Mozo-sipaskuna “hinalla kallpanchakuychik Dios salvasunaykichikpaq”

 1. ¿Imanasqataq bautizakunanchik? (Qaway kay paginapi fotota).

SAPA watam waranqantin biblia estudiaqkuna bautizakunku. Paykunamanta wakinkum mozo-sipas hinaspa warmakuna kanku. Paykunataqa yaqapaschá uchuychankumanta tayta-mamanku Jehova Diosmanta yachachirqa. Qamqa, ¿bautizakurunkiñachu? Chayna kaptinqa, anchatam kusikuniku. Diosta yupaychaqkunaqa bautizakunanchikmi salvasqa kayta hinaspa wiñay kawsakuyta munaspaqa (Mat. 28:19, 20; 1 Ped. 3:21).

 2. ¿Imanasqataq mana manchakunanchikchu Diosllapaqña kawsanapaq tanteakuyta?

² Bautizakuruspaqa achka bendicionkunatam chaskinchik, ichaqa manam pukllay hinallachu ¿imanasqa? Bautizakusqayki punchawpim “arí” nispa nirqanki kayna tapukuyta: “Jesuspi iñisqaykirayku, ¿wanakurunkiñachu huchaykikunamanta hinaspapas tanteakurunkiñachu Diosllapaqña kawsakunaykipaq?”, niqta. Bautizakuruspaykiqa Diosllapaqña kawsanaykipaqmi tanteakurqanki, nirqankim Jehova Diosllataña kuyanaykipaq hinaspa imamantapas paypa munaynillantaña ruwanaykipaq. ¿Pesapakunaykichu kayna tanteakusqaykiwan? Manam. Diosllapaqña kawsanapaq tanteakuyqa manam manchakunapaqchu nitaq yanqapaqchu. Pipas Jehova Diosta yupaychananpaq akllakuspanqa satanastam qipanchachkan. Satanasqa munachkanmi runakuna Jehova Diosta qipanchaspanku wiñaypaq mana kawsanankuta.

 3. ¿Ima bendicionkunatam chaskirqanki Jehova Diosllapaqña kawsakunaykipaq tanteakuspayki?

³ Jehova Diosllapaqña kawsakunaykipaq tanteakuspayki hinaspa bautizakuspayki, ima bendicionkuna chaskisqaykipi yuyaymanay. Jehova Diosllapaqña kawsaspaykiqa mana iskayrayaspam niwaq: ‘[Jehova] Diosmi yanapawaqniyqa, manam manchakusaqchu. Runapa imapas ruwawanantaqa manam manchakusaqchu’, nispa (Sal. 118:6). Ancha kusikunapaqmi payta yupaychayqa hinaspa paypa chaskisqan kayqa.

4, 5. (1) ¿Imanasqataq ninchik Diosllapaqña kawsakunapaq tanteakuyqa kikinchikmanta kasqanta? (2) ¿Imakunatam atipananchik kanqa hayka watayuqña kaspapas?

⁴ Bautizasqa kasqaykiraykum kunanqa anchata kallpanchakunayki Jehova Dioswan kuyachikunaykipaq. Tayta-mamaykiwan yachaptikipas kikikimantañam kanqa salvakunaykipaq utaq manapas. ¿Imanasqataq kayta sapa kuti yuyarinayki? Hamuq punchawkunapi ima sasachakuypi tarikunaykimanta mana yachasqaykiraykum. Ichapas warmallaraq kaspa bautizakurqanki, kunan mozo-sipasña kaspaykiqa musyakunkichá huk sasachakuyniyuqkunaña kasqaykita. Huk mozom kaynata nirqa: “Warmallaraq kaspayki escuelapi pipas santokuptin tortata mana mikuspaykiqa, manam ñakakurqankichu Jehova Diospa testigon kasqaykimantaqa. Ichaqa wiñaruspaykim warmi-qari puñuyta munanki, chayta atipanaykipaqqa manam iskayrayanaykichu Diospa kamachikuyninkunata kasukuynikiqa allinnikipaq kasqanta”, nispa.

⁵ Manam mozo-sipas kaqkunallachu chayna sasachakuykunapiqa tarikunku. Yuyayniyuqña bautizakuqkunapas huk sasachakuykunapim tarikunku. Ichapas ayllunkupi, llamkayninkupi utaq unqusqankurayku. Hayka watayuqña kaspapas tukuy ima sasachakuykunatam atipananchik Diosman sunqu hinalla kanapaqqa (Sant. 1:12-14).

 6. (1) ¿Imatam Diosllapaqña kawsanaykipaq tanteakuspaqa nirqanki? (2) ¿Imatataq yachachisunki Filipenses 4:11-13 nisqan?

⁶ Imaña kaptinpas Diosman sunqu kanaykipaqqa yanapasunkim Diosta imarayku yupaychasqaykimanta yuyariyniki. Diosllapaqña kawsanaykipaq tanteakuspaqa nirqankim tayta-mamaykiña utaq pi kuyasqaykiña Diosta saqiruptinpas, utaq imaña haykaña kaptinpas, tukuy atiyniyuq Jehova Diosta hinalla yupaychanaykipaq (Sal. 27:10). Chaymi allin kanman imaña kaptinpas Jehova Dios kallpata quwananchikpaq mañakuyninchik, chaynapi tanteasqanchikman hina ruwanapaq (qaway Filipenses 4:11-13).

 7. ¿Ima ninantaq salvakunapaq ‘manchakuywan hinaspa respetowan’ kallpanchakuyqa?

⁷ Jehova Diosqa munanmi paywan kuyachikunaykita. Ichaqa hinalla kuyachikunaykipaqqa hinaspa salvasqa kanaykipaqqa anchatam kallpanchakunayki. Filipenses 2:12 nin: “Manchakuywan hinaspa respetowanyá hinalla kallpanchakuychik Dios salvasunaykichikpaq”, nispa. ¿Ima ninantaq kayqa? Kaywanqa nichkanmi Jehova Dioswan hinalla kuyachikunaykipaq hinaspa sasachakuykuna kaptinpas Diosman sunqu kanaykipaq imatapas ruwaspa allinta yuyaymananaykimanta. Ama kikillaykipiqa hapipakuychu. Achka wataña Diosta yupaychaqkunapas Diosman sunqu kasqankutam saqirurqaku. Hinaptinqa, ¿imataq yanapasunki salvasqa kanaykipaq?

 8. (1) ¿Imaynatam Diosta uyarichwan? (2) ¿Imanasqataq bibliata hinaspa qillqanchikkunata sapa kuti ñawinchaspa yuyaymananayki?

⁸ Jehova Dioswan kuyachikunapaqqa paytam uyarinanchik hinaspapas paywanmi rimananchik. Niwasqanchikta uyarinanchikpaqqa bibliata hinaspa qillqanchikkunatam ñawinchananchik, chaymantapas ñawinchasqanchikpim allinta yuyaymanananchik. Bibliata hinaspa qillqanchikkunata ñawinchaspaykiqa manam colegioykipi estudiaspa umallamanta yachanaykipaq hinallachu estudianayki. Aswanqa kallpanchakunaykim Jehova Diospa imayna kasqanta astawan riqsinaykipaq. Chayta ruwaspaykiqa Jehova Diosmanmi astawan asuykunki, paypas asuykamusunkitaqmi (Sant. 4:8).

 9. ¿Imakunataq yanapasurqanki sapaykipi bibliata estudiasqaykipi?

⁹ Diospa llaqtanqa achka yanapakuykunatam quwarqanchik sumaqta bibliata estudiananchikpaq. Chayna kasqantam qawanchik jw.org nisqanpi. “Jóvenes” nisqapim tarinki “Actividades para estudiar la Biblia” nisqanta, chaymi yanapasunki bibliapa willakusqankunata yachanaykipaq. Hina chayllapitaqmi kachkan “Guías de estudio” niq yanapakuy, chayqa “¿Imatapunim Bibliaqa yachachin?” niq qillqamantam kachkan, chaypas yanapasunkim iñiynikimanta mana iskayrayaspa hukkunaman willakunaykipaq. Tarinkitaqmi 2009 watapi abril killapi lluqsimuq ¡Despertad! qillqapipas kayna niq yachachikuyta: “Los jóvenes preguntan. ¿Cómo disfrutar la lectura de la Biblia?”, niqta. Chaypipas tarinkim bibliata imayna estudianapaq yanapakuyta. Chaynaqa, estudiasqaykipi yuyaymanaynikiqa yanapasunkim salvakunaykipaq (qaway Salmo 119:105).

10. ¿Imanasqataq Diosta yupaychaqkunaqa Diosta mañakunanchik?

¹⁰ Jehova Diostaqa uyarinchikmi bibliata hinaspa qillqanchikkunata ñawinchaspanchik. Ichaqa paywan rimananchikpaqqa paytam mañakunanchik. Diosta yupaychaqkunaqa manam costumbreraykullachu utaq imapas ruwasqanchik allinta lluqsinanta munaspallachu mañakunchik. Payta mañakuspaqa paywanmi rimachkanchik. Jehova Diosqa munanmi mañakusqaykita uyariyta (qaway Filipenses 4:6). Chaynaqa imamantapas llakisqa utaq hukmanyasqa kaspaykiqa bibliapa kayna nisqantam yuyarinayki: ‘Diosmanyá quykuy preocupasqa kasqaykitaqa’, niqta (Sal. 55:22). Chayta ruwayqa, ¿yanapasunkimanchu? Arí, achka iñiqmasinchikkunam ninku chayqa anchata yanapasqanta. Qamtapas yanapasunkimanmi.

11. ¿Imanasqataq Jehova Diosta sapa kuti agradecekunayki?

¹¹ Diostaqa sapa kutim mañakunanchik, manam imapas llakinchik kaptillanchu. Bibliaqa ninmi: “Agradecekuqyá kaychik”, nispa (Col. 3:15). Wakinpiqa sasachakuyninchikkuna kasqanraykum qunqaruchwan Diosmanta tukuy chaskisqanchikkunata. Chaymi kayta ruwanaykipaq kallpanchakuwaq: Sapa punchaw yuyaymanay imakunata Dios qususqaykimanta kimsa kaqkunallapipas, hinaspa chaykunamanta Jehova Diosta agradecekuy. 12 watachanpi bautizakuq Abigail sutiyuq sipasmi nin: “Jehova Diosllatam pimantapas astawanqa agradecekunanchik. Sapa kutim agradecekunanchik tukuy ima quwasqanchikmanta. Huk kutipim kayta uyarirqani: ‘Imaynaraq kanman puñusqaykimanta rikchariruspayki qayna punchaw Diosta agradecekusqayki kaqkunallata chaskiptikiqa, ¿achkatachu icha pisillatachu chaskikuwaq?’”, nispa.a

12, 13. ¿Imanasqataq ancha allin kawsakuynikipi Jehova Dios allin kasqanta yuyaymanaynikiqa?

¹² Jehova Diosmi Davidta yanaparqa sasachakuykunata atipananpaq. Chayna kasqanmantam kikin David kaynata nirqa: “Pruebaspataq yachaykuychik Diospa allin kasqantapas. Mayna-mayna kusisqamya Diospi amparakullaqpas”, nispa (Sal. 34:8). Bibliapa kayna nisqanmi kallpanchawanchik Jehova Dios allin kasqanta kikinchikpuni yachaykunanchikpaq. Bibliatawan qillqanchikkunata ñawinchaspa hinaspa huñunakuykunaman rispaykim, yacharqanki utaq uyarirqanki Diosqa yupaychaqninkunata payman sunqu hinalla kanankupaq imayna yanapasqanta. Ichaqa Jehova Diosta astawan kuyanaykipaqqa kikikim qawanayki kawsakuynikipi imaynata pay yanapasusqaykita. ¿Imaynatam yanapasusqaykipi musyakurqanki Jehova Dios allin kasqanta?

¹³ Llapallan Diosta yupaychaqkunam paypa allin kasqanta qawarqanchik. Kikinmi payman hinaspa churinman asuykunanchikpaq niwarqanchik. Jesusmi kaynata nirqa: “Manam pipas ñuqamanqa hamunmanchu kachamuwaqniy taytay mana pusamuptinqa”, nispa (Juan 6:44). ¿Musyakunkichu Jehova Dios payman asuykunaykipaq yanapasusqaykita? Ichapas huk mozo-sipas ninman: “Tayta-mamaytam Diosqa payman asuykunanpaq yanaparqa, ñuqañataqmi tayta-mamaypa ruwasqallanta qatirqani”, nispa. Ichaqa Diosllapaqña kawsanaykipaq tanteakuruspayki hinaspa bautizakuruspaykim Jehova Dioswan kuyachikuy munasqaykita qawachirqanki. Kunanqa paymi pimantapas astawan riqsisunki, chaymi biblia nin: “Sichu pipas Diosta kuyan hinaptinqa Diospas paytam riqsin”, nispa (1 Cor. 8:3). Chaynaqa, kallpanchakuyá Diospa llaqtanpi kasqaykita chaninchanaykipaq.

14, 15. ¿Imanasqataq Diosmanta willakusqaykiqa anchata yanapasunkiman payman asuykunaykipaq?

¹⁴ ¿Imaynatawanmi musyakuwaq Jehova Diosninchik allin utaq sumaq sunquyuq kasqanta? Escuelapi utaq wasin-wasin paymanta willakunaykipaq kallpata qususqaykita musyakuspaykim. Wakin mozo-sipaskunam estudiaqmasinkunaman Diosmanta willakuyta sasachakunku mana uyariy munanankumanta manchakuspanku. Ichapas qampas chayta manchakuspa mana willakuyta atinkichu. Aswan sasaraqmi kanman achka estudiaqmasikikunapa qayllanpi Diosmanta willakunayki kaptinqa. ¿Imataq chaypaq yanapasunkiman?   

¹⁵ Chaypaqqa puntatam kikiki musyakunayki Diospi iñisqaykimanta imanasqa mana iskayrayasqaykita. Internetpim jw.org castellano rimaypi mozo-sipaskunapaq achka yanapakuykunata tarinki. Chay yachachikuykunam yanapasunki imapi hinaspa imanasqa iñisqaykimanta musyakunaykipaq, hinaspa hukkunaman chaymanta imaynata yachachinaykipaqpas. Kallpanchaykikum chay yachachikuykunawan yanapachikunaykipaq. Bibliapa yachachikuyninkunamanta mana iskayrayaspaykiqa hinaspa allinta yachanaykipaq kallpanchakuspaykiqa mana manchakuspam Diospa sutinmanta willakuyta munanki (Jer. 20:8, 9).

16. ¿Imataq yanapasunkiman bibliamanta yachasqaykikunata manaña manchapakuspa willakunaykipaq?

¹⁶ Jehova Diosmanta imaynata willakunaykipaq allinta yachaspaykipas wakinpiqa ichapas hinalla manchapakunki. Huk iñiqmasinchikmi 13 watanpi kachkaspan bautizakurqa, kunanqa 18 watanpiñam kachkan. Paymi nin: “Yachanim bibliapa yachachikuyninkunamantaqa, ichaqa wakinpim sasachakuni imayna willakuyta”, nispa. ¿Imaynatam sasachakuyninta atipan? Paymi nin: “Estudiaqmasiykunaqa mana manchakuspam tukuy imamanta rimanku, ¿manachu ñuqapas mana manchakuspay Diosmanta willakuyman? Chaymi imamantapas paykunaman willakuspay, qunqayllamanta rimayta qallaykuni runakunaman bibliamanta yachachiptiy imakuna pasawasqanmanta. Chaynata rimaspay bibliamanta mana yachachiptiypas, wakinkum nisqayta uyarispanku tapuwanku runakunaman imamanta yachachisqayta. Chay ruwasqaymi yanapawan estudiaqmasiykunaman manaña sasachakuspa Jehova Diosmanta willakunaypaq. Chay ruwasqaymantam ancha kusisqa tarikuni”, nispa.

17. ¿Imanasqataq mana manchakuspa iñisqanchikmanta willakunanchik?

¹⁷ Hukkunata respetaspa yanapanaykipaq kallpanchakuptikiqa, hukkunapas qanwanmi chaynata ruwanqaku. Warmallaraq kachkaspanmi Olivia sutiyuq sipas bautizakurqa, kunanqa 17 watanpi kaspanmi kaynata willakun: “Piwanpas parlaspayqa bibliamanta rimaytaqa manchakurqanim, manam munarqanichu mana allinta ñuqamanta piensanankuta”, nispa. Ichaqa tiempopa risqanman hinam manaña chaynatachu piensarqa. Manchakunanmantaqa payqa kaynatam yuyaymanarqa: “Achka mozo-sipaskunam Jehova Diospa testigonkunamantaqa mana imatapas yachankuchu, chaymi imayna kasqanchikta qawaspanku musyakunqaku Diospa testigonkuna imayna kasqanchikta. Sichu pinqapakuspa utaq manchakuspa Diosmanta willakuptinchikqa, runakunam piensanqaku Diospa testigon kasqanchikta mana chaninchasqanchikta, utaqmi ninqaku imapas iñisqanchikmanta iskayrayasqanchikta. Ichaqa, iñiyninchikmanta mana manchakuspa hinaspa mana iskayrayaspa willakuptinchikqa runakunaqa respetawasunmi”, nispa.

18. ¿Imakunatam ruwanayki Dios salvasunaykipaq?

¹⁸ Dios salvasunaykipaq kallpanchakuyqa kikikimantam, hinaspapas manam pukllay hinachu. Chaypaqmi bibliata ñawinchanayki hinaspa ñawinchasqaykipi allinta yuyaymananayki, Diosta mañakunayki hinaspa imaynata yanapasusqaykipi utaq bendecisusqaykipi yuyaymananayki. Kaykunata ruwaspaykiqa astawanmi Diosman asuykunki hinaspa paywan kuyachikunki, chaymantapas tukuy sunqumantam paymanta willakuyta munanki (qaway Salmo 73:28).

19. ¿Imanasqataq kallpanchakunanchik Dios salvawananchikpaq?

¹⁹ Jesusmi nirqa: “Pipas qatiwayta munaspaqa amaña kikillanpaq kawsaspayá ñakarichiqnin qirunta qipikuykuspa hinalla qatiwachun”, nispa (Mat. 16:24). Jesusta qatinapaqqa Jehova Diospaqña kawsananchikpaqmi tanteakunanchik hinaspa bautizakunanchik. Kayta ruwaspaqa achka bendicionkunatam chaskisun, hamuq tiempopiñataqmi kay allpa pachapi wiñay kawsakuyta chaskisun. Chaynaqa, hinallayá kallpanchakusun Dios salvawananchikpaq.