Jesucristom kay allpa pachapi Diospa munayninta qispichinqa

1, 2. (1) ¿Imanasqataq wakinpiqa iskayrayanchik allpa pacha musuqyachisqa kananmanta? (2) ¿Imataq yanapawasun kay pacha musuqyachisqa kananmanta mana iskayrayanapaq?

KAYPI piensariy: Huk iñiqmasinchikmi tukuy punchaw llamkasqanmanta pisipasqallaña huñunakuyman chayarun. Payqa llumpay hukmanyasqam tarikun patronnin llumpayta llamkachisqanwan, churinkunata imayna mantienenanpaq kallpanchakusqanwan hinaspa señoranpa unqusqanwan. Ichaqa huñunakuyta qallarinapaq takita uyariptinmi sunqunpas tiyaykunraq. Chay takiqa musuq pachapi imayna kawsakunamantam riman, chaymi payqa chaypiñapas kachkanman hina kusikun. Payqa chay takitam llumpayta kuyan, chaymi warminpiwan churinkunawan kuska takispan llakisqa tarikuspanpas iñiyninpi kallpanchasqa tarikun.

² Yaqa llapanchikmi haykallapipas chayna kallpanchasqa tarikurqanchik. Ichaqa llumpay sasachakuy tiempopi tarikusqanchikraykum wakinpiqa iskayrayanchikraq kay allpa pacha musuqyachisqa kananmanta. Kay tiempoqa manamá imallapipas musuqyachisqa allpa pachamanqa rikchakunchu (2 Tim. 3:1). ¿Imataq yanapawasun kay allpa pacha sumaqyachisqa kananmanta mana iskayrayanapaq? ¿Imaynanpim yachanchik Jesucristoqa enteron allpa pachata kamachimunanmanta? Kaykunamanta yachanapaqmi qawasunchik Diospa prometesqankuna ñawpa watakunapi imayna cumplikusqanmanta, kay tiempopi imayna cumplikusqanmanta hinaspa hamuq tiempopi imayna cumplikunanmantapas.

 3. ¿Diospa ima prometesqantaq judio castakunata iñiyninkupi kallpancharqa?

³ Ñawpa Juda casta runakunam llaqtankumanta Babilonia nacionman apasqa karqaku. Chay llaqtapim Diosman sunqu kaqkunataqa wawa-churinkutawan asipayaspa ñakarichirqaku (Sal. 137:1-3). Ichaqa Jehova Diosmi paykunaman prometerqa llaqtankuman kutispa suma-sumaq musuqyachisqa allpapi kawsakunankupaq, chayna prometesqanman hapipakuspankum paykunaqa unay watakuna sasachakuykunata aguantarqaku (leey Isaias 51:3). Diospa prometesqankunaqa iñiyninkupi mana iskayrayanankupaqmi kallpancharqa. Qatiqninpiyá yachasun chay prometesqankuna imayna cumplikusqanmanta.

 4. ¿Ima nispantaq Jehova Diosqa hawka kanankumanta prometerqa?

⁴ Hawkam kawsakunanku karqa. Juda casta runakunaqa manam musuqyachisqa sumaq allpamanchu kutirqaku, aswanqa qanchis chunka wata monteasqa allpamanmi, chaytaqa manam qipa wiñaykunaqa riqsirqakuchu. Hinaspapas leonkunawan achka manchakuypaq purun animalkunam chay allpapiqa karqa. Ichapas chayrayku churiyuq runakunaqa llakisqa tarikuspanku kaynata piensarqaku: “¿Hawkachu warmiywan churiykuna kanqaku? ¿Purun animalchu uywaykunata mikurunqa?”, nispa. Maynatachá Diospa prometesqanqa paykunata kallpancharqa (leey Isaias 11:6-9). Isaiaswanmi Jehova Diosqa willachirqa Diosman sunqu runakunaqa kikinkupas hinaspa uywankupas hawka kanankumanta. Leonkunapas pasto mikuq hinam uywankutapas mana imanananchu karqa, chaymi mana imatapas manchakunankuchu karqa. Jehova Diosqa yupaychaqninkunamanmi nirqa maypi tarikuspankupas hawka kawsakunankumanta (Ezeq. 34:25).

 5. ¿Imakunatam Jehova Diosqa prometerqa imankupas pisinanmanta mana hukmanyanankupaq?

⁵ Manam imankupas pisinanchu karqa. Babiloniamanta kutiqkunaqa kaynatawanpaschá tapukurqaku: “¿Atisaqchu aylluy manteneyta? ¿Ima wasimantaq chayasaqku? ¿Imapitaq llamkasaq? ¿Babiloniapi kawsakusqaymantaqa aswan allinchu chaypi kawsakusaq?”, nispa. Jehova Diosqa payman sunqu runakunata hawkayachinanpaqmi prometerqa allinta paraptin kawsaykuna achkanpi qispinanpaq (Is. 30:23). ¿Maypitaq yachananku karqa hinaspa imapitaq llamkananku karqa? Jehova Diosmi nirqa: ‘Wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku. Wasikunatam hatarichinqaku ichaqa manam sapaq runakuna yachananpaqñachu. Uvas huertakunatam plantanqaku ichaqa manam sapaq runakuna rurun mikunanpaqñachu’, nispa (Is. 65:21, 22). Babilonia nacionpi kanankumantaqa aswan allinmá kutisqanku allpapiqa kananku karqa. Ichaqa Dios yupaychayninkupim ñawpa watakunapi mana allin tarikurqaku, chaymi Babiloniaman apasqa karqaku qanchis chunka wata chaypi kanankupaq. ¿Imaynatam Diospa favorninta kaqmanta tarirqaku?

 6. (1) ¿Imaynam judio casta runakunaqa Dios yupaychasqankupi tarikurqaku? (2) ¿Imaynatam Jehova Diosqa Jerusalenman kutiqkunata kallpancharqa?

⁶ Dios yupaychasqankupim allinyananku karqa. Manaraq Babiloniaman apasqa kachkaspankum Juda casta runakunaqa Diosmanta karunchasqa tarikurqaku. Chaymi Jehova Diosqa nirqa: ‘Heridayuqmi kachkankichik enteron umaykichikpi. Llapallaykichikmi llakisqa kachkankichik sunquykichikpi’, nispa (Is. 1:5). Paykunaqa Diospa kamachisqankunata mana kasukuspankum hinaspa yachachisqankunata mana qawayta munaspankum upa hina chaynataq ñawsa hinam tarikurqaku (Is. 6:10; Jer. 5:21; Ezeq. 12:2). ¿Yaqachu Jerusalen llaqtankuman kutispa Diosmanta hinalla karunchasqa kaspankuqa hawkalla kawsakunmanku karqa? ¿Manachu Diosqa kaqmanta saqirunman karqa? Ichaqa Diosmi paykunata kaynata kallpancharqa: “Chay tiempopim upakunapas uyarinqaku. Libromanta paykunapaq leepuptinkum uyarinqaku. Chay tiempopim ñawsakunapas qawarikunqaku. Ancha tutayaypi karuspankum qawarikunqaku”, nispa (Is. 29:18). Wanakuspa kasukuptinkuqa kikin Jehova Diosmi yachachispan paykunata yanapanan karqa.

 7. (1) ¿Imaynatam Jehova Diosqa judiokunaman prometesqanta cumplirqa? (2) ¿Imaynatam chaykunapi yuyaymanasqanchikqa kallpanchawanchik?

⁷ ¿Prometesqanman hinachu Jehova Diosqa cumplirqa? Awriki. Llaqtanman kutiq Judea casta runakunaqa kaqmantam hawkayaypi imankupas mana pisisqan hinaspa Dios yupaychayninkupi allin tarikurqaku. Enemigonkunamantam Jehova Diosqa ampararqa, purun animalkunapas manam uywankutapas imanarqachu. Ichaqa wakin prometesqankuna imayna cumplikusqanta qawasqankum paykunataqa kallpancharqa. Llaqtanpaq Jehova Diospa tukuy ima ruwasqankunapi yuyaymanayqa anchatam iñiyninchikpi kallpanchawanchik. Diospa prometesqankuna ñawpa watakunapi imayna cumplikusqanqa mayna sumaqmi karqa, ¡mayna kusikunapaqchá kanqa prometesqankuna hamuq tiempopi imayna cumplikusqanta qawasqanchikqa! Kay tiempopi imayna cumplikusqanmantayá qatiqninpi yachasunchik.

 8. ¿Imaynatam Diospa llaqtanpi kaqkunaqa kay tiempopipas kawsakunku?

⁸ Jehova Diospa llaqtanqa manam huk hawaqllapichu, astawanqa tukuy hinastinmantam kanku. Huk nacionman tupachispanmi bibliapiqa hanaq pachapaq akllasqakunata sutichan “Diospa Israelnin”, nispa (Gal. 6:16). Kay pachapi suyakuyniyuqkunam hanaq pachapaq akllasqakunapiwan kuska, musuqyachisqa allpapipas kachkanmanku hina kuyanakuspa hinaspa huk sunqulla sumaqta kawsakuspanku Jehova Diosta yupaychachkanku (Juan 10:16; Is. 66:8). Kay tiempopi chayna kawsakusqanchikmi qawachin Diospa prometesqankuna imayna cumplikusqanta. Qatiqninpiyá chaykuna imayna cumplikusqanmanta yachasunchik.

9, 10. (1) ¿Imaynatam cumplikuchkan Diospa prometesqanmanta Isaiaspa willakusqan? (2) ¿Imakunam qawachin Diospa llaqtanqa hawka kawsakusqankuta?

⁹ Hawkam kawsakunchik. Bibliapim willawanchik purun animalkunawan uywakunapas hinaspa runakunapas hawka kawsakunankumanta (Is. 11:6-9). 9 kaq versiculopim willawanchik purun animalkuna imanasqa manaña pitapas imananankumanta. Chaypim nin: ‘Imaynam yaku pasaypaqta tapaykun lamar quchata, chaynam enteron kay pachapi runakunapas riqsiwanqaku ñuqa Tayta Diosta’, nispa. ¿Diosta riqsispankuchu purun animalkunapas mana imanakuqña kanmanku? Manam. Kaypiqa rimachkan runakunamantam. ¿Cumplikuchkanchu chay willakuyqa? Arí. Runakunam Diosmanta yachaspanku kay tiempopi llampu sunqu kanankupaq vidankuta cambiachkanku, chaynapim iñiqmasinkunawan kuyanakuspa hawkaña kawsakuchkanku.

¹⁰ Kay qillqapim yachamurqanchik Dios yupaychaqkunaqa bibliapa nisqanman hina mayqan autoridadmanpas imanasqa mana sayapakusqanchikmanta, chayrayku qatikachasqa kasqanchikmantapas. Wañuypa patanpi kaspanchikpas Diospa llaqtanpi kaqkunaqa manam qatipakunchikchu Diosmanta karunchasqa mana allin runakunapa ruwasqankutaqa, chaymi mana chapukunchikchu wañuchinakuykunapipas. Chaykunam qawachin Isaiaspa nisqankuna imayna cumplikusqanta. Jesusmi qatiqninkunamanta nirqa kuyanakuq kasqankuwan riqsichikunankumanta (Juan 13:34, 35). Chaypaqmi Jesucristoqa ‘allin yuyayniyuq confianza sirvienteta’ valekun kuyanakuspa hawka kawsakuyta yachachiwananchikpaq (Mat. 24:45-47).

11, 12. (1) ¿Ima yarqaypim kay tiempopi runakunaqa tarikunku? (2) ¿Imakunatam Jehova Diosqa quwanchik yarqaypi mana kanapaq?

¹¹ Manam yarqaypichu tarikunchik. Diosmanta karunchasqa runakunapa iñiyninmanta rimaspanmi Jehova Diosqa nirqa: “Hamuchkanmi tiempokuna, chay punchawkunapim kay pachapi yachaqkunaman yarqayta apachimusaq. Chayna yarqayqa kanqa manam mikuymanta yarqachikuychu. Yakunayayqa kanqa manam yakumanta yakunayaychu aswanqa nisqaykuna uyariymantam”, nispa (Amos 8:11). Yupaychaqninkunamanta rimaspanñataqmi nirqa: ‘Serviqniykunaqa mikusqam kanqaku. Qamkunañataqmi yarqaymanta kankichik. Serviqniykunaqa yakutam tomanqaku. Qamkunañataqmi yakumanta kankichik. Serviqniykunaqa kusisqam kanqaku. Qamkunañataqmi pinqaypi rikurinkichik’, nispa (Is. 65:13). ¿Cumplikuchkanchu Diospa chayna nisqan?

¹² Kay tiempopiqa hatun mayupi achka yaku hinam Dios yupaychayninchikpi yanapawananchikpaq tukuy imakuna kapuwachkanchik: Qillqakuna, uyarinapaq kaqkuna, videokuna, sapa semana huñunakuyninchikkuna, hatun huñunakuyninchikkuna hinaspa internetpi achka yachachikuykunapas. Tukuy kaykunawanmi Dios yupaychayninchikpi allin saksasqa hina tarikunchik (Ezeq. 47:1-12; Joel 3:18). ¿Kusikunkichu Diospa prometesqanman hina iñiynikipi yanapasunaykipaq tukuy kaykuna chaskisqaykimanta? ¿Kallpanchakuchkankichu kay yanapakuykunata leenaykipaq, uyarinaykipaq hinaspa qawanaykipaq?

13. ¿Imaynatam Jesucristoqa kay tiempopi runakunata yanapachkan?

¹³ Iñiyninchikpim alli-allin tarikunchik. Kay tiempopi runakunam iñiyninkupi upa hina chaynataq ñawsa hina tarikunku (2 Cor. 4:4). Chayna kaptinpas Jesucristom enteron allpapi runakunata yanapachkan. ¿Imaynata? Diosmanta imam kaqta yachachispam. Chaynapim paykunaqa pantay religionkunapa yachachisqankunata qipanchachkanku, chay pasananmanta rimaspanmi bibliapiqa nirqaña: “Chay tiempopim upakunapas uyarinqaku. Libromanta paykunapaq leepuptinkum uyarinqaku. Chay tiempopim ñawsakunapas qawarikunqaku. Ancha tutayaypi karuspankum qawarikunqaku”, nispa (Is. 29:18). Sapa watam wara-waranqantin runakuna Diosmanta yachaspanku iñiyninkupi allinña tarikunku. Paykunaqa hatun babiloniawan sutichasqa pantasqa religionkunata qipanchaspam Jehova Diospa llaqtanmanña yaykumuchkanku. Chayna ruwasqankum qawachin iñiyninkupi Jesucristo imayna yanapasqanta.

14. ¿Imapitaq yuyaymanananchik iñiyninchikpi kallpanchasqa tarikunapaq?

¹⁴ Kay qillqapa yachachikuyninkunapim yachamurqanchik Jesucristoqa qatiqninkunata kay tukupay tiempopi huñuspan huk sunqulla kawsananchikpaq yanapawasqanchikmanta. Iñiqmasinchikkunawan chayna kawsakusqanchikpi yuyaymanaymi kallpanchawanchik hamuq tiempopaq Diospa prometesqankunata mana iskayrayaspa suyananchikpaq.

15. ¿Imanasqam mana iskayrayanchikchu kay allpa pachata Jehova Dios huertayachinanmanta?

¹⁵ Jehova Diosqa kay pachata unanchasqanmantapacham suma-sumaq huerta kananta munarqa. Chaymi Adantawan Evata unancharuspan suma-sumaq huertapi churarqa hinaspam kamachirqa mirayninkuwan enteron pachata huntachinankupaq chaynataq animalkunata cuidanankupaq (Gen. 1:28). Ichaqa satanasta kasukuspankum Jehova Diosta qipancharurqaku, chaymi lliw mirayninkunapas huchasapa kaspa wañunchik. Chaykuna pasaruptinpas Jehova Diosqa manam qunqarqachu enteron allpa pacha suma-sumaq huerta kananpaq prometesqantaqa, payqa imapas nisqantam cumplinpuni (leey Isaias 55:10, 11). Diosman sunqu runakunaqa enteron allpa pachata sumaqyachispankum Diospa tukuy ima unanchasqankunatapas cuidaspanku kawsakunqaku. Chaypim Jehova Diospa lliw prometesqankunaqa cumplikunqa. Qawasunyá imakuna pasananmanta.

16. ¿Ima nintaq bibliaqa hamuq tiempopi hawka kawsakunanchikmanta?

¹⁶ Hawkañam kawsakusunchik. Diospa prometesqanmanta Isaiaspa qillqasqankunaqa cumplikunqapuni (Is. 11:6-9) Chaypiqa lliwmi yuyayniyuqpas, warmakunapas mana imata manchakuspa hawkayaypi kawsakunqaku. Manam ima animaltapas nitaq runamasintapas manchakunqakuchu. Maypi tarikuspaykipas wasikipi hinam hawka kanki. Mana manchakuspam mayupipas, quchapipas hinaspa lamar quchapipas nadeanki, urqukunapipas chunniqkunapipas hawkam purinki. Tutaykaramuptinpas mana manchakunapaqmi kanqa. Chayna kananmanta rimaspanmi Diosqa nin: “Chunniqpipas mana manchakuspañam kawsakunqaku, montekunapipas mana manchakuspañam puñukunqaku”, nispa (Ezeq. 34:25).

17. ¿Imanasqam mana iskayrayanchikchu Jesucristo kay pachata kamachimuptin imanchikpas achkanpi kananmanta?

¹⁷ Manam imanchikpas pisinqachu. Piensariy Diospa prometesqan allpapiña kasqaykita: Chaypiqa manañam wakchayaypas nitaq yarqaypas kanqañachu, manataqmi runapa gobiernonpa yanapaynintapas necesitasunñachu. Imaynam iñiyninchikpi allin takyanapaq kay tiempopi tukuy imata quwanchik, chaynataqmi hamuq tiempopipas allin kawsakunanchikpaq mikuyninchikkunata hinaspa tukuy ima necesitasqanchikkunata achkanpi quwasunchik. Señorninchik Jesucristoqa kay pachapi kaspanmi qawachirqa chaykuna ruway atisqanta, paymi yarqaymanta kaq achka runakunaman mikuchirqa iskay kimsa tantakunallamanta hinaspa challwakunallamanta achkayachispan (Mat. 14:17, 18; 15:34-36; Mar. 8:19, 20). Jesucristo kay pachata kamachimuptinqa bibliapi kayna nisqanmi cumplikunqa: ‘[Diosmi] parachimunqa tarpukuynikichikman, chaynapim kawsaynikichikpas allinta qispiptin chaninninpi mikunkichik. Animalnikichiktapas chay tiempopiqa hatu-hatun [pampakunapim] michinkichik’, nispa (Is. 30:23, CQ12).

18, 19. (1) ¿Imaynatam cumplikunqa Isaias 65:20-22, nisqan? (2) ¿Ima niytataq Jehova Diosqa munan, “sachakuna hinam runaykunaqa una-unay watakunata kawsanqa” nisqanwanqa?

¹⁸ Kay tiempokunapiqa achka runakunam mana allin pagasqa llumpayta llamkanku chaymi ayllunkuta mantenenankupaqpas sasachakunku, apu runakunañataqmi astawanraq apuyachkanku. Chayraykum sasachakuypi tarikuqkunaqa hamuq tiempopi sumaq llamkayniyuq hinaspa allin wasipi kawsakuytaqa mana piensayllapas piensankuchu. Ichaqa Diosmi kaynata prometewanchik: ‘Wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku. Wasikunatam hatarichinqaku ichaqa manam sapaq runakuna yachananpaqñachu. Uvas huertakunatam plantanqaku ichaqa manam sapaq runakuna rurun mikunanpaqñachu. Sachakuna hinam runaykunaqa una-unay watakunata kawsanqa. Akllakusqaykunaqa llamkasqankunapa ruruntam hurqunqa’, nispa (Is. 65:20-22).

¹⁹ ¿Ima niytataq Jehova Diosqa munan, “sachakuna hinam runaykunaqa una-unay watakunata kawsanqa” nisqanwanqa? ¿Haykallapipas sayarqankichu hatun sachapa waqtanpi? Ichapas abueloykipa abuelonkunapa tiemponpiraq wiñayta qallaykurqa. Wañukuspa allpayaruptikipas hinallaraqpaschá chay sachaqa wiñanqa. Ichaqa Jehova Diosmi anchata kuyapayawaspanchik prometewanchik ima sachamantapas astawan unaytaraq kawsakunanchikpaq (Sal. 37:11, 29). Chayna kawsakuptinchikqa mayna unay watayuq sachapas chaylla chakiruq waytamanmi rikchakuwasun. Ñuqanchikqa wiña-wiñaypaqmá kawsakusunchik.

20. ¿Imaynatam lliw unquykunamanta librakusun?

²⁰ Manañam imawanpas unqusunchu. Lliw runakunam nacesqanchikmantapacha huchayuq kanchik chayraykum unqunchik hinaspa wañunchik, chaymi huchataqa tupachinchik wañuyman apaq unquywan. ¿Imaynatam chaymanta librakuchwan? Chaypaqqa yanapawasun ñuqanchikrayku Jesucristopa wañusqallanmi (Rom. 3:23; 6:23). Jesucristowan 144.000 yanapaqninkuna waranqa wata kamachimuspankum as-asmanta huchanchikmanta librawasun. Chaypim Diospa kayna nisqan cumplikunqa: ‘Manañam mayqannikichikpas ninkichikñachu: ‘Unquchkanim’ nispaqa. Chaypi yachaqkunapa mana allin ruwasqankutaqa. Tayta Diosmi pampachanqa’ (Is. 33:24). Chay tiempopiqa manañam ñawsapas, upapas nitaq suchupas kanqañachu (leey Isaias 35:5, 6). Llapan unquykunamantam Jesucristoqa hampiykuwasun. Chaymi imawanpas manaña unqusunñachu.

21. (1) ¿Imataq wañuywan pasanqa? (2) ¿Imanasqataq chayqa kusichisunki?

²¹ Wañuyqa ‘enemigonchikmi’, chaymi llapanchikta ñakarichiwanchik, manamá pi runapas makinmanta lluptiytaqa atinchu (1 Cor. 15:26). Chayna kaptinqa ¿imatam Jehova Diosqa wañuywan ruwanqa? Bibliapim nin: ‘Tayta Diosmi wiñaypaq chinkachinqa wañuyta. Señor Diosmi pichanqa llapallan waqaqkunapa wiqinta’, nispa (Is. 25:8). Manam pininchiktapas pampasunñachu nitaqmi panteonkunapas kanqañachu, ¡mayna kusisqachá chaynaqa kawsakusun! Lliw wañusqakunata Jehova Dios kawsarichiptinmi ichaqa kusikuymanta waqasunchik (leey Isaias 26:19).

22. ¿Imataq runakunawan pasanqa Jesucristopa waranqa wata kamachisqan tukuyta?

²² Jesucristom 144.000 yanapaqninkunapiwan waranqa wata kamachimuspanku Diospa munayninta kay pachapaq ruwanqaku hinaspam taytan Jehova Diosman kutichipunqa kamachimunanpaq atiy chaskisqanta (1 Cor. 15:25-28). Chay tiempopaqqa mana huchayuqñam runakunaqa kanqaku, chaynapim satanas kacharisqa kaptin Diosman sunqu kayninku pruebapi churasqa kanqa. Chaymanta qipamanmi Jesucristoqa satanastawan qatiqninkunata wiñaypaq chinkachinqa (Gen. 3:15; Apoc. 20:3, 7-10). Ichaqa Diosman sunqu runakunam wiñaypaq kusisqa kawsakunqaku. Chaymanta rimaspanmi bibliapi nin: “Churinkunata Dios hatunchaspa libraptinmi tukuy imapas paykunawan kuska librakunqa”, nispa (Rom. 8:21).

23, 24. (1) ¿Imanasqataq mana iskayrayanchikchu Diospa prometesqankuna cumplikunanmantaqa? (2) ¿Imata ruwanaykipaqmi kunanmantapacha kallpanchakunayki?

²³ Diospa prometesqankunaqa manam yanqa cuentokunallachu. ¿Imanasqataq chaynata ninchik? Chaymanta yachanapaqyá kay qillqapa punta kaq yachachikuyninpi yachamusqanchikta yuyarisun. Jesucristom qatiqninkunata yachachirqa Diosta kaynata mañakunankupaq: “Kamachimuwaykuñayá. Munasqaykiyá ruwasqa kachun kay pachapipas hanaq pachapi hina”, nispa (Mat. 6:9, 10, NM). Dios kamachimuwananchikpaq mañakusqanchikqa manam yanqa rimayllachu, kunanpunim Jesucristowan hanaq pachamanta kamachimuchkanña. Pasaq pachak watakunapim Diospa wakin prometesqankunata cumplichirqa, chayqa sutillamá qawakun Diospa llaqtan imayna tarikusqanpi. Jesucristo enteron pachata kamachimuptinmi lliw prometesqankuna cumplikunqapuni. Manamá chaymantaqa iskayrayanchikchu.

²⁴ Jesucristoqa taytan nombraykuptinmi kamachimuchkanña, chaymi Diospa prometesqankuna hamuq tiempopi cumplikunanmantaqa mana iskayrayanchikchu. Chayraykum sapakama tapukunanchik: “¿Sutillatachu qawachini imayna kawsakusqaywan Jesucristo kasukusqayta?” Kunanmantapachayá kamachiwaqninchik Jesucristota kasukuspa kawsakunapaq kallpanchakusun, chaynata ruwaspaqa Diospa bendicionninkunatam wiñaypaq chaskisunchik.