¿Imataq huchapi kayqa?

Huchaqa ruwasqanchikpi, piensasqanchikpi Diospa kamachikuyninkunata mana kasukuymi (1 Juan 3:4; 5:17). Bibliapim niwanchik mana allinkunata ruwaspa, runamasinchikta ñakarichispaqa utaq yachachkaspa mana kasukuspaqa Diospa qayllanpi huchallikusqanchikmanta (Santiago 4:17).

Bibliaqa hebreo hinaspa griego rimaypim qillqasqa karqa. Chay rimaykunapiqa flechay munasqanta pipas mana hapichiptinqa niqkum huchallikurusqanta, chaynataqa niqku pantarusqanraykum. Chaymantapas bibliapiqa willawanchiktaqmi israel llaqtayuq wakin soldadokuna warakaspanku imatapas hapichisqankuta. Hebreo hinaspa Griego rimaypiqa warakaspanku mana pantaptinkum niqku “mana huchallikusqankuta” (Jueces 20:16, Nueva Biblia Española). Arí, huchapi kayqa Diospa kamachikuyninkunata mana kasukuymi utaq Diospa contranpi pantaymi.

Diosqa unanchawaqninchik kasqanraykum kamachikuyninkunata kasukunapaq niwanchik (Apocalipsis 4:11). Unanchawaqninchik kasqanraykutaqmi imapas ruwasqanchikmanta cuentata mañawasunchik (Romanos 14:12).

¿Atichwanchu mana huchallikuspa kawsakuyta?

Manam, bibliapim nin llapallanchik huchayuq kasqanchikrayku ‘Diospa kanchayninta mana haypasqanchikta’ (Romanos 3:23; 1 Reyes 8:46; Eclesiastes 7:20; 1 Juan 1:8). ¿Imanasqataq huchayuq kanchik?

Diosqa Adantawan Evataqa mana huchayuqtam unancharqa (Genesis 1:27). Ichaqa mana kasukusqankuraykum huchayuq rikurirurqaku (Genesis 3:5, 6, 17-19). Chayraykum churi-wawankupas huchayuqña nacerqaku (Romanos 5:12). Chaymi kamachiq Davidpas nirqa: “Mamaypa wiksanmantapunim huchayuq kallani”, nispa (Salmos 51:5).

¿Llapallan huchanchikchu chaynalla?

Manam. Wakin runakunaqa llumpay mana allinkunatam ruwanku. Bibliapim willawanchik Sodoma llaqtapi runakuna ‘llumpa-llumpay huchasapa mana allin runakuna’ kasqankumanta (Genesis 13:13; 18:20). Qatiqninpi astawan yachaykusun.

1. Wakinkum llumpay mana allinkunata ruwanku. Bibliapim nin huchapakuy, taytacha-mamacha yupaychay, suwakuy, sinkakuy, runakuna engañay, wañuchiy hucha kasqanta. Chaykunataqa manam ruwananchikchu (1 Corintios 6:9-11; Apocalipsis 21:8). Bibliapiqa nintaqmi pantaq kasqanchikrayku nanay simiwan rimaruspa utaq imata ruwaruspapas pantarusqanchikta (Proverbios 12:18; Efesios 4:31, 32). Chaykuna mana llumpay kaptinpas manam ninanchikchu: “Manam imananchu”, nispaqa. Chaykunaqa llumpay huchamanmi wichiykachiwachwan (Mateo 5:27, 28).

2. Wakinkum mana yachaspanku mana allinkunata ruwanku. Wakinpim mana allinkunata ruwarunchik Diospa kamachikuyninkunamanta mana yachaspa (Hechos 17:30; 1 Timoteo 1:13). Wakin runakunam ichaqa yachachkaspankupas mana allinkunata ruwanku (Numeros 15:30, 31). Bibliapim nin chayna runakunaqa mana sumaq sunquyuq kasqankuta (Jeremias 16:12).

3. Wakinñataqmi yachachkaspa hinalla mana allinkunata ruwanku. Bibliapim willawanchik wakin runakunaqa huchallapi purikusqankuta (1 Juan 3:4-8). Paykunaqa yachachkaspankupas Diospa kamachikuyninkunataqa manam kasukunkuchu (Hebreos 10:26, 27).

Llumpay mana allinta ruwaruspankum wakinkuqa llumpay llakisqa tarikullanku. Chaynam kamachiq Davidpas tarikullarqa. Paymi nirqa: ‘Mana allin ruwasqaymi ñitiruwachkanña. Llasaq carga hinaraqmi ñitiruwachkanña’, nispa (Salmos 38:4). Pipas mana allinta ruwaruspan wanakuptinqa Jehova Diosqa pampachaykunqam. Bibliapim nin: ‘Mana allinkuna ruwaq runaqa dejachunyá mana allin vidanta. Mana allinlla piensaq runaqa dejachunyá mana allin piensasqankunata. Tayta Diosmanyá kutirikuchun paymanta llakipayarikunanpaq. Diosninchikmanyá kutirikuchun allin sunqu kayninman hina pampachaykunanpaq’, nispa (Isaias 55:7).