Hanaq pachapi yachaqkunata diospa serviqninkuna rikusqankumanta

Apostol Juanmi nirqa: ‘Hanaq pachapim rikururqani kamachinapaq tiyanata chaynataq chay tiyanapi tiyaqtapas. Chay tiyaqpa rikchayninmi kasqa jaspe sutiyuq alhaja rumi hina, chaynataq sardio sutiyuq alhaja rumi hina. Chay kamachinapaq tiyanapa muyuriqninpiñataqmi kasqa verde colorniyuq esmeralda alhaja rumi hina chirapa’, nispa (Apocalipsis 4:2, 3).

Diosmanta willakuq Ezequielpas nirqam: ‘Chay qawasqay runa kaqllapa muyuriqninpiñataqmi rikurqani llipityachkaq kanchayta. Chay muyuriqninpi kanchariyqa karqa paramuptin puyu ukumanta chirapa rikurimuchkaq hinam. Chaynatamá tayta Diospa kanchariyninqa ñuqaman rikuriykuwarqa’, nispa (Ezequiel 1:27, 28).

Apostol Juan hinaspa Diosmanta willakuq Ezequielmi Jehova Diospa kanchariyninta tupachirqaku suma-sumaq rumikunawan, chirapawan hinaspa kamachinapaq suma-sumaq tiyanawan. Willakunkum Jehova Diospa kanchariyninqa suma-sumaq kasqanta hinaspa Diosta qawaqkunaqa hawka tarikusqankumantapas.

Juanpa hinaspa Ezequielpa rikusqankuqa tupanmi Salmos qillqaqpa nisqanwanpas, nirqam: “Diosqa mayna hatunmi. Tayta Diosqa mayna alabanapaqmi. Payqa lliw dioskunamantapas respetanapaqmi. Yanqakunallam llapa runakunapa diosninqa. Tayta Diosmi ichaqa cielokunata unancharqa. Ancha kancharichkaqmi kachkan payqa. Santuarionpim kachkan paypa atiyninqa. Santuarionpim kachkan sumaq kayninqa”, nispa (Salmo 96:4-6).

Jehova Diosqa tukuy atiyniyuq kachkaspanpas niwanchikmi payman asuykunanchikpaq, niwanchiktaqmi mañakuptinchikqa uyariwananchikmantapas (Salmo 65:2). Diosninchikqa anchatam kuyawanchik, chaymi apostol Juanpas nirqa: ‘Diosqa kuyaqmi’, nispa (1 Juan 4:8).

Jesuspa qatiqnin Estebanmi, “chuya espirituwan huntasqa kaspan hanaq pachata sumaqta qawarispan Diospa kanchariyninta rikururqa, rikururqataqmi Jesustapas Diospa alliq lawninpi sayachkaqta. Hinaspam nirqa: ‘¡Qawaychik! Hanaq pachatam qawachkani kicharayachkaqta, runapa churintapas Diospa alliq lawninpi sayachkaqta’, nispa” (Hechos 7:55, 56).

Manaraq hanaq pachata Esteban rikuchkaspanqa, Jesusta wañurachiq judiokunawanmi rimarqa. Estebanpa rikusqanmi qawachirqa Jesusqa kawsarirusqantaña hinaspa Diospa hatunchasqan kasqantapas. Chaynaña Jesus kasqanmantam apostol Pablopas qillqarqa: ‘Wañusqakunapa kasqanmantam [Jehova Diosqa] Cristota kawsarichirqa hinaspam hanaq pachapi alliq lawninpi tiyaykachirqa, paytam churarun kunan tiempopipas hamuq tiempopipas llapa gobiernaqkunamanta, kamachikuqkunamanta, atiyniyuqkunamanta, munaychakuqkunamanta hinaspa imaymana sutiyuqkunamanta aswan atiyniyuq kananpaq’, nispa (Efesios 1:20, 21).

Bibliam nin Jesusqa hanaq pachapiña kachkaspanpas taytan Jehova Dios hina anchata kuyawasqanchikta. Kay pachapi kachkaspanmi unquqkunata sanoyachirqa hinaspa wañuqkunatapas kawsarichirqa. Ñuqanchikpa rantinchikpi wañuspanmi qawachirqa Diostawan runakunata anchata kuyasqanta (Efesios 2:4, 5). Kunanqa Diospa alliq lawninpim Jesusqa kachkan, manapas unaymantam Diospa qusqan atiyta servichikunqa Diosta kasukuq runakunata yanapananpaq.

Diosmanta willakuq Danielmi qillqarqa: ‘Qawachkaptillaymi reypa tiyanankuna churasqa karqa. Hinaptinmi huknin tiyanapi wiñaypaq kawsakuq [Jehova Dios] tiyaykurqa [...]. Paytaqa waranqantin-waranqantinmi servirqa. Paypa ñawpaqninpim manaña yupay atina karqa’, nispa (Daniel 7:9, 10).

Hanaq pachata Daniel qawasqanpim Diospa yanapakuyninwan rikururqa ‘waranqantin-waranqantin’ angelkunata. ¡Mayna admirasqachá qiparurqa chay rikusqanwanqa! Angelkunaqa kanku mana rikuy atina, yachayniyuq hinaspa atiyniyuqmi. Angelkunaqa sutichasqam kachkanku Diospa qusqan llamkayninkuman hina serafinwan hinaspa querubinwan. Bibliam 250 masnin kutikama angelkunamanta riman.

Angelkunaqa manam kay pachapi huk tiempo kawsaq runakunachu. Diosmi paykunataqa runakunamanta ñawpaqtaraq unancharqa. Kay pachata Dios unancharuptinmi angelkunaqa qapariyllawanña kusikurqaku (Job 38:4-7).

Kunanpas Diosman sunqu angelkunaqa yanapakuchkankum Diosña kay pachata kamachimunanmanta sumaq willakuy enteron pachapi apakunanpaq (Mateo 24:14). Apostol Juanmi chayna yanapakusqankumanta nirqa: ‘Rikurqanim hanaq pachapa chawpinta pawachkaq huk angeltapas, paymi wiñaypaq kaq sumaq willakuyta apachkasqa kay pachapi yachaqkunaman willakunanpaq. Arí, apachkasqaqa llapallan nacionkunaman, castakunaman, tukuy rikchaq rimayniyuqkunaman hinaspa lliw llaqtakunamanmi’, nispa (Apocalipsis 14:6). Kunanqa manañam ñawpaqpi hinañachu angelkunaqa runakunawan riman, aswanqa Diosmanta willakuqkunatam yanapachkanku allin sunquyuq runakunata tarinankupaq.

‘Hanaq pachapim guerra karurqa, Miguelmi [Jesucristom] angelninkunapiwan manchakuypaq culebrapa contranpi pelearqa, manchakuypaq culebrapas angelninkunapiwanmi pelearqa ichaqa vencerachikurqakum, manataqmi hanaq pachapi sitiopas paykunapaqqa karqañachu. Chaynapim chay manchakuypaq culebraqa kay pachaman wischumusqa karqa. Payqa diablowan hinaspa satanaswan sutichasqa ñawpaqmantaraq kaq culebram. Paymi kay pachapi llapallan runakunata pantachichkan. Paymá angelninkunapiwan kay pachaman wischumusqa karqa’ (Apocalipsis 12:7-9).

Hanaq pachapiqa manam tukuy tiempochu hawkayaypi kawsakurqaku. Runakunata Dios unancharuptinmi huk angel Dios hina yupaychachikuyta munasqanrayku Jehova Diospa contranpi hatarirurqa, chaymi payqa satanasña rikurirurqa, chay sutiqa “contrapi churakuq” ninanmi. Huk angelkunapas satanasman hukllawakurusqankuraykum demoniowanña sutichachikurqaku. Kay mana allin angelkunapas Diospa contranpim kachkanku, chaymi tukuyta ruwanku yaqa lliw runakuna kuyakuq Diosmanta karunchakunankupaq.

Satanaswan demoniokunaqa mana allin ruwaqkunam. Runakunatam chiqniwanchik, paykunataqmi yaqa lliw sasachakuykuna kananpaq huchayuqqa kanku. Satanasmi Diosta serviq Jobpa uywankunata hinaspa runankunata wañurachirqa. Chaymantapas 10 churinkuna huk wasipi kachkaptinmi sinchi wayrawan chay wasita tuñirachispan churinkunata wañurachirqa. Kikin Jobtapas chupu unquywanmi enteron cuerponta hapirachirqa (Job 1:7-19; 2:7).

Ichaqa diablotaqa ñam Diosqa chinkachinqaña. Payqa yachakunmi manaña unay tiempo kawsananta (Apocalipsis 12:12). Chaymanta yachasqanchikmi kusirichiwanchik.

Jesusmantam biblia nin: “Diospaqmi runakunata yawarnikiwan rantirqanki llapallan ayllukunamanta, tukuy rikchaq rimaykuna rimaqkunamanta, lliw llaqtakunamanta hinaspa lliw nacionkunamanta. Diosniykupaqmi kamachiqkuna hinaspa sacerdotekuna kanankupaq paykunataqa churaykurqanki, paykunaqariki kay pachatam kamachinqaku”, nispa (Apocalipsis 5:9, 10).

Jesus hinam wakin runakunapas hanaq pachapi yachanqaku. Chaymi apostolninkunata Jesusqa nirqa: ‘Qamkunapaq sitiota allichaqmi ñuqaqa richkani. [...] Kaqmanta hamuspaymi wasiyman pusasqaykichik maymi kasqaypi qamkunapas kanaykichikpaq’, nispa (Juan 14:2, 3).

Hanaq pachaman riqkunaqa Jesuswan kuskam hanaq pachamanta kay pachata kamachimunqaku, hinaptinmi kay pachapi yachaq runakunaqa hawkayaypi kawsakunqaku. Kikin Jesusmi yachachiwarqanchik Diosña kamachiwananchikpaq mañakunapaq, nirqam: “Hanaq pachapi taytayku sutiki chuyanchasqa kachun. Munaychakuynikiyá hamuchun. Munasqaykiyá ruwasqa kachun kay pachapipas hanaq pachapi hina”, nispa (Mateo 6:9, 10).

Apostol Juanmi kaynata qillqarqa: ‘Kamachinapaq tiyanamantam kayna qayakuyta uyarirqani: “Diospa carpanqa runakunawanñam kachkan. [...] Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa tukurunñam”, nispa’ (Apocalipsis 21:3, 4).

Kay qawasqanqa hamuq tiempopi diablo manaña kaptin kay pachapi sumaq kawsakuy kananmantam rimachkan, chaynaqa kanqa Jesuswan wakin runakuna hanaq pachamanta kamachimuptinkum. Manañam imapas runakunataqa chay tiempopiqa ñakarichinqañachu. Wañuypas tukunqañam.

Ichaqa ¿maypitaq mana hanaq pachaman riq runakunaqa kawsarimuspa yachanqaku? Kay pachapim kawsanqaku sumaq huertayachisqapi (Lucas 23:43).