Diospa Serviqnin huchanchikrayku wañusqanmanta

“Aswanqa tuksipasqam karqa mana kasukusqanchikkunarayku. Aswanqa qoyuy-qoyuymi karqa mana allinkuna rurasqanchikrayku. [. . .] Sanoyasqa kananchikpaqmi heridasqa karqa.” (ISA. 53:5.)

 1. ¿Imatam yuyarichiwanchik Jesuspa wañukusqanta Yuyarinapaq huñunakuy, hinaspa ima willakuytaq chaypaq yanapawasun?

SAPA watam Jesucristopa wañukusqanta Yuyarinapaq huñunakuyqa, yanapawanchik paypa wañukusqan hinaspa kawsarimusqan imapaq allin kasqanpi yuyaymanananchikpaq. Kay huñunakuymi yuyarichiwanchik Jehová Diospa llapallan kamachiq kasqan hatunchasqa kananmanta, sutin chuyanchasqa kananmanta, munaynin rurasqa kananmanta hinaspa runakuna salvakunankumantapas. Yaqapas Isaias 53:3-12 versiculokunapi willakusqan huk textokunamantaqa allinta qawachiwanchik, Jesuspa ñoqanchikrayku wañunanmanta hinaspa wañukusqan allinninchikpaq kasqanmantapas. Isaiasmi ñawpaqmantaraq willakurqa Diospa Serviqnin ñakarinanmanta hinaspa wañukunanpaq imakuna pasananmantapas. Chaymantapas willarqam wañukusqanrayku, hanaq pachaman riy suyaqkuna hinaspa ‘sapaq ovejakunapas’ otaq kay Pachapi kawsakuy suyaqkunapas imayna yanapasqa kanankumanta (Juan 10:16).

 2. ¿Imatam Isaiaspa willakusqan qawachin, hinaspa imaynatam ñoqanchikta yanapawasun?

² Jesus manaraq nacechkaptin yaqa 700 wata ñawpaqtaraqmi, Jehová Diosqa Isaiaswan qellqachirqa Serviqnin ima sasachakuypi kaspanpas mana huchallikunanmanta. Chaynatam qawachirqa Churin payman sonqo kananpi ancha confiasqanta. Chay willakuymanta yachayninchikmi yanapawasun iñiyninchik hinaspa Dios kuyayninchik allinpuni kananpaq.

‘Despreciasqa’ hinaspa ‘mana kaqpaqpas hapisqa’

 3. a) ¿Imanasqam judiokunaqa Jesusta allinta chaskinanku karqa? b) ¿Imaynatam chaskirqaku?

³ (Leey Isaias 53:3.) Jesuspaqqa sasachá karqa kay Pachaman hamunanpaq kuyasqan Taytanta saqeyqa, chaynataq runakunata huchamanta hinaspa wañuymanta salvananpaq vidanta qoypas (Fili. 2:5-8, NM). Vidanta qosqanqa ancha valorniyoqmi karqa Moisespa Leyninman hina animalkuna qosqankumantaqa, wañukusqanwanmi huchataqa wiñaypaq pampachan (Heb. 10:1-4). Chaymi, chay tiempopi runakunaqa chaskiyllapas-chaskinmanku karqa. Chaytam judiokunaqa rurananku karqa, Mesias hamunanta suyasqankurayku (Juan 6:14). Ichaqa ‘despreciarqakum’, hinaspam Isaiaspa willakusqanman hina ‘mana kaqpaqpas hapirqakuchu’. Apostol Juanmi kaynata qellqarqa: “[Jesusmi] hamurqa kikinpa kaqman, castamasinkunañataqmi mana chaskirqachu”, nispa (Juan 1:11). Apostol Pedropas judiokunatam kaynata nirqa: ‘Ñawpaq abuelonchikkunapa [. . .] Diosninmi hatuncharqa serviqnin Jesusta. Paytam autoridadkunaman qoykurqankichik, prefecto Pilato librayta munaptinpas harkakurqankichikmi. Jesus mana huchayoq justo kachkaptinpas’, nispa (Hech. 3:13, 14).

 4. ¿Imanasqataq Bibliaqa nin Jesusqa nanayllapi kasqanmanta otaq onqoyta reqsisqanmanta?

⁴ Isaiasqa willarqataqmi Jesuspa ‘nanayllapi [. . .] kananmanta’ otaq onqoyta reqsinanmanta. Arí, Bibliaqa willawanchikmi Jesusqa wakinpi pisipasqanmanta, ichaqa manam haykapipas onqorqachu (Juan 4:6). Hinaptinqa, ¿imanasqataq Bibliaqa nin nanayllapi kasqanmanta otaq onqoyta reqsisqanmanta? Chaynataqa nin predicaspan onqoqkunawan tupasqanraykum, chaymi llakipayaspan achka runakunata hampirqa (Mar. 1:32-34). Chayna rurasqanwanmi Bibliapa kayna nisqanta cumplirqa: ‘Cheqaptapunipas ñakariyninchikkunawanmi [otaq onqoyninchikkunawanmi] ñakarirqa’ (Isa. 53:4a; Mat. 8:16, 17).

‘Diospuni castigachkanmanpas’ hina

 5. ¿Imatam judiokuna piensarqaku imanasqa Jesus wañusqanmanta, hinaspa imanasqam chayqa astawan ñakarichirqa?

⁵ (Leey Isaias 53:4b.) Chay tiempopi runakunamantaqa asllam entienderqaku Jesuspa imanasqa ñakarisqanmantawan wañusqanmantaqa. Yaqa llapallankum piensarqaku Diospuni castigasqanta otaq llumpayta ñakarichisqanta (Mat. 27:38-44). Judiokunaqa acusarqakutaqmi, Diostam kamin hinaspa piñachinmi nispanku (Mar. 14:61-64; Juan 10:33). Jesusqa manam imapipas huchallikurqachu. Ichaqa Taytanta kuyasqanraykum, yanqamanta acusasqa kaspa hatun huchata ruraq hina wañunanpi piensasqan astawan ñakarichinman karqa. Imaña pasaptinpas, payqa Taytanpa munaynin ruraytam munarqa (Mat. 26:39).

6, 7. ¿Ima ninantaq Jesucristopa qoyuy-qoyuy kasqan, hinaspa imanasqataq Bibliaqa nin chayna kasqanwan Dios kusikusqanta otaq munasqanta?

⁶ Jesusta “Diospuni castigasqanta” runakuna piensanankumanta Isaias willaspanpas, kaynatawanmi nirqa: “Tayta Diospa munasqanman hinam qoyuy-qoyuy karqa”, nispa (Isa. 53:10). Ichaqa Jehová Diosqa Churinmantam nirqa: “Kayqa ñoqapa serviqniymi [. . .]. Paytam ñoqaqa akllakurqani. Payraykum kusisqa kachkani”, nispa. Chaynata nichkaspanqa, ¿imanasqataq munarqa otaq kusikurqa churinpa qoyuy-qoyuy kasqanwan? (Isa. 42:1.) ¿Ima ninantaq chayna nisqanqa?

⁷ Kay profeciamanta entiendenapaqqa kaytam yuyarinanchik, Jehová Diospa llapallan kamachiq kasqanta Satanas iskayrayachispanqa, hanaq pachapi hinaspa kay Pachapi serviqninkunamantapas nichkarqam manam kasusunkichu nispa (Job 1:9-11; 2:3-5). Wañunankama Diosman sonqo kaspanmi Jesusqa qawachirqa Satanas llulla kasqanta. Enemigonkunapa makinpi Jesucristo qoyuy-qoyuy kananta otaq wañunanta saqespan Jehová Dios anchata llakikuspanpas, kusikurqam Churinpa tukuy sonqonmanta kasukusqanwan (Pro. 27:11). Kusikurqataqmi, huchankumanta wanakuq runakunapaq Churinpa wañukusqan allinninkupaq kasqanta yachaspanpas (Luc. 15:7).

‘Tuksisqam karqa mana kasukusqanchikrayku’

8, 9. a) ¿Ima ninantaq Jesusqa ‘tuksisqam karqa mana kasukusqanchikrayku’ nisqanqa? b) ¿Imaynatam chayna kasqanmanta apostol Pedropas nirqa?

⁸ (Leey Isaias 53:6.) Adan huchallikusqanraykum yaqa chinkasqa ovejakuna hina runakunaqa onqoymanta hinaspa wañuymanta librasqa kayta munaspa purirqanchik (1 Ped. 2:25). Pantaq runakuna kaspanchikmi, mayqanninchikpas mana atichwanchu Adanpa chinkarachisqanta kaqmanta tariytaqa (Sal. 49:7). Ichaqa, Jehová Dios anchata kuyawaspanchikmi kuyasqan Churinman otaq akllasqan Serviqninman ‘llapallanchikpa mana allinkuna rurasqanchikta qepiykachirqa’. Jesucristoqa ‘tuksisqam karqa mana kasukusqanchikrayku’ hinaspa qoyuy-qoyuymi otaq wañuchisqam karqa mana allinkuna rurasqanchikrayku, chaynatam ñoqanchikrayku wañurqa hinaspa huchanchikta qepirqa.

⁹ Apostol Pedrom kaynata qellqarqa: “Chaypaqmi Diosqa qayasurqankichik, Cristopas ñoqanchikraykum ñakarirqa chaynapi paypa ejemplonta qatinanchikpaq. Cristom chakatasqa [“warkusqa”, NM] kaspan aparqa cuerponpi tukuy huchanchikkunata chaynapi huchanchikkunamanta wanakuspa allinña kawsananchikpaq”, nispa. Chaymantapas Isaiaspa willasqanman hinam nirqa: “Sanoyachisqa kanaykichikpaqmi heridasqa karqa”, nispa (1 Ped. 2:21, 24; Isa. 53:5). Chaynapim Pedropa nisqanman hina huchallikuq runakunaqa Diosman asuykunmanku. Paymi nirqa: “Cristopas chulla kutillatam ñakarirqa ñoqanchikpa huchanchikmanta. Payqa karqa mana huchayoqmi ichaqa mana allin runakunata Diosman pusawananchikpaqmi ñakarirqa”, nispa (1 Ped. 3:18).

‘Nakanankupaq carnerota hinam pusarqaku’

10. a) ¿Imawanmi Jesusta suticharqa Bautizaq Juan? b) ¿Imanasqataq chayna sutichasqanqa allin karqa?

¹⁰ (Leey Isaias 53:7, 8.) Jesusta hamuchkaqta rikuruspanmi Bautizaq Juan kaynata nirqa: “Qawaychik, paymi Diosmanta Hamuq Carneroqa, wañuspanmi runakunapa huchanta pampachanqa”, nispa (Juan 1:29). ‘Carneromanta’ Juan rimaspanqa yuyarirqachá: ‘Nakanankupaq carnerota hinam pusarqaku’ nispa Isaiaspa nisqanta (Isa. 53:7). Chaymantapas, Jesusmantam Isaias nirqa ‘vidanta wañunankama qonanmanta’ otaq yawarninta chaqchunanmanta (Isa. 53:12). Arí, wañukunan punchawta Yuyarinankupaq qallarichispanmi, Jesusqa 11 apostolninkunaman vasopi vinota qoykuspan nirqa: “Kaymi contrato rurasqaypa yawarniy. Chaqchusqam kanqa achka runakunapa huchankunata pampachanaypaq”, nispa (Mat. 26:28).

11, 12. a) ¿Imatam qawachiwanchik Isaacpa wañuy munasqan Jesucristopa vidan qosqanmanta? b) Jesuspa wañukusqanta Yuyarinapaq huñunakuyman rispa, ¿imatam Jehová Diosmanta yuyarinanchik?

¹¹ Abrahampa churin Isaac hinam Jesuspas Jehová Diosman vidanta ofrendata hina qoyta munarqa (Gen. 22:1, 2, 9-13; Heb. 10:5-10). Ichaqa, vidanta Isaac qoyta munaptinpas, Abrahanmi sapallan churintaqa ofrecerqa (Heb. 11:17). Chaynallataqmi, vidanta Jesus qoyta munaptinpas Jehová Diosmi paytaqa qomurqa runakunarayku wañunanpaq. Chaynaqa, Jesuspa vidanta qosqanqa allintam qawachin runakunata Dios ancha kuyasqanta.

¹² Kikin Jesusmi kaynata nirqa: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq”, nispa (Juan 3:16). Apostol Pablopas kaynatam qellqarqa: “Diosmi kuyawasqanchikta qawachiwarqanchik huchasaparaq kachkaptinchikpas Cristo wañupuwasqanchikwan”, nispa (Rom. 5:8). Jesuspa wañukusqanta yuyarispa payta respetasqanchikta qawachispanchikpas, manam kayta qonqanachu: vidanta qonanpaqqa Jehová Diosmi kamachirqa. Jehová Diosta yupaychanapaqmi rinchik Jesuspa wañukusqanta Yuyarinapaq huñunakuymanqa.

Diospa Serviqninqa achka runakunatam ‘mana huchayoqpaqña chaskichin’

13, 14. ¿Imaynatam Jehová Diospa Serviqninqa achkallaña runakunata ‘mana huchayoqpaqña chaskichin’?

¹³ (Leey Isaias 53:11, 12.) Jehová Diosmi akllasqan Serviqninmanta kaynata nirqa: “Achkallaña reqsiqninkunatam mana huchayoqpaqña chaskisqata ruranqa”, nispa. ¿Ima ninantaq chayqa? 12 versiculopa tukuyninpim kaynata nin: “Mana kasukuqkunapa favorninpim mañakurqa”, nispa. Adanpa llapallan mirayninqa huchallikuqmi kanchik, chaymi ‘huchallikuypa pagonta’ chaskinchik: chayqa wañuymi (Rom. 5:12; 6:23). Chayraykum Jehová Dioswan allinyananchik. Isaias libropa 53 capitulonpim allinta willawanchik huchallikuq runakunapa favorninpi Jesus churakusqanmanta. Ninmi: “Hawkayaypi kananchikpaqmi castigasqa karqa. Sanoyasqa kananchikpaqmi heridasqa karqa”, nispa (Isa. 53:5).

¹⁴ Ñoqanchikpa rantinchikpi wañuspanmi Jesusqa achkallaña runakunata ‘mana huchayoqpaqña chaskichin’. Apostol Pablom kaynata qellqarqa: “Dios Taytamá munarqa paypi tukuy ima tarikuq Cristopi kananta. Diosmi allinyanakuyta munarqa kay pachapi kaqkunawanpas chaynataq hanaq pachapi kaqkunawanpas Cristopa cruzpi [“qerupi”, NM] wañusqallanwan hawkayayman yaykuspa”, nispa (Col. 1:19, 20).

15. a) Pablopa nisqanman hina, ¿pikunataq kanku ‘hanaq pachapi kaqkunaqa’? b) Jesuspa wañukusqanta Yuyariptinchik, ¿pikunallataq tantata mikunmanku chaynataq vinotapas tomanmanku hinaspa imanasqa?

¹⁵ Jesuspa yawarninrayku Jehová Dioswan allinyaq ‘hanaq pachapi kaqkunaqa’ ungidokunam kanku, paykunam Jesucristowan kuska hanaq pachamanta kamachimunqaku. Paykunatam Jehová Diosqa “mana huchayoqpaqña chaskin” (Rom. 5:1, 18; Heb. 3:1). Chaymi Jehová Diosqa chaskin churinkunaña kanankupaq. Paykunataqa Diospa espiritunmi sonqonkupi willan akllasqa kasqankuta, chaynapi ‘Jesucristowan kuska’ reykuna hina chaynataq sacerdotekuna hina hanaq pachamanta kamachimunankupaq (Rom. 8:15-17; Apo. 5:9, 10). Paykunaqa ‘Diospa cheqap akllasqankunam’, chaymi paykunaqa ‘mosoq contratopi’ kachkanku (Gal. 6:16; Jer. 31:31-34). Mosoq contratota paykunawan rurakusqanraykum, Jesuspa wañukusqanta Yuyarinapaq huñunakuypi tantata mikunku hinaspa vinotapas tomanku, kaymantam Jesus nirqa: “Kay vinoqa yawarniywan rurasqa mosoq contratom. Yawarniyqa qamkunarayku chaqchusqam”, nispa (Luc. 22:20).

16. a) ¿Pikunataq kanku ‘kay pachapi kaqkunaqa’? b) ¿Imanasqataq paykunatapas Jehová Diosqa chaskin mana huchayoqpaqña?

¹⁶ ‘Kay pachapi kaqkunaqa’ kanku Jesucristopa sapaq ovejankunam otaq kay Pacha paraiso kaptin wiñaypaq kawsakuy suyaqkunam. Jesusmi paykunatapas mana huchayoqtaña Jehová Dioswan chaskichin. Chaymi Jesuspa wañukusqanpi iñiptinku hinaspa ‘pachankutapas taqsaspa Carneropa yawarninwan yuraqyachiptinku’, Jehová Diosqa churinkunata hina mana chaskispanpas, amistadninkunata hina mana huchayoqpaqña chaskin hinaspam prometen ‘hatu-hatun ñakariy’ kaptin librananpaqpas (Apo. 7:9, 10, 14; Sant. 2:23). Paykunaqa manam mosoq contratopiqa tarikunkuchu otaq hanaq pachaman riytaqa suyankuchu, chaymi Jesuspa wañukusqanta Yuyarinapaq huñunakuyman rispankuqa, tantataqa mana mikunkuchu nitaq vinotapas tomankuchu. Ichaqa chay huñunakuyman rispankum respetasqankuta qawachinku.

Agradecekusun Jehová Diospa chaynataq Serviqninpa rurasqankumanta

17. Isaiaspa willakusqanmanta yachayqa, ¿imaynatam yanaparuwanchik Jesuspa wañukusqanta Yuyarinapaq?

¹⁷ Diospa Serviqninmanta Isaiaspa willakusqanta yachayqa, yanapawasunmi Jesuspa wañukusqanta Yuyarinapaq huñunakuypi piensanapaq. Yanapawanchiktaqmi ‘iñichiwaqninchik hinaspa qespichiwaqninchik Jesusmanta’ allinta yachanapaqpas (Heb. 12:2). Qawarunchikmi Jesus tukuypi kasukuq kasqanmanta. Diospa Churinqa manam Satanas hinachu, payqa Taytanmantam yachayta munan, chaytaqa ruran Llapallan Kamachiq kasqanta respetaspanmi. Diosta servispanmi Jesusqa predicasqan runakunata llakipayarqa hinaspam achka runakunata sanoyachirqa chaynataq Diosmanpas asuykachirqa. Chaynata ruraspanmi qawachirqa hanaq pachamanta kamachimuspan ‘nacionkunapi allin arreglota rurananmanta’ (Isa. 42:4). ‘Nacionkunata kanchaq’ hina sonqonmanta Diospa Gobiernonmanta predicasqanmi, yuyachiwanchik kusikuywan enteron Allpapi predicananchikmanta (Isa. 42:6).

18. ¿Imanasqam tukuy sonqonchikmanta agradecekunchik Isaias libropi willakuykunamanta?

¹⁸ Isaiaspa willakusqanqa yanapawanchiktaqmi, kuyasqan Churinta Jehová Dios ñoqanchikrayku ñakarinanpaq hinaspa wañunanpaq kachamusqanta chaninchanapaqpas. Jehová Diosqa manam Churinpa ñakarisqanwanchu kusikurqa, aswanqa wañukunankama tukuy sonqonmanta kasukusqanwanmi. Ñoqanchikpas Jehová Dios hinam kusikunchik, Satanaspa llulla kasqanta Jesus qawachisqanmanta, Diospa sutinta chuyanchasqanmanta hinaspa Taytanpa llapallan kamachiq kasqanta hatunchasqanmantapas. Chaymantapas, Jesusqa qepichkaq hinam huchanchikkunata aparqa hinaspam ñoqanchikrayku wañurqa. Chayraykum ungidokunatapas chaynataq kay Pachapi kawsakuy suyaqkunatapas Jehová Diosqa mana huchayoqpaqña chaskin. Jesuspa wañukusqanta Yuyarinapaq huñunakuspaqa, ancha agradecesqam tarikusunchik Jehová Diospa chaynataq Serviqninpa rurasqankumanta.

Yuyarinapaq

• ¿Imanasqataq ninchik Jehová Diosqa munarqam otaq kusikurqam churin qoyuy-qoyuy kasqanwan nispa?

• ¿Imaynatam Jesusqa ‘tuksisqa karqa mana kasukusqanchikrayku’?

• ¿Imaynatam Diospa Serviqninqa achkallaña runakunata ‘mana huchayoqpaqña chaskichirqa’?

• Isaiaspa willakusqanmanta yachayqa, ¿imaynatam yanaparuwanchik Jesuspa wañukusqanta Yuyarinapaq?

[26 kaq paginapi dibujo]

‘Despreciasqa’ hinaspa ‘mana kaqpaqpas hapisqam’ karqa

[28 kaq paginapi dibujo]

‘Vidantapas wañunankamam qorqa’

[29 kaq paginapi dibujo]

‘Sapaq ovejakunaqa’ Jesuspa wañukusqanta Yuyarinapaq huñunakuypiqa manam tantata mikunkuchu nitaq vinotapas tomankuchu