¿Allinchu kanman tatuaje nisqankuta ruwachikuyninchik?

Cuerponchikpi tatuajeta churachikuymantaqa utaq dibujachikuymantaqa huk kutillatam bibliapiqa riman. Levitico 19:28a nin: “Amataqmi mana chinkaq marcakunataqa aychaykipipas ruwachikunkichu”, nispa. Israel casta runakunamanmi Diosqa chaynata kamachirqa huklaw nacionniyuq runakunata mana qatipakunankupaq, chay runakunaqa taytachankupa sutintam cuerponkupi marcachikuqku (Deuteronomio 14:2). Israelitakunaman Diospa kamachisqanqa, ñuqanchiktapas yanapawanchikmi allinta tantiakunanchikpaq.

¿Jehova Diosta yupaychaqqa tatuaje nisqankuta ruwachikunmankuchu?

Qatiqninpi yachaykusun bibliapi ima nisqankunamanta:

• Bibliapim nin: “Warmikunapas respetanapaq hinayá allinta pachakuchunku, allin yuyaywan hinaspa ama pitapas hukmanyachinankupaq hina”, nispa (1 Timoteo 2:9). Chayna nisqantaqa qarikunapas kasukunankum.

• Wakin runakunam tatuaje nisqankuta ruwachikunku wakinkuwan mana chaynalla kasqankuta ninankupaq. Jehova Dios yupaychaqkunataqa bibliapim niwanchik: “Kawsachkaq ofrendata hinayá cuerpoykichikta Diosman quychik chuyay-chuyayta hinaspa paypa chaskinanpaq hinata, chayqa tukuy yuyayninchikwan Diosta serviymi”, nispa (Romanos 12:1). Pipas cuerponpi tatuaje nisqankuta ruwachikuyta utaq dibujachikuyta munaptinqa bibliapi chayna nisqanmi yanapanman mana ruwachikunanpaq. Wakinqa hukkunata qatipakusqankuraykum tatuaje nisqankuta ruwachikunku utaq dibujachikunku. Chayraykum manaraq marcachikuchkaspanku piensarinanku imanasqa chaynata ruwachikusqankumanta, chayqa yanapanqam qipakunaman mana ñakakunankupaq (Proverbios 4:7).

• Bibliapim nin: ‘Ganaswan llamkakuq runapa yuyaymanasqanqa apuyachinqam. Mana tantiaq runapa chaylla ruwasqanqa wakchayachinqam’, nispa (Proverbios 21:5). Yaqa llapanpim cuerponkupi tatuaje nisqankuta ruwachikunku utaq dibujachikunku allinta mana piensarispa. Chayna tantiakusqankumantam qipakunaman ñakakunku. Cuerponkuta marcachikuqkunataqa runakunapas hukmantam qawanku, wakinpiqa llamkaytapas manam tarinkuchu. Chay tatuaje nisqankuta cuerponkumanta chinkachiyqa achka qullqipaqmi, chaymantapas llumpaytam nanakun. Chaymi achka runakuna ñakakunku tatuaje nisqankuta ruwachikusqankumanta.