Amapuni iskayrayaychu Diospa Gobiernonmantaqa

1, 2. (1) ¿Imanasqam mana iskayrayachwanchu Jehova Diospa Gobiernon paypa munaynin ruwananmanta? (2) Efesios 2:12 nisqanman hinaqa, ¿imanasqam Diospa ruwasqan contratokunaqa yanapawanchik Gobiernonmanta mana iskayrayanapaq? (Qaway kay paginapi dibujota.)

JEHOVA DIOSPA testigonkunaqa mana iskayrayaspam haykapipas runakunaman ninchik lliw sasachakuyninchikta Diospa Gobiernollan chinkachinanmanta. Chayqa kallpanchawanchikmi hinaspa iñiyninchikpim allinta takyachiwanchik. Chaynaqa, manam haykapipas iskayrayananchikchu Diospa Gobiernonmantaqa nitaq paypa munayninta ruwananmantaqa. ¿Imanasqam mana iskayrayaspa iñichwan Diospa Gobiernonpi? (Heb. 11:1.)

² Jehova Diosmi Gobiernonta hatarirachirqa munaynin ruwasqa kananpaq. Chay Gobiernoqa sutillatam qawachinqa Jehova Dioslla llapallan kamachiq kasqanta. ¿Pitam Diosqa akllarqa chay Gobiernonpi Rey kananpaq? ¿Pikunataq chay Reywan kamachinqa? ¿Pikunatam paykunaqa kamachinqa? Tukuy chaykuna ruwasqa kananpaqmi Jehova Diosqa contratokunata ruwarqa. Chay contratokunataqa kikin Jehova Diosmi ruwarqa hinaspa churin Jesucristopas. Chay contratokunapi yuyaymanayqa yanapawasunmi Diospa munaynin ruwasqa kanamantawan Diospa Gobiernon cheqap kasqanmanta mana iskayrayanapaq (leey Efesios 2:12).

 3. ¿Imamantam kay yachachikuypi hinaspa qatiqnin yachachikuypipas qawasun?

³ Bibliam sutillata willakun Diospa Gobiernonwan tupaq soqta contratokunamanta. Chaykunam: 1) Abrahanwan contrato ruwasqan, 2) Leywan contrato ruwasqan, 3) Davidwan contrato ruwasqan, 4) Melquisedec hina sacerdote kananpaq contrato ruwasqan, 5) mosoq contrato ruwasqan hinaspa 6) Diospa Gobiernonpaq contrato ruwasqan. Qawasunyá chay contratokuna Diospa Gobiernonwan imayna tupasqanmanta hinaspa Diospa munaynin kay Pachapi ruwakunanpaq imayna yanapakusqanmantapas (qaway 9 kaq paginapi yachachikuyta).

 4. Bibliapa willakusqanman hinaqa, ¿ima kimsa kaqkunatam Diosqa tantearurqa munaynin ruwakunanpaq?

⁴ Runakuna kawsanankupaq kay Pachata suma-sumaqta unancharuspanmi, Jehova Diosqa kaykunata tantearurqa: 1) Runakunatam unanchanan karqa kikinman rikchakuqta. 2) Paykunam kay Pachata sumaq huertaman tikraspanku mana huchayoq mirayninkunawan huntananku karqa. 3) Manam mikunankuchu karqa allin kaqta hinaspa mana allin kaqta yachanapaq sachapa ruruntaqa (Gen. 1:26, 28; 2:16, 17). Kay kimsa tanteasqankunallawanmi Diospa munayninqa ruwakunan karqa. Hinaptinqa, ¿imanasqamá Diosqa contratokunataraq ruwanan karqa munaynin ruwakunanpaq?

5, 6. (1) ¿Imaynatam Satanasqa harkakuyta munarqa Diospa munaynin mana ruwakunanpaq? (2) ¿Imatam Jehova Diosqa ruwarqa contranpi hatariqkunata?

⁵ Diospa munaynin mana ruwakunanpaqmi Satanasqa paypa contranpi hatarirurqa. Satanasqa anchatamá munarqa runakunapas Diosta qepanchanankuta, chaymi Evata tentarqa allin kaqta hinaspa mana allin kaqta yachanapaq sachapa rurunta mikurunanpaq (Gen. 3:1-5; Apoc. 12:9). Chaynata ruwaspanmi Diospa llapallan kamachiq kasqanta iskayrayarachirqa. Chaymantapas, tiempopa risqanman hinam Satanasqa runakunamanta nirqa allinkunallata chaskisqankurayku Diosta servisqankumanta (Job 1:9-11; 2:4, 5).

⁶ Hinaptinqa, ¿imatam Jehova Diosqa ruwarqa contranpi hatariqkunata? Payqa chinkarachinmanmi karqa. Ichaqa, chayta ruwaspanqa manachá Adanpawan Evapa miraynin kay Pachata huntananpaq munasqanqa ruwakunmanchu karqa. Chayraykum Jehova Diosqa paykunata mana wañurachirqachu. Aswanqa munaynin ruwasqa kananpaqmi huk sumaq willakuyta Eden huertapi nirqa (leey Genesis 3:15).

 7. ¿Imatam Eden huertapi Jehova Diospa willakusqanqa sutillata qawachin?

⁷ Eden huertapi willakusqanpim Jehova Diosqa culebratawan mirayninkunata otaq Satanastawan paypa yanapaqninkunata nirqa wañuypi tukunankumanta. Chaytaqa warmipa mirayninmi ruwanan karqa. Chaynaqa, Eden huertapi Jehova Diospa willakusqanqa sutillatam qawachin Satanaspas chaynataq lliw ñakariykuna rikurichisqanpas chinkachisqa kananmanta. Chay willakuyqa qawachintaqmi pita servichikuspan chinkachinanmanta.

 8. ¿Imatam nichwan warmimanta hinaspa mirayninmantapas?

⁸ ¿Pitaq warmipa mirayninqa karqa? Culebrapa umanta chamchananrayku otaq Satanasta chinkachinanraykum, chay mirayqa mana runakuna hina aycha-tulluyoqchu kanan karqa (Heb. 2:14). Chayraykum chay willakuypi warmipas mana aycha-tulluyoqchu kanan karqa aswanqa espiritum. Culebrapa miraynin yapakusqanqa sutillam qawakurqa. Ichaqa, ¿imatam nichwan warmipa mirayninmanta? Warmipa mirayninmantaqa manamá yachakurqachu yaqa 4.000 wata pasasqanpi. Chaykamam Jehova Diosqa achka contratokunata ruwarqa chay miray pi kasqanta qawachinanpaq. Chay contratokunaqa qawachirqataqmi Satanaspa tukuy mana allinkuna rikurichisqanta chay miray chinkachinanmantapas.

 9. ¿Haykapim Abrahanwan Diospa contrato ruwasqanqa qallaykurqa?

⁹ Eden huertapi willakusqanpa yaqa 2.000 wata pasaytam, Jehova Diosqa Abrahamta nirqa Ur llaqtata saqespan Canaan lawman rinanpaq (Hech. 7:2, 3). Nirqam: “Llaqtaykimanta, aylluykimanta hinaspa taytaykipa familianmanta lloqsiy qawachinay allpaman. Hatun naciontam qanmanta rurasaq. Bendecispaymi sutikitapas sinchi reqsisqata rurasaq. Qamraykutaqmi wakin runakunatapas bendecisaq. Bendecisaqmi bendecisuqnikikunata. Ñakasaqmi ñakasuqnikikunata. Qamraykum bendecisaq kay pachapi llapallan familiakunata”, nispa (Gen. 12:1-3). Diospa chayna nisqantam Biblia sutichan Abrahanwan contrato ruwasqan nispa. Manamá allintachu yachanchik haykapi chay contratomanta rimanakusqankutaqa. Ichaqa yachanchikmi chay contratoqa cristianokunapa tiemponmanta ñawpaqtaraq 1943 watapi qallaykusqanta. Chaypim Abrahamqa 75 watanpi kachkaspan Haran llaqtamanta lloqsispan Eufrates mayuta chimparqa Canaan lawman yaykunanpaq.

10. (1) ¿Imaynatam Abrahamqa Diospa nisqankunapi ancha iñisqanta qawachirqa? (2) ¿Imakunatam Jehova Diosqa astawanraq qawachirqa warmipa mirayninmanta?

¹⁰ Diosqa Abrahanwan contrato ruwasqanmantaqa achka kutipim kaqmanta payman nirqa, hinaspam astawan qawachirqa imayna kananmanta (Gen. 13:15-17; 17:1-8, 16). Abrahamqa anchatam iñirqa Diospa tukuy nisqanpiqa, chayraykum mana iskayrayaspan sapallan churintapas wañuchiyta munarqa. Chaymi Jehova Diosqa Abrahanwan contrato ruwasqanta astawan takyachirqa (leey Genesis 22:15-18; Hebreos 11:17, 18). Chaypim Jehova Diosqa astawanraq qawachirqa warmipa miraynin pi kananmanta. Arí, chay mirayqa Abrahampa mirayninmantam rikurimunan karqa hinaspapas achkam kanan karqa. Chaymantapas, chay miraypi kaqkunaqa reykunam kananku karqa, enemigonkunatapas chinkachinankum karqa hinaspapas paykunawanmi achkallaña runakuna bendecisqa kananku karqa.

11, 12. (1) ¿Imaynatam Bibliaqa qawachin Abrahanwan contrato ruwakusqanqa hamuq tiempopi astawanraq cumplikunanmanta? (2) ¿Imaynatam chayqa yanapawasun?

¹¹ Abrahanwan contrato ruwakusqanqa qallariypim cumplikurqa mirayninkuna Prometesqa Allpata chaskiptinku. Chayna kaptinpas, Bibliaqa sutillatam qawachin chay contratoqa hamuq tiempopi astawanraq cumplikunanmanta (Gal. 4:22-25). Chaymanta rimaspanmi, apostol Pablo nirqa Abrahampa mirayninmanta punta kaqqa Jesus kasqanta, hinaspa chay miraypa partenñataq hanaq pachaman rinankupaq suyakuyniyoq 144.000 cristianokuna kasqankuta (Gal. 3:16, 29; Apoc. 5:9, 10; 14:1, 4). Eden huertapi Diospa rimasqan warmiqa tupanmi hanaq pachapi Diospa llaqtanwan. Chay warmitam sutichan ‘hanaq pachapi kaq mosoq Jerusalen’ nispa, chaypim kachkanku Diosman sonqo angelkuna (Gal. 4:26, 31). Abrahanwan contrato ruwakusqanman hinam, chay warmipa mirayninqa achka bendicionkunata runakunaman apamunqa.

¹² Abrahanwan contrato ruwakusqanqa, allintam takyachin Diospa Gobiernon hanaq pachapi kananmanta hinaspa chay Gobiernopi kamachiq Rey hinaspa paywan kuska kamachiqkunapas kananmanta (Heb. 6:13-18). ¿Hayka tiempokamataq chay contratoqa kanqa? Chay contratoqa hinallam kanqa Diospa contranpi lliw kaqkunata Diospa Gobiernon chinkachinankama hinaspa kay Pachapi lliw runakuna bendecisqa kanankukama (1 Cor. 15:23-26). Ichaqa, Genesis 17:7 versiculom nin chay contratoqa wiñaypaq kasqanmanta. ¿Imanasqa? Mosoq pachapi lliw kawsaqkuna wiñaypaq bendecisqa kanankurayku. Qawasqanchikman hinaqa, Abrahanwan contrato ruwakusqanqa sutillatam qawachin allin runakuna ‘kay pachaman huntanankupaq’ munayninta Jehova Dios ruwananmanta (Gen. 1:28).

13, 14. ¿Imapaqmi Diosqa Davidwan contratota ruwarqa?

¹³ Eden huertapi Diospa willakusqanqa hinaspa Abrahanwan contrato ruwakusqanqa qawachinmi, Jehova Dios allin ruwasqanman hina haykapipas kamachisqanta. Hinaptinqa, Jesuspa makinpi Diospa Gobiernonpas chayna allin ruwasqanman hinam kamachinqa (Sal. 89:14). ¿Yaqachu haykapipas chay gobiernoqa mana allinta ruwanqa hinaspa chinkanqa? Manamá, chaypaqmi Diosqa huk contratota ruwarqa.

¹⁴ Chay contratoqa karqa Davidwan contrato ruwasqanmi (leey 2 Samuel 7:12, 16). Chay contratontakamam Jehova Diosqa rey Davidta nirqa paypa mirayninmanta Mesias hamunanta (Luc. 1:30-33). Chayna nisqanwanmi sutillata qawachirqa warmipa miraynin pimanta rikurimunanta. Diosqa nirqam rey Davidpa huk kaqnin miraynin Diospa Gobiernonpi rey kananpaq derechoyoq kananmanta (Ezeq. 21:25-27). Davidpa gobiernonqa Jesuswanmi wiñaypaq takyachisqa kanqa. Arí, mirayninmi wiñaypaq gobiernanqa, Inti hinam una-unaypaq gobiernon kanqa (Sal. 89:34-37). Jesuspa makinpi Diospa Gobiernonqa manamá haykapipas mana allintaqa ruwanqachu, hinaspapas tukuy ruwasqanqa wiñaypaqmi kanqa.

15-17. Melquisedec hina sacerdote kananpaq contrato ruwakusqanman hina, ¿ima ruwayniyoqraqtaq warmipa mirayninmanta reyqa kanqa, hinaspa imanasqa?

¹⁵ Abrahanwan hinaspa Davidwan contrato ruwakusqanqa allintam qawachin warmipa miraynin rey kaspan kamachinanmanta. Ichaqa, llapallan runakuna alli-allin bendecisqa kanankupaq hinaspa huchankumanta librasqa kaspa Diospa churinkuna kanankupaqqa, chay mirayqa rey kaspanpas sacerdotem kanan karqa. Chayna sacerdote kananpaqmi Jehova Diosqa huk contratota ruwarqa, chayqa Melquisedec hina sacerdote kananpaq contrato ruwasqanmi.

¹⁶ Rey Davidnintakamam Jehova Diosqa willachirqa Jesuswan contrato ruwananmanta. ¿Imapaq? Puntataqa: ‘alleqninpi tiyaykuspan’ lliw enemigonkunata chinkachinanpaqmi. Chaymantañataq: ‘Melquisedecman rikchakuq kaspan’ ‘wiñaypaq sacerdote kananpaq’ (leey Salmo 110:1, 2, 4). ¿Imanasqam ‘Melquisedecman rikchakunan’ karqa? Abrahampa mirayninkuna Prometesqa Allpaman manaraq yaykuchkaspankum, Melquisedecqa ‘Salem llaqtapi rey kaspanpas’ “Diospa sacerdoten karqa” (Heb. 7:1-3). Kikin Jehova Diosmi rey hinaspa sacerdote kananpaq payta churaykurqa. Jesusmanta ñawpaqtaqa, Melquisedecllam rey kaspanpas sacerdote karqa. Chaymantapas, ñawpaqpi hinaspa paymanta qepamanpas pay hina iskay ruwayniyoq mana pipas kasqanraykum nichwan “wiñaypaq sacerdote” kasqanmanta.

¹⁷ Chay contratontakamam Jehova Diosqa Jesusta sacerdote kananpaq churaykurqa. Chaymi Jesusqa ‘Melquisedecman rikchakuq kaspan wiñaypaq sacerdote kanqa’ (Heb. 5:4-6). Kay contratoqa sutillatam qawachin kay Pachapi Jehova Diospa munaynin ruwakunanpaq Gobiernonta servichikunanmanta.

18, 19. (1) ¿Imaynatam kaypi qawamusqanchik contratokunaqa Diospa Gobiernonwan tupan? (2) ¿Imamantam qatiqnin yachachikuypi qawasun?

¹⁸ Kaykama rimaramusqanchik contratokunaqa, allintam qawachiwanchik Diospa Gobiernonwan tupasqanta. Qawachiwanchiktaqmi chay Gobierno kananpaq allin contratokuna ruwakusqanmanta. Eden huertapi Diospa willakusqanmi allinta qawachin kay Pachapi munaynin ruwasqa kananpaq warmipa mirayninta servichikunanmanta. Abrahanwan contrato ruwasqanñataqmi qawachin pim chay miray kananmanta hinaspa ima ruwayniyoqkuna kananmantapas.

¹⁹ Davidwan contratoñataqmi sutillata qawachin warmipa miraynin Jesusqa pimantakama hamunanta. Qawachintaqmi Diospa Gobiernonpi rey kaspan kay Pachapi runakunata kamachinanmanta hinaspa lliw ruwasqankuna wiñaypaq kananmanta. Melquisedec hina sacerdote kananpaq contrato ruwakusqanñataqmi qawachin, warmipa miraynin Jesusqa sacerdote kananmanta. Ichaqa, Jesusqa manam sapallanchu runakunata yanapanqa mana pantaqña kanankupaqqa. Kanqataqmi pay hina huk reykunapas hinaspa sacerdotekunapas. ¿Pikunam paykunaqa kanku? Chaymantam qatiqnin yachachikuypi qawasun.