Jesucristomanta willakuykuna

JUDIOKUNAQA Isaiaspa chaynataq huk willakuqkunapa qellqasqankutaqa reqsirqakum, chaymi Jesuspa tiemponpi judiokunaqa Jesucristo hamunanta suyachkarqaku (Lucas 3:15). Chay willakuykunaqa qawachirqam Jesucristopa vidanpi imakuna pasananmanta, chaykunataqa manamá runakunallaqa yachanmankuchu karqa. Qawasunchik wakin ejemplokunata.

Cristo nacenanmanta. Isaiasqa willarqañam doncella sipasmanta Cristo nacenanta. Jesus nacenanmanta rimaruspanmi apostol Mateo kaynata qellqarqa: “Tukuy kaykunam pasakurqa Diosmanta willakuqpa kayna nisqan cumplikunanpaq: ‘Doncellam wiksayakuruspan wachakunqa qari wawata’”, nispa (Mateo 1:22, 23; Isaias 7:14). Isaiasqa nirqataqmi Davidpa mirayninmanta Cristo rikurimunanta. Nisqanman hinam Davidpa mirayninmanta rikurimurqa (Mateo 1:6, 16; Lucas 3:23, 31, 32). Chaymi Maria manaraq wachakuchkaptin Gabriel sutiyoq angel Jesusmanta kaynata nirqa: “Diospunim rey kananpaq churanqa ñawpaq abuelon Davidta hina”, nispa (Lucas 1:32, 33; Isaias 11:1-5, 10; Romanos 15:12).

Vidanmanta. Nazaret llaqtapa huñunakunanku wasipi kachkaspanmi Jesusqa Isaiaspa kayna qellqasqanta leerqa: “Diospa Espiritunmi ñoqapi kachkan. Paymi aceitewan talliwaspan sapaqchawarqa. Wakchakunaman allin noticiata willanaypaqmi sapaqchawarqa”, nispa. Hinaspanmi nirqa: “Uyarisqaykichikpi hinapas kunanmi kay palabrakuna cumplikurun”, nispa (Lucas 4:17-21; Isaias 61:1, 2). Isaiasqa nirqataqmi onqoqkunata llakipayaspan Jesucristo yanapananmanta. Chayna kasqanmantam Mateo kaynata nirqa: “achkallaña runakuna qatiptinmi sanoyachirqa lliw onqoqkunata. Paykunatam nirqa: ‘Amam pimanpas willakunkichikchu pim kasqaytaqa’ nispa. Chaynataqa nirqa Diosmanta willakuq Isaiaspa nisqan cumplikunanpaqmi. Paywanmi Dios kaynata nichirqa: [. . .] ‘Manam peleanqachu. Manam qaparinqachu. [. . .] manam pakinqachu qewisqa soqosllatapas’”, nispa (Mateo 8:16, 17; 12:10-21; Isaias 42:1-4; 53:4, 5).

Ñakarisqanmanta. Isaiasqa nirqataqmi yaqa llapallan judiokuna Jesucristota mana chaskispankupas ‘mitkana rumita hina’ qawanankumanta (1 Pedro 2:6-8; Isaias 8:14, 15). Nisqanman hinam karqa. Achka milagrokunata Jesus rurachkaptinpas judiokunaqa “manam paypi iñirqakuchu. Chaynapim cumplikurqa Diosmanta willakuq Isaiaspa nisqan. Paymi nirqa: Señorlláy, willakusqaykutaqa creerqa ¿pitaqsi?”, nispa (Juan 12:37, 38; Isaias 53:1). Jesuspi mana iñispankupas Judiokunaqa piensarqakum Roma nacionpa munaychakuyninmanta Cristo librananta hinaspa Davidpa kamachisqanman hina payña kamachinanta. Jesus llumpayta ñakarispa wañukuptinmi yaqa llapan runakuna Cristo kasqanta mana creerqakuchu, Isaias libro chayna kananmanta willakuchkaptinpas.

Isaiasqa Cristo kayna rimananmantam nirqaña: “Wasaytam qorqani azoteqkunaman [. . .]. Manam uyayta asurichirqanichu toqawaqniykunamanta”, nispa. Chaynatam Jesusta rurarqaku jusgaspanku. Chayna kasqanmantam Mateo willakurqa: ‘Jesuspa uyanman toqaspankum takarqaku, wakinñataqmi uyanpi laqechurqaku’, nispa (Isaias 50:6; Mateo 26:67). Isaiasqa kaytapas nirqam: “Ñakarichispa humillachiptinkum mana rimarirqachu”, nispa. Judiokuna Jesusta acusasqanmanta Pilato tapuptinmi payqa ‘mana imatapas nirqachu’ chaymi Pilato llumpayta admirakurqa (Isaias 53:7; Mateo 27:12-14; Hechos 8:28, 32-35).

Wañusqanmanta. Jesuspa wañukusqan hinaspa wañukusqanpa qepanta imakuna sucedesqanpas Isaiaspa nisqanman hinam karqa. Paymi nirqa: “Mana allin ruraq runakunapa sepulturanpim pampasqa kanan karqa [. . .] apukunapa sepulturanpim pampasqa karqa”, nispa (Isaias 53:9). ¿Imaynatam chayna nisqan cumplikurqa? Jesusqa iskay suwakunapa chawpinpim qerupi warkusqa wañurqa (Mateo 27:38, NM). Chaymantam Arimatea llaqtayoq Josey sutiyoq apu runa kikinpaq toqochisqan mosoq sepulturanpi pamparqa (Mateo 27:57-60). Jesuspa wañukunanmanta Isaiaspa willakusqanpa cumplikusqanmi aswan admirakuypaq karqa. Cristomanta willakusqanpim Isaias nirqa: “Tayta Diospa serviqninmi allinta ruranqa, achkallaña reqsiqninkunatam mana huchayoqpaqña chaskisqata ruranqa. Paykunapa mana allin rurasqantam qepichkaq hina qechunqa”, nispa. Wañuyninwanmi Jesusqa huchamanta librawarqanchik (Isaias 53:8, 11; Romanos 4:25).

Wakin willakuykuna hamuq tiempopi cumplikunanmanta

Jesusqa Cristo kasqanta qawachinanpaqmi apostolninkunawan Isaiaspa qellqasqanmanta astawan rimarqaku. Chayna kaptinpas, hamuq tiempomanta willakuykunaqa sapaq librokunapipas kachkanmi. Hebreo rimaypi Bibliapa wakin libronkunapipas Jesusmanta, Gobiernonmanta hinaspa chay gobiernonpi achka bendicionkuna kananmantam willakuykuna kachkana (Hechos 28:23; Apocalipsis 19:10). ¿Segurochu kachwan cumplikunanmanta? Kikin Jesusmi uyariqnin judiokunaman nirqa: “Manam ñoqaqa hamurqani Moisespa qellqasqan Iey chinkachinaypaqchu nitaq Diosmanta willakuqkunapa yachachisqankunata chinkachinaypaqchu aswanqa cumplinaypaqmi. Cheqaptapunim nikichik: Cielowan kay pacha kanankamaqa Ieypaqa huk letrachallanpas nitaq huk puntochallanpas manam qechusqachu kanqa lliw cumplikunankama”, nispa (Mateo 5:17, 18).

Nirqataqmi paypa tiemponpi hinaspa wañukusqanmanta qepa tiempokunapi sapaq willakuykuna cumplikunanmantapas (Daniel 9:27; Mateo 15:7-9; 24:15). Chaynataqmi Jesuswan discipulonkunapas willakurqaku kay tiempokunapi imakunapas pasananmanta, chay nisqanman hinam cumplikuchkan. Qatiqninpim yachasunchik kunan tiemponchikpaq kaq willakuykuna cumplikusqanmanta chaynataq hamuq tiempopi cumplikunanmantapas.

[Willakuy]

[4 kaq paginapi dibujo]

“Doncellam [. . .] wachakunqa qari wawata”

[5 kaq paginapi dibujo]

“Manam uyayta asurichir- qanichu insultawaqniy- kunamanta”