Hatun hucha ruwaqwan kuyakuq hinaspa llakipayakuq kanamanta

 1. ¿Imataq pasanman pipas hatun huchata ruwaruptin?

PASAQ yachachikuypim yacharqanchik Corinto congregacionpi hatun hucha ruwaqwan imata ruwanankupaq Pablo nisqanmanta. Chay runaqa mana wanakusqanraykum congregacionmanta qarqusqa karqa. Chaywanpas kay yachachikuypaq textopa nisqanman hinam wakinpiqa hatun huchata ruwaqqa wanakunanpaq yanapasqa kanman (Rom. 2:4). ¿Imaynatam Diosqa punta apaqkunawan payta yanapanman?

2, 3. ¿Imatam ruwananchik pi iñiqmasinchikpas hatun hucha ruwarusqanmanta yacharuspaqa? ¿Imanasqa?

² Pipas hatun huchata ruwaspaqa congregacionmantam qarqusqa kanman. Chaynaqa, ¿imatam ruwananchik hukkaqnin iñiqmasinchik hatun hucha ruwarusqanmanta yacharuspaqa? Punta apaqkunaman willananpaqmi kallpanchananchik. Paykunaqa ima ruwarusqanta yachaspallankum yanapayta atinqaku (Is. 1:18; Hech. 20:28; 1 Ped. 5:2).

³ Ichaqa, ¿imatam ruwananchik punta apaqkunaman willayta mana munaptinqa? Ñuqanchikmi willananchik chaynapi chay iñiqmasinchikta yanapanankupaq. Chaytaqa ruwananchik kuyasqanchikraykum. Hinalla mana allinta ruwaspanqa astawanmi Jehova Diosmanta karunchakurunqa. Chaymantapas, hucha ruwasqanmanta Diosta mana serviqkuna yacharuspanqa Diosmantawan serviqninkunamantam mana allinkunata rimayta qallaykunmanku. Chaymi punta apaqkunaman mana manchakuspa willananchik Diosta hinaspa iñiqmasinchikta kuyasqanchikrayku (Sal. 27:14).

¿IMAYNATAM PUNTA APAQKUNA YANAPANKU HATUN HUCHA RUWAQTA?

 4. ¿Imaraykum punta apaqkunaqa hatun huchata ruwaqwan huñunakunku?

⁴ Pi iñiqpas hatun huchata ruwaruptinqa punta apaqkunam tantianku paykunamanta kimsaa chay iñiqmasinchikwan rimanankupaq. Paykunaqa mana hatuntukuspam hucha ruwaq wanakunanpaq tukuyta ruwanku, ichaqa manam cambiananpaqqa obliganmankuchu (Deut. 30:19). Paykunaqa allintam entiendenku mana llapallan hucha ruwaqkuna kamachiq David hina wanakunankuta (2 Sam. 12:13). Wakinqa manam Diospa consejonkunataqa uyariytapas munankuchu (Gen. 4:​6-8). Chaywanpas hucha ruwaqwanqa huñunakunku wanakunanpaq tukuy sunqumanta yanapayta munasqankuraykum. ¿Bibliapi ima consejokunatam yuyarinanku paywan rimanankupaq huñunakuspanku?

 5. Bibliapa nisqanman hinaqa, ¿imaynam punta apaqkuna kananku hucha ruwaqwan rimaspanku? (Rimarimuytaq 2 Timoteo 2:​24-26 nisqanmantapas, qawaytaq dibujotapas).

⁵ Huchallikuqtam qawanku chinkasqa ancha valorniyuq ovejata hina (Luc. 15:​4, 6). Chayraykum paywan rimaspankuqa mana sientichinkuchu, nitaqmi nanay simiwanchu rimapayanku. Manataqmi cumplinankuraykulla huñunakuspankuchu tapupayanku. Aswanqa 2 Timoteo 2:​24-26 (leey) nisqanman hinam kuyakuqllaña hinaspa llampu sunqu kananku, chaynapi huchallikuq imayna piensasqanta cambiananpaq yanapanankupaq.

 6. ¿Imakunatam punta apaqkuna ruwanku hucha ruwaqwan manaraq rimachkaspanku? (Rimarimuytaq Romanos 2:4 nisqanmantapas).

⁶ Diospa imayna piensasqanta entiendenankupaqmi tiempochakunku. Punta apaqkunaqa Diostam qatipakuyta munanku hucha ruwaqta yanapaspankuqa, chaymi Dios hina kuyakuyllawan yanapanku. Pablopa nisqantataqmi yuyarinku, paymi nirqa: “Diosqa ancha kuyakuq kayninpim huchaykimanta wanakunaykipaq qamta yanapayta munasuchkanki”, nispa (leey Romanos 2:4). Paykunaqa manam qunqanankuchu imamantapas astawanqa Jesuspa ovejachankunata cuidanankupaq churasqa kasqankuta. Chaymi imatapas ruwaspankuqa payta qatipakunanku (Is. 11:​3, 4; Mat. 18:​18-20). Hucha ruwaqwan manaraq rimachkaspankum kimsa punta apaqkunaqa Diosta mañakunku wanakunanpaq allinta yanapanankupaq. Bibliapa hinaspa qillqanchikkunapa ima nisqantam estudianku, hinaspapas Diostam mañakunku chay runata allinta entiendenankupaq. Parlankutaqmi paymanta imakuna yachayta necesitasqankumantapas, chaynapi imayna piensasqanta hinaspa hatun huchaman ima aparusqanta entiendenankupaq (Prov. 20:5).

7, 8. ¿Imaynatam punta apaqkuna Diospa pacienciakuq kasqanta qatipakunmanku hatun huchata ruwaqwan rimaspanku?

⁷ Diospa pacienciakuq kasqantam qatipakunku. Yuyarinkum ñawpaq tiempopi huchata ruwaqkunawan Dios imayna kasqanta. Diosmi pacienciakuspan Cainta sumaqllata yanaparqa hinaspam nirqa kasukuptinqa yapamanta bendecinanmanta, ichaqa nirqataqmi mana cambiaspanqa imayna tukunanmanta (Gen. 4:​6, 7). Davidtapas profeta Natanwanmi corregirqa, paymi rikchanachiywan rimapayaspan Davidta yanaparqa huchanmanta wanakunanpaq (2 Sam. 12:​1-7). Mana kasukuq Israel runakunamanpas sapa kutim profetankunata kacharqa (Jer. 7:​24, 25). Payqa manam kikinkumanta wanakunankutaraqchu suyarqa, aswanqa hinallaraq huchata ruwachkaptinkum wanakunankupaq tukuyta ruwarqa.

⁸ Punta apaqkunaqa Jehova Diostam qatipakunku hatun hucha ruwaqta yanapaspankuqa. 2 Timoteo 4:2 nisqanman hinam ‘anchata pacienciakuspanku’ rimapayanku. Paykunaqa hawkalla kaspanku hinaspa pacienciakuspankum huchata ruwaq allin kaqta yapamanta ruwayta munananpaq yanapananku. Piñakuptinku hinaspa nanay simiwan rimayta qallaykuptinkum ichaqa mana uyariyta munaspan wanakuytapas mana munanqachu.

9, 10. ¿Imaynatam punta apaqkuna huchallikuqta yuyaymanachinmanku?

⁹ Hatun huchaman imakuna aparusqantam entiendeyta munanku. ¿Imanasqataq chiriyayta qallaykurqa? ¿Manañachu sapa punchaw biblianta estudiaq utaq Diosmanta willakuq lluqsiq? ¿Manañachu Diostapas tukuy sunqunwan mañakuq? ¿Mana allin munaykunawan aysachikuytachu qallaykurqa? ¿Manachu allinta akllarqa pikunawan hukllawakunanpaq utaq imakunawan kusirikunanpaq? ¿Cuentata qukunchu mana allin ruwasqanwan Jehova Dios imayna tarikusqanta?

¹⁰ Tukuy chaykunata yachanankupaqmi punta apaqkunaqa allin yuyaywan tapunmanku. Ichaqa manam tapunankuchu pinqachinankupaq hinaqa nitaq mana yachananku kaqkunataqa. Kuyakuywan rimapayaptinkuqa mana manchakuspam rimanqa hinaspapas cuentatam qukunqa hatun huchaman imakuna aparusqanmanta (Prov. 20:5). Chaymantapas, Davidta yanapaq Natan hinam ruwasqan mana allin kasqanta cuentata qukunanpaq yanapananku, ichapas chaypaqqa servichikunqaku rikchanachikuykunata. Ichapas punta huñunakusqallankupiraq mana allin ruwasqanmanta cuentata qukuspan pesapakunman utaq wanakunanpaq tantiakurunman.

11. ¿Imatam Jesus ruwarqa mana allin ruwaqkunawan?

¹¹ Jesustam qatipakunku. Jesusmi kawsariramuspan Tarso llaqtayuq Saulota yuyaywan tapuykurqa: “Saulo, Saulo, ¿imanasqataq qatikachawachkanki?”, nispa. Chaynataqa tapuykurqa ruwasqan mana allin kasqanta cuentata qukunanpaqmi (Hech. 9:​3-6). Huk kutipiñataqmi Jezabel sutiyuq warmimanta rimaspan nirqa: “Wanakunantam suyarqani”, nispan (Apocalipsis 2:​20, 21).

12, 13. ¿Imatam punta apaqkuna ruwanmanku hucha ruwaq wanakunanta suyaspanku? (Qawaytaq fotokunatapas).

¹² Punta apaqkunaqa Jesusta qatipakuspankum mana chayllachu piensarunku huchata ruwaq mana haykapipas cambianantaqa. Wakin huchata ruwaqkunaqa punta apaqkunawan punta huñunakusqallankupiraqmi wanakunankupaq tantianku, wakinkum ichaqa mana. Chayraykum hucha ruwaqwanqa achka kutikamapas huñunakunmanku. Ichapas punta huñunakusqanku qipata yuyaymananman hinaspa huchanta riqsikuspa Diosta mañakunman pampachaykunanpaq (Sal. 32:5; 38:18). Ichapas qatiqninpi huñunakuypaqqa sunqun llampuyarunman.

¹³ Punta apaqkunaqa tapukunmankum: “Pay hina tarikuspayqa, ¿imayna rimapayawanankutataq munayman?”, nispa. Chaymi yanapanqa huchallikuqta kuyakuywan yanapanankupaq. Jehova Diostam mañakunku tukuy ima ruwasqankupi yanapananpaq, hinaspapas suyankum chay hucha ruwaq pantaypi kasqanta riqsikuspan wanakunanta (2 Tim. 2:​25, 26).

14. Pipas huchanmanta wanakuptinqa, ¿pitam astawan agradecekunanchik? ¿Imanasqa?

¹⁴ Pipas huchanmanta wanakuptinqa llapallanchikmi anchata kusikunchik (Luc. 15:​7, 10). Ichaqa, ¿pitam astawanqa agradecekunanchik? ¿Punta apaqkunatachu? Pablom nirqa: “Icharaqpas wanakunankupaq Dios saqiykunman”, nispa (2 Tim. 2:25). Chaynaqa, manam punta apaqkuna rimapayasqanraykullachu cambiananpaqqa tantiakun, aswanqa kikin Dios sunqunta tupaykusqanraykum. Pabloqa nirqataqmi hucha ruwaq wanakuspan allinña kananmantapas. ¿Imanasqa? Chiqap yachachikuykunata aswan allinta yachaspa hinaspa pantaypi kasqanta riqsikuspa diablopa tuqllanmanta lluptikusqanraykum (2 Tim. 2:26).

15. ¿Imaynatam punta apaqkunaqa huchallikuq wanakuruptinpas hinalla yanapanmanku?

¹⁵ Huchallikuq wanakuruptinpas punta apaqkunaqa watuspankum hinalla kallpanchanqaku allin iñiyniyuq kananpaq, satanaspa tuqllanmanta ayqikunanpaq hinaspa allin ñanninta rinanpaq (Heb. 12:​12, 13). Punta apaqkunaqa manamá pimanpas hucha ruwaq iñiqmasinchikmanta tukuy ima yachasqankutaqa willakunankuchu. Ichaqa, ¿imallamantam wakinpi iñiqkunaman willanmanku?

“LLAPALLANKUPA QAYLLANPIYÁ QAQCHAY”

16. ¿Pikunamantam Pabloqa rimachkarqa ‘llapallankupa qayllanpi’ nispanqa? (Rimarimuytaq 1 Timoteo 5:20 nisqanmantapas).

¹⁶ (Leey 1 Timoteo 5:20). Pablom punta apaqmasin Timoteota nirqa hucha ruwaqta ‘llapallankupa qayllanpi’ qaqchananpaq utaq correginanpaq. ¿Pikunamantam rimachkarqa ‘llapallankupa qayllanpi’ nispanqa? Manam llapallan iñiqkunamantachu, aswanqa hucha ruwasqanmanta lliw yachaqkunallamantam. Ichapas paykunaqa rikurqaku utaq hucha ruwaq paykunaman willakurqa. Paykunallamanmi punta apaqkunaqa willananku chay hucha ruwaqwan rimaspanku payta corregisqankumantaqa.

17. Hatun hucha ruwaqmanta lliw iñiqkuna yacharuptinqa, ¿imatam punta apaqqa congregacionman willanqa? ¿Imanasqa?

¹⁷ Wakinpim ichaqa hucha ruwaqmanta lliw iñiqmasinkuna yacharunmanku utaqmi qipakunaman llapallankupa yachasqan kanman. Chayna kaptinqa punta apaqmi congregacionman willanqa chay iñiqmasinchik corregisqa kasqanmanta. ¿Imaynanpim congregacionpi kaqkunapa ‘qayllanpi’ corregisqa kanqa? Pablopa nisqanman hinaqa hukkunapas manchakunankupaqmi hinaspa hatun huchaman mana wichiykunankupaqmi.

18. ¿Imatam punta apaqkuna ruwanku bautizasqa iñiqmasinchik manaraq 18 watanpi kachkaspan hatun huchata ruwaruptinqa? (Qawaytaq fototapas).

¹⁸ ¿Imatam punta apaqkunaqa ruwanmanku bautizasqa iñiqmasinchik manaraq 18 watanpi kachkaspan hatun huchata ruwaruptinqa? Paykunam tantianqaku iskay punta apaqkuna chay warmawan hinaspa iñiq tayta-mamanwan utaq pipas uywaqninwan parlanankupaq. Tayta-mamantam tapunqaku: “¿Imatam tantiarunkichik warmaykichikta yanapanaykichikpaq, chaynapi cambiaspan wanakunanpaq?”, nispa. Chay warma humilde kaspan tayta-mamanpa yanapakuyninta chaskikuptinqa manañam tantianqakuchu kimsa punta apaqkunaraq paywan huñunakunankupaqqa. Tayta-mamakunatamriki Jehova Diosqa kamachin churi-wawankuta kuyakuywan correginankupaqqa (Deut. 6:​6, 7; Prov. 6:20; 22:6; Efes. 6:​2-4). Chaymantam punta apaqkunaqa tayta-mamanwan wakinpi rimanmanku warmankuta hinalla yanapasqankumanta yachanankupaq. Chay warma mana wanakuspa mana cambiayta munaptinmi ichaqa kimsa punta apaqkunaña paywan hinaspa iñiq tayta-mamanwan huñunakunqaku.

‘DIOSQA ANCHA KUYAPAYAKUQMI HINASPA ANCHA LLAKIPAYAKUQMI’

19. ¿Imaynatam punta apaqkunaqa Jehova Diosta qatipakunku hatun hucha ruwaqta yanapaspanku?

¹⁹ Diosqa punta apaqkunatam kamachin hatun hucha ruwaqkunamanta lliw iñiqkunata cuidanankupaq. Chaymi paykunaqa tukuyta ruwanku chayta kasukunankupaq (1 Cor. 5:7). Tukuytataqmi ruwanku hatun hucha ruwaqta wanakunanpaq yanapanankupaqpas. Chayraykum Diospa “ancha kuyapayakuq hinaspa ancha llakipayakuq kasqanta” qatipakuspanku kusikuywan hinaspa mana amiruspa hatun hucha ruwaqta yanapayta munanku (Sant. 5:11). Apostol Juanmi yuyaqña kachkaspan kuyakuywan kaynata nirqa: “Kuyasqay churillaykuna, kaykunatam qillqamuchkaykichik mana huchallikunaykichikpaq. Chaywanpas, pipas huchallikuruptinqa Dios taytanchikpa qayllanpim kachkan yanapawaqninchik, payqa allin ruwaq Jesucristom”, nispa (1 Juan 2:1).

20. ¿Imamantam qatiqnin yachachikuypi yachasun?

²⁰ Wakinpiqa hatun hucha ruwaqqa manam wanakuyta munanchu, chayna kaptinqa congregacionmantam qarqusqa kanan. ¿Imatam punta apaqkunaqa ruwanku chayna pasaptinqa? Chaymantam qatiqnin yachachikuypi yachasun.