Satanaspa nisqanmanta cuidakusun

“AMA engañachikuychikchu. Chay Diosqa manam yanapasunkichikchu. Humillakuychik, manachayqa manam librakunkichikchu.” Yaqa chaynatam Asiria nacionpa reynin Senaquerib tropankuna kamachiqwan willachirqa Jerusalenpi kaqkunaman. Reypa tropankunaqa Juda llaqtatam muyurirurqakuña, chay kamachikuq runañataq munarqa Jerusalenpi runakuna hukmanyaruspanku vencechikunankuta (2 Rey. 18:28-35).

Asiria nacionniyoqkunaqa reqsisqam karqaku ñakarichispa wañuchiq kasqankuwan. Enemigon nacionkunatam manchachiq preso apasqankuta tukuy imaymana ñakarichisqankumanta willaspa. Ñawpaq tiempopi pasaqkunamanta willakuq Philip Taylorpa nisqanman hinaqa, “asiriokunaqa vencesqan llaqtakuna contrankupi mana hatarinankupaq hinaspa enemigonkunata mancharisqata tarichinanpaqmi tukuy imaymana ñakarichisqankumanta willachiq”. Chay runapa nisqanman hinaqa, chayna willakuykunata cheqechiyqa cheqaptapunim “runakunapa piensayninta hukmanyachin”.

Cristianokunaqa peleachkanchik manam ‘aychayoq tulluyoqkunawanchu’ aswanqa Diospa contranpi kaq ‘mana allin espiritukunawanmi’ (Efe. 6:12). Paykunata umachaqqa Satanasmi, runakunata manchachinanpaqmi imapas willakuykunata servichikun.

Diabloqa nichkanmi Diosmanta llapanchikta karunchay atisqanta. Jobpa tiemponpipas Jehová Diostam kaynata nirqaña: ‘Vidanraykum runaqa tukuy ima kapuqnintapas qonman’, nispa. Kaywanqa nichkarqam runata hinalla sasachaptinqa, Diosta haykapipas qepanchananmanta (Job 2:4). ¿Chaynachu kanman? ¿Yaqachum runaqa vidanrayku Diosta qepancharunman? Chayna piensananchiktam Satanasqa munan. Chaypaqmi servichikun llulla willakuykunata, kayqa cancer onqoy hinam mana musyayllata piensayninchikta dañarunman. Chayrayku qawasun imakunata servichikusqanmanta, chaynapi imayna atipayta yachanapaq.

‘Ñutu allpa [. . .] hinallam runaqa’

Jobpa kimsa amistadnin tukuqkunamantam Satanasqa Elifazta servichikurqa, pruebakunata runakuna mana aguantay atisqankumanta ninanpaq. Elifazmi kaynata nirqa: “Ñutu allpapa hawanpi mitumanta wasi rurasqa hinallam runaqa”, nispa. Nirqataqmi: “Pacha puyu hina wañuruqllam runaqa. Achikyaqmanta tutaykuqkamallam sarupasqa rikurirunku. Mana pipapas yuyarisqanmi wiñaypaq chinkarunku”, nispa (Job 4:19, 20).

Bibliaqa ninmi pakikuq ‘allpa manka hinalla kasqanchikta’ (2 Cor. 4:7). Mana allin ruray munaq hinaspa pantaqqa kanchik Adan huchallikusqanraykum (Rom. 5:12). Chaymi kallpallanchikwanqa mana atichwanchu Diablopa sasachawasqanchikta aguantaytaqa. Ichaqa manam qonqanachu, cristianokunataqa Jehová Diosmi yanapawanchik. Pantaq kaspanchikpas, Diospaqqa ancha valorniyoqmi kanchik (Isa. 43:4). Mañakuptinchikqa espirituntam qowanchik (Luc. 11:13). Chaywanmi ‘atiyniyoq’ kanchik hinaspa Satanaspa rikurichisqan sasachakuykunata aguantanchik (2 Cor. 4:7; Fili. 4:13, NM). Chaymi iñiyninchikpi ‘qaqa hina sayaspa’ Satanaspa contranpi kaptinchikqa, Diosqa kallpanchawasun (1 Ped. 5:8-10). Diablotaqa manam manchakunachu.

‘Huchallikuq runapiqa Diosqa manam confianchu’

Elifazqa kaynatawanmi nirqa: “¿Pitaq runaqa chuyayachisqapaqña hapisqa kananpaqqa? ¿Pitaq warmimanta naceqqa limpiopaqña hapisqa kananpaqqa?”, nispa. Kikinmi kaynata contestarqa: “Diosqa manam angelninkunapipas confiakunchu. Paypa qayllanpiqa cielokunapas manam limpiochu. Hinaptinqa aswanraqchiki millakuypaq huchasapa runapiqa Diosqa mana confiakunchu. Hinaptinqa aswanraqchiki [. . .] huchallikuq runapiqa Diosqa mana confiakunchu”, nispa (Job 15:14-16). Kaynata nisqanwanmi Elifazqa Jobman nichkarqa, Diospa qawasqanman hinaqa pipas mana allin ruraq kasqanta. Diabloqa servichikuntaqmi mana allin piensasqanchiktapas. Munanmi ñawpaqpi pantasqanchikmanta llakikunanchikta, mana allinta juzgakunanchikta hinaspa ñoqanchikpaq manaña hampi kasqanpi piensananchikta. Chaynataq Diosmanta kayna piensananchikta: llumpay mañakuq, mana llakipayakuq, mana kuyapayakuq hinaspa mana yanapakuq kasqanta.

Arí, ‘llapallanchikmi huchallikuruspa Diospa suma-sumaq qayllanmanta karunchasqa’ kanchik. Pantaq kaspanchikmi Diospa nisqankunawan mana cumpliyta atinchikchu (Rom. 3:23; 7:21-23). Chayna kaspapas Diospaqqa valorniyoqmi kanchik. Payqa “yuyanmi allpamanta rurasqa kasqanchikta”, chaymi pantasqanchikmantaqa ‘mana wiñaypaqchu anyawasun’ (Sal. 103:8, 9, 14). Pantaq kasqanchikta ‘Diablowan hinaspa Satanaswan sutichasqa ñawpaqmantaraq kaq culebrapa’ servichikusqantapas yachanmi (Apo. 12:9, 10).

Mana allin ruraqkunatam Diosqa ‘allin sonqo kayninman hina pampachaykunqa’, rurasqanta saqespa chaynataq humillakuspa asuykuptinkuqa (Isa. 55:7; Sal. 51:17). ‘Cochinilla hina guindoña huchallikusqan kaptinpas, ritita hinam yuraqyachinqa’ (Isa. 1:18). ¡Kayqa yanapawanchikmi Taytanchikpa munayninta ruraypi kallpanchakunapaq!

Huchayoq kaspanchikmi kikillanchikmantaqa Diospa amistadnin kaytaqa mana atichwanchu. Adanwan Evam wiñay kawsayta hinaspa mana pantaq kaytapas chinkarachirqaku, chaymi ñoqanchikpas huchayoq kaspa wañunchik (Rom. 6:23). Ichaqa kuyakuq kasqanraykum Diosqa tukuyta rurarun, Jesuspa wañusqanpi iñiptinchikqa huchanchik pampachasqa kananpaq (Mat. 20:28; Juan 3:16). ¡Anchatam ‘Diosqa favorecewanchik’! (Tito 2:11.) Imayna tarikusqanchikqa hampiy atinam. Hinaptinqa, ¡imaynamá saqechwan mana allinta Satanas creechiwananchiktaqa!

‘Aychanpiwan tullunpi nanayta qoykuy’

Satanasqa nirqam Job onqoruspanqa Diospa contranpi rimananta. Diostam nirqa: “Aychanpiwan tullunpi nanayta qoykuptikiqa uyaykipipunim ñakasunki”, nispa (Job 2:5). Kunanpas onqosqanchiktam servichikun, mana serviq kasqanchikta piensanapaq.

Diosqa manam qepanchawasunchu puntata hina mana serviyta atiptinchikqa. Kaypi piensasun: ¿imatam rurachwan kuyasqanchik amistadninchikta suwa maqaparuspa heridaruptin? ¿Manañachu kuyachwan puntata hina mana ruraptin? Hinallam kuyachwan hinaspa yanapachwan, aswanraqchá yanapawasqanchikrayku chayna qeparuptinqa. Chaynaqa, ¿manachu Jehová Diosqa yanapawasun? Bibliaqa sutillatam niwanchik: “Diosqa justom. Payqa llamkasqaykichiktaqa manam qonqanqachu, manataqmi qonqanqachu pay kuyasqaykichiktapas”, nispa (Heb. 6:10).

Bibliaqa willawanchikmi cheqap yupaychayta yanapaq wakcha viudamanta, payqa chaynatachá sapa wata yanapakurqa. Iskay qollqechakuna churaqta Jesus rikuruspan, ¿nirqachu paypas chaynataq qollqe churasqanpas mana valesqanta? ¡Manam! Aswanqa alabarqam tukuy atisqanta Dios yupaychaypi rurasqanmanta (Luc. 21:1-4).

Pantaq kasqanchikrayku onqoyña, yuyaqyayña hinaspa ima sasachakuyña ñakarichiwaptinchikpas, Diosta kasukuptinchikqa hinallam kanqa paywan amistadninchikqa. Diosqa manam haykapipas saqewasunchu puntata hina mana serviyta atiptinchikqa (Sal. 71:9, 17, 18).

‘Umaykichik harkaq cascotayá’ chaskiychik

¿Imaynatam waqaychasqa kachwan Satanaspa llulla rimasqanmanta? Pablopa kayna nisqanta kasukuspam: ‘Señorninchikman hapipakuspayá atiyninwan allinta kallpanchakuychik. Harkachikunaykichikpaqyá Diospa llapallan qosusqaykichikwan pachakuychik chaynapi wateqasuqnikichik Diablo mana urmachisunaykichikpaq’. Kaykunamanta hukninmi kachkan ‘umanchik harkaq casco hina’ salvasqa kanapaq suyakuyninchik (Efe. 6:10, 11, 17). Satanaspa llulla rimasqanmanta cuidakunapaqqa chaskinam ‘uma harkachikuna cascota’ hinaspa haykapipas servichikuna. Imaynam cascopas soldadopa umanta harkan, chaynam ‘salvasqa kananchikpaq’ suyakuypas otaq Diospa promesanpi confiaypas piensayninchikta harkan Satanaspa llulla rimasqankunamanta (1 Tes. 5:8). Sumaq suyakuyninchikpi piensayta mana saqenanchikpaqqa Bibliatam allinta estudiananchik.

Satanaspa rurasqankunata Job aguantananpaqqa achkam yanaparqa, hukninmi karqa kawsarimuypi iñisqan. Chaymi wañuypa patanpi kachkaspanpas Diosmantaqa mana karunchakurqachu. Aswanmi Diosta kaynata nirqa: “Qayakamuptikim ñoqañataq contestamusqayki. Hinaptinqa unanchawasqaykimantachá sientiypaqña-sientiwanki”, nispa (Job 14:15). Payqa segurom karqa kasukusqanrayku wañuptinqa, serviqninkunata kuyaq Dios kawsarichimunanmanta.

Llapanchikmi Job hina Diospi confiananchik. Satanaspa hinaspa qatiqninkunapa rurasqankurayku ñakarisqanchiktam Dios chinkachinqa. Amapuni qonqasunchu Pablopa kayna nisqanta: “Diosmi confiakuna kasqanrayku mana munanqachu mana aguantay atinaykichikkama tentasqa kanaykichiktaqa. Tentacionkuna hamuptinqa Diosmi vencenaykichikpaq kaqta qosunkichik chaynapi aguantanaykichikpaq” (1 Cor. 10:13).

[20 kaq paginapi dibujo]

Diosqa chaninchanmi sonqomanta servisqanchikta

[21 kaq paginapi dibujo]

Umanchik harkaq cascota chaskisun hinaspa haykapipas servichikusun