (Juan 4:22).

Marcosqa nintaqmi: “Jehova Dioslla, cheqap Dios kasqanmanta yacharuspaymi paywan amistadta ruwaruni”, nispa. Diosta reqsispaqa atisunmi pay kuyayta. Bibliam nin: “Mana kuyakuqqa Diostam mana reqsinchu, Diosqariki kuyakuqllañam”, nispa (1 Juan 4:8).

Huk qellqam nin: “Llumpay huchallikuqpa almanqa wañuptinmi infiernoman rin, chaypi ñakarinanpaq”, nispa (Catecismo de la Iglesia Católica). Religionpi umalliqkunapas wakinqa ninkum infiernopi kaqkunaqa Diosmanta qalaypaq karunchasqa kasqankumanta.

Ninmi: ‘Huchallikuq [almaqa, NM] wañunqam’, nispa (Ezequiel 18:4). Nintaqmi: ‘Manam imatapas yachanchu wañusqakunaqa’, nispa (Eclesiastes 9:5). Bibliapa nisqanman hinam almaqa wañun, manataqmi imamantapas yachanchu. ¿Imaynatataq “rawrachkaq ninapiqa” ñakarinman otaq Diosmantaqa qalaypaq karunchasqa kanman?

Hebreo rimaypi “scheʼóhl” hinaspa griego rimaypi “hái·dēs” ninanqa sepultura ninanmi chaytam wakin Bibliakunapiqa tikranku “infierno” nispa. Jesucristomantam Biblia willakurqa: “Cuerpoytaqariki manapunim sepulturapiqa [“infiernopiqa”, Reina Valera 1909] saqenkichu”, nispa (Hechos 2:27). Jesucristoqa mana huchallikuqmi karqa, payqa sepulturapim tarikurqa manam rawrachkaq ninapichu.

Infiernopi ñakariy kasqanmanta religionkunapi yachachisqankuqa Diosmantam karunchawanchik. Mexicomanta Rociom nin: “Taksachaymantam yachachiwarqaku infiernomanta. Chaywanmi llumpay mancharisqa karqani, piensarqanim Diosqa mana kuyapayakuq, mana llakipayakuq piñakuqllaña kasqanpi”, nispa.

Wañusqakuna imayna tarikusqankumanta chaynataq Diosmanta Bibliapi yacharuspanmi Rocioqa manaña chaynatachu piensarqa. Paymi nin: “Ñitiwaqniy qepimanta librasqa hinam sientekurqani. Musyakurqanim Diosqa allin kananchik munasqanmanta, kuyawasqanchikmanta chaynataq payta kuyanaypaq kasqanmantapas. Kunanqa yacharunim Jehova Diosqa churinkunata kuyakuywan cuidaq tayta hina kasqanmanta”, nispa (Isaias 41:13).

Achka runakunam religionpi kanku infiernota manchakuspanku, ichaqa manam Diosqa munanchu manchakuspa kasukunanchiktaqa. Jesucristom nirqa: ‘Diosnikitam kuyanayki tukuy sonqoykiwan’, nispa (Marcos 12:29, 30). Allin ruwaq Jehova Diosmanta yachasqanchikqa kallpanchawanchikmi juicion punchawta mana manchakuspa suyanapaq. Jobpa amistadnin Eliu sutiyoq runam tukuy sonqonwan nirqa: “Mana allin rurayqa Diosmanta karunchasqayá kachun. Hucha rurayqa Tukuy Atiyniyoq Diosmanta karunchasqayá kachun”, nispa (Job 34:10).

Jehova Diosmanta willakuspanmi religionpi umalliqkunaqa iskay uya kasqankuta Jesus qawachirqa (Juan 8:12-30). Jesuspa chayna nisqanqa Diosmanta runakunapa imayna yachachisqankupi reparanapaqmi yanapawanchik. Paymi nirqa: “Sichu qamkuna seguinkichik nisqaykunata hinaspaqa cheqap discipuloykunam kankichik. Yachankichikmi cheqap kaqmanta, chay cheqapmi libreyachisunkichik”, nispa (Juan 8:31, 32).

‘Seguiychik nisqaykunata’, Jesuspa chayna nisqanmi yachachiwanchik runakunapa yachachisqanku cheqap otaq pantay kasqanmanta cuentata qokunapaq. Diosmanta pipas willasuptikiqa tapukuy: “¿Tupanchu Jesuspa yachachisqankunawan chaynataq Bibliapi yachachikuykunawanpas?”, nispa. Apostol Pablota uyariqkuna imayna ruwasqankuman hina ruway, Bibliapa yachachisqanta allinta estudiay hinaspa Diosmanta yachachisqanku cheqap otaq llulla kasqanpi reparay (Hechos 17:11).

Chaytam ruwarqaku Marcos, Rosa hinaspa Raimunda, paykunaqa Jehova Diospa testigonkunawanmi Bibliata estudiarqaku. Paykunamantaqa kay yachachikuypa qallariyninpim rimamurqanchikña. ¿Imamantam cuentata qokururqaku?

Marcosmi nin: “Estudiachiwaqniyku Testigoqa ima tapukuyniykutapas Bibliapa nisqanwanmi kutichiwaqku. Chaymi señoraywan ñoqaqa pisi-pisimanta Jehova Dios kuyayta qallaykurqaniku, yachasqaykuqa casado vidaykupipas yanapawarqakum”, nispa.

Rosam nin: “Piensarqanim Bibliaqa wakin librokuna hina runapa piensaynin kasqanmanta chaynataq runakunapa yachachisqanman hinalla Diosmanta yachachisqantapas. Ichaqa tiempo pasasqanman hinam cuentata qokurqani tapukuyniykunapa kutichiyninqa Bibliapi kasqanmanta. Kunanqa Jehova Diosqa amistadniymi chaynataq confianapaq Diosniymi”, nispa.

Raimundam nin: “Diospa yanapaynintam mañakurqani payta reqsinaypaq. Chaymanta qepallatam Biblia estudiayta qosaypiwan qallaykurqaniku. ¡Anchatam kusikurqaniku Jehova Diosqa imayna Dios kasqanmanta yachasqaykuwan!”, nispa.

Diospa contranpi yachachisqanku llulla kasqanmanta qawachispanpas Bibliaqa willawanchikmi Dios imayna kasqanmanta. Chaymantapas ‘kuyakuyninman hinam’ entiendechiwanchik paymanta chaynataq munayninmantapas (1 Corintios 2:12). Chayraykum kallpanchaykiku Bibliata estudiaspayki Diosmanta, munayninmanta, hamuq tiempopi imayna kananchikmanta yachanaykipaq. Kaykunamantam astawan yachawaq www.jw.org/es nisqanpi. Maskay “Enseñanzas bíblicas > Preguntas sobre la Biblia” nisqanta. Hina chaynintakamataqmi mañakuwaq Jehova Diospa testigonkuna Bibliata estudiachisunaykipaq. Chaynata ruwaspaykiqa atinkim Dios kuyayta.