Jesuspa wañukusqanta yuyarispayá huk sunqulla kasunchik

1, 2. ¿Imapaqmi 2018 watapi huñunakusunchik hinaspa imanasqam ancha chaninniyuq chay huñunakuyqa? (Qaway kay paginapi fotota).

INTI siqaykuytam 2018 watapa 31 marzo killanpi, wara-waranqantin Diosta yupaychaqkuna hinaspa allin sunquyuq runakuna huñunakusunchik Jesuspa wañukusqanta yuyarinapaq. Kay huñunakuytaqa watapim huk kutillata ruwanchik, manam haykapipas chayna achka runakunaqa enteron pachapiqa huñunakunchikchu.

² Jehova Dioswan Jesusqa anchatam kusikunku wara-waranqantin runakuna enteron pachapi chay punchaw huñunakuptinchik. Bibliaqa nirqañam ‘mana pipa yupay atinan achkallay-achka runakuna’ ‘llapallan nacionkunamanta, castakunamanta, llaqtakunamanta hinaspa tukuy rikchaq rimayniyuqkunamanta’ kaynata ninankumanta: “Salvasqaqa kanchik kamachinapaq tiyanapi tiyaq Diosninchikpa hinaspa malta carneropa yanapawasqanchikwanmi”, nispa (Apoc. 7:9, 10). Sapa watam wara-waranqantin runakuna kay huñunakuypi Jesuspa wañukusqanta yuyarinchik hinaspa Jehova Diostapas hatunchanchik, chayqa ancha kusikunapaqmi.

 3. ¿Ima tapukuykunamantam yachasunchik?

³ Kay yachachikuypim tawa tapukuykunamanta yachachkasun. 1) ¿Imakunatam ruwananchik Jesuspa wañukusqanta yuyarinapaq punchaw manaraq chayamuchkaptin hinaspa imaynatam yanapachikuchwan? 2) ¿Imanasqam Jesuspa wañukusqanta yuyariyqa yanapawanchik Diosta yupaychaqkuna huk sunqulla kananchikpaq? 3) ¿Imaynatam yanapakuchwan iñiqmasinchikkunawan huk sunqulla kananchikpaq? 4) ¿Chayamunqachu punchaw Jesuspa wañukusqanta manaña yuyarinanchikpaq? Chayna kaptinqa, ¿haykapim chayqa kanqa?

 4. ¿Imanasqataq tukuyta ruwananchik Jesuspa wañukusqanta yuyarinapaq huñunakuyman rinapaq?

⁴ ¿Imanasqam rinanchikpuni Jesuspa wañukusqanta yuyarinapaq huñunakuymanqa? Huñunakuykunaman rispam Diosta yupaychanchik. Jehova Dioswan Jesusqa manam qunqankuchu sapa wata chay huñunakuyman rinanchikpaq kallpanchakusqanchiktaqa. Munanchikmi chay huñunakuypi Jehova Dioswan Jesus qawawaspanchik kusisqa kanankuta, ichapas llumpayta unquspanchik utaq huk sasachakuy kaptin manapas atisunchu chay huñunakuyman riyta, chayna kaptinpas kallpanchakunanchikmi. Kay huñunakuy ancha chaninniyuq kasqantam qawachisun chaypi kananchikpaq tukuy imata ruwasqanchikwan, chaynapi Jehova Dios sutinchikta libronpi qillqananpaq. Chay libronpiqa wiñaypaq kawsanankupaq runakunapa sutinmi kachkan (Mal. 3:16; Apoc. 20:15).

 5. Jesuspa wañukusqanta yuyarinapaq punchaw manaraq chayamuchkaptin, ¿imaynatam yachachwan iñiyninchikpi allin utaq mana allin kasqanchikta?

⁵ Jesuspa wañukusqanta yuyarinapaq punchaw manaraq chayamuchkaptinmi, tiempochakunanchik Diosta mañakunanchikpaq hinaspa Diosman sunqu kasqanchik imayna kasqanta qawakunanchikpaq (qaway 2 Corintios 13:5). ¿Imaynatam chayta ruwachwan? Pablom nirqa: “Hinallayá qawakuychik iñiynikichikpi allin utaq mana allin kasqaykichikta yachanaykichikpaq”, nispa. Chaymi tapukunanchik: “¿Jehova Diospa akllasqan llaqtapi kasqaymantachu mana iskayrayani? ¿Kallpanchakunichu Diospa munayninmanta allin willakuykunata runakunaman willakunaypaq hinaspa yachachinaypaq? ¿Qawachinichu imapas ruwasqaywan tukupay punchawkunapiña kawsasqanchikta hinaspa satanaspa munaychakuynin tukunanpaq kayllapiña kasqanmanta? ¿Hinallachu Jehova Diospi hinaspa Jesuspi hapipakuchkani Diosta yupaychanaypaq tanteakusqay punchawpi hina?”, nispa (Mat. 24:14; 2 Tim. 3:1; Heb. 3:14). Kay tapukuykunapi yuyaymanaymi yanapawasun imayna kasqanchikta qawakunapaq.

 6. (1) ¿Imata ruwaspallanchikmi wiñay kawsayta chaskisun? (2) ¿Imatam punta apaq iñiqmasinchik sapa wata ruwan Jesuspa wañukusqanta yuyarinapaq punchaw manaraq chayamuchkaptin? (3) ¿Imaynatam qatipakuchwan?

⁶ Jesuspa wañukusqan punchawta suyaspanchikmi, chaymanta rimaq qillqanchikkunata ñawinchaspa yuyaymanananchik (qaway Juan 3:16; 17:3). Jehova Diosta allintapuni riqsispa hinaspa Jesuspi iñispallam wiñaypaq kawsakuyniyuq kasun. Jesuspa wañukusqanta yuyarinapaq punchaw manaraq chayamuchkaptinmi, Jehova Diosmanta hinaspa Jesusmanta yachachiq qillqakunata sapanchikpi estudiachwan. Punta apaq iñiqmasinchikmi, achka watakunaña huñun Jesuspa wañukusqanmanta rimaq Willakuq qillqanchikkunata hinaspa imayna Jehova Dioswan Jesus kuyawasqanchikmanta rimaq qillqakunatapas. Sapa watam, chay punchaw manaraq chayamuchkaptin iñiqmasinchikqa chay huñukusqan qillqakunata ñawinchaspan yuyaymanan. Chaymantapas, chay huñukusqan qillqakunamanmi huk-iskay yachachikuykunata yapan. Chay qillqakunata ñawinchasqan, Jesuspa wañukusqan punchawpaq bibliata ñawinchasqan hinaspa yuyaymanasqanmi sapa wata mana yachasqankunata astawan yachananpaq yanapan. Chaymantapas, Diosta hinaspa Jesusta astawan kuyasqanmantam musyakun. Iñiqmasinchikpa chayna ruwasqanman hina ruwaspanchikqa ñuqanchikpas astawanmi kuyasun Jehova Diostawan Jesusta.

 7. (1) ¿Imatam Jesusqa taytanta mañakurqa? (2) ¿Imaynatam yachanchik Jehova Diosqa Jesuspa mañakusqanta uyarisqanmanta?

⁷ Apostolninkunawan Jesus santa cenata ruwasqanku qipatam, Jesusqa taytanta mañakurqa. Chaypim qatiqninkunapaq mañakurqa taytanwan huk sunqulla kasqankuman hina qatiqninkunapas huk sunqulla kanankupaq (qaway Juan 17:20, 21). Jehova Diosqa churin Jesuspa mañakusqantam uyarirqa. Jesuspa wañukusqanta yuyarinapaq punchawqa yanapawanchikmi huk sunquña kananchikpaq. Chay punchawqa, tukuy rikchaq waranqantin runakunam enteron allpa pachapi Jesusta yuyarinapaq huñunakunchik, chaywanmi qawachinchik Jehova Diosqa Jesusta kachamusqanmanta mana iskayrayasqanchikta. Wakin llaqtakunapiqa huk rikchayniyuq runakunaqa huk religionniyuqlla kaspankupas manam anchaqa kuskaqa huñunakunkuchu, utaq mana allin qawasqam kanku huñunakuspankuqa. Ichaqa Jehova Diospaqwan Jesuspaqa iñiqmasinchikkunawan huk sunqulla kasqanchikqa suma-sumaqmi.

 8. ¿Imatam Jehova Diosqa Ezequielman willarqaña?

⁸ Jehova Diosta yupaychaqkunaqa huk sunqullam kanchik. Jehova Diosmi willakuqnin Ezequielman nirqaña chayna kananchikmanta. Nirqam Juda castapa kaspinwan Josey castapa kaspin hukllawasqa kanankumanta (qaway Ezequiel 37:15-17). 2016 watapa julio killanpim, Willakuq qillqapi lluqsimurqa Leeqkunapa tapukuyninkuna niq yachachikuy. Chaypim nirqa: “Jehova Diosmi Ezequielman willarqa prometesqa allpaman llaqtan kutinanmanta hinaspa huk nacion hina kaqmanta hukllawakunankumanta. Kay willakuyqa cumplikunantaqmi karqa tukupay punchawkunapi Diosta yupaychaqkuna huk nacion hina hukllawakuptinku”, nispa.

 9. Sapa wata Jesuspa wañukusqan punchawta yuyariptinchik, ¿imaynatam Ezequielpa willakusqan sutillata qawakun?

⁹ Jehova Diosmi 1919 watamanta, sumaqta chuyanchaspan hanaq pachaman riqkunata hukllawarqa, paykunaqa karqa Juda castapa kaspin hinam. Chaymanta qipamanmi kay pachapi kawsaqkuna hanaq pachaman riqkunawan hukllawakurqaku. Kay pachapi kawsaqkunaqa tupan Josey castapa kaspinwanmi. Jehova Diosmi nirqa kay iskay kaspikunata ‘hukllaman makinpi huñunanmanta’ (Ezeq. 37:19). Paymi hanaq pachaman riqkunata hinaspa kay pachapi kawsanankupaq qipaqkunata huk kanchallapi hina ‘kanankupaq hukllawarurqa’ (Juan 10:16; Zac. 8:23). Kay punchawkunapas iskayninkum huk sunqulla Jehova Diosta yupaychanku. Paykunapa kamachiqninqa Jesusmi, paymantam Ezequiel qillqapi Jehova Dios nirqa: ‘Serviqniy Davidmi’, nispa (Ezeq. 37:24, 25). Sapa watam huk sunqulla kanankumanta Ezequielpa willakusqan sutillata qawakun, hanaq pachaman riqkunawan kay pachapi kawsanankupaq qipaqkunawan Jesuspa wañukusqan punchawta yuyarinankupaq huñunakuptinku. Ichaqa, ¿imatam sapakama ruwananchik iñiqmasinchikkunawan huk sunqulla kasqanchik mana chinkarunanpaq?

10. ¿Imaynatam yanapakuchwan iñiqmasinchikkunawan huk sunqulla kananchikpaq?

¹⁰ Diospa llaqtanpi huk sunqulla kananchikpaqqa llampu sunqum kananchik. Kay allpa pachapi Jesus kachkaspanmi qatiqninkunata nirqa llampu sunqu kanankupaq (Mat. 23:12). Diosta mana yupaychaq runakunaqa hukkunamantaqa aswan allinpaqmi hapikunku. Ichaqa llampu sunqu kaspaqa iñiqkunapi punta apaqkunatam respetasun hinaspa kasukusun. Chayta ruwaspaqa yanapakusunmi iñiqmasinchikkunawan huk sunqulla kananchikpaq. Llampu sunqu kaspaqa Jehova Diostam kusichisun, payqa “hatun tukuqkunapa contranpim kachkan, ichaqa ancha kuyakuynintam qawachin mana hatun tukuqkunamanqa” (1 Ped. 5:5).

11. ¿Imanasqam huk sunqulla kananchikpaq yanapawanchik tantapiwan vinopi yuyaymanayqa?

¹¹ Diospa llaqtanpi huk sunqulla kananchikpaqqa yuyaymanananchiktaqmi tantawan vino imawan tupasqanpi. Chaypim yuyaymanananchik manaraq chay punchaw chayamuchkaptin hinaspa chay punchaw chayaramuptinpas (1 Cor. 11:23-25). Mana qunchuyuq tantaqa tupanmi mana huchayuq Jesuspa cuerponwan, hinaspa vinoñataq tupan yawarninwan. Ichaqa manam chayllatachu entiendenanchik. Jesuspa wañukusqanqa qawachinmi Jehova Dios hinaspa kikin Jesus anchata kuyawasqanchikta. Jehova Diosqa kuyawasqanchikraykum salvakunanchikpaq churinta qumurqa hinaspa Jesuspas kuyawasqanchikrayku wañurqa. Chayna kuyawasqanchikpi yuyaymanaymi ñuqanchiktapas kallpanchawananchik paykunata kuyananchikpaq. Iñiqmasinchikkuna hinaspa ñuqanchikpas Jehova Diosta kuyasqanchikmi huk sunqulla kananchikpaq yanapawanchik.

12. Sirvienteyuq huk kamachiqmanta rimaspan, ¿imaynatam Jesus qawachirqa iñiqmasinchikkunata pampachananchikta Jehova Dios munasqanta?

¹² Chaymantapas Diospa llaqtanpi huk sunqulla kananchikpaqqa iñiqmasinchikkunatam sunqumanta pampachananchik. Hukkunata pampachaspaqa qawachinchikmi Jehova Diosta agradecekusqanchikta, paypas pampachawanchikmi Jesucristo ñuqanchikpaq wañusqanrayku. Pampachanakuy imanasqa ancha allin kasqanta qawachinanpaqmi Jesusqa willakurqa sirvienteyuq huk kamachiqmanta. Mateo 18:23-34 nisqanta ñawinchaspam tapukunanchik: “¿Kay willakuyqa kallpanchawanchu pampachakuq kanaypaq? ¿Mana chaylla piñakuqchu kani iñiqmasiykunawan? ¿Pampachanichu sientichiwaqniykunata?”, nispa. Wakinpiqa imapas ruwasqankuqa llumpaymi kanman. Chaymantapas pantaq runa kasqanchikraykum sasata pitapas pampachanchik. Ichaqa Jesuspa rimasqanmi qawachin pampachakuq kananchikta Jehova Dios munasqanta (qaway Mateo 18:35). Jesusmi sutillata qawachirqa iñiqmasinchikpa huchanta mana pampachaptinchikqa, Jehova Diospas huchanchikta mana pampachananmanta. Kaypi yuyaymanayqa ancha allinmi. Chaymi Jesusta kasukuspa hinaspa hukkunata pampachaspanchikqa yanapakunchik iñiqmasinchikkunawan huk sunqulla kananchikpaq.

13. ¿Imaynatam iñiqmasinchikkunawan huk sunqulla kananchikpaq yanapakunchik pampachakuq kaspanchik?

¹³ Iñiqmasinchikkunata pampachaspaqa paykunawanmi hawkalla kasunchik. Apostol Pablom nirqa ‘hawkalla kaspa hinaspa chuya espiritupa yanapakuyninwan huk sunqulla kananchikpaq anchata kallpanchakunanchikpaq’ (Efes. 4:3). Jesuspa wañukusqanta yuyarinapaq punchaw manaraq chayamuchkaptin hinaspa chay punchaw chayaramuptinpas, yuyaymanananchikmi iñiqmasinchikkunawan imayna kasqanchikpi utaq imayna rimapayasqanchikta. Tapukunanchikmi: “¿Sutillatachu qawachini imapas ruwasqaywan utaq nisqaywan pampachakuq kasqayta? ¿Llapankuchu musyakunku iñiqmasiykunawan huk sunqulla kanaypaq anchata kallpanchakusqayta?”, nispa. Jesuspa wañukusqanta yuyarinapaq punchawkunapiqa kaykunapim allinta yuyaymanananchik.

14. ¿Imaynatam kuyakuywan aguantanakusqanchikta qawachichwan?

¹⁴ Chaymantapas, Diospa llaqtanpi huk sunqulla kananchikpaqqa Jehova Dios hina kuyakuq kasqanchiktam qawachinanchik (1 Juan 4:8). Manam kaynataqa ninanchikchu: “Yachanim iñiqmasiykunata aguantanaymanta, ichaqa manam llapankutachu kuyanay”, nispaqa. Chaynata piensayqa manam tupanchu Pablopa kayna nisqanwanqa, nirqam: ‘Kuyakuywanyá aguantanakuychik’, nispa (Efes. 4:2). Kaypi nisqanman hinaqa manam nirqachu ‘aguantanakuychik’ nispallanchu, aswanmi nirqa ‘kuyakuywan’ aguantanakunanchikpaq. Jehova Diosqa tukuy rikchaq runatam llaqtanman pusamurqa (Juan 6:44). Payqa imayna sunquyuq kasqankuta yachaspanmi llaqtanman pusamurqa. Hinaptinqa, ¿imanasqataq ñuqanchikqa iñiqmasinchikkunataqa mana kuyachwanchu? Chaynaqa, Jehova Dios kamachiwasqanchikman hinam iñiqmasinchikkunataqa sunqumanta kuyananchik (1 Juan 4:20, 21).

15. ¿Imaynatam yachanchik hamuq tiempopi Jesuspa wañukusqanta manaña yuyarinanchikmanta?

¹⁵ Chayamunqam punchaw Jesuspa wañukusqanta manaña yuyarinanchikpaq. ¿Imaynatam chayta yachanchik? Pablom hanaq pachapaq akllasqakunata nirqa Jesuspa wañukusqanta sapa wata yuyarispanku willakusqankumanta. ¿Haykapikamam yuyarinanku karqa? Pablom nirqa: ‘Señorninchik hamunankamam’, nispa (1 Cor. 11:26). Tukupay punchawkunamanta rimaspanpas Jesusqa nirqam kutimunanmanta utaq hamunanmanta. Llumpa-llumpay ñakariy punchawkunamanta rimaspanmi Jesus nirqa: “Chaymantam cielopi rikurinqa runapa churinpa señalnin, hinaptinmi kay pachapi llapa ayllukuna qaparispanku waqanqaku hinaspam rikunqaku runapa churinta tukuy atiywan hinaspa hatun kanchariywan puyukunapa hawanta hamuchkaqta. Hinaptinmi payqa hatun cornetilla waqaykuptin angelninkunata kachamunqa, paykunañataqmi akllasqakunata huñunqaku kay pachapa tawan lawninmanta, hinaspa hanaq pachapa cantonmanta cantonkama”, nispa (Mat. 24:29-31). Jesusqa ‘akllasqakunatam huñunqa’ kay pachapiraq kaq hanaq pachapaq akllasqakunata pusaspan. Kayqa kanqa llumpa-llumpay ñakariy punchawkunapa qallarisqan qipatam, manaraq Armagedon qallaykuchkaptin. Armagedonpi utaq Diospa piñakuynin punchawpiqa Jesuswan 144.000 akllasqakunam kay pachapi gobiernokunata vencenqaku (Apoc. 17:12-14). Chaynaqa, hanaq pachapaq akllasqakunata Jesus pusakusqan qipataqa manañam Jesuspa wañukusqantaqa yuyarisunchu.

16. ¿Imanasqam kay wata kallpanchakunayki Jesuspa wañukusqanta yuyarinapaq huñunakuyman rinaykipaq?

¹⁶ Chaynaqa, 2018 watapa 31 marzo killanpi Jesuspa wañukusqanta yuyarinanchikpaqyá kallpanchakusun. Hinaspa Jehova Diospa yanapakuyninta mañakusun iñiqmasinchikkunawan huk sunqulla kananchikpaq (qaway Salmo 133:1). Manam qunqananchikchu, chayamunqam punchaw Jesuspa wañukusqanta manaña yuyarinanchikpaq. Chaynaqa, Jesuspa wañukusqan punchawta yuyarispayá iñiqmasinchikkunawan huk sunqulla kasqanchikta chaninchasun.