¿Imaynanpitaq bautizakunanchik?

1, 2. (1) Pipas bautizakuptinqa ¿imaynam llapallanchikpas tarikunchik? (2) ¿Imamantam kay yachachikuypi yachasun?

¿YAQACHU haykaqllapas rikurqanki bautizakunankupaqña kaqkunata? Yachachimuq iskay tapukuyta ruwaptinmi kusisqallaña “arí” nispa contestanku, hinaptinmi familiankupas, amistadninkupas kusisqallaña kanku. Bautizakuqkunaqa kusisqallañam yakumanta lluqsimunku, hinaptinmi chaypi kaqkunapas kusikuymanta taqllakunku. Chaynam sapa semana waranqantin bautizakunku hinaspam Jehova Diospa testigonña kanku bautizasqa kasqankurayku.

² Bautizakuyta munaspaykiqa ‘Jehova Diostam maskachkanki’, chayta ruwaspaykiqa mana allin runakunapa chawpinpi yachaspapas achki hinam kachkanki (Sal. 14:1, 2). Bautizakuyta munaptikiqa kay yachachikuyqa qampaqmi ruwasqa kachkan jovenña utaq yuyaqña kaptikipas. Kaypim yachanki Jehova Diosta serviyqa imanasqa ancha allin kasqanmanta. Kay yachachikuyqa yanapawasunmi bautizasqaña kaqkunatapas Jehova Diosta hinalla wiñaypaq servinapaq.

 3. ¿Imanasqataq Diosta serviqkunaqa imam kaq rimayta hinaspa allin kaq ruwayta munananchik? (Rimarimuytaq Salmos 119:128, 163 nisqanmantapas).

³ Jehova Diosmi serviqninkunata kaynata kamachirqa: “Imam kaqtayá rimaychik”, nispa (Zac. 8:19). Jesuspas nirqam allin kaqkunata ruwanamanta (Mat. 5:6). Chaykunawanmi yachanchik Diospa munasqanman hina allin kaqkunata ruwayta munanamanta. Qamqa munankichá imam kaq rimayta hinaspa allin kaq ruwayta, chaychá chiqninki llullakuyta chaynataq imapas mana allin ruwaytaqa (leey Salmos 119:128, 163). Pipas llullakuqqa kay pachata munaychakuq satanastam qatipakuchkan (Juan 8:44; 12:31). Satanasqariki Jehova Diospa sutintam pinqayman churayta munachkan, chaymi llullakunata Diosmanta rikurirachin Eden huertamantapacha. Satanasmi nirqa Jehova Diosqa kikillanpaq munaq kamachiq kasqanta chaynataq runakunapa allinninta mana munasqanta (Gen. 3:1, 4, 5). Chayna llullakunata satanas rimasqanraykum yaqa lliw runa Jehova Diostaqa mana allinpaq hapinku. Runakuna imam kaq rimayta mana munaptinkuqa satanasmi kallpanchan tukuy mana allinkunata ruwanankupaq (Rom. 1:25-31).

 4. ¿Imamantam Jehova Diosqa yachachiwanchik kuyaqninkunaman? (Qawaytaq dibujotapas)

⁴ Jehova “Diosqa imam kaqta rimaqmi”, chaymi kuyaqninkunamanqa imam kaqta yachachin (Isa 65:16). Chayna yachachiwasqanchikraykum manaña satanaspa pantachisqanchu kachkanchik. Chaymantapas Jehova Diosqa serviqninkunatam yachachiwanchik mana llullakunapaq hinaspa allin kaqta ruwanapaq, chayqa yanapawanchikmi hawka kawsakunapaq (Prov. 13:5, 6). ¿Bibliata estudiasqaykimantapachaqa qampas allinñachu kawsakunki? Yaqachá ¿aw? Yacharunkichá Jehova Diosta kasukuspalla kusisqa kawsakunamanta (Sal. 77:13). Chayraykuchá Jehova Diosta kasukuyta hinalla munanki (Mat. 6:33). Hinaspapas, Jehova Diosmanta chiqap kaqta yacharusqaykiraykuchá satanasqa llulla kasqanta qawachiyta munanki. ¿Imaynatam chayta ruwawaq?

 5. ¿Imapaq tantiakuptikim yachanqaku imam kaq rimayta hinaspa allin kaq ruwayta munasqaykita?

⁵ Jehova Diosta servinaykipaq tantiakuptikiqa lliw runakunam yachanqaku satanasqa llulla kasqanta, imam kaqta rimay munasqaykita, Jehova Dios kamachiqniki kananta munasqaykita chaynataq kamachikuyninkuna kasukuy munasqaykita. Chaypaqqa manaraq bautizakuchkaspaykim Jehova Diosta mañakuspa ninayki payllataña wiñaypaq servinaykimanta, hinaspam bautizakunayki lliw runakuna chayta yachanankupaq. Arí, imam kaq rimayta hinaspa allin kaq ruwayta munaspaykiqa bautizakuytam munanki, chaypaq tantiakuptikim yachanqaku imam kaq rimay munasqaykita chaynataq allin ruway munasqaykita.

 6. Salmos 45:4 nisqanman hinaqa, ¿imanasqataq Jesusta kuyanchik?

⁶ ¿Imanasqataq Jesucristota kuyanki? Salmos 45:4 (leey) nisqanpim niwanchik Jesusqa imayna kasqanmanta, chayraykum paytaqa kuyanchik. Arí, Jesusqa imam kaq rimaqmi, allin kaqta ruwaqmi hinaspa mana hatuntukuqmi. Qampas chayna kaytachá munanki, chaychá Jesustaqa kuyanki. Jesusqa chiqap kaqtam mana manchakuspa willakurqa, hinaspapas allin kaqtam ruwarqa (Juan 18:37). Ichaqa, ¿imaynanpim yachanchik mana hatuntukuq kasqanta?

 7. ¿Ima niwaqtaq Jesuspa mana hatuntukuq kasqanmanta?

⁷ Jesusqa imapas rimasqanwanmi hinaspa ruwasqanwanmi qawachikun mana hatuntukuq kasqanta, chaymi Jesusqa riqsikun taytanpa yanapakuynillanwan imapas ruway atisqanta. Manamá payta hatunchanankutaqa maskanchu (Mar. 10:17, 18; Juan 5:19). ¿Imaynataq sientekunki Jesuspa mana hatuntukuq kasqanwan? ¿Manachu chayqa kallpanchasunki Jesusta kuyanaykipaq hinaspa qatipakunaykipaq? Arí, anchatachá kallpanchasunki. ¿Imanasqataq Jesusqa humilde? Jehova Diospas humilde kasqanraykum, hinaspapas taytanta kuyasqanraykum imayna kasqanta sumaqta qatipakun (Sal. 18:35; Heb. 1:3). Chayna kasqanraykuchá Jesustaqa astawan kuyanki.

 8. ¿Imanasqataq ancha kusisqa tarikunchik Jesus kamachiqninchik kasqanwan?

⁸ Ancha kusisqam tarikunchik Jesus kamachiqninchik kasqanwan, payqariki alli-allin kamachiqmi. Kikin Jehova Diosmi yachachirqa hinaspam kamachiqninchik kananpaq churarqa (Is. 50:4, 5). Chaymantapas Jesusqa sunqumanta kuyawasqanchiktam qawachiwarqanchik (Juan 13:1). Jesustaqa kamachiqninchik kasqanraykum anchata kuyananchik. Kikinmi nirqa kuyaqnin runakunaqa kamachikuyninkunatapas kasukusqankumanta. Chayna runakunataqa amistadninpaqmi Jesusqa hapin (Juan 14:15; 15:14, 15). ¡Anchatam kusikunchik Jehová Diospa churinpa amistadnin kaspanchik!

 9. ¿Ima ruwayta qallarinapaqmi Jesus hina bautizakurqanchik?

⁹ Jesusmi qatiqninkunata kamachirqa bautizakunankupaq (Mat. 28:19, 20). Kikinpas bautizakurqam. Jesuspa bautizakusqanwan qatiqninkunapa bautizakusqan mana chaynalla kaptinpas wakinpiqa tupanmi (qaway “Jesuspa bautizakusqanwan qatiqninkunapa bautizakusqan imakunapi mana chaynalla kasqan” niq yachachikuyta). Jesusqa bautizakurqa taytanpa munayninta ruwayta qallarinanpaqmi (Heb. 10:7). Chaynam qatiqninkunapas Jehova Diospa munaynin ruwaytaña qallarinapaq bautizakurqanchik. Chayta ruwaptinchikmi lliw yacharqaku munasqanchikta manaña ruwaspa Jehova Diostaña servinapaq prometekusqanchikta. Chaynata ruwaspam Jesusta qatipakurqanchik.

10. ¿Imakunaraykum Jesusta kuyanki? Jesusta qatipakuspaqa ¿imata ruwanaykipaqmi tantiakunayki?

¹⁰ Qamqa allintañam yachanki Jesusqa Jehova Diospa punta unanchasqan kasqanta chaynataq kamachinanpaq payta churasqantapas. Yachankitaqmi Jesusqa humilde kasqantapas hinaspa taytanta sumaqta qatipakusqantapas. Yachankitaqmi Jesusqa kay allpa pachapi kachkaspan yarqaymanta kaqkunaman mikuykachisqanta, llakisqakunata kallpanchaykusqanta chaynataq unquqkunata hampiykusqantapas (Mat. 14:14-21). Yacharunkitaqmi kikin Jesus Diospa llaqtanta pusasqantapas (Mat. 23:10). Chaymantapas, yacharunkim Diospa churasqan kamachiq kasqanrayku hamuq tiempopi tukuy allin kaqkunata ruwapuwananchikmanta. Chaynaqa, ¿imaynatam Jesus kuyasqaykita qawachiwaq? Paypa imapas ruwasqanta qatipakuspam (Juan 14:21). Jesusta qatipakunaykipaqqa Jehova Diosta servinaykipaqmi tantiakunayki hinaspa bautizakunayki.

11. ¿Imataq kallpanchawananchik bautizakunapaq? ¿Imanasqataq chayqa ancha allin?

¹¹ ¿Imataq kallpanchawananchik bautizakunapaq? Jesusmi chaymanta rimaspan kaynata nirqa: “Jehova Diosnikitam kuyanayki tukuy sunquykiwan, tukuy vidaykiwan, tukuy yuyaynikiwan hinaspa tukuy kallpaykiwan”, nispa (Mar. 12:30). ¿Chaynatachu qampas Diosta kuyanki?

12. ¿Imaynanpitaq Jehova Diosta kuyanki? (Qawaytaq fotokunatawan dibujotapas).

¹² Jehova Diostaqa kuyanchik ñuqanchikpaq tukuy imata ruwasqanraykum, yachasqanchikman hinaqa Jehova ‘Diosmi kawsachiwaqninchikqa’. Chaymantapas tukuy imapas allin kaqkunaqa hinaspa allinkuna chaskisqanchikqa Diosmantam hamun (Sal. 36:9; Sant. 1:17). Arí, tukuy imapas allin kapuwaqninchikkunataqa Jehova Diosmi quwarqanchik, payqa qukuykuqllañam hinaspapas anchatam kuyawanchik.

13. ¿Imaynanpitaq Jesuspa wañupuwasqanchikqa sumaq regalo hina?

¹³ Jesuspa wañupuwasqanchikqa Jehova Diospa sumaq regalo quwasqanchik hinam. ¿Imanasqataq chaynata ninchik? Paykunaqa anchatam kuyanakunku. Chaymi Jesuspas nirqa: “Taytayqa kuyawanmi”, nispa. Nirqataqmi paypas taytanta kuyasqanmanta (Juan 10:17; 14:31). Chaymantapas Jehova Dioswan Jesusqa wara-waranqantin wata kuska kasqankuraykum astawan kuyanakurqaku (Prov. 8:22, 23, 30). Chaynaqa Jehova Diosqa mayna llakisqach tarikurqa kuyasqan churinta ñakarichispa wañuchiptinkuqa. Chaywanpas, sapakamata anchata kuyawasqanchikraykum Diosqa mana harkakurqachu kuyasqan churin ñuqanchikrayku ñakarispa wañunantaqa. Chayqa quwasqanchik sumaq regalo hinam, chaynapi wiñaypaq kawsakunapaq (Juan 3:16; Gal. 2:20). Chayraykum Jehova Diostaqa astawan kuyanchik.

14. ¿Imata ruwanaykipaq tantiakuspam kusisqa kawsakunki?

¹⁴ Jehova Diostam astawan kuyarunki paymanta astawan yachasqaykirayku. Hinallachá munachkanki Jehova Dioswan aswan amistad kayta wiña-wiñaypaq. ¡Chaytaqa atiwaqmi! Imapas rimasqaykiwan hinaspa ruwasqaykiwanmi Dios kusichiytaqa atiwaq, chay ruwanaykitam payqa munan (Prov. 23:15, 16). Vidaykiwan imata ruwanaykipaq tantiakusqaykim qawachinqa Jehova Diosta kuyasqayki utaq mana kuyasqaykipas (1 Juan 5:3). Jehova Diospa munasqanman hina kawsakunaykipaq tantiakuspam ichaqa kusisqa kawsakunki.

15. ¿Imata ruwaspaykim Jehova Dios kuyasqaykita qawachiwaq?

¹⁵ ¿Imata ruwaspaykim Jehova Dios kuyasqaykita qawachiwaq? Chaypaqqa puntatam Jehova Diosta mañakuspa ninayki payllataña servinaykimanta (Sal. 40:8). Hinaspam bautizakunayki llapallanku chaypaq tantiakusqaykita yachanankupaq. Qallariypi rimamusqanchikman hinam bautizakuspaykiqa kusisqa tarikunki. Chaymantapacham vidaykiqa cambianña, chay punchawmantam manaña qampaqchu kawsanki, aswanqa Jehova Diosta servinaykipaqñam (Rom. 14:8; 1 Ped. 4:1, 2). Bautizakuyqa manamá pukllay hinallachu, ichaqa bautizakuspaykiqa aswan allinmi kawsakunki. ¿Imanasqa?

16. 1 Juan 2:25 nisqanman hinaqa, ¿imatam Jehova Diosqa qunqa haykam serviqninkunaman?

¹⁶ Jehova Diosqa pimantapas aswan qukuykuqllañam. Paypaq imatapas ruwaptinchikqa payqa achkanpim kutichipuwasun (Mar. 10:29, 30). Kay tukupay tiempopipas Jehova Diosta servispaykiqa hawkalla hinaspa kusisqam kawsakunki, chayqa bautizakusqaykipa qallariyllanraqmi. Diosninchik wiñay kawsayta qusuptikim wiñaypaq serviyta atinki, hinaspapas astawanmi kuyanakunkichik. Pay hinataqmi wiñaypaq kawsakunkipas (leey 1 Juan 2:25).

17. ¿Imapaq tantiakusqaykitaq Jehova Diospaqqa mana kapusqan regalo hina kanman?

¹⁷ Diosllataña servinaykipaq tantiakuspaykiqa hinaspa bautizakuspaykiqa Jehova Diosmanmi quchkanki ancha valorniyuq kaqta. Tukuy ima kapuqnikiqa hinaspa kusisqa kawsakusqaykiqa Jehova Diosmantam hamurqa. Chaymi agradecekusqaykirayku Jehova Diosta imaña kaptinpas wiñaypaq servinaykipaq tantiakuwaq. Kay pachapi hinaspa hanaq pachapi kaqkuna paypa kaptinpas mana kapusqan regalo qusqayki hinam kanman servinaykipaq tantiakusqaykiqa (Job 1:8; 41:11; Prov. 27:11). Chay ruwaynikim aswan allinqa. Arí, Jehova Diosta kuyasqaykiraykum bautizakunaykiqa.

18. ¿Ima tapukuykunatam ruwakunayki?

¹⁸ Kaykama yachamusqanchikman hinaqa ¿yaqañachu bautizakuwaq? Qamllam chaytaqa sunquykipi yachanki. Tapukuy: “¿Yaqañachu bautizakunaypaq hinaña kachkani?”, nispa (Hech. 8:36). Imarayku bautizakunamantam yachamurqanchik, chaytayá yuyariykusun. Punta kaq, imam kaq rimayta hinaspa allin ruwaytam munanayki. Chaypaq tapukuy: “¿Munanichu hamuq punchawpi imam kaq rimaq runakunawan hinaspa allin kaq ruwaq runakunallawan kawsakuyta?”, nispa. Iskay kaq, Jesucristotam kuyanayki. Chaypaq tapukuy: “¿Munanichu Diospa churin kamachiwaqniy kananta hinaspa pay qatipakuyta?”, nispa. Kimsa kaq, kaymi aswan allinqa, Jehová Diostam kuyanayki. Chaypaq tapukuy: “¿Munanichu Jehova Diosllata serviyta hinaspa sunqun kusichiyta?”, nispa. Kimsan tapukuykunata “arí” nispaykiqa, ¿imanasqataq iskayrayankiraq bautizakunaykipaq? ¿Imataq harkasuchkanki? (Hech. 16:33).

19. ¿Imaynanpitaq mana iskayrayanaykichu bautizakunaykipaq? Mikuywan rikchanachispa rimarimuy. (Rimarimuytaq Juan 4:34 nisqanmantapas).

¹⁹ Sichu iskayrayankiraq bautizakunaykipaq hinaspaqa yuyaymanay Jesuspa rikchanachisqanpi (leey Juan 4:34). Jesusmi nirqa taytanpa munayninta ruwayqa mikuynin hina kasqanta. Mikuyqariki cuerponchikpaqmi allin, chaynam Jesuspas yacharqa Jehova Diospa kamachiwasqanchikta ruwayqa allinninchikpaq kasqanta. Payqa manam mana allinninchikpaq kaqtaqa kamachiwanchikchu. Chayraykum Diosqa niwanchik bautizakunapaq (Hech. 2:38). Bautizakunapaq kamachikuyta kasukuynikiqa allinnikipaqmi kanqa. Sichu pipas qaraykusunkiman ancha gustasqayki mikuyta hinaptinqa ¿manachu mikuwaq? Mikuwaqmi ¿aw? Chaynaqa, amayá iskayrayaychu bautizakunaykipaqpas.

20. ¿Imamantam hawanta yachasunchik?

²⁰ ¿Imaynanpim wakinqa iskayrayankuraq bautizakunankupaq? Piensankum manaraq chaypaq hina kasqankuta. Arí, Diosta servinapaq tantiakuyqa hinaspa bautizakuyqa manamá pukllay hinallachu. Chayraykum allinta piensanayki hinaspa chaypaq hina kanaykipaq anchata kallpanchakunayki. Sichu bautizakuytaña munaptikiqa ¿ima ruwaytaq yanapasunkiman? Chaymantam hawanta yachaykusunchik.