‘Amayá manchakuychikchu. Ñuqam yanapasqaykichik’

YUYAYMANASUN llumpay tutaña ñanpi purisqanchikta. Hinaspam chaylla musyakurunchik mana riqsisqanchik runa qatimuwasqanchikta. Sayaruptinchikmi paypas sayarun. Apurawman riptinchikpas apurawmanmi qatimuwanchik. Hinaptinmi amistadninchikpa wasin chaychaypi kasqanta yuyariruspa kallpaylla rinchik. Amistadninchik punkunta kichaykamuwaptinchikqa sunqunchikpas hawkayaykunmi.

Yaqapaschá mana haykapipas chaynapiqa tarikurqanchikchu. Ichaqa kanmi huk sasachakuykuna, ichapas mana allin ruwayta saqinanchikpaq kallpanchakuspapas hinalla chayta ruwachkanchik. Utaq unayña mana llamkayniyuq kaspanchikpas sasachakuchkanchik llamkayta tarinapaq. Llakichiwanchikpaschá unqurunanchikmanta hinaspa yuyaqña kananchikmanta piensasqanchikpas. ¿Imapas llakichiwanchikraqchu?

Imaña sasachakuyninchik kaptinpas, allinmi kanman kuyakuq amistadninchikman yanapaykuwananchikpaq willakuyqa. ¿Kanchu chayna amistadninchik? Arí, kanmi. Abrahampa amistadnin hinam Jehova Diosqa ñuqanchikpapas amistadninchik Isaias 41:8-13 nisqanman hina. 10 versiculopim Jehova Diosqa sapakamata niwanchik: ‘Amayá manchakuychikchu. Ñuqam qankunawan kachkani. Amayá hukmanyaychikchu. Ñuqam Diosnikichik kani. Kallpanchaspaymi yanapasqaykichik. Churinta alliq makinwan hapichkaq runa hinam allinta ruwaspa atiyniywan pusasqaykichik’, nispa. 13 versiculoñataqmi nin: ‘Ñuqa tayta Diosmi alliq makikichikmanta hapiqnikichik kani. “Ama manchakuychikchu, ñuqam yanapasqaykichik” niqnikichikmi kani’, nispa.

Jehova Diospa nisqankunaqa anchatam kallpanchawanchik. Yuyaymanasun Jehova Diospa ima niwasqanchikpi. Bibliaqa manam ninchu Jehova Diospa makinta hapispanchik waqtanta purisqanchikmantaqa, chaynata puriptinchikqa Jehova Diospa alliq makinmi ichuq makinchikta hapinman. Ichaqa Jehova Diosmi ‘alliq makinwan hapichkaq’ hina ‘alliq makinchikta’ hapichkan imapas sasachakuymanta hurquwananchikpaq. Alliq makinchikmanta Jehova Dios hapiwaspanchikqa, kaynatam kallpanchawanchik: ‘Amayá manchakuychikchu. Ñuqam yanapasqaykichik’, nispa.

¿Kuyakuq taytatawan amistadta hinachu Jehova Diosta qawanchik? ¿Iñinchikchu imapas sasachakuypi tarikuptinchik yanapaykuwananchikmanta? Payqa ñuqanchikmanta nanachikuspanmi yanapawanchik. Sasachakuypi tarikuptinchikqa, hawkalla tarikunanchiktam munan. ¿Imanasqa? Anchata kuyawasqanchikraykum. Bibliam nin: “Diosmi sasachakuykunapi chaylla yanapawaqninchikqa”, nispa (Sal 46:1).

Wakin iñiqmasinchikkunaqa ñawpaqpi huchallikusqankuta yuyarispankum iskayrayanku Jehova Dios pampachasqanmanta. Chayna tarikuspanchikqa yuyaymanasun Diosman sunqu Job sutiyuq runapi. Paymi mozo kaspan mana allin ruwasqanmanta willakurqa (Job 13:26). Davidpas riqsikurqam mozollaraq kachkaspan huchallikusqanmanta. Chaymi Jehova Diosta mañakurqa huchankunamanta manaña yuyarinanpaq (Sal. 25:7). Pantaq runakuna kasqanchikraykum, llapallanchik ‘huchallikurunchik hinaspam Diospa kanchayninta mana haypanchikchu’ (Rom. 3:23).

Isaias qillqapa 41 capitulonpi nisqanqa, qillqasqam karqa Israel runakunapaq. Llumpayta huchallikurusqankuraykum Jehova Diosqa nirqa Babilonia nacionman presota hina apanankupaq (Is. 39:6,7). Diosqa nirqataqmi sunqumanta wanakuspanku payman kutirikuqkunata librananmanta (Is. 41:8, 9; 49:8). Jehova Diosqa kuyakuynintawan llakipayakuynintam kunanpas qawachin sunqumanta wanakuspanku payta yupaychaqkunamanqa (Sal. 51:1).

Kunanñataq yachasun Takuyaa sutiyuq iñiqmasinchikmanta. Payqa qalalla kaqkunata qawayman hinaspa qari kayninwan millakuypaq ruwaymanmi qukururqa. Chay ruwayta saqinanpaq kallpanchakuspanpas sapa kutim wichiykuq. Paymi nin mana imapaq valeq hina tarikusqanmanta. Ichaqa Jehova Diosta pampachaykunanpaq mañakuspanmi musyakurqa yanapasqanta. ¿Imaynatam Diosqa yanaparqa? Iñiqkunapi punta apaqkunawanmi. Paykunam Takuya iñiqmasinchikta nirqaku chay ruwayman kaqmanta wichiykuspanqa telefonowan qayananpaq. Paymi nin paykunata qayayqa llumpay sasa kasqanta, ichaqa qayaykuspanmi allin tarikuq. Huk kutipim, llaqtan-llaqtan watukuq iñiqmasinchikta iñiqkunapi punta apaqkuna nirqaku Takuya iñiqmasinchikta watukuspa kallpanchaykunanpaq. Chay iñiqmasinchikmi watukuspan nirqa mana kikillanmanta risqanta, aswanqa iñiqkunapi punta apaqkuna watukunanpaq tantearusqankumantam nirqa. Takuya iñiqmasinchikmi nirqa huchallikuchkaptinpas Jehova Diosqa iñiqkunapi punta apaqkunawan yanapasqanmanta. Chaymantam mana allin ruwasqankunata saqiruspan precursorña karqa. Kunanqa betel wasipiñam llamkachkan. Paytaqa Jehova Diosmi yanapaykurqa, payta hinam ñuqanchiktapas yanapawasun.

Wakinkuqa llamkayninkumanta qarqurachikuspankum hinaspa huk llamkayta mana tarispankum llumpay llakisqa kachkanku. Llamkayta mana tarispankum wakinkuqa mana valeqpaq hinaña hapikunku. Ñuqanchikpas kaynapi tarikuptinchikqa, ¿imaynatam Jehova Diosqa yanapawachwan? Manapaschá chayllaqa llamkayta quwasunchu, ichaqa Davidpa nisqantam yuyarichiwasun: ‘Ñawpaq warma kaspaypas, kunan yuyaq kaspaypas allin runataqa manam qunqarusqataqa rikurqanichu. Wawa-churintapas manam limosnakuqtaqa rikurqanichu’, nispa (Sal. 37:25). Diospaqqa ancha chaninniyuqmi kanchik. Payqa ‘alliq makinwan hapichkaq’ hinam yanapawasun hinalla yupaychananchikpaq.

Colombia nacionpi Sara sutiyuq iñiqmasinchikmi Jehova Diospa imayna yanapasqanta qawarqa. Payqa sapa punchawmi llamkarqa hinaspam achka qullqita chaskirqa. Ichaqa Diosmantam astawan willakuyta munarqa. Chaynapim llamkayninta saqiruspan precursoraña karqa. Ichaqa manam tarirqachu huk llamkaytaqa, chaymi heladota rantikunapaq tiendata kicharurqa. Qullqin pisiruptinmi chay tiendantapas wichqarurqa. Ichaqa paymi nin kimsa wata Jehova Dios yanapasqanmanta. Chaypim yacharurqa kapuqllanwan kawsayta hinaspa hamuq punchawkunamanta mana llumpayta llakikuytapas (Mat. 6:33, 34). Tiempopa risqanman hinam, ñawpaq llamkayninmanta qayaramurqa kaqmanta chaypi llamkananpaq. Ichaqa paymi nirqa iskay-kimsa punchawlla chaypi llamkananpaq utaq lliw huñunakuykunaman rinanpaq saqiptillam chay llamkayman rinanpaq. Chaynata niptinpas chaskiykurqam. Ñawpaqta hina manaña qullqita chaskispanpas, hinallam precursora kachkan. Paymi nin sasachakuypi tarikuptin kuyakuywan Jehova Dios hurqusqanmanta.

Achkam llakikunku yuyaqña kanankumanta hinaspa llamkayninkumanta jubilakunankutaña yachaspanku. Chaymi tapukunku sichu allinlla kawsakunankupaq qullqinku haypananmanta. Llakikunkutaqmi hamuq punchawkunapi unqurunankumantapas. Yaqachusmi Davidqa kaynata Diosta mañakurqa: ‘Ñuqallay machuyaruptiyqa amayá wischurullawaychu. Kallpallay tukuruptinqa amayá saqirullawaychu’, nispa (Sal. 71:9, 18).

¿Imataq yuyaqkunata yanapanman mana llumpayta llakikunankupaq? Imapas pisipuqninkuta Dios qunanmanta mana iskayrayaymi, chaypaqmi Diospi iñiyninkuta astawan kallpanchananku. Wakinkuqa achka qullqichanku kaptinmi kapuqniyuq karqaku. Kunanmi ichaqa yachananku mana tukuy imayuq kaspankupas kusisqa kawsakuyta. Wakinpiqa ichapas musyakunqaku wira aycha mikuruymantaqa ‘yuyu mikuy’ aswan allin kasqanta (Prov. 15:17). Jehova Dios yupaychayta puntapi churaptinchikqa, paymi ima necesitasqanchiktapas quwasunchik yuyaqña kaptinchikpas.

Yuyaymanasun Joseywan Rosa casarasqa iñiqmasinchikpi, paykunaqa 65 masnin watañam tukuy tiemponkuwan Jehova Diosta yupaychachkanku. Chay watakunapiqa achka sasachakuykunapim tarikurqaku. Warmichan Rosapa taytan unquruptinmi tuta-punchaw qawana karqa. Chaymantapas kikin Joseymi cancerwan unqusqanrayku hampichikunan karqa. ¿Imaynatam Jehova Diosqa paykunata yanaparqa? Tony hinaspa Wendy sutiyuq iñiqmasinchikkunawanmi. Paykunapa wasinkupim huk cuartochanku karqa tukuy tiemponkuwan Diosmanta willakuqkunaman qunankupaq. Tony iñiqmasinchikmi yuyarirqa colegiopi estudiachkaspallanraq wasinpa ventananta qawaspan Joseytawan Rosata sapa kuti qawaq Diosmanta kusisqallaña willakuqta, chayta qawasqanmi anchata admirachirqa. Joseywan Rosa achka watakunaña Diosmanta willakusqankuta qawaspankum Tonywan Wendyqa cuartochankuta qurqaku. Paykunaqa 15 watañam yanaparunku Joseytawan Rosata, paykunaqa 85 watanpiñam kachkanku. Joseywan Rosaqa Tonytawan Wendytam Jehova Diospa regalonta hina qawanku.

Jehova Diosmi niwanchik: ‘Amayá manchakuychikchu. Ñuqam yanapasqaykichik’, nispa. Niwanchiktaqmi ‘alliq makinta’ haywawaspanchik yanapawananchikmanta. ¿Ñuqanchikpas haywasunchu makinchikta yanapawananchikpaq?