56 YACHACHIKUY
Huk sunqulla kanapaq yanapakuy
Iñiqmasinchikkunawan kuska kaspaqa kusisqam tarikunchik. Diosta serviq Davidmi nirqa: “¡Qawaychik, mayna allinmi, mayna sumaqmi wawqi-panintin huk sunqulla kawsakuyqa!”, nispa (Salmos 133:1). Chaynaqa, lliwpas kallpanchakunanchikmi huk sunqulla kanapaq.
1. ¿Imaynataq testigokunaqa kanchik may llaqtapiña kaspapas?
May llaqtamanña rispanchikpas iñiqmasinchikkunawanqa unay riqsinakuchkachwanpas hinam tupaykunchik paykuna hina mana rimayniyuq kaspapas. ¿Imanasqa? Jehova Diosmanta hina chayna qillqakunallawan yachasqanchikraykum chaynataq kuyakuq kasqanchikraykum. May llaqtapiña yachaspanchikpas llapallanchikmi ‘Jehova Diosta sutinmanta qayakunchik’ hinaspa “huk sunqulla” yupaychanchik (Sofonias 3:9).
2. ¿Imaynatataq llapallan iñiqmasinchikkunawan huk sunqulla kawaq?
Bibliam nin: “Sunqumantayá llapallaykichik anchata kuyanakuychik”, nispa (1 Pedro 1:22). ¿Imaynatam sunqumanta kuyawaq? Iñiqmasinchikkunapa allin ruwasqankutam qawanayki, pantasqankuta qawanaykimantaqa. Manam llaqtamasillaykiwanchu nitaq ñuqanchik hina rimaqkunallawanchu rimanayki. Kallpanchakunaykim pi iñiqmasinchiktapas mana hukmanta qawanaykipaq (leey 1 Pedro 2:17).a
3. ¿Imaynatam pi iñiqmasinchikwanpas piñanakuruspaqa allinyanakuwaq?
Pantaq kasqanchikraykum wakinpiqa iñiqmasinchikkunawan imamantapas piñachinakunchik. Chaymi bibliapi niwanchik: “Hinalla pampachanakuychik. Imaynam Jehova Diospas mana amispan pampachaykusunkichik, chaynayá qamkunapas [...] pampachanakuychik”, nispa (leey Colosenses 3:13). Jehova Diosqa sapa kutilla piñachiptinchikpas pampachaykuwanchikmi. Chaymi paypas munan iñiqmasinchikkunata pampachaykunanchikta. Pitapas sientirachispaykiqa chayllam perdonta mañakunayki (leey Mateo 5:23, 24).b
ASTAWAN YACHAYKUSUN
¿Imaynatataq iñiqmasinchikkunawan hawkalla hinaspa huk sunqulla kawsakuchwan? Chaymanta yachaykusunchik.
Piwanpas piñanakuruspaqa, ¿imatam ruwanayki allinyanakunaykipaq?
4. Iñiqmasinchikkunataqa amayá hukmantaqa qawasunchu
Llapallan iñiqmasinchikwanmi may llaqtamantaña kaptinpas kuyakuq kayta munanchik. Wakinpiqa sasam kanman iñiqmasinchikkunata kuyayqa huk llaqtayuq kasqankurayku utaq ñuqanchik hina mana kasqankurayku. Leeychik Hechos 10:34, 35 hinaspa qatiqninmanta rimariychik:
Diosqa chaskinmi may llaqtayuqtapas. Chaynaqa, ¿imanasqataq hukmantaqa mana qawanakunanchikchu?
Qampa llaqtaykipiqa, ¿imakunaraykutaq hukkunata hukmanta qawanku? ¿Imanasqataq qamqa mana paykuna hinachu kanayki?
Leeychik 2 Corintios 6:11-13 hinaspa qatiqninmanta rimariychik:
¿Imatam ruwawaq llapallan iñiqmasinchikkunata astawan riqsispa kuyanaykipaq?
5. Achka kutikamaña pampachanakuspapas hinalla pampachanakusun
Jehova Diosqa sapa kuti pantaptinchikpas hinallam pampachawanchik. Leeychik Salmos 86:5 hinaspa qatiqninmanta rimariychik:
Imapipas pantaruptinchik, ¿imaynataq Jehova Diosqa ñuqanchikwan?
¿Imaynataq sientekunki Jehova Dios pampachaykususqaykiwan?
¿Imakuna kaptintaq sasa kanman iñiqmasinchikwan pampachanakuy?
¿Imanasqataq Jehova Diosta qatipakuspa iñiqmasinchikkunawan pampachanakunanchik? Leeychik Proverbios 19:11 hinaspa qatiqninmanta rimariychik:
Pipas rimasqanwan utaq imapas ruwasqanwan sientirachisuptiki piñakunaykimantaqa, ¿imaynataq kawaq?
Wakinpiqa ñuqanchikmi rimasqanchikwan utaq ruwasqanchikwan pitapas sientirachichwan. Chayna kaptinqa, ¿imaynatam allinyanakuchwan? VIDEOTA qawaykuychik hinaspa qatiqninmanta rimariychik:
Qawasqanchik videopi iñiqmasinchikqa, ¿imaynatam piñanakurusqan ñañanwan allinyanakurqa?
6. Iñiqmasinchikkunaqa allin sunquyuqmi kanku
Iñiqmasinchikkunata astawan riqsispanchikqa imapi pantasqankutapas yachanchikmi, ichaqa pantasqallankuta qawananchikmantaqa allin sunquyuq kasqankutayá qawasun, chaypaq VIDEOTA qawaykuychik hinaspa qatiqninmanta rimariychik:
¿Imataq yanapasunkiman iñiqmasinchikkuna sumaq sunquyuq kasqankumanta cuentata qukunaykipaq?
Jehova Diosqa manam pantasqallanchiktachu qawan. Leeychik 2 Cronicas 16:9a hinaspa qatiqninmanta rimariychik:
Pantasqallanchikta Jehova Dios mana qawamusqanta yachaspayki, ¿imaynataq sientekunki?
Quri anillopas wakinpiqa qachachakurunmanmi, chaywanpas hinallam ancha valorniyuq. Chaynallataqmi iñiqmasinchikkunapas pantaq kaspankupas Jehova Diospaqqa ancha valorniyuq.
WAKIN RUNAKUNAM NINKU: “Ñuqa pampachaykunaypaqqa paychiki puntata perdonta mañakuwanan”, nispanku.
¿Imanasqataq pipas pantaruptinqa pampachaykunanchik?
YUYARIYKUSUN
Iñiqmasinchikkunata pampachaptinchikqa hinaspa kuyaptinchikqa llapallanchikmi huk sunqulla kasunchik.
¿Ima niwaqtaq?
¿Imataq yanapasunkiman pitapas hukmanta mana qawanaykipaq?
Piwanpas piñanakuruspaykiqa ¿imaynatam allinyanakuwaq?
¿Imaynataq qampas Jehova Dios hina pampachakuq kawaq?
ASTAWAN YACHANAYKIPAQ
Jesusmi yachachirqa hukkunapa pantasqanta mana qawanapaq. Chaymanta kay videopi qawaykuy.
¿Pampachaykuwananchikpaqchu ninanchik sientirachisqanchikta mana piensaspapas? Chaymanta kaypi yachaykuy.
Pampachanakuqmi kananchik hinaspaqa hawkam kawsakusun (Willakuq, noviembre 2002)
Wakinkum yacharurqaku hukkunawan kuyakuq kayta huk kastamanta kaspankupas, huk llaqtamanta kaspankupas. Chaymanta kay videopi qawaykuy.
Iñiqmasinchikwan sientirachinakuspa imayna allinyanakunamanta kaypi leeykuy.
“Piñanakuruspaqa kuyakuyllawanyá allichasun” (Willakuq, mayo 2016)
a Qaway kay libropa tukupayninpi 6 willakuyta, chaypim nichkan pipas contagiakuq unquyniyuq kaspanqa iñiqmasinkunawan imayna kananmanta.
b Qaway kay libropa tukupayninpi 7 willakuyta, chaypim niwanchik imamantapas quejanakuy kaptin bibliapa yachachikuynin imayna yanapawasqanchikta.