Diospi confiasun piñakuynin hichpallapiña kasqanrayku

“Tayta Diosllapiyá wiña-wiñaypaq hapipakuychik.” (ISA. 26:4.)

 1. ¿Imapim mana chaynallachu kanku Dios serviqkuna huk runakunawanqa?

KAY tiempopiqa achka-achka runakunam mana yachankuchu pi runapi confiayta nitaq imapi confiaytapas, ichapas engañasqa kasqankurayku. Dios serviqkunam ichaqa mana chaynachu kanchik. Diospa yachayninwan yanapasqa kasqanchikraykum entiendenchik kay pachapi ‘kamachikuqkunapi’ confiayqa yanqa kasqanta (Sal. 146:3). Aswanmi vidanchiktawan hamuq tiempopi suyakuyninchiktapas Jehová Diospa makinpi saqenchik, kuyawasqanchikmanta hinaspa rimasqanta cumpliq kasqanmanta seguro kaspanchik (Rom. 3:4; 8:38, 39).

 2. ¿Imatam Josueyqa Jehová Diosmanta nirqa?

² Ñawpaq tiempopim Josueyqa nirqa Jehová Dios confianapaq kasqanta. Wañunanpaqñam llaqtamasinkunata nirqa: “Yachaychikyá tukuy sonqoykichikwan chaynataq tukuy vidaykichikwan yupaychasqanchik Tayta Diospa tukuy allin prometesqankunaqa cumplikusqanta. Chaykunamantaqa manam chullapas yanqaqa karqachu”, nispa (Jos. 23:14).

 3. ¿Imayna Dios kasqantam sutinqa qawachin?

³ Jehová Diosqa manam serviqninkunata kuyasqanraykullachu promesankunataqa cumplen, aswanqa cumplintaqmi sutinraykupas (Exo. 3:14; 1 Sam. 12:22). Ingles rimaypi reqsisqa Bibliapa qallariynin paginankunapi nisqanman hinaqa, Diospa sutinqa qawachinmi promesankunata cumplinanpaq imatapas rurananmanta. Sutinta uyarispaqa yuyarinchikmi nisqankunata haykapipas cumpliq kasqanmanta. Payqa maylawpipas hinaspa haykapipas munasqantaqa ruranmanmi. Manam imapas sasachu paypaqqa. Payqa sutinpa nisqanman hinam imatapas ruran (The Emphasized Bible, de J. B. Rotherham).

 4. a) ¿Imapaqmi Isaias 26:4 nisqan kallpanchawanchik? b) ¿Imakunamantam qatiqninpi yachasunchik?

⁴ Tapukusun: “¿Jehová Diosta allintapunichu reqsini sonqomantapuni confianaypaq? ¿Hamuq tiempota hawkallachu suyani, imapas ruray atisqanmanta yachaspay?”, nispa. Isaias 26:4 kaynata niwanchik: “Diosllapiyá wiña-wiñaypaq hapipakuychik. Amparakuna qaqa hina kasqanrayku Tayta Diospi hapipakuychik”, nispa. Arí, kunanqa manañam ñawpaq tiempopi hinañachu milagrokunata ruraspan runakunataqa yanapan. Chaywanpas payqa ‘amparakuna Qaqa hinam’, chaymi paypiqa “wiña-wiñaypaq” confiachwan. ¿Imaynatam Diosqa yanapawanchik kasukuq serviqninkunata? Kimsa kaqkunapim: tentacionkunata atipanapaq kallpata qowaspanchik, predicasqanchikta mana uyariptinku otaq contranchikpi churakuptinku yanapawaspanchik hinaspa llakinchikkunapi kallpata qowaspanchik. Qatiqninpi kaykunamanta yachaspanchik ama qonqasunchu Jehová Diospi imayna astawan confianapaq yuyaymanayta.

Diospi confiasun tentacionkunapi tarikuspanchik

 5. ¿Haykapim astawan sasachakuchwan Diospi confianapaq?

⁵ Ichapas mana sasachakunchikchu Paraisomanta otaq wañuqkuna kawsarimunanmanta Jehová Diospa promesankunapi confiaytaqa. Ichaqa sasachakuchwanmi imayna kawsanapaq niwasqanchikkunata kasukuytaqa. Chaypaqqa segurom kananchik kamachikuyninkuna kasukuyqa allinpuni kasqanta hinaspa kusikuyta apamusqantapas. Rey Salomonmi niwanchik: “Tayta Diosllapiyá confiakuy tukuy sonqoykiwanqa. Amayá confiakuychu kikikipa entiendesqallaykipiqa. Tukuy kawsasqaykipiyá [“ñannikikunapiyá”, NM] yuyariy Tayta Diosta. Paymi munasqanman hina kawsachisunki qamta”, nispa (Pro. 3:5, 6). Kaypiqa ‘ñankunamantam’ rimachkan. Kaymi qawachin Diospi confiasqanchikta tukuy vidanchikpi qawachinamanta, manam hamuq tiempopi suyakuyllanchikpichu. Kunanñataq qawasun imaynatam Diospi confiachwan tentacionkunapi tarikuspanchik.

 6. ¿Imakunatam rurachwan mana allin piensaykunata qepanchanapaq?

⁶ Mana allin ruraykunaqa qallarin mana allin piensaykunawanmi, chaymi piensayninchikta cuidana (leey Romanos 8:5 hinaspa Efesios 2:3). ¿Imakunatam rurachwan mana allin piensaykunata qepanchanapaq? Pichqa yanapakuykunata qawasun: 1. Diospa yanapakuynintam mañakuna (Mat. 6:9, 13). 2. Ñawpaq tiempopi Jehová Diospa serviqninkuna kasukuspanku allinpi tukusqanmantam yuyaymanana chaynataq mana kasukuqkuna mana allinpi tukusqankumantapas (1 Cor. 10:8-11).a 3. Yuyaymananam huchallikuruptinchik familianchik hinaspa kikinchikpas llumpay llakipi tarikunanchikmanta. 4. Piensanam hatun huchata ruraruptinchik Dios imayna sientekunanmanta (leey Salmo 78:40, 41). 5. Piensanataqmi serviqninkuna mana allinkunata qepanchaptinku hinaspa maypipas allinkunata ruraptinku Jehová Dios kusikusqanpi (Sal. 15:1, 2; Pro. 27:11). Kaykunata ruraspaqa Jehová Diospim astawan confiasun.

Diospi confiasun predicasqanchikta mana uyariptinku otaq contranchikpi churakuptinku

 7. ¿Ima sasachakuypim Jeremiasqa tarikurqa, hinaspa wakinpiqa imaynam sientikurqa?

⁷ Achka cristianokunam predicanku mana uyariy munaqkunapa kasqanpi. Chaynapim Jeremiaspas predicarqa, paymi Diosmanta willakurqa sasallaña tiempokunapi, Juda llaqtam puchukachisqa kananpaqña kachkarqa. Sapa punchawmi Diospi confiasqanta qawachinan karqa juicionkunamanta willakuspan. Yanapaqnin Barucpas sasachakuypi tarikuspanmi quejakuyta qallaykurqa (Jer. 45:2, 3). ¿Jeremiaspas hukmanyarurqachu? Huk kutipim llumpayta hukmanyaruspan nirqa: “Ñakasqayá kachun nacesqay punchawqa [. . .]. ¡Imapaqraq mamay wachakuwarqa ñakariyllata qawanaypaq! [. . .] ¡Imapaqraq mamay wachakuwarqa penqayllapi kawsaspa wañunaypaq!”, nispa (Jer. 20:14, 15, 18).

8, 9. Jeremias 17:7, 8 hinaspa Salmo 1:1-3 nisqanman hina, ¿imatam rurananchik Diosmanta hinalla willakunapaq?

⁸ Chayna kaptinpas Jeremiasqa manam atipachikurqachu. Jehová Diospim confiarqa. Chaymi Bibliapa kayna nisqanpa cumplikusqanta qawarqa: “Diospi hapipakuq runaqa bendecisqam kanqa. Ñoqa Tayta Diospi confiakuq runaqa bendecisqam kanqa. Chayna runaqa kanqa yakupa hichpanpi plantasqa sacha hinaraqmi. Chayna runaqa kanqa yakupa patanpi sapichakuq sacha hinaraqmi. Payqa kanqa rupay tiempopipas verdey-verdey rapisapa sacha hinaraqmi. Usyay tiempopipas qali-qali sacha hinaraqmi payqa kanqa. Tiempollanpi mana tipispa ruruq sacha hinaraqmi payqa kanqa” (Jer. 17:7, 8).

⁹ “Yakupa hichpanpi plantasqa sacha hinaraqmi” Jeremiasqa ‘ruruchkaq’ hina Diosmanta hinalla willakurqa. Runakunapa burlakusqanta uyarinanmantaqa Jehová Diospim confiarqa hinaspam Diospa tukuy ima nisqankunata kasukurqa (leey Salmo 1:1-3; Jer. 20:9). ¡Mayna sumaq ejemplom llapallanchikpaq, aswanraq mana uyariy munaqkunapa kasqanpi predicaqkunapaqqa! Chaynapi tarikuspaqa Jehová Diosta hinalla mañakusun. Paymi yanapawasunchik sutinmanta hinalla willakunapaq (Heb. 13:15).

10. ¿Ima yanapakuykunatam Diosqa qowanchik hinaspa ima tapukuytam rurakunanchik?

¹⁰ Jehová Diosqa achka yanapakuykunatam qowanchik kay sasachakuy tiempokunata aguantananchikpaq. Ejemplopaq, Bibliatam qowanchik, kayqa achka rimaykunapim allinta tikrakuchkan. Chaymantapas, confianza sirvientewanmi achka yanapakuykunata qowanchik. Yanapawanchiktaqmi huñunakuypiwan asambleakunapi achkallaña iñiqmasinchikkunawan allin amistadta ruranapaq. ¿Allintachu servichikunchik kay yanapakuykunata? Chayna ruraqkunaqa, “sonqonkupi kusisqa kasqankuraykum takinqaku”. Diosta mana kasukuqkunam ichaqa, ‘llaki sonqoyoq qaparkachanqaku’ hinaspa ‘ancha llakisqa waqanqaku’ (Isa. 65:13, 14).

Diospi confiasun sasachakuypi tarikuspa

11, 12. Llumpay sasachakuykuna kasqanrayku, ¿imatam yachaywan rurana?

¹¹ Bibliapa willakusqanman hinam runakunaqa aswan-aswan sasachakuykunapi tarikunku (Mat. 24:6-8; Apo. 12:12). Mayo huntaruspa lloqsiruptinmi runakunaqa amparakunankupaq huk lawman ayqekunku otaq imamanpas seqanku. Chaynallataqmi llumpay sasachakuykuna kaptin millonnintin runakunaqa amparakunku runapa yachayninpi, qollqepi, politicapi otaq religionkunapi. Ichaqa chaykunapi amparakuyqa manam cheqaptachu yanapan (Jer. 17:5, 6). Cheqap cristianokunapaqmi ichaqa “amparakuna qaqa hina” kapuwanchik (Isa. 26:4). Arí, Salmos qellqaqmi nirqa: “[Jehová Diosmi] hatun rumi hina harkaykuwaqniyqa. Payllam salvaykuwaqniyqa. Payllam pakaykuwaqniyqa”, nispa (leey Salmo 62:6-9). Ichaqa, ¿imatam rurananchik kay hatun Rumipi amparakunapaq?

¹² Diospim amparakunchik Palabranta kasukuspa runakuna mana allinpaq qawaptinkupas (Sal. 73:23, 24). Runakunapa piensasqanman hina kawsaqkunaqa yaqachá kaynata niwasun: “Kawsachkaspallaqa gozakuy”. “Allin educacionniyoq kay”. “Qollqesapa kay”. “Tukuy imata rantiy”. “Huk nacionkunata reqsiy”, nispa. Diospa piensasqanman hina piensaqkunam ichaqa kayta kasukunku: “Kay pachapi allin kaqkunawan servichikuqkunapas allin kaqkunawan mana servichikuq hinam kananku, kay pacha [otaq mana allinkuna] qawasqanchikqa tukurunqam” (1 Cor. 7:31). Kasukunkutaqmi, Diospa munayninta puntapi churanamantawan hanaq pachapi ‘qori-qollqeta huñunamanta’ Jesuspa nisqantapas (Mat. 6:19, 20).

13. 1 Juan 2:15-17 nisqankunapi piensaspa, ¿ima tapukuykunatam rurakunanchik?

¹³ Tapukusun: “¿Diospi confiasqayta qawachinchu ‘kay pachapi mana allin kaqkunata’ imayna qawasqay?” (1 Juan 2:15-17.) ¿Astawanchu chaninchani Dios serviypi ruraykunatawan bendicionninkunata tukuy imamantapas? (Fili. 3:8.) ¿Kallpanchakunichu ‘allinllata qawanaypaq’?, nispa (Mat. 6:22, NM). Diosqa manamá munanchu mana yachaywan imatapas rurananchikta nitaq familianchik mantieneyta saqenanchiktaqa (1 Tim. 5:8). Ichaqa munanmi haykapipas paypi hapipakunanchikta manam kay pachapi Satanaspa munaychakusqanpichu (Heb. 13:5).

14-16. ¿Ima bendicionkunatam wakin iñiqmasinchikkuna chaskirqaku Diospa munayninta puntapi churasqankumanta?

¹⁴ Rimasun 3 warmachayoq Richard hinaspa Ruth tayta-mamakunamanta. Richardmi nin: “Munarqanim Jehová Diosta astawan serviyta. Kusisqam karqani tukuy imayoq kasqaywan ichaqa cuentatam qokurqani puchuq tiempollaytaña Diosman qosqaymanta. Diosta mañakuspay hinaspa gastoykunata qawaspaymi señoraywan tantearqaniku tawa punchawllaña llamkanaypaq, chaytaqa rurarqaniku nacionniykupi qollqemanta sasachakuy kaptinpas. Patronniyqa uyariykuwarqam hinaspa killa tukuytaqa amañarurqaniña”, nispa. ¿Imaynataq Richardqa tarikun?

¹⁵ Paymi nin: “Pisillataña ganaspaypas kunanqa familiaywan kanaypaq hinaspa warmaykunata yachachinaypaqmi ñawpaqmantaqa pichqa chunka punchaw masninraq watapi kapuwan. Chaymantapas iskay kuti mastaraqmi predicani, kimsa kuti mastaraqmi estudiokunata qoni hinaspa congregacionpi rurayniykunatapas allintañam atiendeni. Warmaykunawan astawan kasqayraykum señorayqa wakin killakunapi precursora auxiliar karqa. Atikunankamam hinalla kaynata llamkayta munani”, nispa.

¹⁶ Roy hinaspa Petina casarasqa cristianokunapas, warmankuwan yachaspankupas pisi tiempollatañam llamkanku tukuy tiemponkuwan Diosta servinankupaq. Roymi nin: “3 punchawllatam semanapi llamkani, señorayñataqmi 2 punchawta. Astakurqanikutaqmi taksalla wasiman. Manaraq 2 warmaykuna kaptinqa precursormi karqaniku, chayna serviytaqa hinallam munarqaniku. Chaymi wiñaruptinku kaqmanta precursor karqaniku. Manam ima qoriwanpas tupachiymankuchu bendicionkuna chaskisqaykutaqa”, nispa.

Diosninchik sonqonchikta hawkayachinanta saqesun

17. ¿Imaynatam Bibliapa nisqanqa yanapasurqanki sasachakuykunata atipanaykipaq?

¹⁷ “Sapakamapaqmi hamun tiempon” otaq qonqaymanta imapas pasawasqanchikraykum mana yachanchikchu paqarin ima pasawananchikta (Ecl. 9:11). Chayqa manam hukmanyachiwananchikchu, Diosta mana reqsiq runakunata hinaqa (Mat. 6:34). Aswanqa Pablopa kayna nisqantam kasukunanchik: “Amayá imamantapas afanakuychikchu, aswanqa orakuspaykichikyá lliwta Diosman willaychik hinaspayá payman graciasta qoychik. Hinaptinqa Diosninchikmi hawkayachisunkichik runakunapa mana entiendey atinan hawkayaywan. Chaynapim imamantapas mana preocupakunkichikchu nitaq llakikunkichikchu” (Fili. 4:6, 7).

18, 19. ¿Imaynatam Diosqa yanapawanchik? Huk ejemplota willamuy

¹⁸ Llumpay sasachakuykunapi tarikuspankum achka iñiqmasinchikkuna Diospa qosqan hawkayayta chaskirqaku. Huk cristianam nin: “Yawarta chaskinaypaqmi doctorqa achka kutipi manchachiwarqa. Niwarqam: ‘¿Opachu kanki yawarta mana chaskinaykipaq?’, nispa. Chay kutipi hinaspa hukkunapipas Jehová Diostam sonqollaypi mañakurqani hinaspam hawkayayninta chaskirqani. Mana kallpayoq hinaspa yawarniy pisilla kaptinpas qaqa hinam takyarqani, hinaspam imarayku yawarta mana chaskisqaymanta willarqani”, nispa.

¹⁹ Wakinpiqa Diosmi yanapawanchik consuelawaqninchik iñiqmasinchikwan, wakinpiñataq tiempollanpi chayamuq qellqanchikkunawan. Yaqachá uyarirqanchik pitapas kayna nisqanta: “Ñoqapaq hinam kaytaqa qellqarusqaku”, nispa. Imayna tarikuptinchikpas Diosqa cuidawasqanchiktam qawachiwasun paypi confiaptinchikqa. ‘Ovejankunam kanchik’ hinaspa sutinta apaq llaqtanpas (Sal. 100:3; Juan 10:16; Hech. 15:14, 17).

20. ¿Imanasqam Jehová Diospa serviqninkunaqa seguro tarikunqaku Satanaspa munaychakusqan tukuruptin?

²⁰ Diospa ‘piñakuynin punchawpiqa’, runakunapa tukuy ima confiasqanmi puchukachisqa kanqa. Manam qoripas nitaq qollqepas chay punchawpiqa imapaqpas valenqachu (Sof. 1:18; Pro. 11:4). Diosllam ‘amparakuna Qaqa hina kanqa’ (Isa. 26:4). Chaynaqa Jehová Diospi confiasqanchikta qawachisun kasukuspa, mana uyariptinku otaq contranchikpi churakuptinku hinalla predicaspa chaynataq llakinchikkunata Diosman willakuspapas. Chayna ruraqqa “segurom kawsakunqa [. . .]. Mana allinmantapas manam manchakunqachu” (Pro. 1:33).

[Willakuy]

¿Yuyarichkankichu?

Imaynatam Diospi confiasqanchikta kaykunapi qawachinchik:

• tentacionkunapi tarikuspa

• predicasqanchikta mana uyariptinku otaq contranchikpi churakuptinku

• sasachakuykunapi tarikuspa

[13 kaq paginapi dibujo]

Diospa nisqankunata kasukuspanchikqa kusisqam kawsakusun

[15 kaq paginapi dibujo]

Jehová Diosqa ‘amparakuna Qaqa hinam’