Tayta-mamakuna, warmaykichikta wawallaraq kasqanmantapacha yachachiychik

BIBLIAM nin: “Churi-wawanchikkunaqa Tayta Diospa qowasqanchik herencianchikmi. Nacepuwaqninchikkunaqa Tayta Diospa qowasqanchik premionchikmi”, nispa (Sal. 127:3). ¡Chayraykumá cristiano tayta-mamakunaqa warmachanku naceptin anchata kusikunku!

Ancha kusikunapaq kaptinpas hatun llamkayniyoqmi tayta-mamakunaqa kanku. Warmacha allin sano wiñananpaqqa sapa punchawmi allin mikuchisqa kanan. Chaymantapas, iñiyninpi allin takyasqa kananpaqqa tayta-mamanmi Diosmanta allinta yachachinan. Chaymi ancha allin tayta-mamakuna Bibliamanta yachachinankupaq kallpanchakuyninkuqa (Prov. 1:8). ¿Haykapitaq churi-wawankuman yachachiyta qallarinanku hinaspa imaynata?

Qawasun Israel nacionpi Dan ayllumanta kaq Zora llaqtapi yachaq Manoa sutiyoq runata ima pasasqanmanta. Huk punchawmi Manoapa mana wachakuq señoranman Diospa angelnin rikuriykuspan nirqa wiksayakuspan qari wawata wachakunanmanta (Juec. 13:2, 3). Chay willakuywanqa maynatachá kusikurqaku, chayna kaptinpas hukmanyarqakuchá churi-wawankuta imayna uywanankumanta. Chaymi Diosta Manoa mañakuspa nirqa: “Señorlláy, mañakullaykim chay qampa kachamusqayki runayá ñoqaykuman kutimuchun hinaspayá yachachiwachunku nacemuq wawawan imam ruranaykuta”, nispa (Juec. 13:8). Manoawan señoranqa allintam warmankutaqa uywarqaku. Paykunaqa Diospa Kamachikuyninkunaman hina Sansonta yachachinankupaqmi anchata kallpanchakurqaku. Chayna ruwasqankuqa manam yanqachu karqa, Bibliam nin: ‘Tayta Diospa Espiritunmi pay kallpanchayta qallarirqa’, nispa. Arí, Diospa atiyninwanmi Sansonqa Israel nacionpa huknin juez kaspan admirakunapaq kaqkunata ruwarqa (Juec. 13:25; 14:5, 6; 15:14, 15).

¿Haykapitaq tayta-mamakunaqa churi-wawankuman yachachiyta qallarinanku? Bibliam Timoteomanta nin ‘warma kasqanmantaraq’ otaq wawallaraq kasqanmanta, maman Eunicewan hinaspa abuelan Loidawan ‘Bibliapa yachachikuyninkunata’ yachachisqankumanta (2 Tim. 1:5; 3:15). Arí, Timoteoqa wawallaraq kasqanmantapacham Diosmanta yachachisqa karqa.

Ancha allinmi cristiano tayta-mamakuna Diospa yanapakuyninta mañakuyninkuqa hinaspa churi-wawankuta wawallaraq kasqankumantapacha imayna uywanankupaq ñawpaqmantaraq allinta tanteayninkuqa. Proverbios 21:5 (NM) nin: “Allin ruwaq runapa ñawpaqmantaraq tanteasqankunaqa allinpim tukunqa”, nispa. Arí, manaraq warmanku nacechkaptinmi tayta-mamakunaqa ñawpaqmantaraq allinta yachananku warmankuta imayna uywanankupaq. Chaypaqqa ichapas huk listata ruwanmanku warmanku imakunata necesitananmanta. Chaymantapas, ancha allintaqmi Dios serviypi warmankuwan kuska imakuna ruwanankumanta piensayninkupas. Tayta-mamakunaqa warmanku nacesqanmantapacham Jehova Diosmanta yachachiyta qallarinanku.

Warmakuna imayna yuyay hapisqankumanta willakuq librom nin, wawakunaqa nacesqanku qepa killakunallapi chaylla imatapas yachay atisqankumanta. Chaymi tayta-mamakunaqa chay tiempota allinta servichikunanku Jehova Diosmantawan kamachikuyninkunamanta allinta yachachinankupaq.

Huk precursora regularmi warmi wawachanmanta kaynata nirqa: “Huk killachayoqllaraq kasqanmantapacham Diosmanta willakuq rispay apaq kani, payqa manamá musyakurqachu ima ruwasqanmantaqa, ichaqa manam yanqachu karqa chayna apasqayqa. Iskay watachayoq kachkaspanqa tratadokunatañam kikillanmanta runakunaman aypuyta qallaykurqa”, nispa.

Churi-wawakunata wawallaraq kasqankumantapacha yachachiyqa allinpim tukun. Chayna kaptinpas, achka tayta-mamakunam reqsikunku chay tiempokunapi Diosmanta yachachiy sasaniraq kasqanmanta.

Warmachakuna mana qasillalla kasqankuraykum tayta-mamakunaqa sasachakunmanku paykunaman yachachiyta. Paykunaqa tukuy ima rikusqankumantam yachayta munanku. Chaynaqa, ¿imatam tayta-mamakunaqa ruwanmanku yachachisqankuta warmachanku uyarinankupaq?

Piensariy Moisespa ima nisqanpi. Deuteronomio 6:6, 7 nin: “Kay kamachisqay palabrakunaqa sonqoykipim kanqa. Churikikunamanmi sapa kutilla yachachinki wasipi kaspa, ñanpi purispa, puñuq yaykuspa chaynataq hatarispaykipas”, nispa. Yachachiy niq rimayqa imatapas kuti-kutirispa yachachiymantam rimachkan. Warmachakunaqa kanku sapa kuti yakuwan tallisqa sachacha hinam. Imatapas kuti-kutirispa yuyarichiy yuyayniyoqkunapaq allin kaptinqa, ¡astawanraqchá warmachakunapaqqa ancha allin kanqa!

Jehova Diosmanta warmachakunaman yachachinapaqqa paykunapaqmi tiempochakuna. Chayna ruwayqa sasam kay tiempopi imapas ruwayninchikkuna achkallaña kasqanrayku. Apostol Pablom ichaqa niwanchik ‘tiemponchikta mana usuchispa’ Dios serviyninchikpi ruwayninchikkunata ruwananchikpaq (Efes. 5:15, 16). ¿Imaynatam chayta ruwachwan? Congregacionpi huk ancianom congregacionpi llamkayninrayku hinaspa sapaq llamkayninrayku sasachakurqa warmachanta uywaypi. Señoranpas precursora regular kasqanraykum manaña haypakurqachu. ¿Maymantam tiempota horqorqaku warmachankuman yachachinankupaq? Paymi nin: “Sapa punchawmi manaraq llamkayniyman richkaspay señoraypiwan leepuniku Bibliamanta willakuq libroy niq qellqamanta otaq Diospa Palabranta sapa punchaw estudianapaq folletomanta. Puñunanpaqñataqmi kaqmanta leepuniku. Diosmanta willakuq rispaykupas apanikum. Anchatam kallpanchakuniku wawallaraq kachkaptin Diosmanta yachachinaykupaq”, nispa.

Llapallanchikmi munanchik churi-wawanchikkuna wiñaspanku allin runakuna kanankuta. Tukuy imamantapas puntataqa Diosta tukuy sonqonkuwan kuyanankupaqmi yachachina (Mar. 12:28-30).

Salmo 127:4 nin: “Kallpallanchikpiraq naceq churinchikkunaqa valeroso soldadokunapa flechankuna hinaraqmi”, nispa. Arí, churi-wawakunaqa flechaqkunapa makinpi flechakuna hinamá kanku. Flechaqkunaqa allintam flechataqa hapinanku kamas munasqankupipuni hapichinankupaq, sichum chay flechata kachaykuptinqa manañam qepamanqa kutinñachu. Tayta-mamakunaqa churi-wawankuwanqa manam unay tiempochu kuska kanku. Chaymi tayta-mamakunaqa chay tiempopi warmankuman yachachinanku Diospa kamachikuyninkunata.

Apostol Juanmi Diosmanta yachachisqan runakunamanta nirqa: “Iñichisqaykuna cheqap kaqpi kawsasqanmanta uyarispaymi ñoqaqa ancha-anchata kusikuni”, nispa (3 Juan 4). Cristiano tayta-mamakunapas anchatamá kusikunku churi-wawanku hinalla ‘cheqap kaqpi kawsasqankumanta’.