Churikichikta yachachiychik Jehová Diosta kuyanankupaq

“Kallpallanchikpiraq naceq churinchikkunaqa valeroso soldadokunapa flechankuna hinaraqmi kanqa.” (SALMO 127:4.)

1, 2. ¿Imaynanpitaq churikunaqa “valeroso soldadokunapa flechankuna hinaraqmi kanqa”?

FLECHAQ runaqa flechananpaqmi alistakun. Cuidadollawanmi flechanta arconpa cuerdanman churan hinaspa alistakun flechananpaq. Sasa kaptinpas pacienciakuspa apuntaspa flechan. Hinaspaqa, ¿hapirachinqachu? Hapirachinqam allin flechaq kaspan, wayra yanapaptin chaynataq flechan suni kaptinpas.

² Salomon sutiyoq reymi churikunata tupanaykachin “valeroso soldadokunapa flechankuna hinaraqmi kanqa” nispa (Salmo 127:4). Yachasunchik imaynatam tayta-mamakunataqa yanapanman kay tupanachiyqa. Flechaqpaqqa pisillam tiempon flechanwan apuntananpaq, hapichiyta munaspaqa apurawtam flechanan. Chaynallataqmi tayta-mamakunapaqpas pisillam tiemponkuqa, churinkunapa sonqonpi Jehová Diosta kuyakuyta hatallichinankupaq. Qawasqankuman hina warmakunaqa chaylla wiñaruspanku wasimanta pasakunku (Mateo 19:5). ¿Munasqanmanchu ‘flechankunaqa’ hapinqa? Imaniwaqtaq, ¿hinallachu churikunaqa Diosta kuyaspanku servinqaku wasimanta pasakuspankupas? Chaynam kanqa achkaq yanapakuykunawan yanapachikusqaqa. Yachasunchikyá kimsa yanapakuymanta: tayta-mamakunapa yachaywan yachachisqankumanta, familiapi imayna kawsakusqankumanta hinaspa yachachikusqankuta churikuna imayna chaskikusqankumantapas. Puntataqa qawasunchikyá imatam tayta-mamakuna ruranankuta.

Qatikunapaq hinayá kaychik

 3. ¿Imanasqataq tayta-mamakunaqa rurasqankuwan yachachinanku?

³ Jesusqa yachachisqanman hinam kawsakurqa, chaymi allinpuni tayta-mamakuna qatikunankupaq (Juan 13:15). Fariseokunamantaqa manam chaynatachu nichwan, paykunatam Jesusqa condenarqa rimasqankuman hina mana ruraptinku (Mateo 23:3). Chaynaqa Jehová Diosta kuyanankupaq churinkunaman yachachiyta munaspankuqa tayta-mamakunaqa rurasqakuwanmi yachachinanku. Rimasqankuman hina mana ruraptinkuqa yachachisqankuqa yanqapaqmi kanqa flechanapaq mana cuerdayoq arco hina (1 Juan 3:18).

 4. ¿Ima tapukuykunatataq tayta-mamakunaqa rurakunmanku, hinaspa imanasqa?

⁴ Tayta-mamakunapa yachachisqankuman hina rurayninqa allinpunim. Yachasunchikyá imanasqa. ¿Imaynatam paykunaqa Diosta kuyayta yacharqaku? Jesuspa rurasqanta qatikuspa. Chaynallataqmi churikunapas Jehová Diosta kuyayta yachanqaku tayta-mamankuta qatikuspa. Yuyarisunchikyá warmakunapa amistadninkunaqa kallpanchanmanmi otaq ‘urmachinmanmi allin kawsaqkunatapas’ (1 Corintios 15:33). Chaynaqa warmakunapa punta kaq watankunapiqa tayta-mamanmi qatipakunankupaq amigonkunaqa kanku. Chaymi paykunaqa tapukunanku: “¿Allin ‘amistadchu’ churiykunapaq kani? ¿Rurasqaywanchu yanapani ‘allin kawsaq’ kananpaq? ¿Allintachu yachachichkani Diosman mañakuymanta chaymanta Biblia estudiaymantapas?” nispa.

Diosman mañakuychik churikichikkunawan kuska

 5. ¿Imatam churikunaqa yachanmanku tayta-mamankupa Diosman mañakusqankuta uyarispanku?

⁵ Warmakunaqa Jehová Diosmanta achkatam yachanmanku tayta-mamankupa mañakusqanta uyarispa. Piensarinapaq: ¿imatam yachanmanku Biblia estudianapaq mañakuptinkuqa hinaspa mikunankupaqpas Diosman graciasta qoptinkuqa? Cuentatam qokunqaku Jehová Dios imapas paymanta yachananchikpaq chaynataq pisipusuwaqninchikta qowasqanchikta, chaymi paytaqa agradecekunanchik. Kayna rurayqa allinpunim (Santiago 1:17).

 6. ¿Imaynatam tayta-mamakunaqa churinkunata yachachinmanku Jehová Diosqa sapakamamanta nanachikusqanta?

⁶ Chaymantaqa, astawanraqmi tayta-mamakunaqa churinkunata yachachinqaku sapaq kutikunapipas mañakuspanku chaymanta familiapi kaqkunapaq imatapas mañapuspanku. Chaynata ruraspankum churinkunata yachachinqaku Jehová Diosqa ayllun hina kasqanta chaynataq cuentatapas qokunqaku familianpi sapakamamanta nanachikusqanta (Efesios 6:18; 1 Pedro 5:6, 7). Huk taytam willakun: “Nacesqanmantapunim warmi churiykuwan Diosman mañakuq kaniku. Wiñasqanman hina paypaqpas mañapuq kaniku, allin amistadkunata armananpaq chaymanta hukkunamantapas. Casarakuspa wasimanta pasakunankama sapa punchaw mañakuq kaniku” nispa. Tayta-mamakuna, ¿churikichikkunawanchu sapa punchaw Diosman mañakunkichik? ¿Yanapankichikmanchu Jehová Diosta amigonta hina qawanankupaq, paykunapa pisipusuqninmanta chaynataq paymanta yachanankupaq preocupakuspanpas sientesqankumanta preocupakusqantapas? (Filipenses 4:6, 7.)

 7. Sapakama churinkunapaq mañapunankupaqqa, ¿imatam tayta-mamakunaqa yachananku?

⁷ Ichaqa sapakamapaq mañapunapaqqa churikuna imayna kasqankutam yachana. Qawasunchikyá iskay warmi churiyoq tayta imam rurasqanmanta: “Semana tukuqtam, kaykunata tapukuq kani: ‘¿Imakunawantaq kay semanapi churiykunaqa sasachakurqaku? ¿Imakunataq allinninkupaq karqa?’ nispa”. Tayta-mamakuna, ¿imanasqataq kaynataqa mana tapukunkichikchu? Kaykunamanta yachaymi yanapasunki churikikunawan Diosman mañakuspa imam ninaykita yachanaykipaq. Chaynata ruraspaqa manam yachachichkankichikchu pipapas mañakusqanta Uyariykuq Jehová Diosman mañakuyllatachu, aswanqa kuyaytam yachachinkichik (Salmo 65:2).

Yanapaychik allin estudiaq kanankupaq

 8. ¿Imanasqataq tayta-mamakunaqa churinkuta yanapananku Bibliata estudiaq kanankupaq?

⁸ Tayta-mamakunapa Biblia estudiayta imayna qawasqankum churikunata yanapanqa Dioswan allin amistadta hatallinankupaq. Jehová Dioswan chaynataq piwanpas allin amistadta armarunapaqqa manam rimanallanchikchu, aswanqa uyarinanchikmi. Diostaqa uyarichwanmi “confianapaq sirviente” horqosqan qellqakunawan Bibliata estudianapaq yanapachikuspa (Mateo 24:45-47; Proverbios 4:1, 2). Chaymi churikuna Jehová Dioswan amistadninta hatallinankupaqqa allinpunim Biblia estudiayta yachachiyqa.

 9. ¿Imataq churikunata yanapanqa Bibliata allinta estudiaq kanankupaq?

⁹ ¿Imataq churikunata yanapanqa allin estudiaq kanankupaq? Kaqtawan nisunchik tayta-mamakunapa rurasqanmi churinkunataqa yanapanqa. Tayta-mamakuna, ¿churikichikkunachu qawasunkichik Bibliata leesqaykichikta chaynataq estudiasqaykichiktapas? Cheqaptachá churikichik uywasqaykichikpi tiempoykichikpas mana haypasunkichikchu Bibliata leenaykipaq chaynataq estudianaykipaqpas. Ichaqa tapukuychikyá: “¿Churiykunachu qawawachkan achka horata televisionta qawakuq kasqayta? Chayna kaptinqa, ¿manachu tiempochakuwaq Bibliata estudianaykipaq hinaspa churiykikunata chayta ruranankupaq yachachinaykipaq?

10, 11. ¿Imanasqataq allinpuni sapa semana familiapi Biblia estudiayqa?

¹⁰ Churikunamanqa Jehová Diosmanta uyarinankupaqqa yachachichwantaqmi sapa semana Bibliata familiapi estudiaspa (Isaias 30:21). Wakinchá ninqaku imapaqtaq chaytaqa ruranmanku churinkuna congregacionpi llapallan huñunakuykunaman richkaptinkuqa. Ichaqa allinpunim familiapi Bibliata estudiayqa. Puntataqa Jehová Diosmi tayta-mamakunata kamachirqa churinkunata yachachinankupaq (Proverbios 1:8; Efesios 6:4). Familiapi estudiayqa yachachinmi manam runakunapa qayllallanpichu Diostaqa yupaychana, aswanqa familia ukupipas yupaychanam (Deuteronomio 6:6-9).

¹¹ Chaymantapas, Diosmanta chaynataq allin ruraykunamanta imam piensasqankuta yachanapaqqa familiapi Bibliamanta allinta estudiaymi yanapanqa. Chaynaqa, warmakuna taqsallaraq kaptinmi, yachachinapaqqa servichikunmanku Aprendamos del Gran Maestro nisqa sutiyoq librowan chaynataq wakin librokunawanpas.a Kay libropiqa yaqa llapallan qellqasqapim wawakunata tapun leesqanmanta piensasqanta rimananpaq. Libropi Bibliamanta rikuriq textokunata leespaqa tayta-mamakuna warmakunawan yuyaymanaspankuqa yanapanqakum entiendeq kaspanku ‘allin kaqtapas hinaspa mana allin kaqtapas reqsinankupaq’ (Hebreos 5:14).

12. ¿Imaynatataq tayta-mamakunaqa familiapi estudiotaqa sapakama churinkunapaq hina ruranmanku, hinaspa ima rurasqaykiwantaq churikikunata yanaparqanki?

¹² Cheqapmá, churikunataqa sapakamapa entiendesqankuman hinam yachachina. Qawasunchikyá imaynatam iskay sipaskunata tayta-maman yanaparqaku estudiaqmasinkunawan fiestaman rinankupaq permisota mañakuptinku. Taytanmi willakun: “Qatiqninpi familiapi estudianaykupaq nirqaniku ñoqaykupa rurasqaykuta paykuna ruranankupaq ñoqaykuñataq paykunapata. Warmiywan ñoqañataqmi churinkuna kanayku karqa paykunañataq tayta-mamayku. Mayqenniyku kanankupaq akllakuspankupas iskayninkum ichaqa escuelapi fiestakunamanta estudiaspanku yachachiwananku karqa” nispa. ¿Imatam yacharurqaku? “Admirakurqanikum, paykunaqa allin kaqta hinaspa mana allin kaqmanta musyakuspanku tayta-mamayku hina Bibliapa nisqanwan yachachiwarqaku escuelapi fiestaman riyqa mana allin kasqanta. Aswanraqmi admirakurqaniku escuelapi fiestaman rinaykumantaqa allin kaqkunata ruraspa kusikunaykupaq consejawasqankumanta. Chay punchawmi cuentata qokurqaniku paykuna imam piensasqankuta chaynataq munasqankutapas” nispa. Cheqapmá, familiapi sapa kuti yanapanapaq hina Bibliamanta estudianapaqqa allinta piensarispam kallpanchakuna. Chaynata kallpanchakuyqa allinpaqmi (Proverbios 23:15).

Mayna allinmi familiapi hawka kawsakuyqa

13, 14. a) ¿Imatam tayta-mamakunaqa ruranmanku familianpi hawkalla kawsakunankupaq? b) ¿Imaynam kanqa pantasqankumanta reqsipakuptinkuqa?

¹³ Allin tiempopi chaynataq hawkalla kaspanqa flechaqmi munasqanpi hapirachinman. Chaynallataqmi, churikunapas Jehová Diosta kuyayta yacharunmanku tayta-mamanku familiapi hawka kawsakuypi kallpanchakuptinkuqa. ‘Allinyanachiqkunamanta’ willaspanmi Santiago sutiyoq discipuloqa nirqa “tarpuchkaq hinam mirachinku hawkalla kawsakuyta chaynapi cosechachkaq hina allin kaqta horqonankupaq” nispa (Santiago 3:18). Ichaqa, ¿imaynatataq tayta-mamakunaqa kallpanchakunmanku familianpi hawkalla kanankupaq? Imamantapas llalliriqtaqa, iskayninkuraqmi allinta kawsanankupaq kallpanchakunanku. Kuyanakuspaqa chaynataq respetanakuspaqa, mana sasachakuspam churinkuman yachachinqaku, hukkunatapas kuyaspanku respetanankupaq hinaspa astawanraqmi Jehová Diostaqa respetanqaku (Galatas 6:7; Efesios 5:33). Qawasqanchikman hina, kuyanakuyqa chaynataq respetanakuypas familiapim hawkallata kawsachiwanchik. Chaymantapas, tayta-mamakuna hawkalla kawsaptinkuqa familianpi ima sasachakuy kaptinpas atiparunqaku.

¹⁴ Ichaqa, kunan tiempopiqa manam casarakuqpas nitaq familiapas mana pantaqqa kanchu. Chaymi, tayta-mamakunaqa manapunim tukuy ima rurasqankupichu chuya espiritupa yanapasqanman hina ruranku (Galatas 5:22, 23). Chayna kaptinqa, ¿imatam rurananku? Pantasqankuta reqsipakuptinkuqa, ¿churinkunachu manaña respetanqaku? Apostol Pablopa rurasqanta qawasunchik. Diospa llaqtanpiqa, achka cristianokunapaqmi taytan hina karqa (1 Corintios 4:15). Chaywanpas pantaq kasqanmanta reqsipakurqa (Romanos 7:21-25). Humillakuspa cheqapllata rimasqanqa astawanmi paytaqa respetachiwanchik. Pablopa pantasqankunaqa manamá harkarqachu Corinto sutiyoq congregacionman ninanpaq: “Ñoqapa ejemploytayá qatiychik, ñoqapas Cristopa ejemplontam qatini” nispa (1 Corintios 11:1). Tayta-mamakuna, qamkunapaqpas chaynam kanman: pantasqaykichikmanta reqsipakuptikichikqa churikichikkunaqa pantasqaykichikta chayllapunim qonqarunqaku.

15, 16. ¿Imanasqataq tayta-mamakunaqa churinkunata yachachinanku congregacionpi wawqe-paninkunata kuyanankupaq, hinaptinqa imaynatam chaytaqa ruranqaku?

¹⁵ ¿Imatawanraqmi tayta-mamakuna rurawaqchik churikichikkuna Jehová Diosta kuyanankupaq? Apostol Juanpa nisqantam qatikuwaqchik: “Pipas runamasinta cheqnichkaspan ‘Diostaqa kuyanim’ niqqa llullam. Rikuchkasqan runamasinta mana kuyaspaqa ¿imaynataq mana rikusqan Diostaqa kuyanman?” nispa (1 Juan 4:20, 21). Churikichikkunata iñiqmasinkunata kuyayta yachachispaykichikqa, Diostapas kuyanankupaqmi yachachinkichik. Tapukuychik: “¿Imaynatam rimani congregacionpi kaqkunamanta? ¿Allintachu icha mana allintachu rimachkani?”. Cuentata qokunaykichikpaqqa, uyariychik churikichikkunapa huñunakuymanta chaynataq wawqe-panikunamanta imayna rimasqankuta. Paykunapa rimasqankuchiki qawachisunkichik qamkunapa piensasqaykichikta.

¹⁶ Hinaptinqa, ¿imata ruraspam churikichikkunata yanapankichik iñiqmasinkunata kuyanankupaq? Peter sutiyoq taytam iskay churinmanta nin: “Warmaykuna taqsacharaq kasqankumantam, allin yuyayniyoq wawqe-panikunata wasiykuman mikunankupaq chaynataq kuskayku kusikunaykupaq invitaq kaniku. Churiykuqa yachanku Diosta servispaqa kusisqa kawsakunamanta, chaytam yacharurqaku Jehová Diosta kuyaqkunawan wiñasqankupi” nispa. Dennis sutiyoq taytapas ninmi: “Pichqa warmi churiykutam kallpancharqaniku congregacionpi unay watakunaña precursor kaqkunawan amistadta ruranankupaq, hinaspa atispaykuqa congregacionta watukuq wawqenchikta warmintawan wasiykupi samachiq kaniku” nispa. Qamkunapas tayta-mamakuna, ¿yanapawaqchikchu churikichikkuna congregacionpi kaqkunata familianta hina qawanankupaq? (Marcos 10:29, 30.)

Churipa ruranan

17. Wiñaruspankuqa, ¿imatam churikunaqa sapakama akllakunqaku?

¹⁷ Kaqtawan flechaqwan tupanaykachisqanchikmanta rimasun. Allin flechaq kaspanpas, manam aciertanqachu flechan wiksu kaptinqa. Tayta-mamakunapas, churinkupa piensasqan “mana allin kaptinqa”, kallpanchakunankum correginankupaq wiksu flechapas kanman hina. Imayna kaptinpas, churinkum akllakunqa kay pachapi mana allin kaqkunata qatikuyta otaq Jehová Dios ‘munasqanman hina kawsachinanta’ (Proverbios 3:5, 6; Romanos 12:2).

18. ¿Imaynatam sientikunqaku tayta-mamakuna chaynataq Jehová Diospas churikuna allin kawsanankupaq akllakuptinkuqa?

¹⁸ Tayta-mamakuna churinkunata “Señorninchikpa yachachikuyninman hina” kasukuqta uywananku kaptinpas, kikin churinmi yuyayniyoq kaspanqa imam rurananta akllakunqa (Efesios 6:4). Chaynaqa mozokuna, ¿chaskikunkichikchu kuyakuywan tayta-mamaykichikpa yachachisusqaykichikta? Chaynata ruraspaykichikqa allinta kawsakunaykichikpaqmi akllakuchkankichik. Manam tayta-mamallaykichiktachu kusichinkichikqa aswanqa Jehová Diostam (Proverbios 27:11).

[Willakuy]

¿Yuyarinkichikchu?

• ¿Imaynatam tayta-mamakunaqa churinkuna qatikunankupaq hina kanmanku Biblia estudiaypi chaynataq Diosman mañakuypipas?

• ¿Imatam tayta-mamakunaqa ruranmanku familianpi hawkalla kawsakunankupaq?

• ¿Imatam churikunaqa akllakunanku, hinaspa imaynatam kuyaqninkunaqa sientikunqaku?