‘Diosta maskaqkunapaqqa manam imankupas pisinqachu’

 1. ¿Ima sasachakuypim David tarikurqa?

KAMACHIQ Saulmi Davidta wañuchinanpaq maskarqa, chaymi Davidqa mana wañuchisqa kananpaq pakanpalla kawsarqa. Mikunanpaq mana kaptinmi Davidqa Nob llaqtaman chayaruspan sacerdote Ahimelecmanta pichqa tantata mañakururqa (1 Sam. 21:1, 3). Chaymantañataqmi runankunapiwan machaypi pakakurqa (1 Sam. 22:1).

 2. ¿Imaynatam Saulqa vidanta peligropi churachkarqa? (Rimarimuytaq 1 Samuel 23:16, 17 nisqanmantapas).

² ¿Imanasqataq Davidqa sasachakuypi tarikurqa? Saulmi envidiakurqa Davidpa imapas ruwasqan allin lluqsiptin. Saulqa yachakurqataqmi mana kasukusqanrayku Jehova Dios qipancharusqantapas chaynataq paypa rantinpi kamachiq kananpaq Davidta Dios akllarusqantapas (leey 1 Samuel 23:16, 17). Ichaqa Israel nacionta hinallaraq kamachisqanraykum Saulpaqa achka-achka soldadonkuna karqa, chaymi Davidqa mana wañurachinankupaq lluptikurqa. ¿Saulqa Davidta wañurachispanchu Jehova Diospa tantiasqanta harkarunman karqa? (Is. 55:11). Biblia chaymanta mana willawaptinchikpas Saulqa kikinmi vidanta peligropi churachkarqa. Pipas Jehova Diospa contranpi hatariqqa mana allinpim haykapipas tukun.

 3. ¿Imaynam David tarikurqa sasachakuykunapi kaspanpas?

³ Davidqa manam hatun tukuq runachu karqa. Chaymi kamachiq kananpaqqa mana kikillanchu churakurqa, aswanqa Jehova Diosmi akllarqa (1 Sam. 16:1, 12, 13). Chayraykum Saulqa chiqnispan wañurachiyta munarqa. Chaywanpas Davidqa mana mikunayuq kasqanmantaqa, machaykunapi pakakusqanmantaqa chaynataq tukuy ima sasachakuykunapi tarikusqanmantaqa manam Jehova Diosmanchu tumparqa. Aswanqa yaqachusmi chay pakakusqanpi Jehova Diospaq takispan kay yachachikuypaq textotapas qillqarqa, chaypim nin: ‘Diosta maskaqkunapaqqa manam imankupas pisinqachu’, nispa (Sal. 34:10).

 4. ¿Ima tapukuykunamantam yachasun? ¿Imanasqataq chaykunamanta yachayqa ancha allin?

⁴ Kunan tiempopi achka testigokunam kawsakunankupaq tukuy imanku faltaptin sasachakuypi tarikunku.b Coronavirus unquy kasqanraykum astawanraq chayna tarikunku. Chaywanpas astawanraqmi mana allinkunaqa kanqa “llumpa-llumpay ñakariy punchawkuna” kayllapiña kasqanrayku (Mat. 24:21). Chayraykuyá kay tapukuykunamanta yachaykusun: ¿Imataq mana pisirqachu Davidta? ¿Imanasqataq imapas kapuwasqallanchikwan kusisqa kawsakunanchik? ¿Imanasqataq mana iskayrayachwanchu Jehova Dios yanapawananchikmanta? ¿Imatam kunanmanta ruwachwan hamuq tiempopi sasachakuykunata aguantanapaq?

5, 6. Salmos 23:1-6 nisqanman hinaqa, ¿imamantam Davidqa rimachkarqa ‘Diosta maskaqkunapaqqa manam imankupas pisinqachu’ nisqanwanqa?

⁵ ¿Imamantam Davidqa rimachkarqa ‘Diosta maskaqkunapaqqa manam imankupas pisinqachu’ nispanqa? Chaymanta allinta yachanapaqmi yanapawasun Salmos 23 capitulopa nisqan (leey Salmos 23:1-6). Chay capitulopa qallariyninpim David kaynata nirqa: ‘Dios taytalláy, qamllam kanki ñuqallaypa michiqnillayqa, manam imapas pisiwanqañachu’, nispa. Salmos librollapitaqmi Davidqa nirqa Jehova Diosta serviynin imamantapas aswan allin kasqanta. Paytaqa ‘allin ñannintam’ Diosqa pusarqa, hinaspapas tukuy imapim yanaparqa. Davidqa riqsikurqataqmi ‘sumaqllaña ikllirimuchkaq pastokunapi’ hina Dios kawsachichkaptinpas sasachakuykunapi kananta. Yaqapaschá wakinpiqa ‘tutay-tutay wayqupi purichkaq’ hina tarikurqa. Nirqataqmi chiqniqninkuna kananmantapas. Chaywanpas michiqninqa Jehova Dios kasqanraykum nirqa: ‘Manapunim manchakusaqchu’, nispa.

⁶ Hinaptinqa, ¿imataq mana pisirqachu Davidta? Diosman sunqu kananpaqmi tukuy ima necesitasqan kapurqa. Kusisqa kananpaqqa manam tukuy imataraqchu necesitarqa. Jehova Diospa qusqallanwanmi kusisqa kawsakurqa. Paypaqqa imamantapas aswan allin karqa Dioswan kuyachikuymi hinaspa paypa chaskisqan kaymi.

 7. Lucas 21:20-24 nisqanman hinaqa, ¿ima sasachakuypim Judea llaqtayuqkuna tarikurqaku?

⁷ ¿Imatam yachachwan Davidpa nisqankunamanta? Manam tukuy imayuq kaytaqa Dios serviyninchikmanta puntapiqa churananchikchu. Chayna kasqantam allinta yacharqaku Jesuspa tiemponpi Judea llaqtayuq Diosta serviqkunapas (leey Lucas 21:20-24). Jesusmi nirqaña Jerusalen llaqtata tropakuna muyurirunanmanta. Chayta rikuspankum urqukunaman ayqikunanku karqa. Tukuy imankutapas saqispa ayqikuspankuqa salvasqam kananku karqa. 1999 watapi lluqsimuq La Atalaya sutiyuq revistapim Judea llaqtayuqkunamanta kaynata nirqa: “Wasinkuta, chakrankuta hinaspa tukuy imankuta saqispankum ayqikurqaku. Jehova Dios yanapananmanta manapuni iskayrayaspankum paypa munayninta imamantapas puntapi churarqaku”, nispa.

 8. ¿Imatam yachachwan Judea llaqtayuqkunata ima pasasqanmanta?

⁸  ¿Imatam yachachwan Judea llaqtayuqkunata ima pasasqanmanta? 7 parrafopi rimamusqanchik revistapitaqmi kaynata nirqa: “Hamuq punchawkunapiqa yaqapaschá Judea llaqtayuqkuna hina ñuqanchikpas tarikusun. Chayna sasachakuykunapi kaptinchikqa, ¿Jehova Diospi hapipakuychu icha tukuy imanchikpi confiakuychu imamantapas aswan allin kanqa? Ichapas tukuy imanchikkunata saqiyqa sasa kanqa. Chaywanpas, Judea llaqtamanta ayqikuq Diosta serviqkuna hinam listo kananchik”, nispa.c

 9. ¿Imapaqmi kallpanchawanchik Jerusalen llaqtayuqkunaman Pablopa qillqasqan?

⁹ Judea llaqtayuqkunapaqqa mayna sasachá karqa tukuy imankuta saqispanku huklawpiña yachayninkuqa. Imapipas Jehova Dios yanapananmantaqa manam iskayrayanankuchu karqa. Jerusalen llaqtata Roma soldadokuna muyurirusqanmanta pichqa wata ñawpaqtaraqmi apostol Pablo Jerusalen llaqtayuqkunaman kaynata qillqarqa: “Amayá qullqilla maskaymanqa qukuruychikchu, aswanqa imam kapusuqnikichikwanyá hawka kawsakuychik. Diosmi nirqa: ‘Manapunim haykapipas qunqasqaykichu nitaqmi saqisqaykichu’, nispa. Hinaptinqa mana manchakuspam kaynata nichwan: ‘Manam manchakusaqchu, Jehova Diosmi ñuqapa yanapawaqniyqa, ¿imanawanmantaq runaqa?’”, nispa (Heb. 13:5, 6). Pablopa chayna nisqanta kasukuqkunapaqqa manachá llumpay sasachu karqa huklaw llaqtapi amañayninkuqa. Paykunaqa manam iskayrayarqakuchu Dios yanapananmantaqa. Pablopa nisqanmi ñuqanchiktapas yanapawanchik paykuna hina Diospi confianapaq.

10. ¿Imam Pablota yanaparqa Diosman sunqu kananpaq?

¹⁰ Apostol Pabloqa Timoteomanpas kaynatam qillqarqa: “Chayrayku, mikunanchikpas pachanchikpas kaptinqa chaywanyá hawka kawsakusun”, nispa (1 Tim. 6:8). ¿Chayna nisqanraykuchu allin mikuykunata mana mikuchwan, mana wasiyuq kachwan utaq allin pachakunata mana rantichwan? Pabloqa manam chaymantachu nichkarqa. Nichkarqaqa imapas kapuwasqallanchikwan kusisqa kawsakunamantam (Filip. 4:12). Chayna kawsakusqanmi Pablotaqa yanaparqa Diosman sunqu kananpaq. Arí, ñuqanchikpaqpas aswan allinqa Jehova Dioswan kuyachikuymi (Hab. 3:17, 18).

11. ¿Imatam yachachwan Israel runakunaman Moisespa nisqanmanta?

¹¹ Yaqapaschá imapas munasqanchikqa mana Jehova Diospa piensasqanman hinachu kanman. Moisesmi 40 wata chunniqpi kasqankumanta qipata Israel runakunata nirqa: ‘Yupaychasqanchik tayta Diosmi bendeciwarqanchik tukuy ima ruwasqanchikpi, tawa chunka watapunim ñuqanchikwan karqa chaymi kay manchakuypaq chunniqpi puriptinchikpas mana imapas pisiwarqanchikchu’, nispa (Deut. 2:7). 40 watamá Jehova Diosqa Israel runakunaman maná sutiyuq mikuyta qurqa. Egipto nacionmanta lluqsisqankumantaraqmi pachankupas mana tukurqachu (Deut. 8:3, 4). Ichapas wakin Israel runakunaqa piensarqaku tukuy chaykunaqa pisilla kasqanta, Moisesmi ichaqa yuyarichirqa imankupas mana faltasqanta. ¿Imatam yachachwan? Jehova Diosqa anchatam kusikunqa tukuy imapas kapuwasqanchikkuna paypa bendicionnin kasqanta riqsikuptinchikqa hinaspa tukuy chaykunamanta anchata agradecekuptinchikqa.

12. ¿Imaynatam yachanchik Davidqa mana kikillanpi hapipakusqanta?

¹² Davidqa allintam yacharqa Jehova Diosqa payta kuyaqkunata mana haykapipas qunqasqanta. Salmos 34 capitulota qillqachkaptin wañuchinankupaq maskachkaptinkupas Davidqa Diospim tukuy sunqunwan hapipakurqa, chaymi tarikurqa muyuriqninmanta Diospa angelnin cuidachkanmanpas hina (Sal. 34:7). Yaqachusmi payqa Diospa angelninta tupachirqa enemigonkunamanta cuidachkaq soldadowan. Davidqa allin peleaq kachkaspanpas chaynataq kamachiq kananpaq Jehova Dios prometechkaptinpas manam kikillanpichu confiakurqa (1 Sam. 16:13; 24:12). Aswanqa angelninwan Jehova Dios yanapaykunanmantam mana iskayrayarqachu. Kunanqa manamá Diosqa milagrokunata ruwaspanraqchu yanapawasun, ichaqa manam iskayrayanchikchu Diosta serviqkuna wiñaypaq mana ñakarinankumantaqa.

13. ¿Imanasqataq hukllawasqa nacionkunapaqqa mana murallayuq llaqta hina rikchakusun? ¿Ichaqa imanasqam mana manchakusunchu? (Qaway qaranpi kaq dibujota).

¹³ Pisi tiempollamantañam Jehova Diospi hapipakusqanchikta qawachinanchik kanqa. Hukllawasqa achka nacionkuna ñuqanchikpa contranchikpi hatariptinkuqa ichapas piensasun chinkarachiwananchikta. Ichaqa manapunim iskayrayananchikchu kanqa Jehova Dios salvawananchikmantaqa. Chay nacionkunapaqqa mana murallayuq llaqta hinam rikchakusun (Ezeq. 38:10-12). Peleanapaq imanchikpas mana kasqanraykum piensanqaku chaylla chinkarachiwananchikpaq hina kasqanchikta. Paykunaqa manamá cuentata qukunqakuchu waranqantin angelninkunawan Jehova Dios yanapawasqanchiktaqa. ¡Maynataraq mancharikunqaku salvawananchikpaq Diospa angelninkuna peleaptinqa! (Apoc. 19:11, 14, 15).

14. ¿Imatam kunanmanta ruwananchik sasachakuykuna hamuptin aguantanapaq?

¹⁴ Chaypaqqa manam hapipakunanchikchu imapas kapuwasqanchikpiqa, tukuy chaykunaqa tukuruqllam. Chaymantapas, imapas kapuwasqallanchikwanmi kawsakunanchik hinaspapas Diospa kuyasqan kasqanchikraykum kusisqa kananchik. Paypi astawan hapipakuspaqa hukllawasqa nacionkuna contranchikpi hatarimuptinpas manapunim iskayrayasunchu salvaykuwananchikmantaqa.

15. ¿Imakunaraykum Davidqa mana iskayrayarqachu Dios yanapananmanta?

¹⁵ ¿Imakunaraqtaq Davidta yanaparqa? Kikinmi nirqa: “Pruebaspataq yachaykuychik Diospa allin kasqantapas, mayna-mayna kusisqamya Diospi amparakullaqpas”, nispa (Sal. 34:8). Chayna nisqanwanmi yachanchik Davidqa Jehova Dios yanapananmanta mana iskayrayasqanta. Payllapi hapipakuptinmi Diosqa haykapipas yanaparqa. Davidqa warmallaraq kachkaspanpas Goliat sutiyuq Filistea runawanmi pelearqa, paytam nirqa: ‘Kunanpunim qamta tayta Dios makiyman churanqa’, nispa (1 Sam. 17:46). Chaymanta qipatapas kamachiq Saul achka kutipi wañurachiyta munaptinmi Davidtaqa Jehova Dios yanaparqa (1 Sam. 18:12). Davidqa ñawpaqpi Dios yanapasqanraykum mana iskayrayarqachu hinalla yanapananmantaqa. Chaypi yuyaymanaymi ñuqanchiktapas yanapawasun sasachakuykuna kaptin aguantanapaq.

16. ¿Imaynatam yachachwan Dios yanapawananchikta?

¹⁶ Kunanmanta Jehova Diosllapi hapipakuspanchikqa manam iskayrayasunchu sasachakuykuna hamuptinpas yanapawananchikmantaqa. Paypi hapipakuspaqa manam manchakusunchu asambleanchikman rinapaq patronninchikta niytaqa utaq sapa semana huñunakuykunaman rinapaq hinaspa Diosmanta astawan willakunapaq mana tukuy punchaw llamkananchikpaq niytaqa. Chaynata niptinchik llamkayninchikmanta qarquruwaptinchikqa, ¿Jehova Diosllapichu hapipakusun icha iskayrayasunchu imapas quwananchikmanta? (Heb. 13:5). Tukuy tiemponkuwan willakuq achka iñiqmasinchikkunam qawarqaku imapipas Jehova Dios yanapasqanta. Payqa manamá qunqawanchikchu.

17. ¿Ima textotaq kachkan 2022 watapaq? ¿Imanasqam chayqa ancha allin?

¹⁷ Dioswan kaspanchikqa manam manchakunanchikchu ima sasachakuyña hamuptinpas. Jehova Diosta puntapi churaptinchikqa manam haykapipas qunqawasunchu. Sasachakuykuna kaptin aguantanapaqmi hinaspa Jehova Dios yanapawananchikmanta mana iskayrayanapaqmi punta apaqkuna tantiarunku Salmos 34:10 nisqan kay 2022 watapaq texto kananpaq, chaypim nin: ‘Diosta maskaqkunapaqqa manam imankupas pisinqachu’, nispa.