¿Ima nintaq bibliapi qari kayninwan utaq warmi kayninwan mana allinkuna ruwasqankumanta?

Estados Unidos nacionpi unquykunamanta estudiaq runakunam ninku 15 watanmanta 19 watankama kaq musu-sipaskuna hukpa siminman qari kayninkuta utaq warmi kayninkuta hinasqankumanta. Sharlene Azam sutiyuq warmim libro qillqasqanpi kaynata nin: “Sichu mayqan musu-sipastapas tapunki hukpa siminman qari kayninta utaq warmi kayninta churasqankumanta hinaptinqa ninqakum chayqa mana hucha kasqanta”, nispa. Payqa ninraqmi: “Chaytaqa paykunaqa manam warmi-qari puñuyta hinachu qawanku”, nispa (Oral Sex Is the New Goodnight Kiss).

• ¿Qamqa ima niwaqtaq?

• ¿Nisqankuman hinachu kanman?

• ¿Jehova Diosqa ima nintaq chaykunamanta?

Arí utaq manam nispa señalanaykipaq.

1. ¿Yaqachu huk sipas wiksayakurunman pipas qari kayninta siminman churasqanrayku?

   1. Arí

   2. Manam

2. ¿Ima unquypas hapirunmanchu hukpa siminman qari kayninta utaq warmi kayninta churaptin?

   1. Arí

   2. Manam

3. ¿Pipas qari kayninta utaq warmi kayninta hukpa siminman hinasqanqa warmi-qari puñuy hinachu kanman?

   1. Arí

   2. Manam

Señalasqaykikunata uraypi kaqwan tupachiy.

1. ¿Yaqachu huk sipas wiksayakurunman pipas qari kayninta siminman churasqanrayku?

   Manam. Chayraykum achkaq ninku hukpa siminman qari kayninkuta utaq warmi kayninkuta hinasqankuqa mana hucha kasqanta.

2. ¿Ima unquypas hapirunmanchu hukpa siminman qari kayninta utaq warmi kayninta churaptin?

   Arí. Pipas chayta ruwaqqa unqurunmanmi hepatitis A utaq B nisqanwan, qari kayninpi utaq warmi kayninpipas tiktim rikurirunman, sida unquypas hapirunmanmi utaq siqsipakuy hina huk unquykunapas.

3. ¿Pipas qari kayninta utaq warmi kayninta hukpa siminman hinasqanqa warmi-qari puñuy hinachu kanman?

   Arí. Qari kayninwan utaq warmi kayninwan imapas ruwasqankuqa warmi-qari puñuy hinañam. Chayqa kanmanmi hukpa siminman qari kayninta utaq warmi kayninta hinay utaq hatun ispanantakama huchapakusqankupas chaynataq hukpa qari kayninta utaq warmi kayninta llapchapayasqankupas.

Hukpa siminman qari kayninta utaq warmi kayninta churaymanta bibliapi ima nisqantayá qawaykusun.

Bibliapim nin: “Diosqa munan [...] mana huchapakunaykichiktam”, nispa (1 Tesalonicenses 4:3).

“Huchapakuyqa” mana casarasqa kachkaspanku tukuy ima ruwasqankum. Chayqa kanmanmi warmi-qari puñusqanku, hukpa siminman warmi kayninta utaq qari kayninta churasqanku, hatun ispananta huchapakusqanku chaynataq hukpa qari kayninta utaq warmi kayninta llapchapayasqankupas. Pipas chaykunata ruwaqqa sasachakuypim tarikunqa. Diosmantapas karunchakurunmanmi (1 Pedro 3:12).

Bibliapim nin: “Huchapakuqmi ichaqa kikinpa cuerponpa contranpi huchallikun”, nispa (1 Corintios 6:18).

Pipas qari kayninta utaq warmi kayninta hukpa siminman churaspanqa imawanpas unqurunmanmi, Dios serviyninpipas manam allinchu kanman hinaspapas hukmanyasqam tarikunman. Huk libropas ninmi: “Musu-sipaskunamanmi willana qari kayninkuwan utaq warmi kayninkuwan imapas mana allinkuna ruwasqankuqa manaraq casarakuchkaspa warmi-qari puñuy hina hucha kasqanmanta. Chaynapi mana hukmanyasqa tarikunankupaq”, nispa (Cómo hablar de sexo con los adolescentes para que te escuchen).

Bibliapim nin: “Ñuqam Jehova Diosnikiqa kani, allinnikipaq yachachiqnikim kani”, nispa (Isaias 48:17).

Warmi-qari puñuymanta Diospa kamachikuyninkunaqa allinnikipaqmi. Chaywanpas ichaya piensanki imapas ruwanaykita harkasusqaykita. Piensariy achkallaña carrokunapa purinanpi carroykiwan allillamanta rinaykipaq utaq maypi sayanaykipaq letrerokuna kasqanpi, ¿niwaqchu chay letrerokuna yanqa kasqanta, icha allinnikipaq kasqantachu niwaq? ¿Imataq pasakunman qampas hinaspa wakinkupas chay letreropa nisqanta mana kasukuptikichikqa?

Yaqa chaynam Diospa kamachikuyninkunapas. Mana kasukuspaqa sasachakuykunapim tarikuwaq (Galatas 6:7). Huk librom nin: “Imapi creesqaykita qipanchaykuspayki hinaspa imapas mana allin kasqanta yachachkaspayki, mana allinkunata ruwaspaykiqa mana valeqpaqmi hapikunki”, nispa (Sex Smart). Diospa kamachikuyninkunata kasukuspam ichaqa allin kaqkuna chaninchasqaykita qawachinki, concienciaykipipas hawkam tarikunki (1 Pedro 3:16).