Jehova Diosqa confiakunapaqmi hinaspa pampachakuqmi

1, 2. a) ¿Imanasqam chaninchanchik confiakunapaq hinaspa pampachakuq amistadninchikkunata? b) ¿Ima tapukuykunatam kutichisun?

¿IMAYNATAQ cheqap amistadqa? Ashley sutiyoq cristianam nin: “Cheqap amistadqa manam haykapipas saqesunkichu, pampachasunkitaqmi imapipas pantaruptiki”, nispa. Llapanchikmá chaninchanchik confiakunapaq hinaspa pampachakuq amistadtaqa. Paykunawan kaspaqa hawka hinaspa kuyasqam tarikunchik (Prov. 17:17).

² Pimantapas Jehova Diosmi confiakunapaq hinaspa pampachakuq cheqap amistadqa. Salmistam kaynata nirqa: ‘Señorlláy, hucha pampachaykuq allin sonqom qamqa kanki. Llapallan qayakusuqnikiwan kuyapayakuqmi [otaq confiakunapaqmi] qamqa kanki’, nispa (Sal. 86:5). ¿Ima ninantaq confiakunapaq hinaspa pampachakuq kayqa? ¿Imaynatam Jehova Diosqa confiakunapaq hinaspa pampachakuq kasqanta qawachin? ¿Imaynatam qatipakuchwan? Kay tapukuykunapa kutichiyninmi kallpanchawasun cheqap Amistadninchik Jehova Diosta astawan kuyanapaq, kallpanchawasuntaqmi iñiqmasinchikkunawan kuyanakunapaqpas (1 Juan 4:7, 8).

 3. ¿Ima ninantaq confiakunapaq kayqa?

³ Confiakunapaq runaqa manam saqenchu kuyasqan runataqa. Kuyakuynintam qawachin imapipas yanapaspan. Manam hawka tarikusqallanpichu yanapan, aswanqa llumpay sasachakuypiña tarikuptinpas hinallamá yanapan. Jehova Diosmi pi runamantapas aswan ‘confiakunapaqqa’ (Sal. 18:25).

4, 5. a) ¿Imaynatam Jehova Diosqa confiakunapaq kasqanta qawachin? b) ¿Imaynatam kallpanchawanchik Jehova Dios confiakunapaq kasqanpi yuyaymanayqa?

⁴ ¿Imaynatam Jehova Diosqa confiakunapaq kasqanta qawachin? Payqa manam haykapipas saqenchu tukuy sonqonkuwan serviqninkunataqa. Huk kaqnin serviqninmi karqa rey David, paymi Diosta nirqa confiakunapaq kasqanmanta (leey 2 Samuel 22:26). Davidqa sutillamá qawarqa sasachakuykunapi tarikuptin Jehova Dios pusasqanmanta, waqaychasqanmanta hinaspa yanapasqanmantapas (2 Sam. 22:1). ¿Imanasqamá Jehova Diosqa Davidman confiakunapaq kasqanta qawachirqa? Paypas ‘confiakunapaq’ kasqanraykum. Diosqa anchatamá chaninchan payman sonqo kaqkunataqa, hinaspam paykunawan confianapaq kasqanta qawachin (Prov. 2:6-8).

⁵ Jehova Diosqa achkaqpim confiakunapaq kasqanta qawachirqa, chayna kasqanpi yuyaymanayqa anchatam kallpanchawanchik. Reed sutiyoq iñiqmasinchikmi nin: “Anchatam kallpanchawan David sasachakuykunapi tarikuptin Jehova Dios imayna yanapaykusqanmanta Bibliapi leesqay. Ayqekuspan machaykunapi pakakuptinpas, Jehova Diosqa hinallam waqaycharqa. ¡Anchatamá chayqa kallpanchawan! Yuyarichiwanmi ima sasachakuypiña tarikuspaypas, payman sonqo kaptiyqa mana saqewananmanta”, nispa. Arí, Jehova Diosqa manamá serviqninkunataqa saqewasunchu (Rom. 8:38, 39).

 6. ¿Imaynatawanmi Jehova Diosqa confiakunapaq kasqanta qawachin, hinaspa imanasqam chayqa allinninchikpaq?

⁶ ¿Imaynatawanmi Jehova Diosqa confiakunapaq kasqanta qawachin? Tukuy kamachisqankunaman hapipakuspanmi. Paymi niwanchik: “Ñoqaqa hina kaqllam kasaq machuyaptikichikpas”, nispa (Is. 46:4). Imatapas ruwanan kaptinqa, tukuytam ruwan kamachikuyninman hina (Mal. 3:6). Chaymantapas, tukuy nisqankunatam ruwan (Is. 55:11). Chayna kamachikuyninman hina ruwasqanqa allinninchikpaqmi. ¿Imanasqa? Kamachisqankunata kasukunapaq kallpanchakuptinchikqa, Diosqa prometesqanman hinam bendeciwasun (Is. 48:17, 18).

 7. ¿Imaynatam Jehova Diospa confiakunapaq kasqanta qatipakuchwan?

⁷ ¿Imaynatam Jehova Diospa confiakunapaq kasqanta qatipakuchwan? Qatipakuchwanmi hatun sasachakuykunapi tarikuqkunata yanapaspa (Prov. 3:27). Ichapas huk kaqnin iñiqmasinchik hukmanyasqa tarikuchkan onqosqanrayku, familian contranpi kasqanrayku otaq imapipas pantarusqanrayku. Chayna kaptinqa, “sumaq consuelakuq palabrakunawanmi” kallpanchaykuwaq (Zac. 1:13).a Chaynata ruwaspanchikqa ‘wawqemantapas aswan confiakunapaqraq amigokuna’ kasqanchiktam qawachisun (Prov. 18:24).

 8. ¿Imaynatam Jehova Diospa confiakunapaq kasqanta qatipakuchwan casarasqa kaspaqa?

⁸ Chaymantapas, Jehova Diospa confianapaq kasqantam qatipakusun kuyasqanchik runakunata mana saqespa. Casarasqa kaspaqa manamá saqesunchu warminchiktaqa otaq qosanchiktaqa (Prov. 5:15-18). Chaymi imallatapas mana ruwanchikchu hukwan pierdekunapaq huchata ruwanapaqqa (Mat. 5:28). Iñiqmasinchikkunawanpas confiakunapaqmi kasun mana cuento qepi otaq mana kamikuq kaspa, manamá yanqakunataqa rimasunchu paykunamanta nitaq chayna rimaqkunatapas uyarisunchu (Prov. 12:18).

9, 10. a) ¿Piman sonqotaq astawanqa kananchik? b) ¿Imanasqam wakinpiqa sasaniraq kanman Diospa kamachikuyninkunata kasukuyqa?

⁹ Pimantapas astawanmi Jehova Diosman sonqo kananchik, chaypaqqa kallpanchakunanchikmi paypa piensasqanman hina imatapas ruwanapaq. Chaymantapas paypa cheqnisqankunatam cheqninanchik, kuyasqantañataqmi kuyananchik (leey Salmo 97:10). Diospa piensasqanman hina piensaspaqa kasukuq runakunam kasun (Sal. 119:104).

¹⁰ Wakinpiqa sasaniraqmi kanqa Diospa kamachikuyninkunata kasukuyqa. Ichapas anchata kallpanchakuna kanqa Diosman sonqo kanapaq. Rimarisun casarakuymanta: wakin iñiqmasinchikkunam casarakuyta munanku, ichaqa manaraqmi tarinkuraqchu paykunapaq hina iñiqmasinta (1 Cor. 7:39). Ichapas huk cristiana mana iñiq llamkaqmasinkunawan hikutasqa kanman piwanpas reqsinakunanpaq. Sapallan kayta mana munaspanpas anchatam kallpanchakun Jehova Diosman sonqo kananpaq. Chayna kaq iñiqmasinchikkunaqa qatipakunapaq hinam kanku. Jehova Diosqa achka bendiciontam qonqa sasachakuypiña tarikuspankupas payman sonqo kaqkunamanqa (Heb. 11:6).

11. ¿Imataq qawachiwanchik Jehova Dios pampachakuq kasqanmanta?

¹¹ ¿Ima ninantaq pampachakuq kayqa? Pampachakuq runaqa manam sientikurunchu pipas contranpi mana allinta ruwaruptinqa. Chaywanqa manamá nichkanchikchu mana allin ruwasqanta allinpaq hapisqantaqa. Aswanqa kallpanchakunmi paywan mana piñasqallaña kananpaq. Pampachakuq kayqa Jehova Diospa huk kaqnin sumaq kayninmi. Bibliaqa niwanchikmi sonqomanta wanakuq runakunapa huchanta Jehova Dios pampachasqanmanta (Sal. 86:5).

12. a) ¿Imaynatam Jehova Diosqa pampachakuq kasqanta qawachin? b) ¿Imatam Pedroqa niyta munachkarqa runakunapa huchan ‘chinkachisqa’ kananmanta rimaspanqa?

¹² ¿Imaynatam Jehova Diosqa pampachakuq kasqanta qawachin? Payqa pipapas huchanta pampachaspanqa qalaypaq hinaspa qonqananpaqmi pampachan (Is. 55:7, NM). ¿Imataq qawachin huchanchikta qalaypaq pampachasqanmanta? Yuyaymanasun Hechos 3:19 (leey) nisqanpi. Apostol Pedrom uyariqninkunata nirqa: “Huchaykichikmanta wanakuspayá Diosman kutirikuychik”, nispa. Pipas huchanmanta wanakuspanqa llumpaytam llakikun chay ruwarusqanmanta hinaspanmi tanteakun mana kaqmanta wichiykunanpaq (2 Cor. 7:10, 11). Chaymantapas kutirikuntaqmi, huk rimaypiqa chay mana allin ruwasqanta saqespanmi Diospa munasqanman hinaña kawsananpaq kallpanchakun. Chaynata ruwaptinqa huchankunaqa ‘chinkachisqam’ kanman. ‘Chinkachiy’ niq rimayqa tupanmanmi limpiaywan. Chaynaqa, Jehova Dios pampachawaspanchikqa huchanchikta limpiachkanmanpas hinam chinkachin. Huk rimaypiqa qalaypaqtam pampachawanchik (Heb. 10:22; 1 Juan 1:7).

13. ¿Imatam Diosmanta yachachiwanchik ‘huchankutaqa manañam yuyarisaqchu’ niq rimayqa?

¹³ ¿Imataq qawachin huchanchikta Dios pampachaspan qonqasqanta? Chaypaq qawasun hanaq pachaman rinankupaq suyakuyniyoqkunamanta Jeremiasman Jehova Dios willasqanta (leey Jeremias 31:34). Diosmi nirqa: “Mana allin rurasqankuta pampachaspaymi huchankutaqa manaña yuyarisaqchu”, nispa. Qawasqanchikman hinaqa, huchanchikta Dios pampachaspanqa manañam chay ruwasqanchikta yuyarinñachu castigawananchikpaqqa. Aswanqa pampachawaspanchikmi qonqanña (Rom. 4:7, 8).

14. ¿Imaynatam Jehova Diospa pampachakuq kasqanmanta yuyaymanayqa hawkayachiwanchik? Rimarimuy Elena iñiqmasinchikmanta.

¹⁴ Jehova Diospa pampachakuq kasqanpi yuyaymanayqa hawkayachiwanchikmi. Pasaq watakunapiraqmi huk iñiqmasinchik congregacionmanta qarqosqa kaspan tiempopa risqanman hina kaqlla kutimurqa, paytam sutichasun Elenawan. Paymi kaynata nin: “Kikiytam nikuq kani Dios pampachawasqanmanta, hukkunamanpas chaynallatam niq kani. Ichaqa karunchasqam tarikurqani Jehova Diosmanta. Piensarqanim wakinkunapaqqa hichpallanpi kasqanmanta”, nispa. Elenaqa Jehova Diospa pampachakuyninmantam Bibliapi leerqa hinaspanmi kallpanchasqa tarikurqa. Paymi nin: “Mana haykapipas hinam Diospa kuyakuyninta sienterqani”, nispa. Elenatam allinta kallpanchan kayna piensasqan: “Manamá piensanachu [Jehova Diospa] pampachawasqanchik huchaqa wiñaypaq kananmantaqa”b, nispa. Nirqataqmi: “Iskayrayarqanim Jehova Dios qalaypaq pampachakuq kasqanmanta, ñoqaqa piensarqanim wañunaykama chay huchallikusqayta qepichkaq hina apanaymanta. Mana chaylla asuykuyta atinay kaptinpas, ñam musyakuchkaniña Jehova Diosman asuykuy atisqayta, chayqa yaqapas llasaq qepiyta qechuruwachkanmankupas hinam”, nispa. ¡Mayna kuyakuq hinaspa llakipayakuqmi servisqanchik Diosqa! (Sal. 103:9.)

15. ¿Imaynatam Jehova Dios hina pampachakuq kachwan?

¹⁵ Jehova Diospa pampachakuq kasqantam qatipakuchwan hukkunata pampachaspa (leey Lucas 17:3, 4). Qawamusqanchikman hinaqa, huchanchikta Dios pampachaspanqa manañam chay ruwasqanchiktaqa yuyarinñachu castigawananchikpaqqa. Ñoqanchikpas hukkunata pampachaspaqa, manam yuyarinanchikchu contranchikpi chay ruwasqankutaqa. Tiempo pasaruptinpas manataqmi chay ruwasqanmantaqa kaqlla rimananchikchu.

16. a) ¿Imaynam kasun pampachakuq kaspaqa? b) ¿Imatam ruwananchik Dios pampachawananchikpaq?

¹⁶ Pampachakuq kaspaqa manamá allinpaq hinatachu qawanchik chay ruwasqankutaqa, manataqmi munanchikchu contranchikpi chay ruwanankutaqa. Aswanqa pampachakuq kaspaqa kallpanchakunchikmi paywan mana sientikurunapaq. Amataq qonqasunchu kayta: Dios pampachawananchikta munaspaqa, ñoqanchikpas pampachakuqmi kananchik (Mat. 6:14, 15). Jehova Diosqa llakipayakuqmi, payqa “yuyanmi allpamanta rurasqa kasqanchikta” (Sal. 103:14). Chaynaqa, ¿manachu ñoqanchikpas llakipayakuq kaspa sonqomanta pampachakuq kananchik? (Efe. 4:32; Col. 3:13.)

17. Sichu huk kaqnin iñiqmasinchik contranchikpi mana allinta ruwaruptinqa, ¿imataq yanapawasun mana sientikurunapaq?

¹⁷ Wakinpiqa sasaniraqmi pitapas pampachayqa. Apostol Pablopa tiempopi wakin cristianokunapas pantanakurusqankuta allichanankupaqmi yanapakuyta chaskirqaku (Filip. 4:2). Sichu huk kaqnin iñiqmasinchik contranchikpi mana allinta ruwaruptinqa, ¿imataq yanapawasun mana sientikurunapaq? Jobmanta rimarisun. Payqa llumpay llakisqam tarikurqa Elifaz, Bildad hinaspa Zofarpas contranpi yanqa rimasqankumanta (Job 10:1; 19:2). Tukuyninpiqa, Jehova Diosmi chay yanqa amistadninkunata corregirqa, hinaspanmi kamachirqa Jobman rinankupaq chaynapi huchankumanta ofrendanku kañasqa kananpaq (Job 42:7-9, NM). Ichaqa, Jobpas paykunapaqmi Diosta mañakunan karqa pampachasqa kanankupaq. Chaynata Job ruwasqanraykum Jehova Diosqa bendeciykurqa (leey Job 42:10, 12, 16, 17). ¿Imatam kayqa yachachiwanchik? Sientirachiwaqninchikpaq sonqomanta Diosta mañakuyqa yanapawasunmi paywan mana piñasqallaña kanapaq.

18, 19. ¿Imaynatam Jehova Diospa sumaq kayninkunata chaninchasqanchikta astawan wiñachichwan?

¹⁸ Anchatamá Jehova Diospa sumaq kayninkunamanta yachayninchikqa kallpancharuwanchik. Qawamurqanchikmi Jehova Diosqa asuykunapaq hina, mana sayapakuq, qokuykuq, entiendeq, confiakunapaq hinaspa pampachakuq kasqanmanta. Ichaqa, achkaraqmi kachkan Jehova Diosmanta yachananchikpaqqa. Wiñaypaq kawsaspanchikpas hinallam kusikuywan paymanta yachasun (Ecl. 3:11). Pablopa nisqanman hinam kaynata ninchik: “¡Mayna allinmi Diosninchikqa! ¡Payqa tukuy yachayniyoq kaspanmi tukuy imata reqsin!”, nispa. Arí, anchatamá kusichiwanchik Diospa kuyakuyninpas chaynataq qawamusqanchik soqta sumaq kayninkunapas (Rom. 11:33).

¹⁹ Astawanyá wiñachisun Jehova Diospa sumaq kayninkunata chaninchasqanchiktaqa. Chaypaqqa allintam yachananchik sumaq kayninkunamanta, yuyaymanananchiktaqmi hinaspapas kawsayninchikpim qawachinanchik (Efes. 5:1). Chaynata ruwaptinchikqa Dios kuyayninchikmi wiñanqa hinaspapas paypa hichpallanpim tarikusun. Chaymantapas salmista hinam kaynata nisun: “¡Mayna sumaqmi Diospa ñawpaqninpi kayqa!”, nispa (Sal. 73:28).